Xana U Nga Pfuna?
1 Muapostola Pawulo u tsundzuxe swirho swa vandlha leswaku swi “khathalelana hi ndlela leyi fanaka.” (1 Kor. 12:25) Hikwalaho, hi fanele hi kombisana rirhandzu naswona hi tiyimisela ku nyikela mpfuno wa rirhandzu loko wu laveka. Hi xikombiso, vamakwerhu van’wana va xisati va moya lava hi nga na vona va kurisa vana va vona entiyisweni va nga ri na mupfuni. Vamakwerhu lava va xisati va byarha ndzhwalo lowukulu wa vutihlamuleri wa ku letela vana va vona. Entiyisweni va faneriwa hi xikhutazo xa musa ni mpfuno wa hina lowunene “hi ku ya hi swilaveko swa vona.” (Rhom. 12:13a) Xana u nga va pfuna?
2 Tindlela Leti U Nga Va Pfunaka Ha Tona: Ku khandziyisa vanhu lava titshegeke hi ku tirhisa swofamba swa mani na mani emovheni wa wena, u va yisa eminhlanganweni ni le tinhlengeletanweni swi nga pfuna ndyangu wolowo leswaku wu hlayisa mali. Ku pfuna manana la nga ni vana lavatsongo eminhlanganweni swi nga endla leswaku a vuyeriwa swinene hi ku yingisela tinkulumo. Hilaha ku fanaka, ku n’wi pfuna loko a famba ni vana entirhweni wa nsimu swi nga ha n’wi pfuna leswaku a kuma nkarhinyana wa ku wisa. Ku kombisa ka hina leswaku ha va rhandza vana va vona hi timbilu ta hina hinkwato—hi kombisa xinghana eka vona—ku nga va ni nsusumeto lowunene eka vantshwa va hina. Ku rhamba ndyangu wa mutswari un’we leswaku wu va kona edyondzweni ya ndyangu wa ka n’wina nkarhi na nkarhi ku nga phyuphyisa ndyangu wolowo emoyeni.
3 Tirhisa Vutlharhi: Hi fanele hi tivonela leswaku hi nga sindzisi van’wana ku va nyika mpfuno wa hina hambi va nga wu lavi. Naswona a hi fanelanga hi nghenelela etimhakeni ta ndyangu wa munhu yoloye loko hi wu pfuna. Ina, vamakwerhu va xisati ni mimpatswa leyi tekaneke hi vona va nga exiyin’weni lexinene xa ku pfuna makwerhu wa xisati la lavaka mpfuno.
4 Vakreste hinkwavo va khutaziwa ku ‘kombisana malwandla.’ (Rhom. 12:13b) Ku pfuna vamakwerhu va moya hi yin’wana ya tindlela to tala leti hi kombisaka ha tona rirhandzu leri hi nga na rona, leri fanaka ni ra Kreste.—Yoh. 13:35.