“Vavasati Lava Tirhaka Hi Matimba eHosini”
1 Hi marito lama nga laha henhla, Pawulo a a vulavula hi Trayifina na Trayifosa, ku nga vamakwerhu vambirhi va xisati lava a va tirha hi matimba evandlheni ra le Rhoma. Loko a vulavula hi makwerhu un’wana, ku nga Persida u te: “U endle mintirho yo tala eHosini.” U vulavule kahle na hi Febe a ku, i “musirheleli wa lavo tala.” (Rhom. 16:2, 12) EMatsalweni, Dorkasi u hlamuseriwe a ri loyi a nga “ni swiendlo swo tala leswinene naswona a a endla tinyiko to tala ta tintswalo.” (Mint. 9:36) Kunene vavasati vo tano va moya i nkateko lowukulu evandlheni!
2 Xana ha va tlangela vamakwerhu va xisati lava tirhaka hi matimba evandlheni ra ka hina? Va endla ntirho wo tala wo chumayela, va fambisa tidyondzo to tala ta Bibele ni ku pfuna vunyingi bya vanhu lava ha riki vantshwa. Va tlhela va tirhisa nkarhi wo tala va pfuna vana leswaku va endla nhluvuko wa moya. Vavasati lava nga Vakreste va hetisisa xiphemu xa vona hi ku endla leswaku ku va ni moya wa rirhandzu, wa ntsako, wo rhula ni wa ku hiseka evandlheni. Va seketela vanuna va vona ni swirho swin’wana swa ndyangu wa vona hi tindlela to hambana-hambana leswaku swi kota ku endla swo tala entirhweni wa Yehovha.
3 Vamakwerhu Va Xisati Lava Nga eNtirhweni Wa Nkarhi Hinkwawo: Exikarhi ka lava va tirhaka hi matimba eHosini ku ni vamakwerhu va xisati lava nga varhumiwa, lava vo tala va vona va hoxeke xandla eku kuriseni ka ntirho wo chumayela ematikweni mambe. Valanguteri lava famba-fambaka loko va endzele vandlha ro karhi, vasati va vona va khomeka hi vutirheli bya nsimu, va khutaza vamakwerhu vo tala va xisati. Hi nga rivali vamakwerhu va xisati lava nga eBethele, lava endlaka ntirho wo kwetsima va seketela nhlengeletano ya Yehovha. Hikwalaho ka matshalatshala ya vona lawa va ma endlaka hi ku tshembeka leswaku va dzunisa Xikwembu, vamakwerhu va xisati lava nga maphayona ya nkarhi hinkwawo, va pfuna vanhu va magidi leswaku va dyondza ntiyiso.
4 Vavasati lava vo tshembeka va eneriseka ngopfu hi vutomi bya vona bya ku tinyiketela. (1 Tim. 6:6, 8) Swa fanela leswaku hi va ndhundhuzela, hi va khutaza ni ku va seketela.
5 Vavasati lava nga Vakreste i va risima enhlengeletanweni ya Yehovha, naswona va tirha ntirho lowunene lowu vuyerisaka hinkwerhu. A hi hambeteni hi tlangela vavasati lava naswona hi khongelela leswaku Yehovha a va katekisa loko va ri karhi va ‘tirha hi matimba eHosini.’