‘Vavasati Lava Tirhaka Hi Matimba eHosini’
‘Ndzi runguleleni Trifena na Trifosa, vavasati lava tirhaka hi matimba eHosini.’—VARHOMA 16:12.
1. Vutirheli bya Yesu bya le misaveni byi tikombise byi ri mikateko eka vavasati hi ndlela yihi?
VUTIRHELI bya Yesu bya la misaveni hakunene a ku ri mikateko eka vavasati va Vayuda. Ntirho lowu a wu sunguleke a wu ta tisa nchavelelo, ntshembo ni ntikelo lowuntshwa eka vavasati va tinxaka hinkwato. A nga yi yingiselanga mikhuva ya Xiyuda leyi a yi “onha rito ra Xikwembu.” (Matewu 15:6) Yo tala ya mikhuva yoleyo yi onhe malunghelo ya vavasati ya xisekelo lawa va nyikiweke wona hi Xikwembu.
Langutelo Ra Yesu Eka Vavasati
2. Ha yini swi nga ha vuriwaka leswaku ku tshinelela ka Yesu ka vavasati a ku ri ku hundzuka ka minkarhi?
2 Vona ku hambana lokukulu swonghasi loku a ku ri kona exikarhi ka langutelo ra Yesu hi vavasati ni leriya ra varhangeri va vukhongeri va Vayuda! Loko hi tshaha Encyclopaedia Judaica, lava vo hetelela a va xiya vavasati va ri “lava nga ni makwanga, varhandzi va timhaka, lava nga ni vulolo ni mavondzo.” Ku vulavurisana ni wansati a swi nga pfumeleriwi, naswona “a swi yila eka mudyondzi ku vulavula ni wansati endleleni.” (Jerusalem in the Time of Jesus, hi Joachim Jeremias; ringanisa Yohane 4:27.) Swi tele leswi nga vuriwaka hi ku tsan’wiwa ka vavasati hi varhangeri va Vayuda. Kambe leswi swi nga laha henhla swi ta va swi ringanile ku komba leswaku ndlela leyi Yesu a tshineleleke vavasati ha yona, a ku ri ku cinca ka minkarhi hakunene.
3. I swiendlakalo swihi swa le nkarhini wa vutirheli bya Yesu leswi kombaka leswaku a a swi rhandza ku dyondzisa vavasati mintiyiso leyi enteke ya moya?
3 Yesu u nyikela xikombiso lexi hetisekeke xa ndlela leyi vavanuna va nga ha vaka ni vuxaka lebyikulu, kambe lebyi tengeke ni vavasati. A nga vulavulanga na vona ntsena, kambe u va dyondzise ni mintiyiso leyi enteke ya moya. Entiyisweni, munhu wo sungula loyi a paluxeke Vumesiya bya yena erivaleni a ku ri wansati, naswona a a ri wansati wa Musamariya. (Yohane 4:7, 25, 26) Ku tlula kwalaho, mhaka leyi katsaka Marta na Mariya yi swi veka erivaleni leswaku ku hambana ni varhangeri va vukhongeri va Vayuda, Yesu a nga vanga ni ntlhaveko wa leswaku wansati a nga na mfanelo yo sukela timbita ta yena nkarhinyana leswaku a ta kurisa vutivi bya yena bya moya. Eka xiendlakalo xexo, Mariya u “tihlawulele ku averiwa lokunene,” a veka swilo swa moya emahlweni. (Luka 10:38-42) Kambe endzhaku ka tin’hweti ti nga ri tingani, loko makwavo wa vona wa xinuna a file, a ku ri Marta, hayi Mariya, la kombiseke ku chivirika lokukulu eku hlanganiseni ka N’wini. Vona ndlela leyi hi tsakaka ha yona hambi ku ri namuntlha loko hi hlaya ku vulavurisana koloko ka moya loku tsakisaka exikarhi ka Yesu na Marta hi ta ntshembo wo pfuxiwa! (Yohane 11:20-27) Mawaku lunghelo leri Marta a a ri na rona!
Vavasati Lava Tirheleke Yesu
4, 5. Handle ka vaapostola, i vamani lava landzeleke Yesu hi nkarhi wa vutirheli bya yena eGaleliya, naswona va n’wi tirherise ku yini?
4 Nakambe Yesu u amukele ku tirheriwa hi vavasati loko a ri karhi a famba-famba etikweni. Emhakeni ya Evhangeli ya yena, Marka u boxa “vavasati . . . lava a va hamba va landza Yesu ni ku n’wi tirhela loko a ha ri Galeliya.” (Marka 15:40, 41) A va ri vamani vavasati lava, naswona a va n’wi tirherisa ku yini Yesu? A hi ma tivi hinkwawo mavito ya vona, kambe Luka u boxa matsongo kutani a hlamusela ndlela leyi a va tirhela Yesu ha yona.
5 Luka wa tsala: “Endzhaku ka sweswo, Yesu a famba hi miti ni swimitana a ri karhi a vula Rito, a twarisa Evhangeli ya Mfumo wa Xikwembu; lava khume na vambirhi na vona a va ri na yena, ni vavasati van’wana lava ntshunxiweke emimoyeni leyo biha ni le mavabyini, a va ri kona. A va ri va Mariya (loyi a va ku i wa Magadala), loyi mademona ya 7 ma hlongoriweke eka yena, na Yohana, nkata Khuza ndhuna ya Heroda, na Suzana, ni vavasati van’wana lavo tala lava a va tirhisa swa vona ku pfuna Yesu ni vadyondzisiwa va yena.” (Luka 8:1-3) Yesu a a swi tsakela ku landzeleriwa hi vavasati lava ni ku tirhisa swilo swa vona ku enerisa swilaveko swa yena swa nyama ni swa vaapostola va yena.
6. (a) I vamani lava fambeke na Yesu eka riendzo ra yena ro hetelela ro ya eYerusalema? (b) I vamani lava a va yime ekusuhi na Yesu ku kondza loko a fa, naswona van’wana va vona va vuyeriwe hi ndlela yihi? (c) Hi ku ya hi langutelo ra mikhuva ya Xiyuda, i yini lexi xiyekaka hi mhaka leyi nga eka Yohane 20:11-18?
6 Loko Yesu a dlayiwa, “a ku ri ni vavasati lavo tala kwalaho, a va languta va ri kule. A va ri lava va landzeleleke Yesu ni ku n’wi tirhela loko a huma eGaleliya. Exikarhi ka vona, a ku ri na Mariya wa Magadala, na Mariya mana wa Yakobo na Yosefa.” (Matewu 27:55, 56) Xisweswo, vavasati vo tala va ripfumelo a va yime kusuhi na Yesu hi nkarhi wa rifu ra yena. Lexi xiyekaka nakambe i mhaka ya leswaku vavasati a ku ri timbhoni to sungula ta ku pfuxiwa ka yena. (Matewu 28:1-10) Leswi hi swoxe a swi nga tolovelekanga eka mukhuva wa Vayuda, hikuva eka Xiyuda vavasati a va tekiwa va nga faneriwanga hi ku va timbhoni ta le nawini. U ri na leswi emiehleketweni, hlaya Yohane 20:11-18, kutani u ringeta ku anakanya ntlhaveko lowukulu lowu Mariya wa Magadala a faneleke a ve na wona loko N’wini la pfuxiweke a humelele eka yena, a n’wi vitana hi vito rakwe, ni ku n’wi tirhisa tanihi mbhoni ya yena ku ya tivisa vadyondzisiwa va yena leswaku hakunene wa hanya!
Vavasati Lava Tshembekeke Va Vakriste Endzhaku Ka Pentekosta
7, 8. (a) Hi swi tivisa ku yini leswaku vavasati a va ri kona loko ku chuluriwa moya hi Pentekosta? (b) Vavasati va Vakriste va hlanganyerise ku yini eku hangalasiweni ko sungula ka Vukriste?
7 Endzhaku ka loko Yesu a tlhandlukele etilweni, vavasati lava chavaka Xikwembu a va ri kona kun’we ni vaapostola lava tshembekeke ekamareni ra le henhla eYerusalema. (Mintirho 1:12-14) Leswaku a ku ri ni vavasati exikarhi ka lava moya lowo kwetsima wu chululeriweke ehenhla ka vona hi Pentekosta swi le rivaleni. Hikwalaho ka yini? Hikuva loko Petro a hlamusela leswi nga humelela, u tshahe Yoel 2:28-30, leyi hi ku kongoma yi boxaka ‘vana va xisati’ ni ‘vatirheli va xisati’ kumbe ‘mahlonga ya xisati.’ (Mintirho 2:1, 4, 14-18) Kutani vavasati va Vakriste lava totiweke, lava tswariweke hi moya a va ri xiphemu xa bandlha ra Vukriste ku sukela eku sunguleni ka rona.
8 Vavasati va teke xiphemu xa nkoka eku hangalakeni ka Vukriste, hambi leswi a va nga ri nhlayo leyikulu. Mariya, mana wa Marka ni hahani wa Barnaba, u nyikele yindlu ya yena leyi handle ko kanakana a yi ri leyikulu leswaku yi tirhisiwa hi bandlha ra le Yerusalema. (Mintirho 12:12) Naswona u tinyiketele ku endla leswi hi nkarhi lowu a ka ha ku tlhekeka nxaniso ehenhla ka Vakriste. (Mintirho 12:1-5) Vana va mune va vanhwanyana va muevhangeli Filipi va ve ni lunghelo ro va vaprofeta va xisati va Vakriste.—Mintirho 21:9; 1 Vakorinto 12:4, 10.
Langutelo Ra Pawulo Eka Vavasati
9. I xitsundzuxo xihi lexi Pawulo a xi nyikeleke mayelana ni vavasati va Vakriste epapileni ra yena ro sungula leri yaka eka Vakorinto, naswona i nsinya wihi wa nawu wa Xikwembu lowu a a khutazaka vavasati ku wu xixima?
9 Minkarhi yin’wana muapostola Pawulo u hehliwa hi ku venga ni ku nga tshembi vavasati. I ntiyiso, i Pawulo la sindziseke leswaku vavasati va hlayisa swivandla swa vona leswi faneleke exikarhi ka bandlha ra Vukriste. Eku fambisiweni loku tolovelekeke ka swilo, a va nga fanelanga va dyondzisa eminhlanganweni ya bandlha. (1 Vakorinto 14:33-35) Loko wansati a vulavula enhlanganweni, hikwalaho ka leswi Mukriste wa xinuna a nga riki kona, kumbe hikwalaho ka leswi a profetaka ehansi ka nkongomiso wa moya lowo kwetsima, a a fanela ku ambala xo funengeta nhloko. Xifunengelo lexi a ku ri ‘mfungho wa vuhosi,’ xikombiso lexi vonakaka xa leswaku wansati u xixima lunghiselelo ra Xikwembu ra vunhloko.—1 Vakorinto 11:3-6, 10.
10. Van’wana va lumbete Pawulo hi yini, kambe i yini lexi kombaka leswaku ku lumbeta loku i vunwa?
10 Pawulo handle ko kanakana u vone swi fanerile ku tsundzuxa Vakriste vo sungula hi minsinya leyi ya milawu ya le tilweni leswaku ‘swilo hinkwaswo swi ta famba hi ndlela leyinene’ eminhlanganweni ya bandlha. (1 Vakorinto 14:40) Kambe xana leswi swi kombisa leswaku Pawulo a a venga vavasati, hi laha van’wana va vulaka ha kona? Doo, a swi vuli swona. Xana a ku nga ri Pawulo loyi eka ndzima yo hetelela ya papila ra yena leri ri yaka eka Varhoma a rhumeleke marungula lama kufumelaka eka vavasati va kaye va Vakriste? Xana a nga kombisanga ku tlangela lokukulu eka Fobe, Prisca (Prisila), Trifena na Trifosa, loko a vulavula hi vavasati lava vambirhi vo hetelela u ri ‘vavasati lava tirhaka hi matimba eHosini’? (Varhoma 16:1-4, 6, 12, 13, 15) Naswona a ku ri Pawulo la tsaleke ehansi ka ku huhuteriwa a ku: “Hinkwenu lava mi nga khuvuriwa eka Kriste, mi ambarile Kriste. Hikokwalaho, a ku na Muyuda kumbe Mugriki, a ku na hlonga kumbe muntshunxeki, a ku na wanuna kumbe wansati, hikuva hinkwenu mi un’we eka Kriste Yesu.” (Vagalatiya 3:27, 28) Entiyisweni, Pawulo a a rhandza ni ku tlangela vamakwavo va yena va xisati va Vakriste, ku katsa na Lidiya, la kombiseke xikombiso xo amukela vaendzi hi nkarhi wa ku xaniseka.—Mintirho 16:12-15, 40; Vafilipiya 4:2, 3.
Vavasati Lava Tirhaka Hi Matimba Namuntlha
11, 12. (a) Xana Psalma 68:11 yi hetisekisa ku yini namuntlha hi laha ku kongomeke? (b) Hi le ka xiyimo xihi laha vo tala va vamakwerhu wa hina va xisati va tikumaka va ri eka xona, naswona ha yini va lava rirhandzu ni swikhongelo swa hina?
11 Exikarhi ka bandlha ra Vukriste namuntlha, ku na vavasati vo tala va Vakriste lava ‘tirhaka hi matimba eHosini.’ Kahle-kahle, tinhlayo ti kombisa leswaku ‘vavasati lava vulaka mahungu lamanene i vuthu lerikulu,’ va endla xiphemu lexikulu xa vuthu ra Timbhoni leti Yehova a ti tirhisaka enkarhini lowu wa makumu. (Psalma 68:11) Vavasati va Vakriste lava va tirhaka hi matimba va tikumele vito lerinene tanihi leswi va lwelaka ku hetisisa swiphemu swa vona swa ku va vavasati, vamanana, valanguteri va makaya, vawundli kun’we ni ku va vatirheli va Vukriste.
12 Vo tala va vamakwerhu lava vanene va xisati va ni vanuna lava nga pfumeriki. Va fanela ku hlangavetana ni xiyimo lexi, tiawara ta 24 hi siku. Van’wana va lwele ku va vavasati lavanene hi malembe yo tala va ri karhi va ringeta ku fikelela swilaveko swo va malandza lama tshembekeke ya Yehova. A swi nga olovi, kambe va tiyiserile, nkarhi hinkwawo a a va tshemba leswaku ‘vanuna va vona va nga ha kokiwa handle ka rito’ hikwalaho ka mahanyelo ya vona lamanene ya Vukriste. Kutani vona ntsako lowu kumiwaka hi ndyangu hinkwawo loko wanuna wo tano a tsakela! (1 Petro 3:1, 2) Hi nkarhi lowu fanaka, vamakwerhu lava va xisati lava va tshembekeke hakunene va lava rirhandzu ra vumakwerhu ni swikhongelo swa swirho swin’wana swa bandlha. Leswi “moya . . . wa ku olova ni ku rhula” lowu va ringetaka ku wu kombisa wu nga ni “nkoka lowukulu emahlweni ka Xikwembu,” ni ku tshembeka ka vona loku tiyeke i ka nkoka emahlweni ya hina.—1 Petro 3:3-6.
13. Ha yini swi nga ha vuriwaka hi vamakwerhu va hina lava phayonaka leswaku i ‘vavasati lava tirhaka hi matimba eHosini,’ naswona va fanele ku xiyiwa njhani emabandlheni ya vona?
13 Vamakwerhu va xisati lava tirhaka tanihi maphayona, hi ku tiyiseka va nga ha vuriwa lava ‘tirhaka hi matimba eHosini.’ Vo tala va vona va ni makaya, vanuna ni vana lava va fanelaka ku va khathalela, ku engetela eka ntirho wa vona wo chumayela. Van’wana va endla ntirho wa nkarhinyana ku fikelela swilaveko swa vona swa nyama. Hinkwaswo leswi swi lava ku hleleka lokunene, ku tiyimisela, ku phikelela ni ku tirha hi matimba swinene. Vavasati lava va Vakriste va fanele va swi kota ku vona rirhandzu ni nseketelo wa lava xiyimo xa vona xi nga va pfumeleriki ku fikelela tiawara ta maphayona entirhweni wo nyikela vumbhoni.
14. (a) I xikombiso xihi lexinene xa ku phikelela lexi kombisiwaka? (b) Hi vahi vavasati van’wana va Vakriste lava faneleke hi ku bumabumeriwa, naswona hikwalaho ka yini? Boxa swikombiso swin’wana ni swin’wana swa kwalaho.
14 Vavasati van’wana va Vakriste va kombise ku chivirika lokukulu entirhweni wa vona wa vuphayona. Le Canada, Grace Lounsbury u ringete ku phayona ka yena ro sungula hi 1914. U boheke ku tshika ku phayona hi 1918 hikwalaho ka vuvabyi, kambe hi 1924 u tlhelele entirhweni wa nkarhi hinkwawo. Hi nkarhi wa ku tsariwa ka mhaka leyi, wa ha ri enxaxamelweni wa maphayona hambi leswi a nga ni malembe ya 104 hi vukhale! Vamakwerhu vo tala va xisati lava nga varhumiwa, lava hi va-1940 a va leteriwa eka mintlawa yo sungula ya Xikolo xa Bibele xa Gilead xa Watchtower va ha tirha hi ku tshembeka, va ri ensin’wini ya varhumiwa kumbe tanihi swirho swa ndyangu wa Bethele eBrooklyn kumbe rin’wana ra marhavi ya Sosayiti ya Watch Tower. Vavasati lava hinkwavo va Vakriste, ni vamakwerhu hinkwavo va xisati lava tinyiketeleke ntirho wa Bethele, va kombisa moya wa ku tinyiketela naswona i swikombiso leswinene. Xana ha va byela leswaku va tlangeriwa?
Vasati Va Valanguteri Lava Famba-fambaka
15, 16. I ntlawa wihi wa vavasati va Vakriste lowu hi ku hlawuleka wu faneleke hi ku bumabumeriwa hi hina hi rirhandzu, naswona hikwalaho ka yini?
15 Vasati va valanguteri lava famba-fambaka va endla ntlawa wun’wana wa vavasati va Vakriste lava faneriwaka hi ku bumabumeriwa ni ku khutaziwa loku kufumelaka. Vamakwerhu lava va xisati lava rhandzekaka va tiyimisele ku landzela vanuna va vona loko va famba hi bandlha ni bandlha, kumbe xifundza hi xifundza, leswaku va aka vamakwavo va vona emoyeni. Vo tala va vona va titsone ku va ni makaya lama phyuphyisaka; va etlela eka mubedo lowu hambaneke vhiki rin’wana ni rin’wana, naswona a hi mubedo lowunene minkarhi hinkwayo. Kambe va tsaka ku amukela hinkwaswo leswi vamakwerhu va nga swi nyikelaka. I swikombiso leswinene eka vamakwavo va vona va moya.
16 Vavasati lava va Vakriste nakambe va nyika vanuna va vona nseketelo lowunene, tanihi vavasati lava chavaka Xikwembu lava landzeleke Yesu ni ku “n’wi tirhela.” (Marka 15:41) A va swi koti ku heta nkarhi wo leha ni vanuna va vona ntsena, lava nkarhi hinkwawo va ‘nga ni ntirho wo tala eHosini.’ (1 Vakorinto 15:58) Van’wana va vona, vo tanihi Rosa Szumiga wa le Furwa, la ngheneleke ntirho wa nkarhi hinkwawo hi 1948, a a va paka tipusumendhe ta vanuna va vona ni ku famba na vona ku ringana malembe ya 30 kumbe 40. Va tiyimiserile ku endlela Yehova magandzelo ni vamakwavo va vona va xinuna ni va xisati. Va faneriwa hi ku tlangeriwa, rirhandzu, ni swikhongelo swa hina.
Vasati Va Vakulu
17, 18. (a) I timfanelo tihi leti lavekaka eka vasati va vamakwerhu va xinuna lava hlawuleriwaka swiyimo swa ntirho? (b) I ku tinyiketela kwihi loku vasati va vakulu va pfumelaka ku ku endlela Yehova ni vamakwavo va vona, naswona vavasati van’wana va nga va pfunisa ku yini vanuna va vona?
17 Loko a xaxameta timfanelo ta vamakwerhu lava nga ha vekiwaka tanihi vakulu ni malandza ya vutirheli, muapostola Pawulo u boxe ni vavasati, a tsala a ku: “Hi mukhuva wolowo vavasati na vona a va chaviseke, va nga vi na rilumbeto, kambe va dya hi ku pima, va tshembeka eswilweni hinkwaswo.” (1 Timotiya 3:11) I ntiyiso, xitsundzuxo lexi xa ntolovelo xi tirha eka vavasati hinkwavo va Vakriste. Kambe loko hi landzela mongo wa xona, handle ko kanakana xi fanele ku landzeriwa hi ndlela ya xikombiso hi vavasati va vamakwerhu lava hlawuleriweke swiyimo swa ntirho.
18 Lexi tsakisaka, leswi swi tano hi magidi yo tala ya vasati va valanguteri va Vakriste. Va ringanisela eka mahanyelo ni maambalelo ya vona, va hisekela vutomi bya Vukriste, va ni vukheta eka leswi va swi vulaka, naswona va lwela ku va lava tshembekaka eka swilo hinkwaswo. Nakambe va pfumela ku endla ku tinyiketela, va pfumela leswaku vanuna va vona va nyikela nkarhi eka timhaka ta bandlha, nkarhi lowu handle ka swona a wu ta hetiwa na vona. Vavasati lava va Vakriste lava tshembekaka va faneriwa hi rirhandzu ra hina leri kufumelaka ni xikhutazo. Kumbexana vamakwerhu vo tala va xinuna va nga fikelela malunghelo emabandlheni ya hina yo tala loko vasati va vona vo pfumela hi ku titsongahata eku endleni ka ku tinyiketela ko tano leswaku va pfuna hinkwavo.
‘Vavasati Lava Kuleke’ Vo Tshembeka
19. Ha yini ‘vavasati vo tala lava kuleke’ lava nga ni ripfumelo va tlangeriwa swinene emabandlheni ya ka vona, naswona hi fanele ku titwisa ku yini hi vona?
19 Mpfuxeto wa hina wa vavasati lava boxiweke eBibeleni wu hi pfune ku vona leswaku malembe a ma va siveli vavasati va ripfumelo ku tirhela Yehova. Yinhla leyi yi kombisiwile etimhakeni ta Sara, Elizabeta na Ana. Namuntlha ku ni vavasati vo tala va Vakriste lava kuleke hi malembe lava nga swikombiso leswinene swa ripfumelo ni ku tiyisela. Ku engetela kwalaho, hi vutlhari va nga seketela vakulu hi ku pfuna vamakwerhu lavantshwa va xisati. Hi ku tirhisa ntokoto wa vona wa nkarhi wo leha, va nga nyikela xitsundzuxo xa vutlhari eka vavasati lavantshwa, tanihi leswi Matsalwa ya va pfumelelaka ku endla tano. (Tito 2:3-5) Swi nga ha endleka leswaku makwerhu la kuleke na yena nkarhi wun’wana a lava ku tsundzuxiwa. Loko swi ri tano, nkulu la endlaka sweswo u fanele a ‘n’wi khoma tanihi mana wa yena.’ Vakulu va fanele va “xixima tinoni” naswona loko ku ri ni xilaveko va va lulamisela mpfuno wa swilo leswi vonakaka. (1 Timotiya 5:1-3, 5, 9, 10) Vamakwerhu va hina va xisati lava rhandzekaka va fanele va titwa va rhandziwa no tlangeriwa hakunene.
Vafumi Na Kriste
20. I lunghelo rihi lerikulu leri nyikiweke vavasati vo tala va Vakriste, naswona hikwalaho ka yini tinyimpfu tin’wana ti nga tsakaka hi leswi?
20 Matsalwa ya swi veka erivaleni leswaku “Xikwembu a xi yi hi nghohe” malunghana ni rixaka kumbe rimbewu. (Varhoma 2:10, 11; Vagalatiya 3:28) Naswona leswi nakambe i ntiyiso eka ndlela leyi Yehova a hlawulaka lava nga ta hlanganyela kun’we ni N’wana wa yena evulawurini bya Mfumo. (Yohane 6:44) Ntshungu lowukulu wa tinyimpfu tin’wana wu nga va lowu tlangelaka swonghasi leswi vavasati vo tshembeka, vo tanihi Mariya mana wa Yesu, Mariya wa Magadala, Prisila, Trefina, Trafosa ni ntlawa wa van’wana va bandlha ro sungula ra Vukriste, sweswi va hlanganyelaka eku fumeni ka Mfumo, va fuwisa mfumo wolowo hi ku twisisa ka vona lokukulu ka mintlhaveko ni mintokoto ya vavasati! Vona xivono xa le mahlweni ni vutlhari eka Yehova!—Varhoma 11:33-36.
21. Hi titwa njhani namuntlha hi ‘vavasati lava tirhaka hi matimba eHosini’?
21 Hina namuntlha hi nga ha hlanganyela eka mintlhaveko ya muapostola Pawulo loko a vulavule hi rirhandzu ni ku tlangela ‘vavasati lava va lweke na mina eka mahungu lamanene.’ (Vafilipiya 4:3) Hikwato Timbhoni ta Yehova, vavanuna ni vavasati, va swi kuma ku ri ntsako ni lunghelo ku tirhisana ni ‘vandla lerikulu ra vavasati eku vuleni ka mahungu lamanene,’ ina, ‘vavasati lava tirhaka hi matimba eHosini.’—Psalma 68:11; Varhoma 16:12.
Swivutiso Swa Mpfuxeto
◻ Yesu u swi kombise njhani leswaku a a nga hlanganyeli eka xihlawuhlawu xa varhangeri va vukhongeri bya Xiyuda ehenhleni ka vavasati?
◻ Vavasati lava chavaka Xikwembu va n’wi tirhele njhani Yesu, naswona i lunghelo rihi lerikulu leri van’wana va vona va ri amukeleke?
◻ I xitsundzuxo xihi lexi Pawulo a xi nyikeleke mayelana ni vavasati eminhlanganweni ya bandlha?
◻ I vamakwerhu va muxaka wihi va xisati lava faneriwaka hi rirhandzu ra hina leri hlawulekeke ni nseketelo, naswona hikwalaho ka yini?
◻ Xana hi fanele hi titwisa ku yini namuntlha hi hinkwavo lava va nga ‘vavasati lava tirhaka hi matimba eHosini’?
[Xifaniso lexi nga eka tluka 16, 17]
Vavasati va tirhele Yesu ni vaapostola va yena
[Swifaniso leswi nga eka tluka 18]
Vasati va valanguteri lava famba-fambaka ni va vakulu van’wana lava tinyiketeleke va nyikela swinene entirhweni wa Xikwembu