Ku Seketela Ntirho Wa Xikwembu Etikweni Ra Ka N’wina Ni Le Misaveni Hinkwayo

TIMBHONI TA YEHOVHA ti ya emahlweni ti chumayela mahungu lamanene “ku ya fika endhawini ya le kule swinene ya misava,” leswaku ku ta hetiseka vuprofeta bya Yesu malunghana ni masiku lawa ya makumu. (Mint. 1:8; Mat. 24:14) Leswi ti swi endla hi ku tirhisa nkarhi ni matimba ya tona hi ku tirhandzela leswaku ti avelana ni van’wana swilo swa moya. Hikwalaho ko tshembela eka Yehovha leswaku u ta khathalela vanhu lava endlaka ntirho wakwe, ti hambeta ti rhangisa Mfumo wa Xikwembu evuton’wini bya tona. (Mat. 6:25-34; 1 Kor. 3:5-9) Vuyelo bya kona byi swi veka erivaleni leswaku Yehovha wa wu amukela ntirho lowu naswona wa wu katekisa.

KU KHATHALELA NTIRHO WA MFUMO EMISAVENI HINKWAYO

² Loko van’wana va vona tindlela leti hi ti tirhisaka leswaku hi chumayela ni ku xiya leswaku hi fambisa Tibibele ni minkandziyiso leyi sekeriweke eBibeleni handle ko hakerisa vanhu, va tivutisa: “Xana swilo leswi hinkwaswo swi kotekisa ku yini?” I ntiyiso leswaku swi lava mali yo tala ku xava michini yo kandziyisa Tibibele ni minkandziyiso leyi sekeriweke eBibeleni. Swi lava mali yin’wana yo tala ku aka ni ku hlayisa makaya ya Bethele leswaku malandza lama tirhisaka michini yo gandlisa, lama ungamelaka ntirho wo chumayela ni mintirho yin’wana leswaku ntirho wo chumayela mahungu lamanene wu ya emahlweni. Ku engetela kwalaho, valanguteri va miganga, varhumiwa, maphayona yo hlawuleka ni van’wana lava nga eka ntirho wa nkarhi hinkwawo va nyikiwa mali leswaku va ya emahlweni ni ntirho wa vona. Swi le rivaleni leswaku ku seketela ntirho wo chumayela mahungu lamanene enkarhini wa hina, swi koxa mali yo tala ngopfu, ku nga khathariseki leswaku hi le tikweni ra ka hina kumbe ematikweni man’wana. Xana mali yoleyo hinkwayo yi huma kwihi?

³ Vanhu vo tala lava tlangelaka ntirho wo dyondzisa Bibele lowu endliwaka hi Timbhoni ta Yehovha va swi tsakela ku nyikela leswaku va seketela ntirho lowu wa misava hinkwayo. Hambiswiritano, ntirho wa hina wu seketeriwa ngopfu hi Timbhoni, leti tin’wana ta tona ti rhumelaka minyikelo ya ku tirhandzela emarhavini ya Timbhoni ta Yehovha ya le matikweni lawa ti tshamaka eka wona. Ti kombisa moya wa ku tirhandzela lowu fanaka ni wa malandza ya Xikwembu ya khale, lawa minyikelo ya wona ya ku tirhandzela yi seketeleke ku akiwa ka ndhawu leyi Yehovha a a gandzeriwa eka yona. (Eks. 35:20-29; 1 Tikr. 29:9) Hambileswi minyikelo yin’wana yi humaka eka nhundzu leyi kumekaka loko munhu a tsarise leswaku loko a fa nhlangano wu va mudyandzhaka, hi ntolovelo ku va ni minyikelo leyitsongo leyi rhumeriwaka hi vanhu vo hambana-hambana, hi mavandlha ni miganga. Loko minyikelo leyi hinkwayo yi hlanganisiwa, yi kota ku seketela ntirho leswaku wu ya emahlweni.

⁴ Timbhoni ta Yehovha ti swi teka ku ri lunghelo ku tirhisa mali ya tona ni swilo swin’wana swa tona swa risima leswaku ti yisa ntirho wo chumayela emahlweni. Yesu ni vadyondzisiwa vakwe a va ri ni bokisi leri a va hoxa mali leyi a yi hlayisiwa hi xikongomelo xo xava swilo leswi va swi pfumalaka. (Yoh. 13:29) Bibele yi vulavula hi wansati la seketeleke Yesu ni vadyondzisiwa vakwe. (Mar. 15:40, 41; Luka 8:3) Muapostola Pawulo u wu tlangerile swinene mpfuno wa swilo leswi vonakaka lowu a wu huma eka lava a va tsakela ku pfuna leswaku ntirho wo chumayela mahungu lamanene wu ya emahlweni ni lava a va lava ku hlanganyela na yena eka wona. (Filp. 4:14-16; 1 Tes. 2:9) Timbhoni ta Yehovha ti hambeta ti landzela swikombiso leswi swa khale, swa vanhu lava hisekeleke ntirho wo chumayela ni ku va ni moya wa ku hanana. Leswi swi endla leswaku vanhu lava nga ni timbilu letinene va kuma “mati ya vutomi mahala” kun’wana ni kun’wana laha va kumekaka kona.—Nhlav. 22:17.

KU KHATHALELA SWILAVEKO SWA VANDLHA RA KA N’WINA

⁵ Swilo leswi lavaka mali evandlheni ra ka n’wina na swona swi xaviwa hi mali ya minyikelo ya ku tirhandzela. A ku kolekiwi mali naswona munhu a nga byeriwi leswaku u fanele a humesa mali muni kumbe a sindzisiwa ku humesa mali yo karhi. Ku ni mabokisi ya munyikelo laha tinhlengeletano ta vandlha ti khomeriwaka kona leswaku un’wana ni un’wana a nyika “hilaha a boheke hakona embilwini yakwe.”—2 Kor. 9:7.

⁶ Mali leyi nyikeriweke yi tirhiseriwa ku hakela swilo leswi tirhisiwaka eHolweni ya Mfumo ni ku yi lunghisa. Huvo ya vakulu yi nga ha endla xiboho xo rhumela mali yin’wana erhavini ra kwalaho ra Timbhoni ta Yehovha leswaku ntirho wa misava hinkwayo wu ta yisiwa emahlweni. Vandlha ri fanele ri pfumelelana ni xiboho xo tano. Leyi i ndlela yin’wana leyi mavandlha yo tala ma hambetaka ma nyikela ha yona entirhweni wa misava hinkwayo. Nkarhi na nkarhi ku nga ha va ni swilaveko swin’wana, kambe loko hinkwerhu hi tiva swilaveko swa vandlha, a swi nge kali swi lava leswaku hi hambeta hi tsundzuxiwa leswaku hi humesa minyikelo.

NDLELA YO TAMELA MINYIKELO

⁷ Endzhaku ka nhlengeletano yin’wana ni yin’wana ya vandlha, vamakwerhu vambirhi va humesa mali hinkwayo leyi hoxiweke emabokisini ya minyikelo kutani va yi tsala ehansi. (2 Tih. 12:9, 10; 2 Kor. 8:20) Huvo ya vakulu yi ta endla malunghiselelo lama faneleke yo hlayisa mali leyi kukondza yi rhumeriwa erhavini kumbe yi tirhisiwa eka swilaveko swa vandlha. Makwerhu la tamelaka mali ya vandlha u lunghiselela xiviko xa n’hweti ni n’hweti kutani a tivisa vandlha ndlela leyi mali yi tirhisiweke ha yona, kasi endzhaku ka tin’hweti tin’wana ni tin’wana tinharhu, muhlanganisi wa huvo ya vakulu u hlela leswaku ku kambisisiwa mali ya vandlha.

MALI LEYI TIRHISIWAKA ETINHLENGELETANWENI TA MUGANGA

⁸ Timbhoni leti vumbaka muganga wolowo hi tona ti humesaka mali leyi lavekaka leswaku ku khomiwa tinhlengeletano swin’we ni timali tin’wana leti lavekaka eka muganga wolowo. Ku ni mabokisi ya minyikelo etindhawini ta tinhlengeletano leswaku muganga wu kota ku hlengeleta minyikelo ya ku tirhandzela. Ku engetela kwalaho, mavandlha ma nga ha humesa minyikelo minkarhi yin’wana ku hakelela swikoxo leswi nga ha vaka kona.

⁹ Hakanyingi, miganga yi fanele yi kota ku tihakelela swikoxo swa yona ivi mali leyi salaka yi nyikeriwa eka ntirho wa misava hinkwayo. Loko ku nga ri na mali leyi ringaneke eka akhawunti ya muganga leswaku ku hakeriwa leswi nga ta tirhisiwa eka nhlengeletano yoleyo kumbe leswaku ku hakeleriwa swikoxo swa nhlengeletano leyi landzelaka, ku fana ni ku hirha ndhawu ya nhlengeletano, mulanguteri wa muganga a nga ha tsundzuxa mavandlha hi lunghelo leri ma nga na rona ro nyikela. Huvo ha yin’we ya vakulu yi ta bula hi mhaka leyi kutani yi vona leswaku vandlha ri nga nyikela hi mali muni eka muganga. Vandlha ri ta endla xiboho xa leswaku ri ta nyikela hi mali muni.

¹⁰ Loko ku va ni swiyimo swa timali leswi lavaka vakulu va muganga, vakulu va muganga wolowo va ta va ni nhlengeletano hi siku ra nhlengeletano ya muganga. Swiboho hinkwaswo leswi nga ta endliwa handle ka leswi katsaka mali ya swilaveko swa nkarhi ni nkarhi swa muganga, swi fanele swi tekiwa tanihi swiboho leswi endliweke hi vakulu. Swiboho leswi swi fanele swi tsariwa handle ka leswi katsaka timali leti tshamaka ti ri karhi ti hakelela swilo leswi tirhisiwaka nkarhi na nkarhi. Swiboho sweswo swi fanele swi ri swa mali ya ntsengo lowu kongomeke naswona ku fanele ku kumiwa mpfumelelo nkarhi wun’wana ni wun’wana loko ku tirhisiwa mali ya muganga.

¹¹ Tiakhawunti ta muganga ta kamberiwa endzhaku ka nkarhi wo karhi.

KU KHATHALELA SWISIWANA

¹² Ntirho wun’wana wa mali leyi a yi hoxiwa ebokisini leri a ri tameriwa hi Yesu ni vadyondzisiwa vakwe a ku ri ku pfuna swisiwana. (Mar. 14:3-5; Yoh. 13:29) Ninamuntlha Vakreste va ha ri ni vutihlamuleri byebyo, hikuva Yesu u te: “Swisiwana mi tshama mi ri na swona nkarhi hinkwawo.” (Mar. 14:7) Xana Timbhoni ta Yehovha ti va pfuna njhani lava nga swisiwana namuntlha?

¹³ Minkarhi yin’wana, vanhu vo tshembeka evandlheni va nga lava ku pfuniwa hi swilo leswi vonakaka hikwalaho ka leswi va dyuhaleke, va lamaleke kumbe hikwalaho ka xiyimo xo tika lexi va nga swi kotiki ku xi balekela. Swirho swa ndyangu, maxaka ni van’wana lava tivaka xilaveko xo tano va nga ha susumeteleka ku pfuna. Leswi swi pfumelelana ni marito ya muapostola Yohane, lama nge: “Mani na mani la nga ni swa ku hanya ha swona swa misava leyi kutani a vona makwavo a pfumala kambe a swinya a nga n’wi kombi ntsetselelo wakwe lowukulu, xana rirhandzu ra Xikwembu ri tshamisisa ku yini eka yena? Vana lavatsongo, a hi veni ni rirhandzu, ku nga ri hi marito kumbe ririmi, kambe hi swiendlo ni ntiyiso.” (1 Yoh. 3:17, 18; 2 Tes 3:6-12) Vugandzeri bya ntiyiso byi katsa ku khathalela lava tshembekaka lava swi nga endlekaka va lava ku pfuniwa hi swilo leswi vonakaka.—Yak. 1:27; 2:14-17.

¹⁴ Eka papila rakwe ro sungula leri a ri tsaleleke Timotiya, muapostola Pawulo u hlamusele ndlela leyi vanhu lava pfumalaka va nga pfuniwaka ha yona hi swilo leswi vonakaka. U nga hlaya xitsundzuxo xakwe eka 1 Timotiya 5:3-21. Mukreste ha un’we u ni vutihlamuleri lebyikulu byo khathalela swilaveko swa vandyangu wakwe. Lava dyuhaleke kumbe lava vabyaka va fanele va wundliwa hi vana va vona, vatukulu kumbe maxaka ya vona. Minkarhi yin’wana mfumo kumbe mihlangano yo pfuna vaakatiko yi pfuna vadyuhari ni vanhu lava vabyaka hi mali, kutani maxaka kumbe van’wana va nga ha pfuna lava sweleke leswaku va endla xikombelo xa mpfuno wo tano. Ku nga ha va ni xiyimo lexi nga lavaka leswaku swirho hinkwaswo swa vandlha swi pfuna vamakwerhu lava sweleke, lava nga ni nkarhi wo leha va ri karhi va tirhela Yehovha hi ku tshembeka. Loko vamakwerhu volavo va nga ri na swirho swa ndyangu kumbe maxaka lama nga va pfunaka naswona ku nga ri na mpfuno lowu nga kumekaka eka mfumo kumbe eka mihlangano yo pfuna vaakatiko, huvo ya vakulu yi nga ha ringanyeta ndlela leyi va nga pfuniwaka ha yona. Vakreste va swi teka ku ri lunghelo ku pfuna vamakwerhu vo tano hi swilo leswi vonakaka.

¹⁵ Vamakwerhu vo tala va nga ha va evuswetini hikwalaho ko xanisiwa, tinyimpi, ku tsekatseka ka misava, tindhambhi, ndlala kumbe makhombo man’wana lama endlekaka eminkarhini leyi ya mangava. (Mat. 24:7-9) Swi nga endleka leswaku mavandlha ya kwalaho ma nga ri na nchumu lowu ma nga pfunanaka ha wona, kutani Huvo leyi Fumaka yi endla malunghiselelo ya leswaku lava pfumalaka va phalariwa hi vamakwerhu va le matikweni man’wana. Sweswo swi fana ni ndlela leyi Vakreste va le Asia Minor va va nyikeke ha yona swakudya vamakwavo va le Yudiya loko va hlaseriwe hi ndlala leyikulu. (1 Kor. 16:1-4; 2 Kor. 9:1-5) Hi ku landzela xikombiso xa vona, hi kombisa vamakwerhu leswaku ha va rhandza naswona hi tiyisekisa leswaku hakunene hi vadyondzisiwa va Yesu Kreste.—Yoh. 13:35.

KU FAMBISA MINKANDZIYISO

¹⁶ Tibibele ni minkandziyiso leyi sekeriweke eBibeleni swi hoxa xandla swinene eku chumayeriweni ka rungula ra Mfumo. Hi ntolovelo huvo ya vakulu yi avela nandza wa vutirheli leswaku a khathalela mphakelo wa vandlha wa minkandziyiso. Vamakwerhu lava averiweke ku khathalela minkandziyiso leyi a va byi tekeli ehansi vutihlamuleri bya vona. Va yi tsala ehansi minkandziyiso leyi leswaku ku va ni minkandziyiso leyi eneleke leyi nga ta tirhisiwa hi vandlha.

¹⁷ Tanihi Vakreste lava tinyiketeleke, ha swi tiva leswaku nkarhi wa hina, vutlhari ni matimba ya hina, vuswikoti bya hina ni rifuwo ra hina, hambi ku ri vutomi bya hina, i nyiko leyi humaka eka Xikwembu kutani hi tiyimisele ku swi tirhisa entirhweni wa xona. (Luka 17:10; 1 Kor. 4:7) Hi ku ri tirhisa kahle rifuwo ra hina, hi kombisa leswaku hi n’wi rhandza hi mbilu hinkwayo Yehovha. Hi navela ku dzunisa Yehovha hi swilo swa hina swa risima, hi ri karhi hi tiva leswaku u tsakela nyiko yin’wana ni yin’wana leyi hi kombisaka ha yona leswaku hi tinyiketele eka yena hi mbilu hinkwayo. (Swiv. 3:9; Mar. 14:3-9; Luka 21:1-4; Kol. 3:23, 24) Yesu u te: “Mi amukele mahala, nyikani mahala.” (Mat. 10:8) Loko hi ri karhi hi tinyiketela ni ku nyikela hi rifuwo ra hina entirhweni wa Yehovha hi ta kuma ntsako lowukulu.—Mint. 20:35.