Ku Seketeriwa Hi Swa Timali Hi Minyikelo Ya Ku Tirhandzela

Hinkwawo ntirho lowu hlamuseriweke wu seketeriwa hi vatirhi va ku tirhandzela, xisweswo swi hunguta ku durha. Ntirho wa yindlu na yindlu ni ku hangalasiwa ka tibuku ku endliwa hi ku tirhandzela hi Timbhoni ta Yehova. Va tihakelela mali leyi va yi tirhisaka. Vakulu lava fambisaka mabandlha, lava pfuniwaka hi malandza ya vutirheli, a va kumi hakelo ya mintirho ya vona. Va tihakelela vona vini.

Hambi ku ri swirho swa Huvo leyi Fumaka ni hinkwavo van’wana lava tirhaka nkarhi hinkwawo eku lunghiseleleni ni le ku humesiweni ka Tibibele ni tibuku ta Bibele va kuma ntsena yindlu ya vona ni swakudya ni xipfuno lexintsongo xo pfuneta leswi va swi pfumalaka. Swi tano na hi valanguteri lava famba-fambaka va nkarhi hinkwawo.

Tibuku ta hina ti kandziyisiwa leswaku ti pfuna vanhu lava tsakelaka Bibele. Minxavo ya swixavaxavana, ku kandziyisa ni ku rhumeriwa ka tibuku yi hakeleriwa hi minyikelo ya ku tirhandzela leyi endliwaka hi vanhu lava tsakelaka naswona yi seketeriwa hi minyikelo, hi swiboho swo nyikela swo karhi, leswi endliwaka hi Timbhoni ta Yehovha.

Eka minhlangano hinkwayo ya Timbhoni ta Yehova, hambi hi le bandlheni kumbe etinhlengeletanweni, ku na mabokisi ya minyikelo lama kumekaka eka lava navelaka ku endla minyikelo. Ku hava minhlengo leyi tekiwaka. A ku na mindzuvo kumbe vukhume lebyi faneleke ku hakeriwa. Tanihi loko swi tsariwile eMatsalweni, un’wana ni un’wana u nyikela leswi a swi ringaniseke embilwini yakwe.—2 Vakorinto 8:12; 9:7.

• Xana ntirho hinkwawo wa Timbhoni ta Yehova wu seketeriwa hi ndlela yihi hi swa timali?