Ku Tlangela Minkandziyiso Ya Hina

¹ “Ku endliwa ka tibuku to tala a ku heli.” (Ekl. 12:12) Tibuku to tala leti kandziyisiwaka a hi ta nkoka. Hambiswiritano, a swi tano hi minkandziyiso ya Timbhoni ta Yehovha. Yona i ya nkoka hikuva yi tamele swakudya swa moya leswi ponisaka vutomi. Yi pfuna vanhu lava tsakelaka leswaku va tiva Yehovha, naswona yi tiyisa ripfumelo ra lava ana se va nga malandza ya Yehovha lama tinyiketeleke.

² Hi rhandza ku fambisela vanhu minkandziyiso ya hina, tanihi leswi yi nga va pfunaka. Hambileswi hi yi fambisaka handle ko hakerisa vanhu, ku kandziyisiwa ni ku hangalasiwa ka yona swi lava mali. Hikwalaho, a hi lavi ku yi haxa kunene minkandziyiso ya hina. Loko swi nga tikombi kahle leswaku n’wini wa muti wa tsakela kumbe e-e, hakanyingi hi n’wi siyela magazini wa Xihondzo xo Rindza ni wa Xalamuka! kumbexana hi n’wi siyela xiphephana. Hi fanele hi tlhelela eka hinkwavo lava amukeleke minkandziyiso ya hina, naswona loko va kombisa ku tsakela hi nkarhi wolowo, hi kona hi nga va nyikaka nkandziyiso wun’wana.

³ Van’wana va chava ku byela vini va muti leswaku ntirho wa hina wu seketeriwa hi minyikelo ya ku tirhandzela, kambe hakanyingi swa antswa leswaku hi va byela. Leswi swi pfuna n’wini wa muti ku vona leswaku ntirho wa hina a hi bindzu. Swi kombisa kahle leswaku xikongomelo-nkulu xa hina i ku chumayela mahungu lamanene ya Mfumo ni ku endla vadyondzisiwa. Swi hi pfuna ku vona vanhu lava tsakelaka hakunene. Hakanyingi vanhu va na yona mali yo xava mafole ni tibuku ta misava. Loko va swi tsakela hakunene leswi u va byeleke swona, va ta namba va swi vona leswaku swi fanerile ku seketela ntirho wa Vukreste bya ntiyiso hi ku nyikela hi mali. Loko hi hlamusela ndlela leyi ntirho lowu wu seketeriwaka ha yona, hi ta va hi kombisa leswaku minkandziyiso ya hina hi yi teka yi ri ya nkoka. Hi ta va hi kombisa leswaku ha swi lemuka leswaku ku endla minkandziyiso yo tano swi lava mali.

⁴ Loko mhaka ya minyikelo yi hlamuseriwa kahle, hakanyingi vini va muti va tsakela ku hoxa xandla entirhweni wa hina wa nkoka. Minkarhi yin’wana u nga vona swi nga fanelanga ku boxa mhaka ya minyikelo, kambe hakanyingi swa antswa ku boxa mhaka leyi eka riendzo ro sungula, loko n’wini wa muti a tsakela ku hlaya nkandziyiso lowu u wu fambisaka.