Bokisi Ra Swivutiso

◼ Hi nga swi vona njhani loko swi fanerile ku siyela munhu minkandziyiso?

Nchumu wa nkoka lowu hi faneleke hi wu xiya hiloko munhu a tsakela. Loko a kombisa ku tsakela ka xiviri, hi nga n’wi siyela timagazini timbirhi, broxara ni buku kumbe nkandziyiso wun’wana lowu hi wu fambisaka. Leswi i ntiyiso hambiloko hi xiya leswaku u ni mali yitsongo kumbe a nga na mali yo nyikela eka ntirho wa misava hinkwayo. (Yobo 34:19; Nhlav. 22:17) Hi hala tlhelo, a hi lavi ku siya minkandziyiso ya hina ya risima ni vanhu lava nga yi tsakeriki.—Mat. 7:6.

Xana n’wini wa muti a nga swi kombisa njhani leswaku wa tsakela? Ku va a bula na hina i vumbhoni bya leswaku wa tsakela. Ku rhiya ndleve loko hi vulavula, ku hlamula swivutiso ni ku phofula vonelo rakwe swi kombisa leswaku wa katseka ebulwini. Ku va a fambisana na hina loko hi ri karhi hi hlaya eBibeleni swi kombisa leswaku wa ri xixima Rito ra Xikwembu. Hakanyingi, swa pfuna ku n’wi vutisa loko a ta wu hlaya nkandziyiso lowu hi n’wi nyikaka wona. Vahuweleri va fanele va kota ku xiya loko munhu a tsakela. Hi xikombiso, loko hi endla ntirho wa le xitarateni a hi xikolokolo leswaku hi nyika munhu un’wana ni un’wana la hundzuka timagazini, tibroxara kumbe tibuku. Loko hi nga swi koti ku vona loko munhu a tsakela, swi nga va swinene leswaku hi n’wi nyika xiphephana.

Hilaha ku fanaka, nhlayo ya minkandziyiso leyi muhuweleri a yi kumaka eka khawuntara ku fanele ku va leyi a yi lavaka leswaku a hetisisa vutirheli byakwe, ku nga ri vuswikoti byakwe byo nyikela. Minyikelo a hi ya ku hakela minkandziyiso kambe i ya ku seketela swiyenge hinkwaswo swa ntirho wa hina wa misava hinkwayo. Ku nga khathariseki swiyimo swa hina swa mali, ku tlangela swi nga hi susumetela leswaku hi nyika hilaha ku engetelekeke hilaha hi lavaka hakona, ku nga ri eka leyi saleke leswaku hi seketela timhaka ta Mfumo. (Mar. 12:41-44; 2 Kor. 9:7) Nakambe swi ta hi susumetela ku teka minkandziyiso leyi hi yi lavaka ntsena, xisweswo hi nga tlangisi mali leyi nyikeriweke eka ntirho wa Xikwembu.

[Marito lama tshahiweke exihlokweni lama nga eka tluka 2]

Vahuweleri va fanele va kota ku xiya loko munhu a tsakela