Ku Fambisa Tibuku eNsin’wini Leyi Nga Ni Tindzimi To Tala

1. Ha yini mavandlha yo tala ma lava tibuku ta tindzimi timbe?

¹ Etindhawini to tala, nsimu yi sungula ku va ni vanhu lava humaka ematikweni man’wana. Vo tala va vona va dyondza hi ku hatlisa ni ku twisisa ku antswa loko va dyondzisiwa hi ririmi ra ka vona. Hi wahi malunghiselelo lama nga kona yo nyika vanhu lava tsakelaka tibuku leti sekeriweke eBibeleni hi ririmi leri va ri twisisaka ku antswa?

2. Hi wihi ntirhisano lowu lavekaka loko mavandlha mambirhi kumbe ku tlula lama vulavulaka tindzimi to hambana, ma tirha nsimu yin’we?

² Nkarhi Wo Fambisa Tibuku: Loko vandlha rin’we kumbe mambirhi lama tirhaka nsimu yin’we, ma vulavula tindzimi leti hambaneke, tihuvo ta vakulu ti fanele ti vulavurisana ni valanguteri va ntirho leswaku va endla malunghiselelo lama fanelekelaka leswaku vanhu va tindzimi hinkwato va ta kota ku chumayeriwa kahle. Loko mi chumayela hi yindlu ni yindlu, mi nyikela vumbhoni hi xitshuketa kumbe mi chumayela etindhawini ta mani na mani, fambisani tibuku hi tindzimi leti tirhisiwaka endhawini yoleyo.

3. Hi rini laha vandlha ri nga hlayisaka tibuku ta ririmi rimbe?

³ Ku Va Ni Tibuku eXitokweni: Xana ku nga endliwa yini loko endhawini yo karhi ku ri ni vanhu vo hlaya lava vulavulaka ririmi rimbe kambe ku nga ri na vandlha leri tirhisaka ririmi rero? Eka swiyimo swo tano, vandlha ri nga hlayisa nhlayo yitsongo ya tibuku ta xisekelo leti kumekaka hi ririmi rero, to fana ni swiphephana, broxara leyi nge I Yini Leswi Xi Swi Languteleke ni leyi nge Munghana Wa Xikwembu ni buku leyi nge Vutivi. Vahuweleri va nga fambisa tibuku leti loko va hlangana ni vanhu lava kotaka ku hlaya ririmi rero.

4. Xana ti nga kumiwa njhani tibuku ta ririmi leri vandlha ri nga ti hlayisiki?

⁴ Ndlela Leyi Tibuku Ti Nga Odiwaka Ha Yona: Loko vandlha ri nga ti hlayisi tibuku ta ririmi leri munhu la tsakelaka a hlayaka rona, xana ti nga kumiwa njhani tibuku ta ririmi rero? Muhuweleri u fanele a vulavurisana ni mukhomi wa tibuku, ku vona leswaku hi tihi tibuku leti nga kona hi ririmi rero leswaku tibuku leti lavekaka ti ta odiwa loko vandlha ri ta oda tibuku enkarhini lowu taka.

5. Xana ku nga endliwa yini loko tibuku to karhi ti laveka hi xihatla?

⁵ Loko tibuku leti ti laveka hi xihatla, muhuweleri a nga vutisa xirho xa Komiti ya Ntirho ya Vandlha loko xikombelo xexo xi nga fambisiwa ku nga si fambisiwa xikombelo xa vandlha lexi landzelaka. Loko leswi swi amukeriwile, mupfuni wa mukhomi wa tibuku kumbe un’wana loyi a komberiweke hi yena a nga tivisa hofisi ya rhavi hi ku hatlisa hi ku rhumela xikombelo hi poso kumbe hi ku ba riqingho. Tibuku ti ta rhumeriwa eka adirese ya vandlha ya ntolovelo kumbe ya nkarhinyana, loko va lava sweswo.

6. Hi xihi xikongomelo xa hina xo endla leswaku tibuku ta Vukreste ti kumeka?

⁶ Onge hi nga ti tirhisa hi ndlela leyi vuyerisaka tibuku ta Vukreste leswaku hi pfuna “vanhu va mixaka hinkwayo,” ku nga khathariseki ririmi ra vona, leswaku ‘va fikelela vutivi lebyi kongomeke bya ntiyiso ni ku ponisiwa.’—1Tim. 2:3, 4.