Ku Chumayela Vanhu Lava Vulavulaka Ririmi Rimbe

1. Loko hi tirha nsimu leyi hi averiweke yona, i yini leswi hi hlanganaka na swona?

¹ Yesu Kreste u profete leswaku mahungu lamanene ma ta chumayeriwa emisaveni hinkwayo leswaku ma va “vumbhoni ematikweni hinkwawo.” Un’wana ni un’wana loyi a hlanganyelaka entirhweni wo chumayela ni ku dyondzisa wa swi tiva leswaku i ya nkoka ku fikela kwihi marito wolawo. (Mat. 24:14; 28:19, 20) Loko hi ri karhi hi chumayela ni ku endla vadyondzisiwa, hi nga ha hlangana ni vanhu va tinxaka to hambana-hambana lava vulavulaka ririmi rimbe. Vanhu volavo na vona va fanele va twa rungula ra Mfumo kutani va yima va tiya entiyisweni siku ra Yehovha leri chavisaka ri nga si fika. (Mal. 3:18) Hi nga va pfuna njhani vanhu lava vulavulaka ririmi rimbe ensin’wini ya hina?

2. Loko hi chumayela vanhu lava vulavulaka ririmi rimbe, hi va hi tekelela Yehovha hi ndlela yihi?

² Vana Ni Langutelo Ra Yehovha Hi Vanhu Lava Vulavulaka Ririmi Rimbe: Leswaku hi kombisa rirhandzu ra Yehovha eka vanhu hinkwavo lava hi hlanganaka na vona ensin’wini ya hina handle ko ya hi nghohe, hi fanele hi swi navela hi timbilu ta hina hinkwato ku pfuna vanhu leswaku va kuma vutivi bya ntiyiso malunghana ni Xikwembu xa ntiyiso Yehovha, ku nga khathariseki ririmi leri va ri vulavulaka. (Ps. 83:18; Mint. 10:34, 35) Hambileswi loko hi ri ensin’wini hi lavaka ngopfu vanhu lava vulavulaka ririmi leri hi ri tirhisaka evandlheni ra hina, hi fanele hi khathala hi swilaveko swa vanhu lava vulavulaka ririmi rimbe naswona hi lava tindlela leti hi nga ti tirhisaka leswaku hi va byela hi rungula ra Mfumo wa Xikwembu. Ku va honisa swi ta va swi nga pfumelelani ni xikongomelo xa Yehovha xo chumayela vanhu va matiko hinkwawo. Kutani hi nga va pfuna njhani vanhu volavo?

3. Hi xihi xi tirhisiwa lexi hi lunghiseleriweke xona, naswona i yini leswi hi nga swi endlaka leswaku hi lunghekela ku xi tirhisa?

³ Tirhisa Xibukwana Lexi Nge Good News for People of All Nations: Xibukwana lexi xi endleriwe leswaku hi ta xi tirhisa loko hi hlangana ni vanhu lava vulavulaka ririmi leri hi nga ri tiviki. Tshama u ri na xona, xi tolovele naswona u lunghekela ku xi tirhisa. Fungha tindzimi leti mi talaka ku hlangana na tona ensin’wini ya n’wina leswaku u ta hatla u tikuma loko u ti lava. Loko minkandziyiso ya tindzimi leti hi nga ti tiviki yi ri kona, swi nga va swinene ku va ni yin’wana ya yona leswaku u ta yi fambisela vanhu vo tano endzhaku ka loko va hlaye xibukwana lexi.

4. Hi nga xi tirhisa njhani xibukwana lexi nge Good News for People of All Nations ensin’wini ya hina?

⁴ Loko u hlangana ni munhu loyi a vulavulaka ririmi rimbe ensin’wini ya n’wina naswona u nga tiyiseki leswaku u tirhisa ririmi rihi, sungula hi ku n’wi komba xifunengeto xa xibukwana xexo. N’wi kombe xifunengeto xa le ndzeni lexi nga ni mepe wa misava hinkwayo kutani u n’wi komba tiko leri u tshamaka eka rona. N’wi kombele a ku komba emepeni leswaku yena u huma kwihi naswona hi rihi ririmi rakwe. Loko se a ku byerile, pfula nxaxamelo wa leswi nga endzeni leswaku u kuma tluka leri faneleke ra ririmi rakwe kutani u n’wi komba xivulwa xo sungula eka tluka rero lexi nga tsariwa hi marito yo dzwihala. N’wi kombele leswaku a hlaya rungula rero. Loko a heta, n’wi fambisele xiphephana hi ririmi rakwe kutani u n’wi komba xivulwa lexi nga ni muvala wo kwalala, lexi kombisaka leswaku u ta tsakela ku tlhela u vuya naswona u ta n’wi khomela nkandziyiso hi ririmi rakwe. Endzhaku ka sweswo, n’wi kombe xiga lexi tsariweke hi marito yo dzwihala lexi nge “vito ra mina,” kutani u n’wi byela vito ra wena. Tlhela u n’wi komba ni lexi nge “vito ra wena” lexi na xona xi tsariweke hi marito yo dzwihala kutani u yimela nhlamulo yakwe. Endla malunghiselelo ya leswaku u tlhela u vuya.

5. I yini swin’wana leswi hi nga swi endlaka ku kombisa leswaku ha khathala hi vanhu lava kombiseke ku tsakela kambe va vulavulaka ririmi rimbe?

⁵ Malunghiselelo Ya Leswaku U Tlhela U Vuya: Hi fanele hi tikarhatela ku tlhelela eka vanhu lava kombiseke ku tsakela rungula ra Mfumo, ku nga khathariseki ririmi leri va ri tirhisaka. Loko hi swi vona leswaku munhu loyi hi nga hlangana na yena u rhandza Xikwembu ni Rito ra xona ku nga Bibele, hi fanele hi tata fomo leyi nge Please Follow Up (S-43) kutani hi yi nyika matsalana wa vandlha leswaku yena a yi rhumela erhavini, ku endlela leswaku munhu yoloye a ta endzeriwa hi muhuweleri loyi a vulavulaka ririmi rakwe. Rhavi ri ta rhumela fomo yoleyo eka ntlawa lowu vulavulaka ririmi rero. Loko fomo yoleyo yi fika, munhu yoloye u ta endzeriwa hi ku hatlisa. Matsalana a nga ha endla kopi ya fomo yoleyo kutani a yi nyika mulanguteri wa ntirho, ku endlela leswaku a swi tiva leswaku ku ni ntlawa wa ririmi ro karhi lowu kombiseke ku tsakela. Fomo leyi yi fanele yi tsariwa ntsena loko munhu a tsakela.

6. Loko hi hlangana ni munhu loyi a kombiseke ku tsakela kambe a vulavulaka ririmi rimbe, hi byihi vutihlamuleri lebyi hi nga na byona?

⁶ Ku nga ha hundza nkarhinyana wo leha munhu loyi a kombiseke ku tsakela a nga si endzeriwa hi muhuweleri loyi a vulavulaka ririmi rakwe endzhaku ka loko ku rhumeriwe fomo ya S-43. Kutani leswaku munhu yoloye a tshama a ri karhi a tsakela, muhuweleri loyi a nga rhumela fomo ya S-43, a nga ha tshama a ri karhi a n’wi endzela leswaku a hlakulela ku tsakela loku munhu yoloye a ku kombiseke ku fikela loko a endzeriwa hi muhuweleri loyi a vulavulaka ririmi rakwe. Loko swi koteka, munhu yoloye a nga ha fambiseriwa dyondzo ya Bibele. Loko muhuweleri a ha rindzele leswaku munhu yoloye a endzeriwa hi muhuweleri loyi a vulavulaka ririmi rakwe, xana a nga yi kumisa ku yini minkandziyiso hi ririmi ra munhu yoloye?

7. Hi rihi lunghiselelo leri hi nga na rona ro kuma minkandziyiso hi ririmi ra vanhu lava tsakelaka lava hi hlanganaka na vona?

⁷ Minkandziyiso Hi Tindzimi Tin’wana: Mavandlha a ma fanelanga ma va ni minkandziyiso yo tala hi tindzimi leti tirhisiwaka hi vanhu vatsongo ensin’wini ya wona. Kambe loko ku ri leswaku mulanguteri wa ntirho u xiye leswaku ku ni vanhu lava tsakelaka lava vulavulaka ririmi rimbe, a nga ha vona swi fanerile leswaku mi va ni minkandziyiso yi nga ri yingani hi ririmi rero leswaku vahuweleri va ta yi tirhisa. Loko yi nga ri kona evandlheni, ku nga ha endliwa xikombelo xa yona. Swi nga ha endleka leswaku yi hlwela ku fika. Kambe ku nga endliwa tikopi ta yona eka www.watchtower.org. Ku ni minkandziyiso yo tala leyi kumekaka hi tindzimi ta madzana leti nga kopiwaka hi muhuweleri kumbe munhu yoloye la tsakelaka. A swi kanakanisi leswaku lunghiselelo leri ri ta hi pfuna leswaku hi hlakulela ku tsakela loku vanhu lava vulavulaka ririmi rimbe va ku kombiseke.

8. Hi byihi vutihlamuleri lebyi vandlha ri nga na byona eku pfuneni ka vanhu lava tsakelaka lava vulavulaka ririmi rimbe?

⁸ Vutihlamuleri Bya Vandlha: Etindhawini tin’wana laha ku nga ni ntlawa wutsongo wa vanhu lava tsakelaka lava vulavulaka ririmi rimbe, swi nga ha endleka leswaku ku nga ri na vandlha leri nga ekusuhi leri khomaka minhlangano hi ririmi rero. Nilokoswiritano, vanhu volavo lava tsakelaka va fanele va rhambiwa eminhlanganweni ya vandlha. Ku va amukela hi mandla-mambirhi ni ku va komba leswaku ha khathala hi vona swi nga va pfuna leswaku va tshama va ri kona eminhlanganweni ya hina. Hi nga hambana hi ririmi kumbe hi ndhavuko; kambe a xi kona lexi nga ta hi sivela ku kombisa rirhandzu ra ntiyiso ra Vukreste enhlengeletanweni ya misava hinkwayo ya Timbhoni ta Yehovha. (Sof. 3:9; Yoh. 13:35) Xana ri kona ririmi leri u ri vulavulaka kahle? Loko swi ri tano naswona u swi navela ku pfuna vanhu lava vulavulaka ririmi rero, hi kombela leswaku u tivisa matsalana wa le vandlheni ra n’wina leswaku yena a ta hundzisela rungula rero erhavini. Leswi swi ta pfuna loko rhavi ri lava muhuweleri loyi a nga ta hlakulela ku tsakela eka vanhu lava vulavulaka ririmi rimbe.

9. Yi nga sunguriwa loko swi te yini tlilasi yo dyondzisa vahuweleri ririmi rimbe naswona leswi swi nga endliwa njhani?

⁹ Ku Dyondza Ririmi Rimbe: Loko u hlangana ni vanhu lava tsakelaka lava vulavulaka ririmi rimbe, i swa nkoka ku va khutaza leswaku va va kona eminhlanganweni ya vandlha leri tirhisaka ririmi ra vona loko ri nga ri ekule. Loko sweswo swi nga koteki, vahuweleri van’wana va nga ha vona swi antswa ku dyondza ririmi leri vanhu volavo lava tsakelaka va ri vulavulaka leswaku va ta va pfuna. Loko ku ri nga ri na vandlha leri nga ekusuhi, rhavi ri nga ha hlela leswaku ku sunguriwa tlilasi ya vanhu lava tsakelaka lava vulavulaka ririmi rimbe. Loko leswi swo va tano, rhavi ri nga ha tivisa mavandlha lama nga ekusuhi malunghana ni xilaveko lexi nga kona, naswona ri nga tlhela ri ma tivisa ni hi tlilasi leyi nga kona. Etlilasini leyi, ku fanele ku tsarisa ntsena vahuweleri lava xikongomelo xa vona ku nga ku rhurhela eka ntlawa kumbe vandlha leri sunguleke tlilasi leyi hi xikongomelo xo pfuna vanhu lava vulavulaka ririmi rimbe ensin’wini ya rona.

10. I yini leswi lavekaka leswaku ku sunguriwa ntlawa lowu vulavulaka ririmi rimbe, naswona hi rihi endlelo leri faneleke ri landzeriwa?

¹⁰ Ku Vumba Mintlawa: Leswaku ku sunguriwa ntlawa wa ririmi ro karhi, ku fanele ku fikeleriwa swilaveko swo karhi. (1) Ku fanele ku va ku ri ni vanhu lava tsakelaka ensin’wini leyi tirhisaka ririmi rero. (2) Ku fanele ku va ku ri ni vahuweleri va nga ri vangani lava tivaka ririmi rero kumbe lava nga eku ri dyondzeni. (3) Ku fanele ku va ni nkulu kumbe nandza wa vutirheli loyi a nga ta rhangela ntlawa wolowo naswona a fambisa hambi ko va nhlangano wun’we hi vhiki, hi ririmi rero. (4) Huvo ya vakulu yi fanele yi va yi tiyimiserile ku seketela ntlawa wolowo. Loko swilaveko leswi swi fikeleriwile, huvo ya vakulu yi fanele yi tivisa rhavi, leswaku ntlawa wolowo wu ta simekiwa ximfumo tanihi leswi vandlha ri wu seketelaka. (Vona buku leyi nge Ku Hleleriwa, matl. 106-107.) Nkulu kumbe nandza wa vutirheli loyi a nga ta rhangela ntlawa lowu u ta vitaniwa “mulanguteri wa ntlawa” kumbe “nandza wa ntlawa.”

11. Ha yini ku ri lunghelo ku chumayela vanhu lava vulavulaka ririmi rimbe ensin’wini ya hina?

¹¹ Yesu Kreste loyi a nga Xikombiso xa hina, u hi vekele ntila lowu hi faneleke hi wu landzela loko swi ta emhakeni yo chumayela vanhu lava vulavulaka ririmi rimbe naswona u swi veke erivaleni leswaku leswi i swa nkoka entirhweni wa hina wo chumayela emisaveni hinkwayo. Onge hi nga hisekela ku hetisisa xiphemu xa hina kutani hi vona leswaku Yehovha u ya njhani emahlweni a ninginisa matiko leswaku a koka vanhu lava navelekaka eka yena. (Hag. 2:7) Mawaku ndlela leyi swi hi phyuphyisaka ha yona ku hlanganyela hi xitalo entirhweni lowu wa nkoka! Onge Yehovha a nga katekisa matshalatshala ya hina yo chumayela vanhu lava vulavulaka ririmi rimbe, naswona hi tshama hi ri karhi hi tsundzuka leswaku hambileswi hi hambanaka hi tindzimi, Xikwembu hi xona lexi kurisaka leswi hi swi byalaka.—1 Kor. 3:6-9.