Ku Antswisa Vutshila Bya Hina eNsin’wini—Ku Chumayela Munhu La Nga Vulavuriki Ririmi Ra Wena

Lexi Endlaka Swi Va Swa Nkoka: Yehovha u tsakela leswaku vanhu lava humaka “eka tiko rin’wana ni rin’wana” va va ni vuxaka lebyinene na yena. (Mint. 10:34, 35) Hikwalaho, Yesu u vule leswaku mahungu lamanene ma ta chumayeriwa “emisaveni hinkwayo leyi akiweke” ni le ‘matikweni hinkwawo.’ (Mat. 24:14) Zakariya u profete leswaku vanhu “lava humaka eka tindzimi hinkwato ta matiko” a va ta amukela mahungu lamanene. (Zak. 8:23) Eka xivono lexi muapostola Yohane a xi voneke, lava nga ta pona nhlomulo lowukulu va ta katsa vanhu lava “[humaka] eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlav. 7:9, 13, 14) Hi ku ya hi rungula leri ha ha ku bulaka ha rona, loko hi hlangana ni munhu loyi a nga vulavuriki ririmi ra hina ensin’wini ya hina, hi fanele hi ringeta ku n’wi chumayela.

Ndlela Leyi U Nga Swi Endlaka Ha Yona:

Tshama u tilunghiselerile. Tshama u ri ni xibukwana lexi nge, Good News for People of All Nations ebegeni ya wena leyi u yi tirhisaka ensin’wini. Tolovelana ni swiletelo leswi nga ni nhlokomhaka leyi nge, “How to Help Those Who Speak Another Language,” leswi nga eku sunguleni ka xibukwana lexi. Kopa tivhidiyo kumbe minkandziyiso eka jw.org, hi tindzimi leti u anakanyaka leswaku u nga ha hlangana ni vanhu lava ti vulavulaka, u tirhisa xitirhisiwa xa wena lexi kotaka ku nghena eka Internet. Ringeta ku tirhisa JW Language app leswaku u dyondza swivulwa swo karhi swa tindzimi teto. Loko nsimu leyi mi yi tirhaka yi tirhiwa ni hi mavandlha lama tirhisaka tindzimi tin’wana, khoma minkandziyiso ya ririmi leri tirhisiwaka evandlheni ra ka n’wina ntsena, loko u chumayela hi yindlu ni yindlu. Hambiswiritano, loko u chumayela etindhawini ta mani na mani laha ku vulavuriwaka tindzimi to tala, khoma minkandziyiso hi tindzimi ta vanhu lava u nga ha hlanganaka na vona.
Loko u hlangana ni munhu loyi a nga vulavuriki ririmi ra wena, endla matshalatshala yo n’wi byela hi “swilo leswikulu ngopfu swa Xikwembu” hi ririmi ra yena. (Mint. 2:11) N’wi byele leswaku a nghena eka jw.org, loko a lava ku kuma rungula leri engetelekeke hi ririmi ra yena. Loko a tsakela, hlela leswaku un’wana loyi a vulavulaka ririmi rakwe a n’wi endzela. Yana emahlweni u endzela munhu yoloye loyi a tsakelaka kukondza a endzeriwa hi vahuweleri lava vulavulaka ririmi rakwe.

Ringeta Ku Endla Leswi N’hweti Leyi:

Eka Vugandzeri bya n’wina bya Ndyangu lebyi landzelaka, praktisani ndlela leyi mi nga n’wi chumayelaka ha yona munhu loyi a nga vulavuriki ririmi ra n’wina.