Hi Nga Yi Hi Nghohe eVutirheli Bya Hina

¹ “Šikwembu a ši yi hi ngohe,” hi ku vula ka Petro, kambe, “loyi a ši tšhavaka, a endla le’ŝi lulameke, ša ṅwi ṭakela.” (Mint. 10:​34, 35) Vutirheli bya hina namuntlha byi endliwa hi ku landza ntiyiso wolowo lowu vekiweke erivaleni. Hikwalaho, i swa nkoka leswaku hi endla matshalatshala yo hlula xihinga xihi na xihi lexi xi nga hi sivelaka ku fikelela un’wana ni un’wana hi mahungu lamanene.

² Eminkarhini ya sweswi, vanhu va tinxaka to hambana-hambana swi nga ha endleka va rhurhele ensin’wini ya vandlha ra n’wina. Ngopfu-ngopfu etindhawini leti teleke hi vanhu, swi tolovelekile ku kuma vanhu lava vulavulaka ririmi rin’we kumbe ku tlula eka tindzimi ta vantima. Eku sunguleni, kumbexana eka masimu man’wana a ku vulavuriwa ngopfu Xinghezi. Hambi swi ri tano, etindhawini to tala a swa ha ri tano. Phela hambi ku ri etindhawini leti a ku vulavuriwa ngopfu Xizulu, sweswi vamakwerhu va hlangana ni vanhu lava vulavulaka Xitsonga, Xiputukezi, Xivenda kumbe ririmi rin’wana. Ku nga endliwa yini leswaku ku pfuniwa vanhu lava hinkwavo va tiva ntiyiso?

³ Xo sungula, hi fanele hi tivona hi ri ni vutihlamuleri eka munhu un’wana ni un’wana loyi hi hlanganaka na yena ensin’wini ku nga khathariseki rixaka kumbe ririmi ra yena. Vakulu, ngopfu-ngopfu mulanguteri wa ntirho, u fanele ku tiyisekisa leswaku mintlawa ya tindzimi ya khathaleriwa ensin’wini ni le minhlanganweni ya vandlha.

⁴ Vandlha rin’wana ni rin’wana ri fanele ku tiyisekisa leswaku tibuku ti va kona hi tindzimi hinkwato ta nsimu ya rona. Vahuweleri ni maphayona va fanele va famba ni tibuku leti loko va ya evutirhelini. Minkarhi yo tala, munhu a nga ha va a swi kotanyana ku vulavula Xinghezi kumbe ririmi rin’wana leri tirhisiwaka ngopfu ensin’wini yoleyo. Enkarhini lowu hundzeke, swi nga ha endleka leswaku a hi hatlisela ku yisa mavito ya vona ni tiadirese eka Sosayiti, hi kombela un’wana loyi a vulavula ririmi ra vona leswaku a va endzela. Loko ku nga ri na vandlha ekusuhi kumbe ntlawa lowu wu nga nyikelaka vumbhoni hi ririmi ro karhi, ku nga ha va ni muhuweleri eka rin’wana ra mavandlha ya le kusuhi loyi a tivaka ririmi rero, loyi a nga va endzelaka. Kambe, loko leswi swi nga koteki, ha yini wena u nga ringeti ku hlakulela ku tsakela koloko? Vahuweleri van’wana va dyondze ririmi rin’wana, hambi ku ri ririmi ra mavoko, leswaku va pfuna munhu la tsakelaka ku va a dyondza Bibele. Loko swi nga koteki ku vulavula ni munhu un’wana, vulavula ni mulanguteri wa ntirho loyi a nga ta vulavurisana ni mulanguteri wa doroba. Loko ku nga kumiwi munhu la vulavulaka ririmi rero, hambi endzhaku ko vulavurisana ni mulanguteri wa doroba, vamakwerhu va kwalaho va fanele va endla matshalatshala leswaku vumbhoni byi nyikeriwa. Broxara leyi nge Tsakela Vutomi eMisaveni Hi Masiku! ya pfuna swinene eka swiyimo swo tano.

⁵ Eka mavandlha yo tala ensin’wini ya hina, ku vulavuriwa tindzimi to hlayanyana. Leswi swi nga nonon’hwa swinene eka vakulu. Loko lava va vaka kona eminhlanganweni ya hina va swi kota ku hlamula hi ririmi rin’wana leri tirhisiwaka ngopfu, va fanele va khutaziwa ku tirhisa rona. Hambi swi ri tano, van’wana va kota ku hlamula hi ririmi ra vona ntsena. Loko swi koteka, vakulu va nga ha hlela dyondzo ya buku kumbe Dyondzo ya Xihondzo xo Rindza ya le tlhelweni leyi nga ta fambisiwa hi ririmi rero. Loko eka Xikolo xa Vutirheli bya le Tilweni, va nga swi koti ku nyikela tinkulumo hi rin’wana ra tindzimi leti tirhisiwaka ngopfu evandlheni, mulanguteri wa xikolo a nga hlela leswaku va nyikela tinkulumo eka xikolo xa vumbirhi kumbe xa vunharhu, kumbexana a hlela leswaku xikolo xa vumbirhi hinkwaxo xi fambisiwa hi ririmi rero madyambu wolawo. Leswi swi endle leswaku ku vumbiwa mavandlha ya tindzimi ta matiko mambe ensin’wini. Nakambe hi ringanyeta leswaku eka mfungho wa n’wina wa minhlangano ya vandlha mi kombisa leswaku vanhu hinkwavo va amukeriwa eka minhlangano yerhu, mi nga tsali hi ririmi leri tirhisiwaka ngopfu ntsena evandlheni kambe mi tsala ni hi rin’wana ra tindzimi ta vantima leri vulavuriwaka ensin’wini ya ka n’wina.

⁶ Hi ku endla matshalatshala lamakulu yo fikelela vanhu hinkwavo hi mahungu lamanene ku nga khathariseki ririmi ra vona, hi ta va hi kombisa ku rhandza ka hina Yehovha, Xikwembu xa hina, “lexi navelaka leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso.”​​—⁠⁠1 Tim. 2:⁠4.