Loko N’wini Wa Muti A Vulavula Ririmi Rin’wana

1. Ha yini ku laveka leswaku mavandlha ma khomisana loko ma tirha nsimu yin’we?

¹ Vahuweleri vo tala emisaveni hinkwayo va tshama va ri karhi va hlangana ni vanhu lava tsakelaka lava vulavulaka ririmi rin’wana leri ku nga tirhisiwiki rona evandlheni ra vona. Leswaku ku pfuniwa vanhu volavo leswaku va aka vuxaka bya vona na Yehovha, marhavi yo tala ma vona swi fanerile leswaku ku va ni mintlawa ni mavandlha ya tindzimi teto. Tanihi leswi endhawini yin’we swi nga ha endlekaka ku vulavuriwa tindzimi to hlayanyana, swi nga ha endleka leswaku mavandlha ma nga ri mangani lama tirhisaka tindzimi to hambana ma tirha nsimu yin’we. Xana mavandlha ma nga khomisana njhani leswaku ntirho wo chumayela wu endliwa hi ku hleleka?—1 Kor. 14:33.

2. Loko hi chumayela hi yindlu ni yindlu, xana hi nga khomisana njhani ni ntlawa kumbe vandlha ra ririmi rin’wana leri hi tirhaka nsimu yin’we na rona?

² Ku Khomisana: Loko muhuweleri a ri eku chumayeleni exitarateni kumbe hi xitshuketa u ntshunxekile ku vulavula ni munhu un’wana ni un’wana hambi ku ri loyi a vulavulaka ririmi rin’wana, kutani a n’wi fambisela nkandziyiso wa ririmi leri a ri lavaka. Kambe loko hi chumayela hi yindlu ni yindlu ensin’wini leyi hi yi tirhaka ni ntlawa kumbe vandlha leri tirhisaka ririmi rin’wana, muhuweleri u fanele a chumayela emakaya lawa ku vulavuriwaka ririmi leri tirhisiwaka evandlheni leri a nga eka rona. Loko mavandlha yo hlayanyana ma tirha nsimu yin’we, i swa nkoka ku tiva leswaku hi yihi nsimu leyi se yi tirhiweke. Valanguteri va ntirho va mavandlha wolawo va fanele va vulavurisana naswona va hlela swilo hi ndlela leyi nga ta vuyerisa vahuweleri hinkwavo. (Swiv. 11:14) Kambe loko hi ri eku chumayeleni hi yindlu ni yindlu, kutani hi hlangana ni munhu la vulavulaka ririmi rin’wana naswona ku nga ri na mavandlha lama tirhisaka ririmi rero ekusuhi, muhuweleri u fanele a tiyimisela ku dyondzisa munhu yoloye naswona a n’wi pfuna loko a tsakela.

3. Hi fanele hi endla yini loko hi hlangana ni vahuweleri va ntlawa kumbe vandlha ra ririmi rin’wana va ri karhi va tirha nsimu leyi hi tirhaka eka yona?

³ Hi Endla Ntirho Wun’we: Xana swi fanele swi endlisiwa ku yini loko vahuweleri va mavandlha yo hambana va tikuma va chumayela nsimu yin’we hi siku rin’we? Rirhandzu ra hina tanihi Vakreste ri ta hi endla leswaku hi tikarhatela ku chumayela vanhu hinkwavo. (Yoh. 13:34, 35) Lava va rhangelaka va ta kombisa ku anakanyela ni rirhandzu loko va hlawula leswaku hi wihi ntlawa lowu nga ta ya tirha nsimu yin’wana swa xinkarhana.—Yak. 3:17, 18.

4. Hi byihi vuprofeta lebyi hetisekaka namuntlha?

⁴ Bibele yi profete leswaku vanhu va tindzimi to hambana-hambana va ta twa mahungu lamanene. (Nhlav. 14:6, 7) Hinkwavo lava katsekaka, loko va khomisana ku ta papalatiwa leswaku vandlha ri tirha nsimu leyi se yi tirhiweke hi vandlha lerin’wana, naswona sweswo swi ta endla leswaku mahungu lamanene ma fikelela vanhu vo tala lavantshwa ku katsa ni va tindzimi tin’wana.—Efe. 4:16.