Malunghiselelo Lama Endliweke Yo Chumayela Vanhu Va Tindzimi To Hambanahambana

Hakanyingi vanhu va ri amukela rungula ra Mfumo loko va ri twa hi ririmi ra rikwavo. Kumbexana hi yona mhaka leyi Yehovha a endleke leswaku hi Pentekosta ya 33 C.E., “Vayuda . . . va tiko rin’wana ni rin’wana ra lava nga ehansi ka tilo” va twa mahungu lamanene hi ‘ririmi ra vona leri va nga velekiwa na rona,’ hambileswi a va swi kota ku vulavula Xiheveru kumbe Xigriki. (Min 2:5, 8) Namuntlha etindhawini leti ku vulavuriwaka tindzimi to hambanahambana, mavandlha lama khomaka mihlangano hi tindzimi teto swi nga endleka leswaku ma tirha nsimu yin’we. Mavandlha wolawo ma nga tirhisana njhani leswaku ma chumayela vanhu hinkwavo handle ko phindhaphindha tiyindlu leti fanaka leswi nga ha khunguvanyisaka vini va miti?

• 

  Ku Vulavurisana (Swiv 15:22): Valanguteri va ntirho wa nsimu va fanele va hlangana va burisana hi ndlela leyi va nga yi tirhaka ha yona nsimu yoleyo hi ndlela leyinene. Loko nsimu ya kona yi ri yi ntsongo, mavandlha lama chumayelaka hi tindzimi tin’wana ma nga ha tlula miti ya vanhu lava vulavulaka ririmi rin’wana. Loko nsimu ya kona yi ri yikulu, a va fanelanga va tlula miti kambe loko va kuma munhu loyi a tsakelaka naswona a vulavulaka ririmi rin’wana va nga ha tivisa vandlha leri tirhisaka ririmi rero. (od 93 ¶37) Kumbe va nga ha kombela leswaku vandlha ra n’wina ri va pfuna ku kuma vanhu lava vulavulaka ririmi leri tirhisiwaka evandlheni ra vona. (km 1/13 3, ni bokisi) Tsundzuka leswaku emutini wun’we ku nga ha vulavuriwa tindzimi to hambana. Malunghiselelo yo hlanganisa nsimu ya n’wina ma fanele ma fambisana ni nawu wa tiko malunghana ni ku tsala tiadirese ta vanhu.

• 

  Ku Tirhisana (Ef 4:16): Yingisani nkongomiso lowu mi wu kumaka eka mulanguteri wa ntirho. Xana u fambisa dyondzo ya Bibele ni munhu loyi a nga vulavuriki ririmi ra vandlha ra ka n’wina? Munhu yoloye a nga ha endla nhluvuko hi ku hatlisa loko wo n’wi nyiketa eka vahuweleri va vandlha leri nga ekusuhi kumbe eka ntlawa lowu vulavulaka ririmi rakwe.

• 

  Lunghiselela (Swiv 15:28; 16:1): Loko n’wini wa muti a vulavula ririmi rin’wana, endla matshalatshala yo n’wi chumayela. U nga kota ku endla tano, loko u kopa mikandziyiso ni tivhidiyo ta tindzimi leti u nga ha ti kumaka ensin’wini ya ka n’wina, u tshama u ri na swona eka xitirhisiwa xa wena xa elektroniki. U nga ha tirhisa JW Language app leswaku u dyondza maxewetelo hi tindzimi tin’wana.