Yi Tirhise Hi Vutlhari Minkandziyiso Ya Hina Leyi Sekeriweke eBibeleni
1, 2. Xana vanhu vo tala va titwisa ku yini hi minkandziyiso ya hina naswona ku tlakuka swivutiso swihi?
1 “Ndzi sungule ku hlaya minkandziyiso ya n’wina hi 1965. Ndzi pfula Bibele loko ndzi ri karhi ndzi yi hlaya naswona hinkwaswo leswi tsariweke eka yona swi fambisana ni Bibele. I khale ndzi ri karhi ndzi lava ku tiva ntiyiso wa xiviri hi Xikwembu na Yesu, kutani ndzi nga vula ndzi tiyisile leswaku ndzi kuma ntiyiso lowu heleleke eminkandziyisweni ya n’wina ni le Bibeleni.” Marito wolawo ma vuriwe hi wanuna un’wana loko a tsalela yindlu-nkulu ya Timbhoni ta Yehovha papila. Epapileni rero u kombele dyondzo ya Bibele.
2 Ku fana ni wanuna yoloye la tlangelaka, vanhu va timiliyoni emisaveni hinkwayo va yi tlangela minkandziyiso leyi humesiwaka hi “hlonga ro tshembeka ni ro tlhariha,” leyi va pfunaka ku tiva Bibele. (Mat. 24:45) Lembe ha rin’we ku humesiwa minkandziyiso yo tala leswaku hi pfuna vanhu va timbilu letinene va “fikelela vutivi lebyi kongomeke bya ntiyiso.” (1 Tim. 2:4) Xana hi nga yi tirhisa njhani hi vutlhari minkandziyiso ya hina leyi sekeriweke eBibeleni?
3. Xana hi nga swi papalata njhani ku tlanga hi minkandziyiso?
3 U Nga Tlangi Hi Yona: Hi ku famba ka nkarhi hi nga tikuma hi ri ni minkandziyiso yo tala leyi hi nga tiviki leswaku hi fanele hi endla yini ha yona. Xana hi nga ku papalata njhani ku tlanga hi minkandziyiso ya hina ya risima? Swi lava vutlhari loko hi teka minkandziyiso leyi hi nga ta yi fambisa ensin’wini. Ematshan’weni yo teka yo tala, a hi tekeni yitsongo kutani loko se hi yi fambisile ku ri kona hi landzaka yin’wana. Sweswo swi ta endla leswaku hi nga tikumi hi ri ni minkandziyiso yo tala ekaya. Hilaha ku fanaka, loko hi kuma leswaku hi ni timagazini to tala leti hi nga ti fambisangiki, swi ta va swinene leswaku hi hunguta nhlayo ya timagazini leti hi endleke xikombelo xa tona.
4. Xana ku nga endliwa yini loko ku ri ni minkandziyiso yo tala ngopfu evandlheni?
4 Loko Ku Ri Ni Minkandziyiso Yo Tala eVandlheni: Loko ku ri ni minkandziyiso yo karhi leyi taleke ngopfu evandlheni, makwerhu la ungamelaka minkandziyiso u fanele a vutisa mavandlha ya le kusuhi loko ma nga swi kota ku tirhisa minkandziyiso yoleyo. Minkandziyiso yoleyo vahuweleri va nga yi nyika swirho swa ndyangu leswi nga riki Timbhoni, swichudeni swa Bibele ni van’wana. Lava ha ku sungulaka ku hlanganyela evandlheni va nga ha tsakela ku va ni minkandziyiso ya khale leswaku va ta yi hlayisa elayiburari ya vona ya tibuku ta nhlengeletano.
5. Xana hi nga swi kombisa njhani leswaku ha yi tlangela minkandziyiso ya hina?
5 Hi lava leswaku minkandziyiso ya hina yi endla ntirho wa yona, ku nga ku pfuna vanhu va timbilu letinene leswaku va dyondza hi Yehovha ni swikongomelo swa yena leswi tsakisaka. Tanihi leswi Yesu a nga swi cukumetangiki swakudya leswi seleke loko a heta ku phamela ntshungu hi ndlela ya singita, xikongomelo xa hina xi fanele xi va ku yi tirhisa kahle minkandziyiso leyi hi nga na yona, leyi sekeriweke eBibeleni. (Yoh. 6:11-13) Rungula ra hina leri ponisaka leri tameriweke hi minkandziyiso ya hina a ri nge swi koti ku fika eka vanhu va timbilu letinene loko ri furhekiwe etilayiburari kumbe eminkwameni ya hina. Hikwalaho, hi fanele hi xiya loko hi teka minkandziyiso leyi hi nga ta ya na yona ensin’wini naswona hi yi tirhisa hi vutlhari leswaku yi pfuna van’wana.—Filp. 4:5.