Ku Twarisa Mahungu Lamanene Hi Ku Tirhisa Tibuku Hi Vutlhari

1 Nongonoko wa siku ra nhlengeletano leyi hlawulekeke wa lembe ra ntirho ra 1991 wu nyikele bulo ehenhleni ka “Vutirheli Bya Hina—A Byi Vevuki, Kambe Bya Kwetsima.” Wu kandziyise leswaku ntirho wa hina wa kwetsima naswona a wu fanelanga wu tekeriwa ehansi. Tanihi leswi ku tirhisa tibuku leti gandlisiweke ku nga xiphemu xa nkoka xa vutirheli bya hina, na xona xi fanele xi tameriwa hi xichavo. Un’wana ni un’wana wa hina a nga kombisa xichavo lexi enteke lexi hi nga na xona hi ku tirhisa tibuku ta hina hi vutlhari.

2 Eka lembe ra ntirho ra 1990, Sosayiti yi humese timagazini ta 678 wa timiliyoni ni Tibibele ni tibuku to tirhisiwa ensin’wini ya misava hinkwayo to tlula 51 wa timiliyoni. Leswi swi kombisa ku tirhisiwa lokukulu ka swilo leswi nyikeriweke, ku katsa nkarhi, matimba ni mali. Matshalatshala lama hlanganeke ya vatirhi vo tirhandzela vo tala ma humesa tibuku leti nga ni ntikelo leswaku ti tirhisiwa hi munhu hi xiyexe ni ku ti hangalasa entirhweni wa nsimu. Hi tihi tindlela tin’wana leti hi nga kombisaka ha tona ku tlangela lokunene ka tibuku ta hina loko hi twarisa rungula ra Mfumo eka vanhu va timbilu letinene?

3 Dyondzo Ya Munhu Hi Xiyexe Ni Ya Ndyangu: Eka Varhoma 2:21 muapostola Pawulo u ri: “Wena ke la dyondzisaka van’wana, a wu tidyondzisi xana?” Loko hi tinyika nkarhi wo hlaya, ku dyondza ni ku anakanyisisa hi xikhongelo hi tibuku ta hina leti sekeriweke eBibeleni, xisweswo hina hi hexe hi kombisa mpimo lowu ha wona hi tlangelaka malunghiselelo ya nkarhi na nkarhi ya Yehova ya swakudya swa moya hi ku tirhisa ntlawa wa malandza ya yena. (Luka 12:42) Hambi ku ri hi dyondzo ya munhu hi xiyexe kumbe ya ndyangu, ku fambisana ni mintiyiso leyi paluxiwaka swi hi pfuna leswaku hi hlakulela xichavo lexikulu xa hinkwaswo leswi Yehova a hi nyikeke leswaku hi swi khathalela. Vana na vona va fanele va leteriwa hi laha ku faneleke leswaku va tlangela ni ku khathalela tibuku ta vona, va nga ti tsalatsali kumbe va ti onha hi futa. Tlhandla-kambirhi, tibuku ta hina ti fanele ti vekiwa hi laha ku faneleke leswaku ti tshama ti basile ni ku languteka leswaku hi ti tirhisa ensin’wini.

4 Papalata Ku Ti Tlangisa: Leswaku ti pfuna hakunene, tibuku ta hina ti fanele ti ya emavokweni ya valavi va ntiyiso, hi leswaku, lava tsakelaka rungula ni ntirho wa hina hi xiviri. (Mat. 10:11) Hikwalaho hi fanele hi papalata ku nyikela tibuku handle ko xiya eka lava nga ri tsakelangiki hi xiviri rungula ra Bibele. Ku tlangisa ku nga ha humelela loko hi tshika timagazini, kumbe tibuku tin’wana ti tlhandlekelana ekaya.

5 Tanihi leswi timagazini ti tsariweke masiku, hi na nkarhi lowu hikiweke wo ti nyikela tanihi minkandziyiso ya sweswinyana. Kutani ke, matshalatshala ya hina lamakulu ma laveka leswaku hi huma hi ya evutirhelini naswona hi endla timagazini leti ti kumeka eka lava tsakelaka. Loko hi kuma leswaku timagazini ta hina ta ha pakelana, kumbexana swi nga va swinene ku lulamisa xiyimiso xa hina leswaku hi heta nkarhi lowu engetelekeke entirhweni wa timagazini. Kumbe loko leswi swi nga koteki ku swi endla, hi fanele hi cinca odara ya hina. Hi ku landzela swiringanyeto leswi, hi tikombisa hi ri malandza lama tshembekaka ya musa lowu nga fanelangiki wa Xikwembu.—1 Vakor. 4:2; 1 Pet. 4:10, 11; ringanisa Luka 16:1, 10.

6 Yehova u ‘byarhise’ vanhu va yena lava tinyiketeleke vutihlamuleri ni ntirho lowu tikaka swinene, ku katsa ni ‘rifuwo’ leri “nandza” la tshembekaka a ri lawulaka. (2 Tim. 1:12; Luka 12:42-44, 48b; 1 Tim. 6:20) Hi ku tlangela loku enteke ka malunghelo ya hina entirhweni wa Xikwembu, onge hi nga hambeta hi tirhisa tibuku ta hina hi vutlhari eku twariseni ka mahungu lamanene eka van’wana.