Kombisa Moya Wa Ku Tlangela Swilo Swa Ntirho Wa Xikwembu

¹ Loko a endla malunghiselo yo pfuxeta tempele, Hosi Yosiya u lerise lava averiweke ntirho, a ku: “Ku nga tshuki ku laviwa nhlamuselo eka vona ya mali leyi vekiweke evokweni ra vona, hikuva va tirha hi vutshembeki.” (2 Tih. 22:3-7) Xichavo lexi vanhu lava a va ri na xona eka swilo swo kwetsima xi kombisiwa hi ndlela leyi a va swi khoma ha yona swilo leswi va tamerisiweke swona. Namuntlha tanihi leswi hi khomekeke entirhweni wo kwetsima wa mahungu lamanene ya Xikwembu, na hina hi fanele hi swi tirhisa hi ku tshembeka swilo leswi hi tamerisiweke swona.

² Evutirhelini Bya Nsimu: Ku tlangela rungula ra nkoka leri tameriweke hi minkandziyiso ya hina ni ku anakanya hi mali leyi tirhisiweke eku humeseni ka minkandziyiso yoleyo swi endla leswaku hi yi teka yi ri ya nkoka swinene. A hi fanelanga hi fambisa tibuku ta hina eka vanhu lava nga kombisiki ku tsakela rungula ra Bibele. Loko munhu a nga kombisi ku tsakela lokukulu eka mahungu lamanene, hi nga ha n’wi nyika xiphephana ematshan’weni yo n’wi nyika buku yo karhi.

³ Fambisa tibuku hi ndlela leyi kombisaka leswaku u xixima ntikelo wa tona. Papalata ku ti siya etindhawini ta mani na mani laha ti nga ta sala ti lo n’walalaa. Leswaku u nga tlangi hi tibuku, rhanga hi ku kambisisa leti u nga na tona ekaya u nga si kuma leti engetelekeke. Loko nkarhi ni nkarhi ku va ni timagazini leti salaka eka nkandziyiso ha wun’we, anakanyisisa hi ku hunguta mphakelo lowu u wu kumaka.

⁴ Minkandziyiso Leyi Nga Ta Tirhisiwa Hi Wena N’wini: Hi fanele ku oda ntsena minkandziyiso leyi hi yi lavaka hakunene. Ngopfu-ngopfu hi fanele hi ringanisela loko hi oda Tibibele ta deluxe, ti-Reference Bible, ni minkandziyiso yin’wana leyikulu, yo tanihi Concordance, Index, tivholumo ta Insight, ni buku leyi nge Vahuweleri, ku nga minkandziyiso leyi dyaka mali yo tala.

⁵ Xana a wu rivali ku tsala vito ni adirese ya wena eka tikopi ta wena? Leswi swi pfuna leswaku ku nga vi ni xilaveko xa ku kuma minkandziyiso yin’wana loko u lahlekeriwe hi ya wena. Loko u lahlekeriwa hi buku ya tinsimu, Bibele kumbe nkandziyiso lowu dyondziwaka, kumbexana u nga wu kuma eka swilo leswi kumiweke eHolweni ya Mfumo kumbe endhawini leyi nhlengeletano yi khomeriweke eka yona.—Luka 15:8, 9.

⁶ A hi ringeteni ku tirhisa minkandziyiso ya hina hi vutlhari. Leyi i ndlela yo kombisa ku tshembeka ka hina eku tirhiseni ka swilo swa Mfumo leswi Yehovha a hi tameriseke swona.—Luka 16:10.