Xiyimiso Lexintshwa Xa Nhlengeletano Ya Xifundzha
1 N’wini wa hina u profete leswaku vadyondzisiwa va yena va ta va ni nhlomulo. (Mat. 24:9) Xana hi fanele hi wu languta njhani nhlomulo? Xana i yini lexi nga hi pfunaka leswaku hi tiyisela nhlomulo? Xiyimiso xa nhlengeletano ya xifundzha xa lembe ra ntirho ra 2004 xi ta hlamula swivutiso leswi. Xihloko xa yona xi ri “Tsakani Hi Ntshembo. Mi Tiyisela Nhlomulo.”—Rhom. 12:12.
2 Tinkulumo Timbirhi Ta Nxaxamelo: Nxaxamelo wo sungula wu ni xihloko lexi nge “Veka Mihandzu Hi Ku Tiyisela,” wu ta hlamusela tindlela leti hi vekaka mihandzu ha tona. Vahuweleri vo hlaya va ta komberiwa va hlamusela leswaku va endla njhani leswaku va chumayela ni ku dyondzisa hi ndlela leyi kombisaka leswaku rungula ra hina i ra xihatla. Vatswari ngopfu-ngopfu va nga tsakela ku nyikela nyingiso eka xiphemu lexi nge “Loko U Tshinyiwa Hi Yehovha,” lexi nga ta hlamusela ndlela leyi vatswari va nga va pfunaka ha yona vana va vona. Xivulavuri xo hetelela eka nxaxamelo lowu xi ta kandziyisa leswi hi faneleke hi swi endla leswaku hi nga ngheniwi hi moya wo biha wa misava lowu nga endlaka leswaku hi nga veki mihandzu.—Mar. 4:19.
3 Xihloko xa nxaxamelo wa vumbirhi xi ri “Tsutsuma Mphikizano Hi Ku Tiyisela.” Xi ta swi kombisa kahle leswaku vutomi bya hina byi fana ni mphikizano hi ndlela yihi. Ha yini hi fanele hi tsutsuma hi ku ya hi milawu leyi vekiweke? Xana hi nga swi kotisa ku yini ku hluvula ntiko wun’wana ni wun’wana leswaku hi nga karhali eka mphikizano lowu wo kuma vutomi? Ndzayo ya Matsalwa leyi nga enkarhini, leyi nga ta nyikeriwa, yi ta hi pfuna hinkwerhu leswaku hi hambeta hi tsutsuma hi ku tiyisela.
4 Ku Tiyisela Ku Endla Leswaku Hi Amukeriwa Hi Xikwembu: Tinkulumo leti nga ta nyikeriwa hi valanguteri lava famba-fambaka ti ta ri tiyisa ripfumelo ra vanhu lava nga ta yingisa ndzayo va tlhela va yi tirhisa. Yin’wana ya tinkulumo ta mulanguteri wa muganga yi ni xihloko lexi nge “Ku Tiyisela Ku Yisa Eka Xiyimo Xa Ku Amukeriwa.” Nkulumo ya le rivaleni yi ta hlamula swivutiso leswi nge, I vito ra mani leri matiko ma faneleke ma veka ntshembo eka rona naswona i yini leswi katsekaka eku endleni sweswo? Nkulumo yo gimeta leyi nge “Hi Ku Tiyisela Mi Ta Londzovota Mimoya-xiviri Ya N’wina,” yi ta kombisa ndlela leyi Yesu a swi koteke ha yona ku tiyiselela maxangu handle ko hlundzuka.
5 Mi nga rivali ku ta ni tibuku ta n’wina leti nge Xikolo xa Vutirheli ni Xihondzo xo Rindza lexi nga ta hlayiwa hi vhiki rero. Tsalani tinhla leswaku mi tshama mi xalamukile ni leswaku mi ta ti tirhisa enkarhini lowu taka. Nongonoko lowu wu ta tlhela wu pfuxetiwa evandlheni.
6 I Yehovha hi byakwe loyi a lunghiseleleke nkhuvo lowu wa swakudya swa moya. Tanani mi ta dya! Hi ta huwelela hi ku tsaka ka mbilu loko hi va kona leswaku hi vuyeriwa eka nongonoko lowu hinkwawo.—Esa. 65:14.