Ku Tiyisela Ka Laveka Eka Vakreste
‘Seketelani ku pfumela ka n’wina hi ku tiyisela.’—2 PETRO 1:5, 6.
1, 2. Ha yini hinkwerhu ka hina hi fanele ku tiyisela ku fikela emakumu?
MULANGUTERI la famba-fambaka ni nsati wakwe a va endzela Mukreste-kulobye loyi a nga emalembeni yakwe ya va-90. U hete makume ya malembe a ri entirhweni wa nkarhi hinkwawo. Loko va ri karhi va vulavula, makwerhu la dyuhaleke u hlamusele man’wana ya malunghelo lama a ma tsakeleke hi malembe layo tala. “Kambe se a ndza ha ri na wona matimba, ndzo va munhu ntsena,” a vula hi ku karhateka, mihloti yi sungula ku xiririka. Mulanguteri la famba-fambaka u pfule Bibele yakwe, a hlaya eka Matewu 24:13, laha Yesu Kreste a nge: “Loyi a tiyiselaka ku fika makumu, hi yena loyi a nga ta ponisiwa.” Kutani mulanguteri u langute makwerhu la rhandzekaka, a ku: “Xiavelo xo hetelela lexi hinkwerhu ka hina hi nga na xona, ku nga khathariseki leswaku hi endla ntirho wo tanihi kwihi, i xa ku tiyisela ku fikela emakumu.”
2 Ina, hinkwerhu ka hina tanihi Vakreste hi fanele ku tiyisela ku fikela emakumu ya mafambiselo lawa ya swilo, kumbe ku fikela emakumu ya vutomi bya hina. Ku hava ndlela yin’wana leyi hi nga ponisiwaka ha yona hi Yehovha. Hi le mphikizanweni wa vutomi, kutani hi fanele “hi tsutsuma hi . . . ku tiyisela” ku fikela emakumu. (Vaheveru 12:1) Muapostola Petro u kandziyise nkoka wa mfanelo leyi, loko a khutaza Vakreste-kulobye a ku: ‘Seketelani ku pfumela ka n’wina hi ku tiyisela.’ (2 Petro 1:5, 6) Kambe xana ku tiyisela kahle-kahle swi vula yini?
Leswi Ku Tiyisela Swi Vulaka Swona
3, 4. Ku tiyisela swi vula yini?
3 Ku tiyisela swi vula yini ke? Riendli ra Xigriki leri vulaka “ku tiyisela” (hy·po·meʹno) hi ku kongoma ri vula “ku ka u nga tshiki kumbe ku khomelela.” Ri humelela ka 17 eBibeleni. Hi ku ya hi vatsari va dikixinari, W. Bauer, F. W. Gingrich na F. Danker, ri vula “ku khomelela ematshan’wini yo baleka . . . , ku ka u nga tsekatseki, ku khoma swi tiya.” Riviti ra Xigriki ra “ku tiyisela,” (hy·po·mo·neʹ) ri humelela minkarhi yo tlula 30. Malunghana na rona, A New Testament Wordbook, leyi tsariweke hi William Barclay, yi ri: “I moya wa ku tiyisela swilo, hayi hi ku titsongahata ntsena, kambe na hi ntshembo lowu nga tsekatsekiki . . . I mfanelo leyi endlaka leswaku munhu a nga tsekatsekisiwi loko a langutane ni mheho. I mfanelo leyi nga hundzulaka ndzingo lowukulu wu va ku dzuneka, hikuva yi endla leswaku u yisa mianakanyo eka ntshembo wa wena, ku nga khathariseki leswaku u nonon’hweriwa ku fikela kwihi.”
4 Kutani ku tiyisela ku hi pfuna leswaku hi yima hi tiyile, hi nga heleriwi hi ntshembo loko hi langutane ni swihinga kumbe swiphiqo. (Varhoma 5:3-5) Ku tiyisela ku endla leswaku hi anakanya hi pakani ya hina—hakelo kumbe nyiko ya vutomi lebyi nga heriki, etilweni kumbe emisaveni, ku nga pakani leyi hi tiyimiseleke ku yi fikelela, ku nga khathariseki mahlomulo lawa hi nga na wona sweswi.—Yakobo 1:12.
Ha Yini Hi Fanele Ku Tiyisela?
5. (a) Ha yini Vakreste hinkwavo ‘va fanele ku tiyisela’? (b) Hi swihi swiyenge swimbirhi leswi miringo ya hina yi nga avanyisiwaka ha swona?
5 Tanihi Vakreste, hinkwerhu ka hina ‘hi fanele ku tiyisela.’ (Vaheveru 10:36) Ha yini ke? Kahle-kahle xivangelo hi leswi hi “hlangana[ka] ni miringo ya tinxaka-xaka.” Rito ra Xigriki leri tirhisiweke laha eka Yakobo 1:2 ri kombisa xihinga lexi nga languteriwangiki kumbe lexi nga amukeriwiki, tanihi loko munhu a wela emavokweni ya nsula-voya. (Ringanisa Luka 10:30.) Hi langutana ni miringo leyi nga avanyisiwaka hi swiyenge swimbirhi: leyi vanhu hinkwavo va nga na yona hikwalaho ka xidyoho lexi va tswariweke na xona, ni leyi yi hi telaka hikwalaho ka leswi hi chavaka Xikwembu. (1 Vakorinto 10:13; 2 Timotiya 3:12) Xana yin’wana ya miringo leyi hi yihi ke?
6. Mbhoni yin’wana yi tiyisele hi ndlela yihi loko yi langutane ni vuvabyi lebyi karhataka?
6 Vuvabyi lebyikulu. Vakreste van’wana va boheka ku tiyisela “ku tala ku va ni switlhavitlhavi emirini,” ku fana na Timotiya. (1 Timotiya 5:23) Ngopfu-ngopfu loko hi langutane ni vuvabyi lebyi nga tshungulekiki, kumbexana lebyi karhataka swinene, hi fanele ku tiyisela swinene, hi mpfuno wa Xikwembu, hi nga heleriwi hi ntshembo wa Vukreste lowu hi nga na wona. Xiya xikombiso xa Mbhoni yin’wana leyi nga ni malembe lama tlulakanyana 50 leyi lwisaneke swinene ni tshumba ra vukarhi leri a ri kula hi ku hatlisa. Loko a endliwa vuhandzuri kambirhi, u yime a tiyile eka xiboho xakwe xa ku ka a nga yi amukeli mimpompelo ya ngati. (Mintirho 15:28, 29) Kambe tshumba ri tlhele ri humelela ekhwirini rakwe ri kula ri ya fika ekusuhi ni longo. Tshumba leri ri n’wi twise ku vava swinene lerova ku nga vi na murhi lowu miyetaka ku vava loku. Kambe u anakanye hi hakelo ya vutomi emisaveni leyintshwa, ku nga khathariseki ku karhateka loku a a ri na kona enkarhini wolowo. U hambete a vulavula ni madokodela, vaongori ni vaendzi hi ntshembo wakwe lowu tiyeke. U tiyiserile ku fikela emakumu—makumu ya vutomi byakwe. Vuvabyi bya wena kumbexana a byi na khombo ngopfu tanihi lebyi a byi khome makwerhu yoloye la rhandzekaka, kambe byi nga ha tisa ndzingo lowukulu wa ku tiyisela.
7. Eka vamakwerhu van’wana, ku tiyisela ku katsa ku karhateka ka muxaka muni?
7 Ku karhateka emoyeni. Nkarhi wun’wana, van’wana va vanhu va Yehovha va twa “ku v̌av̌a ka mbilu” loku vangaka “moya wo ṭhov̌eka.” (Swivuriso 15:13) Ku tshikileleka lokukulu ka mianakanyo ku tolovelekile ‘eminkarhini leyi yo nonon’hwa.’ (2 Timotiya 3:1, ringanisa NW.) Science News ya December 5, 1992 yi vikile: “Mpimo wa ntshikilelo lowukulu wa mianakanyo, lowu hakanyingi wu siyaka munhu a ri xilema wu engetelekile eka rixaka rin’wana ni rin’wana leri velekiweke ku sukela hi 1915.” Swivangelo swa ntshikilelo wo tano wa mianakanyo swa hambana, swin’wana swi endliwa hi ku karhateka emianakanyweni ni le mirini. Eka Vakreste van’wana, ku tiyisela swi katsa nyimpi ya siku na siku yo tshama va tiyile loko va karhateka emoyeni. Kambe a va heli matimba. Va tshama va tshembekile eka Yehovha ku nga khathariseki ku karhateka loku va langutaneke na kona.—Ringanisa Pisalema 126:5, 6.
8. Hi wihi ndzingo wa swa timali lowu hi nga langutanaka na wona?
8 Miringo yo hambana-hambana leyi hi langutanaka na yona yi nga katsa xiphiqo lexikulu xa timali. Loko makwerhu wa le New Jersey, U.S.A., a tikuma a lahlekeriwe hi ntirho a nga swi langutelanga, hi laha ku faneleke, a a karhateka hi leswaku a nga lahlekeriwi hi kaya rakwe, ni leswaku u ta wu wundlisa ku yini ndyangu wa yena. Hambi swi ri tano, a nga heleriwanga hi ntshembo wakwe malunghana ni Mfumo. Loko a ri karhi a lava ntirho wun’wana, u teke vuphayona byo pfuna. U hetelele a wu kumile ntirho.—Matewu 6:25-34.
9. (a) Ku feriwa hi murhandziwa ku nga lava ku tiyisela hi ndlela yihi? (b) I matsalwa wahi lama kombisaka leswaku a swi hoxanga ku humesa mihloti hikwalaho ka ku vaviseka loko u feriwile?
9 Loko u feriwe hi murhandziwa, u fanele ku va ni ku tiyisela loku tshamaka nkarhi wo leha loko lava ku chavelelaka se va tlhelele emakaya ya vona. Nakambe u nga kuma leswaku swi ku nonon’hwela ku tlurisa lembe rin’wana ni rin’wana loko ku fika nkarhi lowu murhandziwa wa wena a feke ha wona. Ku tiyisela hi ku humesa mihloti hikwalaho ka ku vavisiwa hi ku feriwa koloko a swi hoxanga. A swi bihanga ku rila murhandziwa la feke, naswona ku rila ko tano a swi kombisi nikatsongo leswaku a wu na wona ntshembo wa ku pfuxiwa ka vafi. (Genesa 23:2; ringanisa Vaheveru 11:19.) Yesu ‘u ririle’ endzhaku ka rifu ra Lazaro, hambi leswi A byeleke Marta hi ku tiyisa a ku: “Makwenu ú ta tlhela a pfuka.” Kutani Lazaro u pfukile hakunene!—Yohane 11:23, 32-35, 41-44.
10. Ha yini vanhu va Yehovha va fanele ku tiyisela hi laha ku hlawulekeke?
10 Ku engetela eku tiyiseleni ka miringo leyi vanhu hinkwavo va hlanganaka na yona, vanhu va Yehovha va ni xilaveko xo hlawuleka xa ku tiyisela. Yesu u tsundzuxile a ku: “Mi ta vengiwa hi vanhu va matiko hinkwawo hikwalaho ka vito ra mina.” (Matewu 24:9) Nakambe u te: “Loko va ndzi xanisile, na n’wina va ta mi xanisa.” (Yohane 15:20) Ha yini ku ri ni rivengo ni ku xanisiwa ko tano? Hikuva ku nga khathariseki laha hi tshamaka kona emisaveni leyi tanihi malandza ya Xikwembu, Sathana u ringeta ku herisa ku tshembeka ka hina eka Yehovha. (1 Petro 5:8; ringanisa Nhlavutelo 12:17.) Hikwalaho Sathana hakanyingi u vange ku xanisiwa ka tihanyi, a nghenisa ku tiyisela ka hina endzingweni lowukulu.
11, 12. (a) Timbhoni ta Yehovha ni vana va tona va langutane ni miringo yihi ya ku tiyisela hi va-1930 ni le ku sunguleni ka 1940? (b) Ha yini Timbhoni ta Yehovha ti ala ku losa mujeko wa tiko?
11 Hi xikombiso, hi va-1930 ni le ku sunguleni ka 1940, Timbhoni ta Yehovha ni vana va tona le United States ni le Canada ti xanisiwile hi leswi ti aleke ku losa mujeko wa tiko hikwalaho ka ripfalo ra tona. Timbhoni ta wu xixima mujeko wa tiko leri ti tshamaka eka rona, kambe ti yingisa nsiya wa nawu lowu andlariweke eNawini wa Xikwembu lowu nga eka Eksoda 20:4, 5, leyi nge: “U nga ṭhuki u tiendlela šifaniso le’ši v̌atliweke, ni loko ši ri šifaniso šihi ni šihi ša ŝilo le’ŝi nge henhla e tilweni, ni loko ši ri ša ŝilo le’ŝi nge hansi e misaveni, ni loko ši ri ša ŝilo le’ŝi nge matini, e hansi ka misav̌a; u nga ṭhuki u ŝi nkhinsamela, ni loko ku ri ku ŝi tirela; hikuv̌a hi mina Yehova, Šikwembu ša wena, ša rilav̌eta.” Loko vana van’wana va Timbhoni va hlongoriwile exikolweni hikwalaho ka leswi a va tiyimisele ku gandzela Yehovha Xikwembu ntsena, Timbhoni ti simeke Swikolo swa Mfumo leswaku vana va tona va ta dyondzela eka swona. Vana lava va tlhelele eswikolweni swa tiko loko Huvo leyi Tlakukeke ya le United States yi amukele xiyimo xa vona xa vukhongeri, hi laha matiko man’wana lama twisisaka ma endlaka ha kona namuntlha. Hambi swi ri tano, ku tiyisela ka xivindzi ka vana lava i xikombiso lexi khutazaka, ngopfu-ngopfu eka vantshwa va Vakreste lava va nga ha hlekuriwaka namuntlha hikwalaho ka leswi va tiyimiseleke ku hanya hi ku landza milawu ya Bibele.—1 Yohane 5:21.
12 Miringo yo hambana-hambana leyi hi langutanaka na yona—leyi vanhu hinkwavo va nga na yona ni leyi hi langutanaka na yona hikwalaho ka ripfumelo ra hina ra Vukreste—yi kombisa leswaku ha yini hi fanele ku tiyisela. Kambe hi nga tiyiserisa ku yini?
U Nga Tiyisela Ku Fikela eMakumu Hi Ndlela Yihi?
13. Yehovha u hi pfuna hi ndlela yihi leswaku hi tiyisela?
13 Vanhu va Xikwembu va ni lunghelo lerikulu ku tlula lava nga n’wi gandzeriki Yehovha. Leswaku hi kuma mpfuno hi nga kombela eka “Xikwembu lexi ku tiyisela . . . ku humaka ka xona.” (Varhoma 15:5) Kambe xana Yehovha u hi nyika njhani matimba yo tiyisela? Ndlela yin’wana i ku tirhisa swikombiso swa ku tiyisela leswi rhekhodiweke eRitweni rakwe, ku nga Bibele. (Varhoma 15:4) Loko hi anakanyisisa hi swikombiso leswi, a hi khutaziwi leswaku hi tiyisela ntsena, kambe hi tlhela hi dyondza swo tala malunghana ni ndlela leyi hi nga tiyiselaka ha yona. Xiya swikombiso swimbirhi leswikulu—ku tiyisela lokukulu ka Yobo, ni ku tiyisela loku hetisekeke ka Yesu Kreste.—Vaheveru 12:1-3; Yakobo 5:11.
14, 15. (a) Yobo u tiyisele miringo yihi? (b) Yobo u swi kotise ku yini ku tiyisela miringo leyi a langutaneke na yona?
14 I swiyimo swihi leswi ngheniseke ku tiyisela ka Yobo endzingweni? U ve xisiwana loko a lahlekeriwe hi rifuwo rakwe lero tala. (Yobo 1:14-17; ringanisa Yobo 1:3.) Yobo u vaviseke swinene loko vana vakwe hinkwavo va khume va dlayiwe hi xitshuketa hi xidzedze. (Yobo 1:18-21) U khomiwe hi vuvabyi byo chavisa ni lebyi karhataka swinene. (Yobo 2:7, 8; 7:4, 5) Nsati wakwe u n’wi sindzise ku fularhela Xikwembu. (Yobo 2:9) Vanghana vakwe lavakulu va vule marito lama tlhavaka, lama nga tsetseleriki ni lama nga riki ntiyiso. (Ringanisa Yobo 16:1-3 na Yobo 42:7.) Hambi swi ri tano, eka leswi hinkwaswo, Yobo u yime a tiya, a nga tsekatseki. (Yobo 27:5) Swilo leswi yena a swi tiyiseleke swa fana ni miringo leyi vanhu va Yehovha va langutanaka na yona namuntlha.
15 Yobo u swi kotise ku yini ku tiyisela miringo leyi hinkwayo? Lexi ngopfu-ngopfu xi nga tiyisa Yobo a ku ri ntshembo. U te: “Murhi lowu tsemiweke wa ha ri ni ku tshemba: Wa ha ta tlhela wu hluka, wu ya emahlweni wu phaka marhavi.” (Yobo 14:7, BML) Hi wihi ntshembo lowu Yobo a a ri na wona? Hi laha swi kombisiweke ha kona hi tindzimana leti nga endzhakunyana, u te: ‘Loko munhu la hanyeke kahle a fa, xana a nga tlhela a hanya ke? U ta huwelela, kutani mina ndzi ta ku hlamula. Hikuva a wu ta tsakela ntirho wa mavoko ya wena.’ (Yobo 14:14, 15, ringanisa NW.) Ina, Yobo a a ri ni ntshembo, ku nga khathariseki ku karhateka loku a a ri na kona. A a swi tiva leswaku miringo yakwe a yi ta hela. Ngopfu-ngopfu a a fanele ku tiyisela ku fikela eku feni. Ntshembo wakwe lowukulu a ku ri leswaku Yehovha, loyi a swi lavaka ku pfuxa vafi hikwalaho ka rirhandzu rakwe, a a ta n’wi pfuxa eku feni.—Mintirho 24:15.
16. (a) I yini lexi hi xi dyondzaka eka xikombiso xa Yobo malunghana ni ku tiyisela? (b) Ntshembo wa Mfumo wu fanele ku va wa xiviri eka hina ku fikela kwihi, naswona ha yini?
16 Xana hi dyondza yini emhakeni ya ku tiyisela ka Yobo? Leswaku hi tiyisela ku fikela emakumu, hi nga tshuki hi heleriwa hi ntshembo lowu hi nga na wona. Nakambe tsundzuka leswaku ku tiyiseka hi ntshembo wa Mfumo swi vula leswaku ku xaniseka kwihi na kwihi loku hi langutanaka na kona i ka “nkarhinyana ntsena.” (2 Vakorinto 4:16-18) Ntshembo wa hina wa risima wu sekeriwe swinene eka xitshembiso xa Yehovha malunghana ni nkarhi lowu tshineleke laha ‘a nga ta sula mihloti hinkwayo emahlweni ya hina, kutani rifu ri nga ha vi kona, hambi ku ri ku rila, kumbe ku kolola, kumbe ku karhateka, a swi nga ha vi kona.’ (Nhlavutelo 21:3, 4, ringanisa NW.) Ntshembo wolowo, lowu nga ‘khomisiki tingana,’ wu fanele ku sirhelela timbilu ta hina. (Varhoma 5:4, 5; 1 Vatesalonika 5:8) Wu fanele wu va wa xiviri eka hina—wu va wa xiviri swinene lerova hi mahlo ya hina ya mianakanyo, hi kota ku tivona hi ri emisaveni leyintshwa—hi nga ha lwi ni mavabyi ni ku tshikileleka ka mianakanyo, kambe siku na siku hi pfuka hi hanye kahle, ni mianakanyo ya hina yi phyuphyile; hi nga ha karhateki hi swiphiqo leswikulu swa timali, kambe hi hanya handle ko chava xo karhi; hi nga ha rili hikwalaho ka ku fa ka varhandziwa, kambe hi tsaka swinene loko hi va vona va pfuxiwa eku feni. (Vaheveru 11:1) Loko hi nga ri na wona ntshembo wo tano hi nga tikeriwa swinene hi miringo leyi hi telaka, ku fikela laha hi helaka matimba. Hikwalaho ka ntshembo wa hina, hi na nsusumeto wa matimba swonghasi lowu endlaka leswaku hi hambeta hi lwa, hi hambeta hi tiyisela ku fikela emakumu!
17. (a) Hi yihi miringo leyi Yesu a yi tiyiseleke? (b) Ku xaniseka lokukulu loku Yesu a ku tiyiseleke ku nga voniwa emhakeni yihi? (Vona nhlamuselo ya le hansi.)
17 Bibele yi hi khutaza ‘ku languta swinene’ eka Yesu ni ku n’wi ‘anakanya swinene.’ Xana ú tiyisele miringo yihi? Yin’wana ya yona yi vangiwe hi xidyoho ni ku nga hetiseki ka van’wana. Yesu a nga tiyiselanga “loko vadyohi va lwa na yena” ntsena, kambe u tiyisele ni swiphiqo leswi veke kona exikarhi ka vadyondzisiwa vakwe, ku katsa ni ku tshamela ka vona ku kanetana hi vukulukumba. Ku tlula kwalaho, u langutane ni ndzingo lowukulu swinene wa ripfumelo. U ‘tiyisele mhandzi ya nxaniso.’ (Vaheveru 12:1-3, ringanisa NW; Luka 9:46; 22:24) A swi olovi ku anakanya hi ku vaviseka emianakanyweni ni le mirini loku a veke na kona loko a beleriwa, ni ku xumbadzeka hi ku dlayiwa tanihi murhukani.a
18. Hi ku ya hi muapostola Pawulo, hi swihi swilo swimbirhi leswi tiyiseke Yesu?
18 I yini lexi pfuneke Yesu ku tiyisela ku fikela emakumu? Muapostola Pawulo u boxa swilo swimbirhi leswi tiyiseke Yesu: ‘ku khongela ni ku kombela’ kun’we ni “ku tsaka loku vekiweke emahlweni ka yena.” Yesu, N’wana wa Xikwembu la hetisekeke, a a kombela mpfuno handle ko khomiwa hi tingana. A a “huwelela hi matimba ni ku rila hi mihloti.” (Vaheveru 5:7; 12:2) U kume swi fanela swinene ku khongelela matimba hi ku phindha-phindha ni hi mahika, loko ndzingo wakwe lowukulu wu ri ekusuhi. (Luka 22:39-44) Loko a hlamula swikombelo swa Yesu, Yehovha a nga wu susanga ndzingo, kambe u tiyise Yesu leswaku a tiyisela ndzingo wa kona. Nakambe Yesu u tiyiserile hi leswi a a langutele hakelo yakwe leyi mhandzi ya nxaniso yi nga riki nchumu loko yi ringanisiwa na yona—ku nga hakelo ya ntsako lowu a a ta va na wona hi ku hoxa xandla eku kwetsimiseni ka vito ra Yehovha ni ku kutsula vanhu eku feni.—Matewu 6:9; 20:28.
19, 20. Xikombiso xa Yesu xi hi pfunisa ku yini leswaku hi va ni mianakanyo ya xiviri malunghana ni leswi ku tiyisela swi katsaka swona?
19 Eka xikombiso xa Yesu, hi dyondza swilo swo tala leswi hi pfunaka ku va ni mianakanyo ya xiviri malunghana ni leswi ku tiyisela swi katsaka swona. Ku tiyisela a swi olovi. Loko hi kuma swi hi nonon’hwela ku tiyisela ndzingo wo karhi, hi twa hi chaveleriwa hi ku tiva leswaku a swi ri tano ha Yesu. Leswaku hi tiyisela ku ya fika emakumu, hi fanele hi khongelela matimba hi ku phindha-phindha. Loko hi ringiwa, minkarhi yin’wana hi nga vona hi nga fanelanga ku khongela. Kambe Yehovha u hi khutaza leswaku hi n’wi phofulela leswi nga etimbilwini ta hina, ‘hikuva u tikarhatela hina.’ (1 Petro 5:7) Naswona hikwalaho ka leswi Yehovha a swi tshembiseke eRitweni rakwe, u hlambanye ku nyika “matimba lamakulu . . . lama tlulaka hinkwaswo” eka lava va n’wi kombelaka hi ripfumelo.—2 Vakorinto 4:7-9.
20 Minkarhi yin’wana hi boheka ku tiyisela hi mihloti. Ku xaniseka ka Yesu emhandzini ya nxaniso a swi nga n’wi tsakisi. Kambe a a tsakisiwa hi hakelo leyi a yi vekiwe emahlweni ka yena. Hina a hi fanelanga ku langutela leswaku minkarhi hinkwayo hi ta tsaka ni ku khana loko hi ringiwa. (Ringanisa Vaheveru 12:11.) Hambi swi ri tano, loko hi languta emahlweni eka hakelo ya hina, hi nga swi kota ku “yi [teka] ku ri mhaka ya ku tsakisa swinene” hambi loko hi langutana ni swiyimo leswi ringaka swinene. (Yakobo 1:2-4; Mintirho 5:41) Nchumu wa nkoka hi leswaku hi tshama hi nga tsekatseki—hambi loko hi rila mihloti. Phela Yesu a nga vulanga a ku, ‘Loyi a humesaka mihloti yitsongo hi yena loyi a nga ta ponisiwa,’ kambe u te, “Loyi a tiyiselaka ku fika makumu, hi yena loyi a nga ta ponisiwa.”—Matewu 24:13.
21. (a) Eka 2 Petro 1:5, 6, hi khutaziwa ku seketela ku tiyisela ka hina hi yini? (b) Hi swihi swivutiso leswi nga ta hlamuriwa eka xihloko lexi landzelaka?
21 Kutani ku tiyisela ka laveka leswaku hi ta ponisiwa. Hambi swi ri tano, eka 2 Petro 1:5, 6, hi khutaziwa ku seketela ku tiyisela ka hina hi ku chava Xikwembu. Ku chava Xikwembu swi vula yini? Ku hlangana njhani ni ku tiyisela, naswona u nga swi kotisa ku yini? Swivutiso leswi swi ta hlamuriwa eka xihloko lexi landzelaka.
[Nhlamuselo ya le hansi]
a Ku xaniseka lokukulu loku Yesu a ku tiyiseleke kumbexana ku nga voniwa emhakeni ya leswi a feke endzhaku ka tiawara to hlayanyana emhandzini, kasi vadyohi lava beleriweke etlhelo ka yena va tshoveleriwe milenge leswaku va ta hatla va fa. (Yohane 19:31-33) A va xanisekanga hi ndlela leyi Yesu a xanisekeke ha yona emianakanyweni ni le mirini hi ku yingayingisiwa vusiku hinkwabyo a nga si beleriwa, kumbexana a kala a nga ha swi koti ni ku rhwala mhandzi ya yena ya nxaniso.—Marka 15:15, 21.
A Wu Ta Hlamurisa Ku Yini Ke?
◻ Ku tiyisela swi vula yini?
◻ Ha yini vanhu va Yehovha va fanele ku tiyisela hi laha ku hlawulekeke?
◻ Yobo u pfuniwe hi yini leswaku a tiyisela?
◻ Xikombiso xa Yesu xi hi pfunisa ku yini leswaku hi va ni mianakanyo ya xiviri malunghana ni ku tiyisela?
[Xifaniso lexi nga eka tluka 10]
Swikolo swa Mfumo swi simekiwile leswaku ku dyondzisiwa vana va Vakreste lava hlongoriweke exikolweni hi leswi a va gandzela Yehovha ntsena
[Xifaniso lexi nga eka tluka 12]
Tanihi leswi a a tiyimisele ku dzunisa Tata wakwe, Yesu u khongelele ku kuma matimba yo tiyisela