Byala Swo Tala Leswaku U Tshovela Swo Tala
1 Murimi un’wana ni un’wana wa swi tiva leswaku loko a byala mbewu yo tala, u ta kuma ntshovelo wo tala, kambe loko a byala katsongo, hakunene u ta tshovela katsongo. (2 Kor. 9:6) Kumbexana ku hava kun’wana lomu xihloko lexi xi twisisekaka kona ku antswa ku tlula emhakeni ya hina ya ku nyikela vumbhoni. Swi le rivaleni leswaku loko hi tinyiketela ngopfu eku nyikeleni ka vumbhoni, hi kona laha hi nga ta vuyeriwa swinene hi mintokoto leyi tsakisaka, maendzo yo vuyela lama tswalaka mihandzu ni tidyondzo ta le kaya ta Bibele leti endlaka nhluvuko.
2 Nakambe hi fanele ku byala swo tala loko ku tiwa eka timagazini, tibroxara ni minkandziyiso yin’wana. Nkarhi wun’wana hi nga ha ti tshika ti pakelana ekaya kasi a ti ta tirhiseriwa ku pfuna lava fanelekaka ensin’wini ya hina leswaku va tiva ntiyiso. (Ringanisa Matewu 25:25.) A hi languteni mhaka ya ku fambisiwa ka timagazini. Timagazini leti hi ti fambisaka ti ya ti hunguteka. Eka lembe ra ntirho ra 1993 vahuweleri va le Afrika Dzonga, hi ku ya hi nhlayo-xikarhi, va fambise timagazini ta 4,2 hi n’hweti. Hambi loko ku ri ni swivangelo swo tala swa leswi, ku katsa ni swiyimo swo biha swa ikhonomi, swi le rivaleni leswaku vahuweleri vo tala a va wu hleli nkarhi wa ku hlanganyela entirhweni wa timagazini nkarhi na nkarhi. Emavandlheni yo tala ku hleriwe Siku ra Timagazini vhiki rin’wana ni rin’wana laha vandlha hinkwaro ri kotaka ku hlanganyela eka xiyenge lexi xa nkoka xa ku byala mbewu yo tala ya Mfumo. Ematshan’wini yo hlawula Mugqivela wun’we kumbe yimbirhi ntsena en’hwetini, vakulu va fanele ku endla malunghiselelo ya ntirho wa timagazini Mugqivela WUN’WANA NI WUN’WANA.
3 Eka tindhawu tin’wana vamakwerhu swa va nonon’hwela swinene ku fambisa timagazini hikwalaho ka madzolonga lama nga kona emalokixini. Vakulu va fanele ku tsundzuxa vahuweleri leswaku va tirha etindhawini leti rhulekenyana. Loko swi nga koteki ku nyikela vumbhoni exitarateni, kutani fambani hi yindlu na yindlu. Mintila ya timagazini hi yin’wana ya tindlela to engetela timagazini leti fambisiwaka ivi eku heteleleni ku sunguriwa tidyondzo ta Bibele.
4 Kun’wana lomu hi faneleke ku byala swo tala kona hi le ka ntirho wa hina wa dyondzo ya Bibele. Hi August 1993, eAfrika Dzonga ku vikiwe nhlohlorhi leyintshwa ya tidyondzo ta Bibele ta 63 887. Sweswo i swinene naswona hi lava ku nkhensa hinkwavo lava hlanganyeleke eka ntirho lowu wa nkoka. Loko murimi a byala mbewu, u langutela ku kuma ntshovelo lowunene. Kutani eka tidyondzo ta Bibele leti tlulaka 63 000 leti fambisiwaka, xana a hi fanelanga hi va ni ku engeteleka ka vadyondzisiwa lavantshwa n’hweti na n’hweti?
5 Leswaku hi kuma vuyelo byebyo hi fanele hi tiyimisela ku tirha hi matimba ni ku tirhisa swiringanyeto hinkwaswo leswinene leswi hi swi kumeke eka minkandziyiso ya sweswinyana ya Vutirheli Bya Hina Bya Mfumo malunghana ni tidyondzo ta Bibele. Xana wena u tshame u swi tirhisa swiringanyeto leswi? (Languta Vutirheli Bya Hina Bya Mfumo, June ku ya ka December 1993.) Ha yini u nga endli tikopi ta swihloko leswi ivi u swi veka endzhaku ka buku ya wena leyi nge Hanya Hi Masiku ni leyi nge United in Worship leswaku u hamba u languta eka swona? Mulanguteri wa ntirho ni vafambisi va dyondzo ya buku na vona va fanele ku tirhisa swihloko leswi leswaku va pfuna vandlha hinkwaro leswaku ri humelela swinene eku fambiseni ka tidyondzo ta Bibele, xisweswo ku nga languteriwa ntshovelo lowunene wa vahuweleri lavantshwa.—Mt. 28:19, 20.
6 Hinkwerhu hi fanele ku tivutisa, Xana ndzi nga byala swo tala swinene evutirhelini? (1 Tes. 4:1) Swi nga va njhani loko wo tshama ehansi, u ehleketisisa, u ri wexe kumbe tanihi ndyangu, hi ndlela leyi u nga hlanganyelaka hi xitalo ha yona eku hangalaseni ka timagazini. Loko u nga ri na dyondzo ya Bibele enkarhini wa sweswi, khongela hi mhaka leyi naswona u tirha hi matimba ensin’wini leswaku u yi kuma. Loko u fambisa dyondzo, tirhisa swiringanyeto leswi nyikeriwaka hi nhlengeletano ya Yehovha leswaku u kuma vuyelo lebyinene. Loko hi endla leswi hi ta tshovela swo tala, hi dzunisa Yehovha.