Ndlela Yo Sungula Tidyondzo Ta Bibele Ni Lava U Va Fambiseleke Timagazini
1. Hi yihi pakani ya hina loko hi fambisa timagazini?
1 Hi ntolovelo hi Migqivela loko hi ri ensin’wini hi fambisa timagazini ta Xihondzo xo Rindza ni Xalamuka! Hambiswiritano, leri ko va goza ro sungula ro fikelela pakani ya hina yo dyondzisa vanhu va timbilu letinene ntiyiso. Laha hansi ku ni swin’wana swa swiringanyeto swo fambisa buku leyi nge Leswi Bibele Yi Swi Dyondzisaka eka riendzo ro vuyela, u tlhela u sungula ni dyondzo ya Bibele. U nga ha swi tirhisa hi ku ya hi swiyimo swa nsimu ya n’wina naswona u swi veka hi marito ya wena n’wini. U nga chavi ku tirhisa swingheniso swin’wana leswi ku fambelaka kahle.
2. Xana hi nga ri tirhisa njhani rungula leri nga eku sunguleni ka buku leyi nge Leswi Bibele Yi Swi Dyondzisaka leswaku hi sungula dyondzo ya Bibele?
2 Tirhisa Rungula Leri Nga Eku Sunguleni Ka Buku: Loko u tlhelela, u nga ha ku: “Timagazini leti ndzi ku siyeleke tona ti ku yisa eBibeleni. Xiya xivangelo xa ku va swi ri swa nkoka ngopfu ku hlaya Bibele.” Hlaya Esaya 48:17, 18; Yohane 17:3; kumbe tsalwa rin’wana leri faneleke. Kutani endzhaku ko hlamusela n’wini wa muti hi buku leyi nge Leswi Bibele Yi Swi Dyondzisaka niloko u n’wi nyike ya yena, u nga ha ya emahlweni u ku:
“Bibele yi hi nyika ntshembo wa xiviri hi vumundzuku.” Komba n’wini wa muti matluka 4-5, kutani u n’wi vutisa u ku, “Eka switshembiso leswi, hi swihi leswi u nga ta tsakela ku swi vona swi hetiseka?” N’wi kombe ndzima leyi bulaka hi xitshembiso xa Matsalwa lexi a xi hlawuleke, kutani loko a pfumela u dyondza na yena ndzimana yin’we kumbe timbirhi.
◼ Kumbe u nga ha ku, “Bibele yi hlamula swivutiso swa nkoka swinene leswi vanhu va tivutisaka swona.” N’wi byele a pfula eka tluka 6, kutani u n’wi vutisa loko a tshame a tivutisa xin’wana xa swivutiso leswi nga emakumu ka tluka rero. Pfulani ndzima leyi hlamulaka xivutiso xa kona kutani mi bula hi ndzimana yin’we kumbe timbirhi.
◼ Kumbe u nga ha n’wi komba tinhloko-mhaka leti nga eka tluka ra leswi nga endzeni kutani u n’wi vutisa leswaku hi tihi leti ti n’wi tsakisaka. Pfulani ndzima ya kona, kutani hi ku komisa u n’wi komba ndlela leyi dyondzo ya Bibele yi fambisiwaka ha yona.
3. Xana hi nga yi sungula njhani dyondzo ya Bibele endzhaku ka loko hi fambise timagazini leti vulavulaka hi (a) swiyimo swa misava leswi yaka swi tika? (b) ndyangu? (c) ku tshembeka ka Bibele?
3 Eka Riendzo Ro Sungula N’wi Siye Ni Xivutiso: Ndlela yin’wana i ku va u vhela u pfula tindlela ta riendzo ro vuyela loko u endzela n’wini wa muti ro sungula. Loko n’wini wa muti a amukele timagazini, n’wi vutise xivutiso kutani u n’wi tshembisa leswaku u ta n’wi hlamula xona loko u vuya. Tikarhatele ku endla malunghiselelo lama tiyeke yo vuyela, u tlhela u tiyiseka leswaku a wu n’wi khomisi ribye. (Mat. 5:37) Loko u tlhelela, tsundzuxa n’wini wa muti xivutiso lexi u n’wi vutiseke xona eku sunguleni, kutani hi ku komisa u hlaya u tlhela u bula na yena hi nhlamulo ya xivutiso xexo leyi nga ebukwini leyi nge Leswi Bibele Yi Swi Dyondzisaka. N’wi nyike ya yena leswaku a ta fambisana na wena. Hi leswi swikombiso swi nga ri swingani:
◼ Loko magazini lowu u wu fambiseke wu vulavula hi swiyimo swa misava leswi yaka swi tika, u nga ha ku, “Enkarhini lowu taka hi nga bula hi nhlamulo leyi nga eBibeleni ya xivutiso lexi nge, Xana Xikwembu xi ta cinca yini laha misaveni?” Loko u tlhelela tirhisa matluka 4-5. Kumbe u nga ha tlakusa xivutiso lexi nge, “Xana makhombo lama humelelaka ma vangiwa hi Xikwembu?” Eka maendzo yo vuyela, komba n’wini wa muti tindzimana 7-8 eka ndzima 1.
◼ Loko magazini lowu u wu fambiseke wu vulavula hi ndyangu, u nga si lela u nga ha vutisa xivutiso lexi nge, “I yini lexi xirho xin’wana ni xin’wana xa ndyangu xi nga xi endlaka leswaku vutomi bya ndyangu byi tsakisa?” Loko u tlhelela bula hi ndzimana 4 eka tluka 14.
◼ Loko magazini lowu u wu fambiseke wu vulavula hi ku tshemba Bibele, u nga ha vutisa xivutiso lexi landzelaka leswaku u lunghiselela bulo ra nkarhi lowu taka u ku, “Xana Bibele ya pakanisa loko yi vulavula hi sayense?” Eka riendzo ro vuyela, bula hi ndzimana 8 eka ndzima 2.
4. I yini lexi hi nga xi endlaka loko n’wini wa muti a nga yi amukeli buku leyi nge Leswi Bibele Yi Swi Dyondzisaka?
4 Loko u gimeta bulo rin’wana ni rin’wana, vutisa munhu wa kona xivutiso xin’wana lexi u nga ta xi hlamula eka riendzo leri landzelaka. Loko dyondzo ya Bibele se yi sungurile, dyondzani buku ku sukela eku sunguleni. I yini lexi u nga xi endlaka loko n’wini wa muti a nga yi amukeli buku leyi nge Leswi Bibele Yi Swi Dyondzisaka? U nga ha ya emahlweni u n’wi yisela timagazini u tlhela u bula na yena hi Matsalwa. Loko u ri karhi u n’wi pfuna leswaku a ya a tsakela, a nga hetelela a amukele dyondzo ya Bibele.
5. Ha yini hi fanele hi ringeta ku sungula tidyondzo ta Bibele, hi nga heleli ntsena hi ku fambisa timagazini?
5 Timagazini ta Xihondzo xo Rindza ni Xalamuka! ti nga khutaza munhu leswaku a tsakela ku dyondza leswi Bibele yi swi dyondzisaka hakunene. Hikwalaho, endla matshalatshala yo hlawuleka yo sungula tidyondzo ta Bibele ni vanhu lava amukelaka timagazini. Hi ndlela yoleyo, hi ta va hi yingisa swiletelo swa Yesu swa ku ‘endla vadyondzisiwa ni ku va dyondzisa.’—Mat. 28:19, 20.