Ku Antswisa Vutshila Bya Hina eNsin’wini—Ku Fambisa Buku Leyi Nge Leswi Bibele Yi Swi Dyondzisaka

Nkoka Wa Yona: Buku leyi nge Leswi Bibele Yi Swi Dyondzisaka i xi tirhisiwa xa nkoka eka switirhisiwa swa hina swo dyondzisa ha swona. Kambe, loko hi nga si sungula ku dyondza ni munhu un’wana, hi fanele hi rhanga hi n’wi fambisela yona. Hikokwalaho, hinkwerhu ka hina hi fanele hi tikarhatela ku va ni vuswikoti byo fambisa buku leyi nge Leswi Bibele Yi Swi Dyondzisaka ensin’wini. (Swiv. 22:29) Ku ni tindlela to tala to yi fambisa naswona vahuweleri va fanele va tirhisa ndlela leyi tirhaka eka vona.

Ndlela Leyi Hi Nga Endlaka Ha Yona:

Vutisa xivutiso lexi pfuxaka ku tsakela lexi u nga xi tirhisaka ku kongomisa n’wini wa muti eka ndzima yo karhi ebukwini leyi. U nga ha hlawula xin’we eka swivutiso leswi nga eku sunguleni ka ndzima. Endzhaku ko twa nhlamulo ya n’wini wa muti, hlaya tsalwa leri faneleke kutani u n’wi komba ndzimana leyi vulavulaka hi mhaka ya kona kutani mi burisana ha yona hi ku komisa.
Ndlela yin’wana i ku tirhisa matluka ya le ku sunguleni ka buku leswaku u pfuxa ku tsakela ka n’wini wa muti kutani u n’wi komba laha tinhlamulo ta Bibele ti kumekaka kona. Hi xikombiso, u nga ha n’wi byela hi khombo le ra ha ku humelelaka leri kombisiweke eka mahungu kutani u hlamusela leswaku vo tala va hlamarisiwe hi tinhlamulo ta swivutiso leswi nga eka tluka 3. Kumbe u nga ha vula leswaku u endzela vaakelani va wena ku burisana na vona hi rungula lerinene hi vumundzuku. Endzhaku n’wi kombe swifaniso leswi nga eka matluka 4-5 kutani u ku, “Eka switshembiso leswi, hi swihi leswi u nga tsakelaka ku swi vona swi hetiseka?” Ndlela yin’wana u nga ha vula leswaku u endzela vanhu swa xinkarhana ku va pfuna ku kuma tinhlamulo ta swivutiso leswi va karhataka evuton’wini. Kutani komba n’wini wa muti swivutiso leswi nga ehansi eka tluka 6, ivi u n’wi vutisa leswaku hi xihi lexi n’wi tsakisaka ngopfu.
Tirhisa xingheniso lexi kongomeke ku sungula dyondzo ya Bibele. U nga ha ku: “Hi komba vaakelani va hina buku leyi yo pfuneta ku dyondza Bibele. Xana u tshame u yi vona? [Yimela nhlamulo.] Loko u ri na nkarhinyana ndzi nga tsakela ku ku kombisa ndlela leyi yi dyondziwaka ha yona hi ku tirhisa Bibele ya wena.”

Ringeta Ku Endla Leswi N’hweti Leyi:

Endlani minkombiso hi nkarhi wa vugandzeri bya n’wina bya ndyangu.
Loko mi ri ensin’wini, byela vahuweleri van’wana leswi u kunguhataka ku swi vula. (Swiv. 27:17) Loko xingheniso xa wena xi nga vi na vuyelo lebyinene, xi cince.