Ku Antswisa Vutshila Bya Hina eNsin’wini—Ku Kombisa Ndlela Yo Fambisa Dyondzo Ya Bibele Hi Buku Leyi Nge, Leswi Bibele Yi Swi Dyondzisaka

Lexi Endlaka Swi Va Swa Nkoka: Swi nga ha endleka vanhu vo tala va nga swi twisisi leswaku hi vula yini loko hi va byela leswaku hi fambisela vanhu tidyondzo ta le kaya ta Bibele mahala. Va nga ha anakanya leswaku va fanele va joyina ntlawa wo karhi lowu dyondzaka Bibele kumbe leswaku va fanele va endla khoso yo karhi va ri ekaya. Ematshan’weni yo kombela ku va fambisela dyondzo ya Bibele ntsena, ha yini u nga va kombisi ndlela leyi yi fambisiwaka ha yona? U nga komba munhu ndlela leyi swi olovaka swi tlhela swi vuyerisa ha yona ku dyondza Bibele hi timinete ti nga ri tingani, hambiloko u yime enyangweni.

Ndlela Leyi U Nga Swi Endlaka Ha Yona:

Endzhaku ko titivisa, vutisa n’wini wa muti loko a karhateka hi vumundzuku.
N’wi byele leswaku vanhu vo tala na vona va karhateka hi swilo sweswo, kutani n’wi kombe leswi nga endzeni ka buku leyi nge, Leswi Bibele Yi Swi Dyondzisaka. N’wi hlamusele leswaku buku leyi yi ni tidyondzo leti twisisekaka hi ku olova leti kombisaka leswi Bibele yi swi dyondzisaka malunghana ni vumundzuku ni timhaka tin’wana, kutani u n’wi vutisa leswaku hi yihi ndzima leyi a tsakelaka leswaku mi bula ha yona.
N’wi nyike buku kutani mi pfula ndzima leyi a yi hlawuleke. N’wi hlamusele leswaku swivutiso leswi nga eku sunguleni ka ndzima swi hlamuriwa eka tindzimana leti nga eka ndzima yoleyo.
Kombela n’wini wa muti leswaku a hlaya ndzimana yo sungula loko a swi tsakela. Endzhaku ka sweswo hlaya xivutiso xa kona kutani mi lava nhlamulo swin’we. Hlayani mi tlhela mi bula hi matsalwa lama kombisiweke lama seketelaka nhlamulo yoleyo. N’wi kombe ndlela leyi u yi khwatihateke ha yona nhlamulo ebukwini ya wena.
A a hlaye ndzimana leyi landzelaka, endzhaku ka sweswo n’wi kombele leswaku a ringeta ku hlamula xivutiso hi marito ya yena n’wini.
N’wi bumabumele, u endla ni malunghiselelo yo tlhela u vuya leswaku mi ta hetisa ndzima yoleyo.
Loko swi fanerile, n’wi hlamusele hi vhidiyo leyi nga eka jw.org/ts leyi nge Leswi Endlekaka Eka Dyondzo Ya Bibele.

Ringeta Ku Endla Leswi N’hweti Leyi:

Khongela eka Yehovha u kombela leswaku a katekisa matshalatshala ya wena yo sungula dyondzo leyintshwa ya Bibele.—Filp. 2:13.
Loko u ri ensin’wini, ringeta ku kombisa vanhu ndlela yo fambisa dyondzo ya Bibele u tirhisa buku leyi nge, Leswi Bibele Yi Swi Dyondzisaka, kumbe u va komba vhidiyo leyi nge, Leswi Endlekaka Eka Dyondzo Ya Bibele.