Pfuna Vanhu Lava Kotisaka Tinyimpfu Leswaku Va Aka Eka Masungulo Lama Tiyeke
1 Ku aka yindlu swi lava makungu lamanene ni matimba lamakulu. Loko yindlu se yi kunguhatiwile, ku fanele ku lunghisiwa ndhawu yo aka eka yona kutani ku vekiwa masungulo lama tiyeke. Muako lowu wu tlakuka hakatsongo-tsongo ku fikela loko wu hela. Hi ku fanana, hi fanele ku pfuna vanhu lava kotisaka tinyimpfu leswaku va dyondza ntiyiso hakatsongo-tsongo. Hi lwela ku pfuxa ku tsakela eka riendzo ro sungula. Endzhaku ka sweswo, hi endla maendzo yo vuyela, hi veka masungulo hi ku va dyondzisa ntiyiso wa xisekelo hi Xikwembu ni xikongomelo xa xona hi vanhu.—Lk. 6:48.
2 Kambe, ku nga si vekiwa masungulo, hi fanele ku lunghisa ndhawu yo aka eka yona, hi ehleketelela swiyimo swa n’wini wa muti. Hi yihi mhaka leyi ku buriweke ha yona eku sunguleni? I matsalwa wahi lama tirhisiweke? U hlamurise ku yini? Hi yihi buku leyi siyiweke? Loko u vuya, vana ni tinhla to karhi, kutani u hambeta u aka masungulo. Eka riendzo rin’wana ni rin’wana vutivi bya n’wini wa muti bya kula naswona ripfumelo rakwe eka Xikwembu ra engeteleka.
3 Loko u fambise buku leyi nge “Hanya Hi Masiku” u nga ha ku:
◼ “Ndza tsaka ku ku kuma u ri ekaya. Kumbexana wa tsundzuka leswaku eka bulo ra hina leri hundzeke, hi bule hi ku hunguteka ka vanhu lava tsakelaka Xikwembu endhawini ya ka hina. Bibele yi swi veka erivaleni leswaku Xikwembu xa va tsakela vanhu ni leswaku lavo lulama va ta katekisiwa hi Mfumo wa xona. [Hlaya Matewu 6:9, 10.] Eka Mfumo lowu ku ta andza vunene ni vululami.” Hlaya Esaya 11:3-5, kutani u komba n’wini wa muti tindzimana timbirhi to sungula ta ndzima 1 ebukwini leyi nge Hanya Hi Masiku. Kombisa ndlela leyi mhaka leyi yi nga dyondziwaka ha yona.
4 Loko u fambise xiphephana lexi nge Vutomi eMisaveni Leyintshwa eka riendzo ro sungula, mi nga ha pfuxeta tinhla-nkulu leti mi buleke ha tona, malunghana ni ku laveka ka swiyimo swo antswa ni switshembiso swa Bibele. Kandziyisa leswaku loko hi ta kota ku hanya emisaveni leyintshwa, hi fanele ku va ni vutivi lebyi kongomeke. Hlaya Yohane 17:3. Hlamusela leswaku endzhaku ka ku va ni vutivi byebyo, hi fanele ku endla ku rhandza ka Xikwembu. Hlaya 1 Yohane 2:17. Komba n’wini wa muti tinhla to karhi leti nga eka tluka 5 ra xiphephana.
5 Loko u kandziyise mhaka ya vutomi bya ndyangu loko u fambisa buku leyi nge “Hanya Hi Masiku” eka riendzo ro sungula, u nga ha ku:
◼ “Enkarhini lowu hundzeke loko ndzi endzile hi bule hi mhaka ya vutomi bya ndyangu. Hi pfumerile leswaku loko hi ta va ni vutomi bya ndyangu lebyi tsakisaka, hi fanele ku landzela swiletelo leswi kumekaka eBibeleni. Xana u vona onge ku laveka yini leswaku vukati byi humelela?” Yimela nhlamulo. Kandziyisa tinhla to karhi leti humaka eka rungula leri andlariweke eka matluka 243-6 ebukwini leyi nge Hanya Hi Masiku. Kombela tinhlamuselo ta n’wini wa muti eka swifaniso kutani mi bula hi tinhla leti u ti hlawuleke loko swi fanela. Kombisa ntikelo lowu tirhaka wa misinya ya milawu ya Bibele.
6 Loko u siye xiphephana lexi nge Tsakela Vutomi Bya Ndyangu, pfuxeta misinya ya milawu ya Bibele leyi kombisiweke eka matluka 4 na 5. Loko ku tsakela ku ri kona, fambisa buku leyi nge Hanya Hi Masiku. Pfula ndzima 29, “Ku Endla Vutomi Bya Ndyangu Byi Kateka,” kutani u kombisa ndlela leyi yi nga dyondziwaka ha yona ni n’wini wa muti kun’we ni ndyangu wakwe.
7 Hinkwerhu hi fanele hi hlanganyela nkarhi hinkwawo eku endleni ka maendzo yo vuyela. Landzelela ku tsakela hinkwako loku kombisiwaka hi ku endla maendzo yo vuyela lama humelelaka hi September.