Ku Pfuna Van’wana Leswaku Va Vona Rifuwo Lerikulu
1 Loko hi chumayela van’wana hi mahungu lamanene ya Mfumo, kungu rin’wana ra hina ku fanele ku va ku pfuna vanhu va timbilu letinene va twisisa nkoka lowu hlawulekeke wa Rito ra Xikwembu. (Flp. 3:8) Tibuku ta hina leti sekeriweke eBibeleni ti endla xiphemu xa nkoka eku hangalaseni ka rungula ra Mfumo. Hi xikombiso, buku leyi nge Hanya Hi Masiku yi pfune madzana ya magidi ya vanhu leswaku va tirhela Yehovha hikwalaho ka ntiyiso wa Bibele lowu va wu dyondzeke.
2 Vutirheli bya hina a byi katsi ku siya buku ntsena ni munhu un’wana ni un’wana la yi tsakelaka. Hi fanele hi vula rungula hi mukhuva lowu tsakisaka, hi yingisa hi ku twisisa leswi n’wini wa muti a swi vulaka, kutani hi lunghekela ‘ku kombisana na yena hi Matsalwa.’—Mint. 17:2.
3 Xana Leswi Swi Nga Endlisiwa Ku Yini? Swingheniso swa hina swi nga pfula ndlela leswaku vini va miti va kombisa loko va yi tsakela hakunene Bibele ni rungula ra yona.
U nga ha ku:
◼ “Hi endzele ku ta burisana hi nhlamuselo ya swilo leswi humelelaka emisaveni namuntlha. Vanhu vo tala va heleriwe hi ku tsakela Xikwembu ni mimpimanyeto ya xona ya vutomi hi laha yi andlariweke ha kona eBibeleni. Leswi swi kucetele ndlela leyi vanhu va langutanaka ha yona. Xana u swi xiyile leswi? [Yimela nhlamulo. U nga ha kombetela eka swiyimo swo karhi.] Xiya langutelo ra lava boxiweke eka 2 Timotiya 3:1-5, kutani u ndzi byela loko leswi u vona swi fana ni misava ya namuntlha. [Hlaya; yimela nhlamulo.] Xana ku ni xivangelo lexi twalaka xa ku langutela swiyimo swo antswa enkarhini lowu taka?” Loko a kombisa ku tsakela, n’wi kombe xifaniso lexi nga eka matluka 12 na 13 ya buku leyi nge Hanya Hi Masiku kutani u yisa nyingiso eka tindzimana 12 na 13. Loko nyiko yi ariwa, kutani u nga ha fambisa xiphephana lexi nge Vutomi eMisaveni Leyintshwa.
4 Loko mutswari a pfula nyangwa, hi nga ha sungula bulo ra hina hi ndlela leyi:
◼ “Hi vulavurisana ni vanhu lava tsakelaka ku tiva ndlela leyi hi nga langutanaka ku antswa ha yona ni swiphiqo swa vutomi bya ndyangu. Hinkwerhu hi ringeta ku endla leswi hi nga swi kotaka, kambe loko ku ri na lexi xi nga hi pfunaka hi humelela, ha swi tsakela, a swi tano ke? [Yimela nhlamulo.] Bibele yi nyika nkongomiso emhakeni leyi hi laha wu kumekaka ha kona eka Vakolosa 3:12-14. [Hlaya.] Kutani, i yini lexi lavekaka leswaku vutomi bya ndyangu byi humelela? Xiya leswi tsariweke eka buku leyi eka ndzima leyi nga ni xihloko lexi nge ‘Ku Endla Vutomi Bya Ndyangu Byi Kateka.’” Hlaya ndzimana 3 eka tluka 238 ra buku leyi nge Hanya Hi Masiku. Loko n’wini wa muti a khomekile kumbe a nga tsakeli, ringeta ku fambisa magazini wa sweswinyana lowu bulaka hi timhaka ta ndyangu kumbe xiphephana lexi nge Tsakela Vutomi Bya Ndyangu.
5 A hi fanelanga ku rivala xikongomelo xa hina eku nyikeleni ka vumbhoni lebyi heleleke bya Mfumo. (Mt. 24:14) Hi ku tirhisa kahle Bibele ni malunghiselelo yo hlawuleka ya tibuku ta mfumo wa le tilweni leti hi nga na tona, hi nga languta eka Yehovha hi xivindzi leswaku a hi katekisa eku endleni ka ku rhandza kakwe eminkarhini leyi ya nkoka.—Gal. 6:9.