Ndlela Leyi Swirho Swa Ndyangu Swi Nga Tirhisanaka Ha Yona Leswaku Swi Hlanganyela Hi Xitalo—Edyondzweni Ya Bibele
1 Ntiyiso wu endla leswaku ndyangu wu va ni xikongomelo xa xiviri evuton’wini, kambe leswaku wu tirhela Yehovha hilaha ku humelelaka a swi tiendlekeli. Ku aka ndyangu lowu tiyeke hi tlhelo ra moya swi lava nkarhi ni ku tikarhata. Ku ni xilaveko lexikulu xa leswaku swirho swa ndyangu swi tirhisana swinene emhakeni leyi. Lexi i xihloko xo sungula xa nxaxamelo wa swihloko swinharhu leswi nga ta hlamusela ndlela leyi mindyangu yi nga tirhisanaka ha yona eku hlakuleleni ka mikhuva leyinene yo dyondza.
2 Hi Ku Hlaya Bibele Siku Na Siku: Swivuriso 24:5 yi vula leswaku “munhu wo dyonḍeka wa tiyisa matimba ya yena.” Vutivi lebyi kumiwaka hi ku hlaya Rito ra Xikwembu nkarhi na nkarhi byi nyika munhu nsusumeto lowu lavekaka leswaku a sirheleta vumoya byakwe eka minhlaselo ya Sathana. (Ps. 1:1, 2) Xana mi hlaya Bibele kun’we tanihi ndyangu siku na siku? Xiyimiso xa Xikolo xa Vutirheli bya le Tilweni xi ni “Ku Hlaya Ka Bibele Loku Engetelekeke” eka vhiki rin’wana ni rin’wana ra lembe. Ku xi tirhisa swi lava kwalomu ka khume ra timinete ta nkarhi wa ndyangu siku na siku. Hlawula nkarhi lowu faneleke, wo tanihi nkarhi wa swakudya swo fihlula, endzhaku ka ku lalela kumbe mi nga si ya eku etleleni, leswaku mi hlaya Bibele ni ku kambisisa tsalwa ra siku eka xibukwana lexi nge Ku Kambisisa Matsalwa. Swi endleni mukhuva wa ndyangu wa siku na siku.
3 Hi Ku Dyondza Kun’we Vhiki Na Vhiki: Dyondzo ya ndyangu ya Bibele yi fanele yi va mhaka ya ndyangu leyi tsakisaka vhiki na vhiki. Xirho xin’wana ni xin’wana xi fanele xi seketela dyondzo hi ku hlanganyela eka yona hi ku hiseka. Nhloko ya ndyangu yi fanele yi anakanyela swilaveko swa ndyangu loko yi hlawula mhaka leyi nga ta dyondziwa, siku, nkarhi ni ku leha ka dyondzo. Rhangisani dyondzo ya ndyangu eka xiyimiso xa vhiki. Mi nga pfumeleli swilo leswi nga nyawuriki swi mi kavanyeta.—Filp. 1:10, 11.
4 Tatana loyi hakanyingi a a beriwa tinqingho ekaya malunghana ni timhaka ta ntirho, a a hlomula ntambu ya riqingho hi nkarhi wa dyondzo ya ndyangu. Loko vanhu lava lavaka mpfuno va fika ekaya, a va rhambiwa leswaku va hlanganyela edyondzweni kumbe va yima kukondza dyondzo yi hela. Tatana loyi a tiyiseka leswaku ku nga vi na nchumu lowu kavanyetaka dyondzo ya ndyangu. Leswi swi ve ni nkucetelo lowukulu eka vana vakwe naswona bindzu rakwe na rona a ri humelela.
5 Swa tsakisa swinene loko swirho swa ndyangu swi tirhisana etimhakeni ta swilo swa moya! Ku endla matshalatshala ya hina hi ku tshembeka leswaku hi hlanganyela hi xitalo edyondzweni ya ndyangu ya Bibele ku ta hi tisela mikateko ya Yehovha.—Ps. 1:3.