Xiyimiso Xa Ndyangu, Xa Dyondzo Ya Ndyangu

¹ Nyiko leyikulu leyi u nga yi nyikaka vana va wena tanihi mutswari la nga Mukreste, i ku va dyondzisa ku rhandza Yehovha kukota leswi wena u n’wi rhandzisaka xiswona. Nyiko yoleyo u nga va nyika yona loko ‘u tshame endlwini ya wena’ u ri karhi u va fambisela dyondzo ya Bibele ya ndyangu ya vhiki ni vhiki. (Det. 6:5-7) Hambiloko u ri ni munghana wa vukati la nga riki mupfumeri, kumbe u tshama endyangwini lowu nga ni vukhongeri lebyi hambaneke, kumbe u ri mutswari la nga yexe, u nga va pfuna vana va wena leswaku va tshinela eka wena ni le ka Yehovha, hi ku fambisa dyondzo ya ndyangu ya nkarhi na nkarhi.

² Ndlela Leyi U Nga Sungulaka Ha Yona: I ku titoloveta ku hamba mi dyondza tanihi ndyangu. Loko u nga tiyiseki leswaku u nga yi khoma rini dyondzo leyi, ha yini mi nga buli hi mhaka leyi tanihi ndyangu? (Swiv. 15:22) Loko u ri ni vana lavatsongo, u nga ha tsakela ku va khomela tidyondzo to koma minkarhi yo hlayanyana evhikini. Kumisisa leswaku hi xihi xiyimiso lexi lulameleke ndyangu wa wena. Tsala nkarhi wa dyondzo exiyimisweni xa n’wina xa ndyangu, kutani u tiyimisela ku wu namarhela.

³ Xana mi nga dyondza yini? Van’wana va lunghiselela Dyondzo ya Buku ya Vandlha kumbe Dyondzo ya Xihondzo xo Rindza. Van’wana va hlaya rungula leri lunghiseleriweke swihlangi. Tata wa xijahatana ni xinhwanyatana xin’wana u te: “Nchumu wun’wana lowu endlaka dyondzo ya hina yi tsakisa vana vhiki ni vhiki, hileswaku hi tlanga drama ya leswi hi swi dyondzaka eka Buku Yanga Ya Timhaka Ta Bibele. Leswaku hi dyondza tindzimana tingani a hi swa nkoka, kambe xa nkoka i ndlela leyi va khumbekaka ha yona ni ndlela leyi va swi twisisaka ha yona leswi dyondziwaka.”

⁴ Dyondzani Vhiki Ni Vhiki: Dyondzo ya ndyangu yi fanele yi fambisiwa nkarhi na nkarhi, naswona swirho hinkwaswo swa ndyangu swi fanele swi yi langutela hi mahlo-ngati. Mi nga ha pfumelelana ni swiyimo loko swi ta emhakeni yo cinca siku ni nkarhi loko ko tshuka ku va ni swilo leswi a mi nga swi langutelanga. Nakambe minkarhi yin’wana ku nga laveka leswaku mi cinca leswi mi nga ta dyondza ha swona. Kambe ku cinca kwihi ni kwihi loku nga ha vaka kona a ku fanelanga ku kavanyeta xiyimiso xa dyondzo ya ndyangu nkarhi wo leha. Nhwanyana un’wana u ri: “Minkarhi hinkwayo loko nkarhi wa dyondzo ya hina wu cinciwa, Tatana a a wu tsala ephepheni ivi a wu namaketa enyangweni wa xigwitsirisi leswaku hinkwerhu hi ta wu tsundzuka.” Matshalatshala yo fana ni lawa ya leswaku mi khoma dyondzo ya ndyangu nkarhi na nkarhi ma bumabumeriwa hakunene! Loko mi ri karhi mi kurisa vana va n’wina “hi ku tshinya ni nkongomiso wa mianakanyo wa Yehovha,” mi komba leswaku mi rhandza vana va n’wina ni Tata wa hina la nge matilweni.—Efe. 6:4.