Tinhloko Ta Mindyangu—Vanani Ni Xiyimiso Xa Nkarhi Na Nkarhi Xa Timhaka Ta Moya
1 Hambileswi a hanyeke makume ya malembe etikweni ra Babilona leri a ri tele vugandzeri bya swikwembu swa hava ni manyala, Daniyele a a tiviwa a ri munhu la tirhelaka Yehovha “nkarhi hinkwawo.” (Dan. 6:16, 20) Xana a a byi khathalela njhani vumoya bya yena? Rungula ra Bibele ri kombisa leswaku a a ri ni ndlela leyinene yo hambeta a endla mintirho leyi fambisanaka ni vugandzeri bya ntiyiso. Hi xikombiso, a a tolovele ku khongela kanharhu hi siku a ri ekamareni rakwe ra le henhla. (Dan. 6:10) A swi kanakanisi leswaku a a ri ni xiyimiso xa ku endla ni timhaka tin’wana ta moya, to tanihi ku hlaya Nawu. Hikokwalaho, loko a langutane ni ndzingo lowu xungetaka vutomi bya yena, Daniyele a nga kalanga a tsekatsekisiwa eku tinyiketeleni ka yena eka Yehovha, naswona u ponisiwile hi singita.—Dan. 6:4-22.
2 Hilaha ku fanaka ni namuntlha, hi fanele hi lwela ku “hiteka nkarhi hinkwawo.” (Efe. 6:18) Misava leyi hi hanyaka eka yona “yi le hansi ka matimba ya lowo homboloka.” (1 Yoh. 5:19) Minkaneto kumbe miringo swi nga fika hi xitshuketa kutani swi veka ripfumelo ra hina endzingweni. Hi nkarhi wa nhlomulo lowukulu, malandza ya Xikwembu ma ta hlaseriwa swinene hi Gogo wa Magogo, naswona swi ta vonaka onge a ku na loyi a nga ta pona. Leswi swi ta lava leswaku hi tshemba Yehovha hi ku helela.—Ezek. 38:14-16.
3 “Xilotlelo xin’wana xa nkoka i ku endla leswaku ku hlaya ka Bibele, ku dyondza ni ku bula tanihi ndyangu swi va ndlela ya vutomi.” Sweswo swi vuriwe exinghenisweni xa drama ya ntsombano wa muganga wa 1998 leyi nge, “Mindyangu—Endlani Ku Hlaya Ka Bibele Ka Siku Ni Siku Ku Va Ndlela Ya N’wina Ya Vutomi!” Xi ye emahlweni xi ku: “Loko mindyangu yi landzela nongonoko wo tano nkarhi hinkwawo ni ku endla leswaku Bibele yi twisiseka, ntolovelo lowu wa ku hlaya Bibele wu nga pfuna ndyangu swinene. Wu engetela vutivi bya hina. Wu tiyisa ripfumelo ra hina. Wu hi komba vanhu lava hi nga va tekelelaka—vavanuna ni vavasati vo tshembeka va minkarhi ya khale—lava va nga hi khumbaka, va hi susumetela ku yimela ntiyiso.” Loko hi ri karhi hi kambisisa tindlela to hambana-hambana to simeka xiyimiso xa nkarhi na nkarhi xa timhaka ta moya, tinhloko ta mindyangu ti fanele ku vona loko ku ri ni ndlela yo karhi yo antswisa xiyimiso xa timhaka ta moya ta mindyangu ya tona.
4 Kambisisani Rito Ra Xikwembu Siku Na Siku: “Loko Mfumo wa Xikwembu wu fuma handle ko kavanyetiwa naswona ku rhandza ka xona ku endleka emisaveni hilaha ku endlekaka hakona etilweni, a ku nge vi na vanhu va tihanyi—e-e, hambi ku ri swiharhi—a swi nge ‘endli swo biha kumbe ku onha.’ (Esa. 11:9; Mat. 6:9, 10)” Marito wolawo a ma kumeka eka xibukwana lexi nge Ku Kambisisa Matsalwa Siku Ni Siku—2001 eka tinhlamuselo ta tsalwa-nkulu ra siku ra September 11. Xitsundzuxo lexi a xi khutaza hakunene! Tanihi nhloko ya ndyangu, xana u swi endla mukhuva ku kambisisa tsalwa ra Bibele ni tinhlamuselo ta rona siku na siku swin’we ni ndyangu wa wena? Leswi swa vuyerisa hakunene. Loko swi nga koteki ku hlengeletana swin’we nimixo, kumbexana mi nga swi endla hi nkarhi wun’wana eka siku rero. Tatana un’wana u te: “Nkarhi wa swakudya swa nimadyambu wu endle leswaku hi kota ku vulavurisana hi tsalwa ra Bibele siku ni siku.”
5 Loko ana se mi ri ni ndlela leyinene yo hambeta mi vulavurisana hi tsalwa ra siku tanihi ndyangu, mi endla kahle swinene. Kumbexana mi nga pfuneka swinene ni hi ku hlaya xiphemu xa Bibele hi nkarhi wolowo. Van’wana va titolovete ku hlaya ndzima hinkwayo leyi tsalwa ra siku ri tekiweke eka yona. Van’wana va hlaya buku yo karhi ya Bibele ku sukela eku sunguleni ku ya fika emakumu ka yona. Ku hlaya Bibele siku na siku swi ta pfuna ndyangu wa wena leswaku wu va ni moya wa ku chava ku hlundzukisa Yehovha, naswona swi ta endla leswaku wu tiyimisela swinene ku endla ku rhandza ka yena.—Det. 17:18-20.
6 Xiyimiso xa ndyangu wa wena xa ku hlaya Bibele ni ku kambisisa tsalwa ra siku xi ta vuyerisa swinene loko mi heta timinete ti nga ri tingani mi vulavurisana hi ndlela leyi mi nga ri tirhisaka ha yona rungula leri mi ri dyondzeke. Buku leyi nge Xikolo Xa Vutirheli, eka tluka 60, yi nyikela swiringanyeto leswi: “Mi nga ha hlawula tindzimana ti nga ri tingani eka ku hlaya ka Bibele loku vekeriweke vhiki rero, mi nyikela nhlamuselo ya tona kutani mi vutisa swivutiso swo fana ni leswi: ‘Xana rungula leri ri hi nyika nkongomiso hi ndlela yihi? Hi nga ti tirhisa njhani tindzimana leti ensin’wini? Xana ti paluxa yini hi Yehovha ni ndlela yakwe ya ku endla swilo naswona ti hi pfuna njhani leswaku hi n’wi tlangela?’” Ku vulavurisana ko tano hi timhaka ta moya ku ta mi pfuna hinkwenu endyangwini leswaku mi ‘hambeta mi twisisa leswi ku rhandza ka Yehovha ku nga swona.’—Efe. 5:17.
7 Dyondzo Ya Ndyangu: Ku fambisa dyondzo ya ndyangu vhiki rin’wana ni rin’wana i swa nkoka eka tinhloko ta mindyangu leswaku ti dyondzisa vana va tona leswaku swilo swa moya hi swona swi faneleke swi rhanga emahlweni. Jaha rin’wana ri te: “Minkarhi yin’wana Tatana a a vuya hi le ntirhweni a karhele swinene lerova swi n’wi tikela ku tshama a pfule mahlo, hambiswiritano dyondzo ya ndyangu a yi khomiwa naswona leswi swi hi pfune ku twisisa nkoka wa yona.” Vana na vona va nga hoxa xandla leswaku lunghiselelo leri ri humelela. Ndyangu wun’wana lowu a wu ri ni vana va kaye a wu pfuka hi awara ya ntlhanu wu va ni dyondzo ya ndyangu hikuva a ku nga ri na nkarhi wun’wana lowu a wu ta tirhisa wona.
8 Leswaku dyondzo ya ndyangu yi humelela, nhloko ya ndyangu yi fanele yi ‘nyikela nyingiso lowu hambetaka eku dyondziseni ka yona.’ (1 Tim. 4:16) Buku leyi nge Xikolo Xa Vutirheli eka tluka 32, yi ri: “Ku nga ha vuriwa leswaku dyondzo leyi humelelaka ya ndyangu yi sungula hi ku dyondza ni ndyangu wa wena n’wini. Xana swirho swa ndyangu wa wena swi endla nhluvuko wo tanihi kwihi emoyeni? . . . Loko u ri evutirhelini bya le nsin’wini ni vana va wena, xana va ntshunxekile ku titivisa leswaku i Timbhoni ta Yehovha eka tintangha ta vona? Xana va ri tsakela lunghiselelo leri u ri endleke ra leswaku ndyangu wu hlaya Bibele ni ku dyondza? Xana hakunene va endla tindlela ta Yehovha ti va tindlela leti va hanyaka ha tona? Ku xiyisisa hi vukheta ku ta paluxa leswi wena tanihi nhloko ya ndyangu u faneleke ku swi endla leswaku u simeka ni ku aka timfanelo ta moya eka xirho xin’wana ni xin’wana xa ndyangu.”
9 Minhlangano Ya Vandlha: Ku lunghiselela ni ku ya eminhlanganweni ya vandlha ku fanele ku va nchumu wa nkoka lowu mi wu endlaka vhiki na vhiki. (Hev. 10:24, 25) Minkarhi yin’wana, mi nga ha kota ku lunghiselela minhlangano yin’wana ya vandlha tanihi ndyangu. Ematshan’weni yo lunghiselela hi ku tsutsumisa nkarhi, xana mi nga hlela ku lunghiselela ka ha ri ni nkarhi wo tala? Ku endla sweswo nkarhi na nkarhi hi ndlela leyi hlelekeke swi ta pfuna ku antswisa ndlela leyi mi lunghiselelaka ha yona naswona mi ta vuyeriwa swinene eminhlanganweni.—Swiv. 21:5.
10 Xiyimiso lexinene xa timhaka ta moya xi fambisana ni ku tivekela pakani yo endla swilo swo karhi nkarhi na nkarhi. Ku vuriwa yini loko swiyimo swi ku kavanyeta ku lunghiselela minhlangano hinkwayo? Buku leyi nge Xikolo Xa Vutirheli eka tluka 31, yi nyikela xiringanyeto lexi nge: “Papalata ntlhamu wa ku hlaya rungula rero hi rivilo ntsena leswaku u va u hlayile, kumbe swo biha ku tlurisa, ku tshika u nga dyondzi nchumu hikwalaho ka leswi u nga swi kotiki ku endla tano. Ematshan’wini ya sweswo, vona leswaku u nga kota ku dyondza rungula ro tanihi kwihi kutani u ri dyondza kahle. Endla tano vhiki rin’wana ni rin’wana. Hi ku famba ka nkarhi, lwela ku ndlandlamuxa dyondzo ya wena yi katsa ni minhlangano leyin’wana.”
11 Loko mindyangu yi fika eminhlanganweni ka ha ri ni nkarhi, sweswo swi endla leswaku mianakanyo ya yona yi lunghekela ku dzunisa Yehovha ni ku langutela ku vuyeriwa eka vuleteri lebyi a byi nyikelaka. Xana ndyangu wa wena wa swi endla leswi? Swi lava ku kunguhatiwa kahle naswona swirho hinkwaswo swa ndyangu swi fanele swi khomisana emhakeni leyi. Loko u xiya leswaku ndyangu wa wena wu tshama wu ri eku tsutsumeni naswona wa tshikileleka loko mi ya eminhlanganweni nimadyambu, xana mi nga cinca xiyimiso xa n’wina? Xana ku ni leswi mi nga swi endlaka ka ha ri emahlweni? Loko xirho xin’wana xa ndyangu xi ri ni swo tala swo swi endla, xana van’wana va nga xi pfuna? Xana ku tshikileleka ku nga hunguteka loko hinkwenu mi va mi lungheke khale loko ku fika nkarhi wo suka? Ku hleleka swi engetela moya wa ku rhula endyangwini ni le vandlheni.—1 Kor. 14:33, 40.
12 Ntirho Wa Nsimu: Ku tivekela minkarhi yo ya ensin’wini i ndlela yin’wana yo tiendlela xiyimiso lexinene xa timhaka ta moya. Jaha rin’wana leri vuriwaka Jayson ri ri: “Eka hina, hi Mugqivela wun’wana ni wun’wana nimixo a ku yiwa entirhweni wa nsimu. Leswi swi ndzi pfune ngopfu hikuva loko ndzi hambeta ndzi ya ensin’wini a ndzi ya ndzi vona vuyelo lebyinene naswona a ndzi ya ndzi tsakela nsimu.” Vo tala lava kuleleke emindyangwini ya Timbhoni na vona va vule leswaku ku tivekela nkarhi wo karhi wo ya ensin’wini vhiki rin’wana ni rin’wana swi va pfune ku endla nhluvuko tanihi vatirheli lava nga Vakreste.
13 Xiyimiso lexinene xi nga tlhela xi pfuna leswaku ndyangu wa wena wu va ni nkarhi lowunene ni lowu vekaka mihandzu evutirhelini bya nsimu. Xana leswi swi nga endliwa njhani? Xihondzo xo Rindza xa July 1, 1999, eka tluka 21, xi nyike xiringanyeto lexi landzelaka: “Xana mi pfa mi tirhisa nkarhi wa dyondzo ya n’wina ya ndyangu leswaku mi pfuna swirho swa ndyangu wa n’wina swi lunghiselela ntirho wa nsimu wa vhiki rero? Ku endla tano swi nga pfuna swinene. (2 Timotiya 2:15) Swi nga pfuna ku endla leswaku ntirho wa vona wu va ni xikongomelo naswona wu humelela. Minkarhi yin’wana mi nga tirhisa nkarhi hinkwawo wa dyondzo ya ndyangu mi lunghiselela ntirho wa nsimu. Hakanyingi timhaka ta vutirheli bya nsimu mi nga vulavula ha tona eka mabulo yo koma emakumu ka dyondzo ya ndyangu kumbe hi nkarhi wun’wana evhikini.” Xana ndyangu wa wena wu swi ringetile leswi?
14 Hambeta U Endla Nhluvuko: Emhakeni leyi, xana u ku xiyile laha ndyangu wa wena wu endlaka kahle kona? Wu bumabumele kutani u ringeta ku wu pfuna ku endla nhluvuko hi ku tirhisa xisekelo xa swilo leswinene leswi wu swi endlaka. Loko u vona leswaku ku ni swilo swo hlayanyana leswi wu faneleke wu antswisa eka swona, hlawula xin’we kumbe swimbirhi ku sungula kutani u wu pfuna eka swona. Loko se swi nghene kahle exiyimisweni xa n’wina xa timhaka ta moya, hlawula xin’wana kumbe swimbirhi leswi lavaka ku lulamisiwa. Vana ni langutelo lerinene naswona u anakanyela. (Filp. 4:4, 5) Ku va ni xiyimiso lexinene xa timhaka ta moya endyangwini swi lava matshalatshala lamakulu, kambe swa fanela ku ma endla, hikuva Yehovha wa hi tiyisekisa a ku: “Loko ku ri la hlayisaka ndlela leyi vekiweke, ndzi ta endla leswaku a ponisiwa hi Xikwembu.”—Ps. 50:23.