Hambetani Mi Famba Hi Mukhuva Lowu Hlelekeke
1 Muapostola Pawulo a a ri ni rirhandzu ro hlawuleka eka vandlha ra le Filipiya, leri a tirhisiweke ku ri vumba. U tlangele malunghiselelo ya vona ya musa ya swilo leswi vonakaka kutani a vula leswaku va veka xikombiso lexinene.—2 Kor. 8:1-6.
2 Papila ra Pawulo eka Vafilipiya a ri susumetiwa hi rirhandzu lerikulu. Buku leyi nge Insight, Vholumo 2, tluka 631, ya vika: “Epapileni hinkwaro u khutaza vandlha ra Vafilipiya leswaku ri hambeta ri famba endleleni ya rona leyinene—ri namarhela swinene Rito ra vutomi, ripfumelo leri tiyeke, ni ntshembo wa hakelo leyi taka.” Va hlamule kahle, va tiyisa xiboho xa rirhandzu exikarhi ka vona ni muapostola. Marito ya Pawulo i ya nkoka swinene eka hina namuntlha, ma hi nyika xivangelo lexinene xo anakanyisisa kahle xikhutazo xakwe, ngopfu-ngopfu lexi tsariweke eka Vafilipiya 3:15-17.
3 Langutelo Leri Vupfeke Ra Mianakanyo I Ra Nkoka: Eka Vafilipiya 3:15, Pawulo u tsale tanihi wanuna loyi a nga ni ntokoto wa malembe. U bumabumele ku kula ka Vafilipiya emoyeni, a va khutaza tanihi Vakreste lava vupfeke lava nga ni langutelo lerinene ra mianakanyo. Ntsena loko langutelo ra vona ra mianakanyo ri kombisa ku titsongahata ni ku tlangela loku kombisiweke hi Yesu, va ta ya emahlweni va “pfumala nandzu, [va] va lava tengeke, [va] va vana va Xikwembu lava nga riki na xisandzu . . . , [va] namarhela Rito ra vutomi.” (Flp. 2:15, 16) Loko hi hlaya marito ya Pawulo, ma fanele ma hi khumba ku fana na loko a vulavula na hina. Xisweswo hi tikarhatela ku va ni langutelo ra mianakanyo leri fanaka ni leri Yesu a a ri na rona ni ku kombisa ku ma tlangela swinene malunghelo ya hina. Hi ya emahlweni hi kombela Yehovha hi xikhongelo, hi kombela ku pfuniwa emhakeni leyi ni le ka tin’wana.—Flp. 4:6, 7.
4 Hi laha Vafilipiya 3:16 yi kombisaka ha kona, hinkwerhu ka hina hi fanele ku tikarhatela ku endla nhluvuko. Rito leri nge “nhluvuko” ri vula “ku ya emahlweni, ku antswisa.” Vanhu lava hluvukaka va “tsakela mianakanyo leyintshwa, swilo leswintshwa kumbe malunghelo.” Pawulo a a lava leswaku Vafilipiya va twisisa leswaku Vukreste a byi yimi ndhawu yin’we ni leswaku lava va tivulaka vanamarheli va byona va fanele ku hambeta va ya emahlweni. Ku navela ka vona ku ya emahlweni ku ta tikomba hi ku tiyimisela ku tikambela, ku pfumela ku tsana ka vona, ni ku lwela ku fikelela malunghelo ya ku endla leswi engetelekeke kumbe ku antswisa xiyimo xa leswi va swi endlaka. Namuntlha nhlengeletano ya Yehovha ya laha misaveni yi hambeta yi ya emahlweni, yi ndlandlamuxa mpimo wa yona wa ntirho ni ku twisisa ka yona Rito ra Xikwembu. Un’wana ni un’wana wa hina u fanele ku fambisana na yona, a tirhisa hinkwaswo leswi yi swi nyikelaka ni ku hlanganyela hi xitalo entirhweni wa yona.
5 Nhluvuko Wu Lava Ku Famba Hi Mukhuva Lowu Hlelekeke: Pawulo u ye emahlweni a khongotela vamakwavo vakwe leswaku va hambeta va ‘famba hi mukhuva wun’we.’ (Flp. 3:16) Ku va lava fambaka hi nawu swi lava leswaku hi veka vanhu kumbe swilo etindhawini ta swona malunghana ni vuxaka bya hina na vona, ni ku va ni mahanyelo lamanene. Vakreste va le Filipiya va tiveke endhawini ya vona, va tshinelelana na nhlengeletano ya Yehovha ni hi xivona. Vutomi bya vona a byi fumiwa hi nawu wa rirhandzu. (Yoh. 15:17; Flp. 2:1, 2) Pawulo u va khongotele leswaku “mahanyelo ya [vona] ma fanele ku fambelana ni Evhangeli.” (Flp. 1:27) Xilaveko xa ku famba hi nawu ni mahanyelo lamanene xa ha ri xa nkoka hi laha ku fanaka eka Vakreste namuntlha.
6 Mukhuva i ndlela leyi munhu a titoloveteke yona. Xisweswo yi fambelana swinene ni ndlela ya ntolovelo yo endla swilo. Ku va ni mukhuva swi nga hi pfuna hikuva a hi nge boheki ku yima ni ku ehleketa loko hi endla swiboho mayelana ni goza leri landzelaka—hi ta va se hi simeke ntila wo wu landzela hi ku susumetiwa hi mukhuva.
7 Mukhuva wa le tilweni lowu hlelekeke wu katsa swiyimo ni ntolovelo lowunene, lowu vuyerisaka, lowu kombisaka ku chava Xikwembu—hi xikongomelo xo tiaka emoyeni, ku pfuna van’wana, naswona, loko swi koteka, hi endla swo tala entirhweni wa Yehovha. Ku fikelela tipakani leti, swi lava ku simeka ni ku hlayisa mukhuva lowu katsaka dyondzo ya munhu hi xiyexe, ku va kona eminhlanganweni nkarhi na nkarhi ni ku hlanganyela entirhweni wo chumayela.
8 Swin’wana Swa Nkoka Leswi Lavekaka Loko U Famba Hi Mukhuva Lowu Hlelekeke: Xin’wana xa nkoka i “vutivi ni ku twisisa loku hetisekeke.” (Flp. 1:9) Dyondzo ya munhu hi xiyexe yi entisa ripfumelo ra hina, ri tiyisa ku tlangela ka hina ntiyiso ni ku hi susumetela ku endla mintirho leyinene. Hambi swi ri tano, van’wana va kuma swi nonon’hwa ku fambisana ni mukhuva wa vona wo dyondza. Xin’wana xa swivangelo-nkulu leswi nyikeriwaka i ku pfumaleka ka nkarhi.
9 Mpfuno wo hlaya Bibele siku na siku a wu nge tshameli ku vuriwa. Swiletelo swa yona swi “pfuna” hi tindlela hinkwato. (2 Tim. 3:16, 17) Xana hi nga wu kuma njhani nkarhi wo dyondza Bibele evuton’wini bya hina bya siku na siku? Van’wana va kume leswaku va nga pfuka wa ha ri mixo swinene siku na siku, loko mianakanyo ya vona ya ha xalamukile. Van’wana va kume leswaku va endla kahle hi ku hlaya timinete ti nga ri tingani va nga si ya eku etleleni. Vavasati lava nga ekaya dyambu hinkwaro va nga ha tivekela xinkarhana etlhelo ni ndzhenga van’wana va nga si vuya entirhweni kumbe exikolweni. Ku tlhandlekela eku hlayeni ka Bibele nkarhi na nkarhi, van’wana va katsa na buku leyi nge Vahuweleri exiyimisweni xa vona xo dyondza xa vhiki na vhiki.
10 Loko hi simeka maendlelo lamantshwa, swi nga endleka leswaku ma lwisana ni layo sungula. Enkarhini lowu hundzeke hi nga ha va hi vile ni mboyamelo wo pfumelela mintirho leyi nga riki ya nkoka yi dya nkarhi lowu nga kona. A swi olovi ku huma entileni wolowo. Ku hava munhu loyi a nga ta hi lerisa mayelana ni mukhuva wa hina wo dyondza; naswona a hi boheki ku tihlamulela eka leswi hi swi endlaka emhakeni leyi. Leswaku mukhuva wa hina wo dyondza wu famba kahle swi titshege ngopfu hi ku tlangela ka hina ka “leswi nga swinene ku tlula swin’wana” ni ku tiyimisela ka hina ku londzovota “nkarhi lowu [hi] nga na wona” leswaku hi vuyeriwa eka swona.—Flp. 1:10; Ef. 5:16.
11 Minhlangano ya Vukreste yi endla xiphemu xa nkoka eku kuleni ka hina hi tlhelo ra moya, yi nyikela vuleteri ni xikhutazo lexi pfunaka. Hikwalaho, ku va kona eminhlanganweni i xiphemu xin’wana xa nkoka xa mukhuva wa hina lowu hlelekeke. Pawulo u kandziyise nkoka wa leswi. A hi mhaka leyi munhu a nga tihlawulelaka eka yona.—Hev. 10:24, 25.
12 Xana nhleleko wu nga kombisiwa njhani loko hi kunguhata xiyimiso xa hina xa vhiki na vhiki xa ntirho? Van’wana va hlela minkarhi yo karhi yo khathalela timhaka ta vona kutani va ringeta ku nghenisa minhlangano etindhawini tihi ni tihi leti kumekaka, kambe swi fanele ku cinciwa. Minhlangano ya hina ya vhiki na vhiki yi fanele ku rhangisiwa emahlweni, kasi mintirho leyin’wana yi fanele yi kunguhateriwa ku endliwa hi nkarhi lowu nga kavanyetaniki ni wa minhlangano.
13 Ku va kona eminhlanganweni nkarhi na nkarhi swi lava ku kunguhatiwa kahle ni ntirhisano wa ndyangu. Exikarhi ka vhiki vo tala va hina hi ni xiyimiso xa mintirho yo tala lexi hi ntolovelo xi endlaka leswaku hi sala hi hlongorisa nkarhi. Leswi swi vula leswaku, loko swi koteka, swakudya swa ni madyambu swi fanele ku swekiwa wa ha ri nkarhi leswaku ndyangu wu ta va ni nkarhi lowu eneleke wo dya, ku lungheka, ni ku fika enhlanganweni wu nga si sungula. Emhakeni yoleyo swirho swa ndyangu swi nga tirhisana hi tindlela to hambana-hambana.
14 Ku hlanganyela entirhweni wa nsimu nkarhi na nkarhi i swa nkoka loko hi ta hambeta hi famba hi mukhuva lowu hlelekeke. Hinkwerhu ka hina hi wu vona kahle ndzhwalo wa hina wa nkoka wa ku chumayela rungula ra Mfumo. Sweswo hi swona swi hi endlaka Timbhoni ta Yehovha. (Esa. 43:10) Tanihi leswi wu nga ntirho wa xihatla ni lowu vuyerisaka swinene lowu endliwaka namuntlha, a hi fanelanga hi wu languta tanihi nchumu wa xiwelo exiyimisweni xa hina. Pawulo u tsundzuxile: “A hi humeseni magandzelo ha yena Yesu, hi dzunisa Xikwembu ha wona, hi ri karhi hi vonga vito ra xona hi marito lama humaka emilon’weni ya hina.”—Hev. 13:15.
15 Loko hi kunguhata mintirho ya hina ya vhiki na vhiki, hi fanele ku hlela minkarhi yo karhi ya ntirho wa nsimu. Hakanyingi vandlha ri ni minhlangano ya ntirho wa nsimu leyi lunghiseleriwaka minkarhi yo karhi vhiki na vhiki, naswona hina hi nga hlawula leswaku hi yihi leyi hi nga yi seketelaka. Swi ta va swinene ku lwela ku hlanganyela eka xiphemu xihi ni xihi xa ntirho, tanihi ku endla ntirho wa yindlu ni yindlu hi timagazini ni tibuku tin’wana, ku endla maendzo yo vuyela ni ku fambisa tidyondzo ta Bibele. Nakambe hi nga ha kunguhata ka ha ri emahlweni ku endla vumbhoni bya xitshuketa hi ku famba ni tibuku ni ku xalamukela minkarhi yo sungula mabulo. Tanihi leswi hi toloveleke ku huma ni van’wana, hi fanele ku va vutisa hi xiyimiso xa vona leswaku hi ta endla malunghiselelo lama nga ta fambelana ni ya vona.
16 Mukhuva wa hina wo chumayela wu fanele ku landzeriwa ku nga khathariseki ku honisiwa ensin’wini. Hi swi tiva ka ha ri emahlweni leswaku i vanhu va nga ri vangani lava nga ta hlamula kahle. (Mt. 13:15; 24:9) Ezekiyele a a lerisiwe ku chumayela vanhu lava ‘nga yingisiki, lava tiarisaka, lava nga ni timbilu leti nonon’hwaka.’ Yehovha u tshembise ku pfuna Ezekiyele hi ku “nonoṅhwisa ngohe ya [yena] leŝaku [a] lwa ni tingohe ta v̌ona,” leswi vulaka, “[a n’wi] ringanisa ni diaman, leŝaku [a] lwa na v̌ona.” (Ezek. 2:3, 4; 3:7-9) Hikwalaho xiyimiso xa nkarhi na nkarhi xa ntirho wa nsimu xi lava ku tiyisela.
17 Swikombiso Leswinene Swo Swi Tekelela: Vo tala va hina hi endla leswi antswaka entirhweni wa nsimu loko ku ri ni un’wana la rhangelaka. Pawulo ni vanghana vakwe va veke xikombiso lexinene, naswona u khongotele van’wana leswaku va n’wi tekelela. (Flp. 3:17) Mukhuva wakwe a wu katsa swilo hinkwaswo leswi a swi laveka leswaku a tihlayisa a tiyile emoyeni.
18 Ni namuntlha, hi katekisiwe hi swikombiso leswinene. Eka Vaheveru 13:7, Pawulo u khongoterile a ku: “Anakanyani vafambisi va n’wina, . . . ehleketani vutomi bya vona ni mahetelelo ya byona, mi landza ntila wa ku pfumela ka vona.” Kavula, Kreste i Xikombiso xa hina, kambe hi nga tekelela ripfumelo leri kombisiweke hi lava rhangelaka. Ku fana na Pawulo, vakulu va fanele ku xiya xilaveko xo va swikombiso leswinene eka van’wana. Hambi loko swiyimo swa vona swi hambana, un’wana na un’wana u fanele ku kombisa leswaku u hlayisa mukhuva lowu hlelekeke eku rhangiseni ka swilaveko swa Mfumo. Hambi loko va ri ni mintirho yo tihanyisa ni vutihlamuleri bya ndyangu, vakulu va fanele ku va ni mikhuva leyinene edyondzweni ya munhu hi xiyexe, ku va kona emihlanganweni ni ku rhangela entirhweni wa nsimu. Loko vakulu va kombisa leswaku va ‘fambisa mindyangu ya vona hi mukhuva lowunene,’ hinkwavo evandlheni va ta khutaziwa leswaku va hambeta va famba hi mukhuva lowu hlelekeke.—1 Tim. 3:4, 5.
19 Tipakani Ta Lembe Lerintshwa Ra Ntirho: Ku sungula ka lembe lerintshwa ra ntirho i nkarhi lowunene wo kombisa ku famba ka hina vini hi mukhuva lowunene. Xana mpfuxeto wa ntirho wa hina wa lembe leri hundzeke wu komba yini? Xana hi kote ku hlayisa, kumbe ku antswisa, mpimo wa hina wa ntirho? Hi nga ha va hi endle kahle swinene edyondzweni ya hina ya munhu hi xiyexe. Hi nga ha va hi nga xwanga eminhlanganweni kumbe hi engetele ntirho wa hina wa nsimu hi ku nghenela vuphayona bya nkarhinyana. Kumbexana hi nga ha kombisa swiendlo swin’wana swa tintswalo ta Vukreste leti hi ti kombiseke van’wana evandlheni kumbe endyangwini wa hina. Loko swi ri tano, hi nga tsaka hi ku va hi fambe hi ndlela leyi tsakisaka Xikwembu, naswona hi na xivangelo lexinene xo “kula [hi] ri karhi [hi] hanyisa sweswo.”—1 Tes. 4:1.
20 Ku vuriwa yini loko xiyimiso xa hina xi nga tshamisekanga kumbe xi ve xa xiwelo? Xana hi khumbeke njhani hi tlhelo ra moya? Xana nhluvuko wa hina a wu siveriwa hi xivangelo xo karhi? Ku antswisa ku sungula hi ku kombela mpfuno wa Yehovha. (Flp. 4:6, 13) Burisana ni ndyangu hinkwawo hi swilaveko swa wena, u kombela ku pfuniwa hi vona eku lulamiseni ka swiphemu swa xiyimiso xa wena. Loko u ri ni xiphiqo, kombela mpfuno eka vakulu. Loko hi endla matshalatshala ya xiviri naswona hi amukela nkongomiso wa Yehovha, hi nga tiyiseka leswaku hi ta papalata ku “phyam[a] kumbe ku pfumala mihandzu.”—2 Pet. 1:5-8.
21 Ku famba hi mukhuva lowu hlelekeke swi tisa mikateko leyi nga ta endla leswaku matshalatshala ya wena ma va lama faneleke. Eku tiyimiseleni ka wena ku hambeta u famba hi mukhuva lowu hlelekeke, “ku chivirika ka wena ku nga vohli, kambe [u] va ni ku hiseka emoyeni, [u] tirhela Hosi.” (Rhom. 12:11)—Leswaku u kuma rungula leri engetelekeke ra mhaka leyi, vona Xihondzo xo Rindza xa May 1, 1985, matluka 12-16.