Hambeta U Endla Nhluvuko eMoyeni!
Siku Leri Hi Khuvuriweke Ha Rona I Siku Leri Nkarhi Na Nkarhi Hi Faneleke Hi Ri Tlangela Ni Ku Ri Tsundzuka. Phela, I Siku Leri Ha Rona Hi Ti Tiviseke Erivaleni Leswaku Hi Tinyiketerile Ku Tirhela Xikwembu.
EKA vanhu vo tala swi lava matshalatshala lama xiyekaka leswaku va fikelela yinhla leyi—ku tshika mikhuva yo biha leyi ku nga khale va ri na yona, ku tshika vanghana vo biha, ku cinca mianakanyo ni mahanyelo lawa va ma toloveleke.
Hambiloko nkhuvulo wu ri xiendlakalo lexi xiyekaka ni lexi tsakisaka evuton’wini bya Mukreste, kambe ko va masungulo ntsena. Muapostola Pawulo u byele Vakreste lava khuvuriweke eYudiya a ku: “Leswi se hi tshikeke dyondzo ya masungulo malunghana na Kreste, a hi chivirikeleni eku wupfeni.” (Vaheveru 6:1) Ina, Vakreste hinkwavo va fanele va “fikelela vun’we eka ripfumelo ni le ka vutivi lebyi kongomeke bya N’wana wa Xikwembu, [va] va vanhu lava kuleke hi ku helela, hi mpimo wa vukulu lebyi nga bya ku tala ka Kreste.” (Vaefesa 4:13) Hi nga “tiyisiwa eripfumelweni” ntsena loko ho endla nhluvuko ku kondza hi fikelela ku wupfa.—Vakolosa 2:7.
Eka malembe ma nga ri mangani lama hundzeke, madzana ya magidi ya vagandzeri lavantshwa lava tinyiketeleke va nghene evandlheni ra Vukreste. Kumbexana u un’wana wa vona. Ku fana ni vamakwenu va lembe-xidzana ro sungula, a wu swi rhandzi ku tshama u ri ricece hi tlhelo ra moya. Wa swi lava ku kula, u endla nhluvuko! Kambe hi ndlela yihi? Naswona hi tihi tindlela tin’wana leti u nga ti tirhisaka leswaku u endla nhluvuko wo tano?
Ku Endla Nhluvuko Hi Ku Tirhisa Dyondzo Ya Munhu Hi Xiyexe
Pawulo u byele Vakreste le Filipiya a ku: “Leswi ndzi hambetaka ndzi swi khongelela hi leswi, leswaku rirhandzu ra n’wina ri ya ri andza ngopfu hi vutivi lebyi kongomeke ni ku twisisa loku heleleke.” (Vafilipiya 1:9) Ku kula hi “vutivi lebyi kongomeke” i swa nkoka eka nhluvuko wa wena wa moya. ‘Ku nghenisa vutivi hi Yehovha Xikwembu na Yesu Kreste’ i mhaka leyi yaka emahlweni, a hi nchumu lowu helaka endzhaku ka ku khuvuriwa.—Yohane 17:3.
Mukreste un’wana wa xisati loyi hi nga ta n’wi vitana Alexandra, u tsundzuke leswi loko se ku hundze malembe ya khume endzhaku ka ku khuvuriwa ka yena loko a ri ni malembe ya 16. A kurisiwe entiyisweni naswona nkarhi na nkarhi a va kona eminhlanganweni ya Vukreste ni ku hlanganyela etirhweni wo chumayela. Wa tsala: “Eka tin’hweti ti nga ri tingani leti hundzeke, ndzi anakanye leswaku a ku ri ni swin’wana swi nga fambangiki kahle. Ndzi ehlekete ku tikambisisa hi vutshembeki ni ndlela leyi ndzi titwisaka xiswona malunghana ni ntiyiso, ni leswaku hikwalaho ka yini ndzi tama ndza ha ri entiyisweni.” Xana u kume yini? U ya emahlweni: “Ndzi kume leswaku swivangelo swa mina swo va entiyisweni a swi ndzi kavanyeta. Ndzi tsundzuka leswaku loko ndza ha kula, minhlangano ni ntirho wa nsimu a swi kandziyisiwa. Kutani, a a swi tikomba onge ku va ni dyondzo ya munhu hi xiyexe ni xikhongelo a ku ri leswi a swi to tiendlekela hi swoxe. Kambe, ku te loko ndzi ri karhi ndzi kambisisa xiyimo xa mina, ndzi xiye leswaku sweswo a swi humeleli.”
Muapostola Pawulo wa khutaza: “Hi mpimo lowu hi endleke nhluvuko ha wona, a hi hambeteni hi famba hilaha ku hlelekeke eka ntila lowu fanaka.” (Vafilipiya 3:16) Ntila wo karhi wu nga hi pfuna leswaku hi ya emahlweni. A swi kanakanisi leswaku loko u nga si khuvuriwa, vhiki rin’wana na rin’wana a wu dyondza Bibele ni mudyondzisi la fanelekaka kahle. Loko ku tlangela ka wena ku kula, ku katse ku lunghiselela dyondzo ya vhiki rin’wana ni rin’wana, ni ku hlaya matsalwa lama kombisiweke eBibeleni, ni swin’wana. Ku sukela loko u khuvuriwile, xana u hambete u ‘famba hi ntila wolowo lowu fanaka’?
Loko swi nga ri tano, swi nga ha lava leswaku u tlhela u kambisisa leswi u faneleke u swi rhangisa, ‘u tiyiseka hi swilo swa nkoka swinene.’ (Vafilipiya 1:10) Leswi hi tshamaka hi khomekile, hi fanele hi tikhoma, hi tivekela nkarhi wa dyondzo ya munhu hi xiyexe etlhelo, ni wa ku hlaya Bibele. Kambe vuyelo bya kona i byikulu. Nakambe tsundzuka ntokoto wa Alexandra. Wa pfumela: “Ndzi nga ku ndzi ve entiyisweni ku ringana malembe ya 20 kumbe ku tlula, hi ku ya emihlanganweni ni ku hlanganyela evutirhelini bya nsimu ntsena.” Hambiswiritano, u ya emahlweni a hlamusela: “Ndzi fikelele makumu ya leswaku hambiloko swilo leswi swi ri swa nkoka, loko swi ri swoxe swi nga ka swi nga ndzi tiyisi loko timhaka to sungula ku nonon’hwa. Hinkwaswo leswi swi ve erivaleni loko mukhuva wa mina wa dyondzo ya munhu hi xiyexe wu nyamalala, ni swikhongelo leswi a swi nga ha endliwi nkarhi na nkarhi, swi ri swo hetisisa nawu ntsena. Sweswi ndza ehleketa leswaku ndzi fanele ku endla ndzulamiso wa mianakanyo ya mina ndzi tlhela ndzi sungula nongonoko wa dyondzo ya xiviri leswaku ndzi ta kota ku tiva Yehovha hakunene ni ku n’wi rhandza ndzi tlhela ndzi n’wi nkhensa hikwalaho ka leswi N’wana wakwe a hi nyikeke swona.”
Loko u lava mpfuno wo simeka ntila wa dyondzo ya munhu hi xiyexe leyi vuyerisaka, vakulu ni Vakreste van’wana lava wupfeke evandlheni ra ka n’wina va nga swi tsakela ku ku pfuna. Ku engetela kwalaho, swihloko leswi humelelaka eka Xihondzo xo Rindza xa May 1, 1995; August 15, 1993; na May 15, 1986 swi ni swiringanyeto leswi pfunaka.
Xilaveko Xa Ku Tshinela Ekusuhi Ni Xikwembu
Nchumu wun’wana lowu u faneleke u lwela ku wu antswisa, i vuxaka bya wena ni Xikwembu. Eswiyin’weni swin’wana ku nga ha va ni xilaveko lexikulu emhakeni leyi. Anakanya hi Mbhoni leyi vitaniwaka Anthony, loyi a khuvuriweke a ha ri tsongo. Wa hlamusela: “A a ndzi ri n’wana wo sungula ku khuvuriwa endyangwini wa ka hina. Endzhaku ka ku khuvuriwa ka mina manana u ndzi vukarhe hi ndlela yo kombisa nkhathalelo. A ndzi nga si tshama ndzi n’wi vona a tsakile. A ku ri ni ntsako lowukulu, naswona ndzi titwe ndzi ri ni matimba swinene.” Hambiswiritano, a ku katseka swin’wana emhakeni leyi. Anthony u ya emahlweni a ku: “Phela se a ku ri khale ku nga se tshama ku khuvuriwa vanhu lavatsongo evandlheni ra ka hina. Kutani a ndzi tinyungubyisa ngopfu hikuva wo sungula. Nakambe a ndzi hlamula ni ku nyikela tinkulumo hi ku tikukumuxa eminhlanganweni. Ku amukeriwa ni ku dzunisiwa hi vanhu a swi ri swa nkoka ngopfu eka mina ematshan’wini yo va ku dzunisiwa Yehovha. Hakunene a ndzi nga ri na byona vuxaka bya le kusuhi na yena.”
Ku fana na Anthony, van’wana va nga ha va va tinyiketele hi xikongomelo xo lava ku tsakisa van’wana ku ri ni ku tsakisa Yehovha. Hambiswiritano, Xikwembu xi langutela leswaku vanhu vo tano va hetisisa xitshembiso xa vona xa leswaku va ta xi tirhela. (Ringanisa Eklesiasta 5:4.) Kambe loko va nga ri na byona vuxaka bya le kusuhi ni Xikwembu, hakanyingi a swi olovi leswaku va endla tano. Anthony wa hlamusela: “Ntsako lowukulu lowu ndzi veke na wona endzhaku ka ku khuvuriwa wu nyamalarile. Loko na lembe ri nga si hela endzhaku ka loko ndzi khuvuriwile, ndzi wele exidyohweni lexikulu xisweswo a ndzi fanele ku tshinyiwa hi vakulu va vandlha. Hikokwalaho ko phindha-phindha eku tikhomeni loko biha ndzi hetelele ndzi susiwile eku hlanganyeleni ni vandlha. Endzhaku ka malembe ya ntsevu yo tinyiketela ka mina eka Yehovha, ndzi khomiwile ndzi tlhela ndzi pfaleriwa ekhotsweni hikwalaho ko dlaya.”
Ku Endla Vuxaka Lebyikulu Ni Xikwembu
Ku nga khathariseki xiyimo lexi u nga eka xona, Vakreste hinkwavo va nga angula eka xirhambo xa Bibele lexi nge: “Tshinelani eka Xikwembu, kutani xi ta tshinela eka n’wina.” (Yakobo 4:8) A swi kanakanisi leswaku a wu hlakulela mpimo wa ku tshinela ekusuhi ni Xikwembu loko u endla dyondzo ya Bibele ro sungula. U dyondzile leswaku Xikwembu a hi lexi nga twisisekiki tanihi xikwembu lexi gandzeriwaka hi Vujagana, kambe xi ni vito, i Yehovha. U tlhele u vona leswaku xi ni timfanelo leti xiyekaka, ku nga leswaku i “Šikwembu ša tintŝalo ni v̌unene, le’ši hlwelaka ku kariha, le’ši teleke tintŝalo ni ku ṭhembeka.”—Eksoda 34:6.
Hambiswiritano, leswaku u hanya hi ku pfumelelana ni ku tinyiketela ka wena ku tirhela Xikwembu, u fanele u titshineta ekusuhi swinene na xona! Njhani? Mupisalema u khongerile a ku: “Yehova! Nḍi kombe tindlela ta wena, U nḍi dyonḍisa mikhuv̌a ya wena.” (Pisalema 25:4) Dyondzo ya munhu hi xiyexe hi ku tirhisa Bibele ni minkandziyiso ya Sosayiti swi nga ku pfuna leswaku u tolovelana ku antswa na Yehovha. Ku endla xikhongelo lexi humaka embilwini nkarhi na nkarhi naswona i swa nkoka. Mupisalema wa khongotela: “Halatani timbilu ta ṅwina e mahlweni ka šona.” (Pisalema 62:8) Loko u vona swikhongelo swa wena swi hlamuriwa, u ta swi vona leswaku Xikwembu xa ku rhandza. Leswi swi ta ku endla u titwa u ri ekusuhi na xona.
Miringo ni swiphiqo naswona swi hi nyika nkarhi wa ku tshinela ekusuhi ni Xikwembu. U nga ha langutana ni mintlhontlho ni miringo ya ripfumelo yo tanihi vuvabyi, mintshikilelo ya le xikolweni na le mintirhweni, kumbe ku tikeriwa hi swiyimo swa timali. Nakambe swi nga ha endleka leswaku ntila lowu tolovelekeke wa swilo swa le tilweni, ku nga ku hlanganyela evutirhelini, ku ya eminhlanganweni kumbe ku dyondza Bibele ni vana va wena, swa ku nonon’hwela. U nga langutani ni swiphiqo swo tano u ri swaku! Kombela mpfuno eka Xikwembu ni nkongomiso wa xona. (Swivuriso 3:5, 6) Kombela moya wa xona lowo kwetsima! (Luka 11:13) Loko u ri karhi u kuma mpfuno eka Xikwembu, u ta ya u va ekusuhi swinene na xona. Swi hilaha mupisalema Davhida a hlamuselaka hakona a ku: “Nantŝani, mi v̌a mi v̌ona leŝaku Yehova i lo’nene . . . Ku katekile munhu l’a tšhav̌elaka ka yena.”—Pisalema 34:8.
Ku vuriwa yini hi Anthony? Wa tsundzuka: “Ndzi sungule ku ehleketa hi nkarhi lowu a ndzi ri ni tipakani to tala ta moya emianakanyweni, to lava ku endla ku rhandza ka Yehovha. Leswi a a swi vava hakunene. Kambe hambiloko ndzi ri karhi ndzi langutana ni ku khomisiwa tingana ni ku vaviseka, ndzi tsundzuke rirhandzu ra Yehovha. Swi ndzi tekele nkarhi emahlweni ko va ndzi kota ku khongela eka Yehovha, kambe leswi ndzi swi endlile, ndzi n’wi phofulele leswi nga embilwini ya mina, ndzi kombela ndzivalelo. Ndzi sungule ku hlaya Bibele, kambe ndzi hlamarisiwe ngopfu hi ndlela leyi a ndzi rivale swo tala ni ndlela leyi a ndzi tiva switsongo ha yona mayelana na Yehovha.” Hambileswi Anthony a a ri kusuhi ni ku heta xigwevo xakwe, u kume mpfuno eka Timbhoni ta kwalaho, xisweswo u le ndleleni yo tlhela a hlakarhela hi tlhelo ra moya. Ndza tlangela, ku vula Anthony: “Ndzi nkhensa Yehovha ni nhlengeletano yakwe, ndzi swi kotile ku hluvula munhu wa khale, kutani ndzi lwela ku ambala munhu lontshwa siku na siku. Sweswi vuxaka bya mina na Yehovha i bya nkoka swinene.”
Nhluvuko Wa Moya eVutirhelini Bya Wena
Yesu Kreste u lerise valandzeri vakwe leswaku va va vachumayeri va “mahungu lamanene ya mfumo.” (Matewu 24:14) Tanihi muhuweleri lontshwa wa mahungu lamanene, ntokoto wa wena evutirhelini wu nga ha va wu ri wutsongo. Kutani u ta wu endlisa ku yini nhluvuko leswaku u ta ‘hetisisa vutirheli bya wena hi xitalo’?—2 Timotiya 4:5.
Ndlela yin’wana i ku hlakulela langutelo lerinene. Dyondza ku languta ntirho wo chumayela wu ri “xuma,” wu ri lunghelo. (2 Vakorinto 4:7) I nkarhi wo kombisa rirhandzu ra hina ni vutshembeki eka Yehovha. Ntirho lowu wu tlhela wu hi pfumelela ku kombisa nkhathalelo eka vaakelani va hina. Ku nyika ko tano loku pfumalaka vutianakanyi ku nga ha hi tisela xihlovo xa ntsako wa ntiyiso.—Mintirho 20:35.
Yesu hi yexe a a ri ni vonelo lerinene hi ntirho wo chumayela. Ku avelana ntiyiso wa Bibele ni van’wana a swi fana ni “swakudya” eka yena. (Yohane 4:34) Lexi a xi n’wi endla a pfuna van’wana xi nga ha katsakanyiwa hi ku tirhisa marito yakwe lama nge, “Ndza swi lava.” (Matewu 8:3) Yesu a a ri ni ntwela-vusiwana eka vanhu, ngopfu-ngopfu lava a va “vavisiwile ni ku tsalangana” hikokwalaho ka misava ya Sathana. (Matewu 9:35, 36) Xana na wena wa “swi lava” ku pfuna lava va nga emunyameni hi tlhelo ra moya, lava lavaka ku voningeriwa hi Rito ra Xikwembu? Kutani u ta titwa u susumeteleka ku yingisa xileriso xa Yesu lexi nge: “Hikokwalaho fambani mi ya endla vanhu va matiko hinkwawo va va vadyondzisiwa.” (Matewu 28:19) Hakunene, u ta navela ku hlanganyela hi xitalo entirhweni lowu, hilaha rihanyo ni swiyimo swa wena swi ku pfumelelaka ha kona.
Xilotlelo xin’wana xo endla nhluvuko i ku hlanganyela nkarhi hinkwawo evutirhelini—vhiki rin’wana na rin’wana loko swi koteka. Ku endla tano swi nga herisa ku chava loku ku nga ha vaka kona eka loyi a ngo chumayela hi xitshuketa ntsena. Ku hlanganyela nkarhi hinkwawo entirhweni wa nsimu swi nga tlhela swi ku vuyerisa hi tindlela tin’wana. Swi ta engetela ku tlangela ka wena ntiyiso, swi kurisa rirhandzu leri u nga na rona ha Yehovha ni vaakelani, swi tlhela swi ku pfuna leswaku u rindzela Mfumo hi mahlo-ngati.
Kambe, ku vuriwa yini hiloko swiyimo leswi u nga eka swona sweswi swi ku sivela ku hlanganyela hi xitalo entirhweni wo chumayela? Loko swi nga koteki ku endla mindzulamiso, tiyiseka leswaku Xikwembu xa tsaka swinene hi ntirho wun’wana ni wun’wana lowu u kotaka ku wu endla, tsendze loko u wu endla hi moya-xiviri wa wena hinkwawo. (Matewu 13:23) Kumbexana u nga endla nhluvuko hi tindlela tin’wana, to tanihi ku antswisa vutshila bya wena byo chumayela. Evandlheni, Xikolo xa Vutirheli bya le Tilweni ni Nhlangano wa Ntirho swi nyikela ndzetelo wa kahle swinene emhakeni leyi. Hi ntolovelo, loko hi ri ni vutshila swinene evutirhelini, hi ta byi tsakela swinene naswona hi ta va ni vuyelo lebyinene.
Kutani ke, swi le rivaleni leswaku nhluvuko wa moya a wu fanelanga wu yima hi siku leri munhu a khuvuriwaka ha rona. Muapostola Pawulo u tsale leswi malunghana ni ntshembo wa yena wo kuma vutomi lebyi nga riki na ku fa ematilweni: “Vamakwerhu, a ndzi titeki se ndzi swi khomile; kambe ku ni xilo xin’we malunghana na swona: Ku rivala swilo swa le ndzhaku ni ku kokela emahlweni eka swilo swa le mahlweni, ndzi lwela ku fikelela pakani ya hakelo ya ku vitaneriwa ehenhla hi Xikwembu hi ku tirhisa Kreste Yesu. Kutani, leswi vo tala va hina hi wupfeke, a hi veni ni langutelo leri ra mianakanyo; naswona loko mi ri ni mboyamelo wa mianakanyo lowu hambaneke hi ndlela yihi na yihi, Xikwembu xi ta hlavutela langutelo leri nga laha henhla eka n’wina.”—Vafilipiya 3:13-15.
Ina, Vakreste hinkwavo, ku nga khathariseki leswaku ntshembo wa vona i wa ku nga fi ematilweni kumbe wa vutomi lebyi nga heriki eParadeyisini emisaveni, va fanele va ‘kokela emahlweni’—va tikarhata, leswaku va fikelela pakani ya vutomi! Ku khuvuriwa ka wena a ku ri masungulo lamanene, kambe a ko va masungulo ntsena. Hambeta u tikarhatela ku endla nhluvuko wa moya. Hi ku ya eminhlanganweni ni ku va ni dyondzo ya munhu hi xiyexe, vana “la kuleke hi ku helela ematimbeni ya ku twisisa.” (1 Vakorinto 14:20) Leswaku “hi rixaladza [u] swi kota ku twisisa hi mianakanyo . . . leswi nga ku anama ni ku leha ni ku tlakuka ni ku enta ka ntiyiso.” (Vaefesa 3:18) Nhluvuko lowu u nga ta wu endla, a wu nge ku pfuni leswaku u tshama u tsakile sweswi ntsena, kambe leswaku u tlhela u kuma ndhawu leyi hlayisekeke emisaveni leyintshwa ya Xikwembu, ehansi ka vulawuri bya Mfumo wa xona wa le tilweni, laha u nga ta kota ku endla nhluvuko lowu nga heriki!
[Xifaniso lexi nga eka tluka 29]
Swi lava ku tilaya leswaku u kuma nkarhi wa dyondzo ya munhu hi xiyexe
[Xifaniso lexi nga eka tluka 31]
Ku va ni langutelo lerinene swi nga hi pfuna leswaku hi kuma ntsako evutirhelini