Ku Pfuna Mindyangu

1. Mindyangu ya Vaisrayele a yi pfuneka njhani hi Savata ya vhiki ni vhiki?

¹ Ku hlayisiwa ka Savata a ku ri lunghiselelo ra Yehovha ra rirhandzu leri pfuneke mindyangu yo tala. Vaisrayele a va wisa eka mintirho ya vona leyi tolovelekeke naswona a va kuma nkarhi wo kombisa vunene bya Yehovha ni vuxaka lebyi va nga na byona na yena. Vatswari a va tirhisa nkarhi wolowo leswaku va dzikisa Nawu wa Yehovha etimbilwini ta vana va vona. (Det. 6:6, 7) Savata a yi nyika vanhu va Yehovha nkarhi wo anakanyisisa hi vuxaka bya vona na yena vhiki ni vhiki.

2. Xana Savata yi hi dyondzisa yini hi Yehovha?

² I ntiyiso leswaku Yehovha a nga ha langutelanga swona leswaku mindyangu yi hlayisa Savata. Kambe nawu wolowo wu hi dyondzisa swin’wana hi Xikwembu xa hina. Minkarhi hinkwayo a xi khathala hi vumoya bya vanhu va xona. (Esa. 48:17, 18) Ndlela yin’wana leyi Yehovha a yi tirhisaka namuntlha ku kombisa leswaku wa khathala, i ku tirhisa Vugandzeri bya Ndyangu bya nimadyambu.

3. Xana hi xihi xikongomelo xa Vugandzeri bya Ndyangu bya nimadyambu?

³ Hi Xihi Xikongomelo Xa Vugandzeri Bya Ndyangu Bya Nimadyambu? Hi January 2009, Dyondzo ya Buku ya Vandlha yi sungule ku khomiwa hi siku rin’we ni Xikolo xa Vutirheli bya le Tilweni ni Nhlangano wa Ntirho. Xivangelo xin’wana xa ku antswisiwa loku a ku ri ku nyika mindyangu nkarhi wo tiyisa vuxaka bya wona na Yehovha hi ku va yi tivekela siku ro karhi evhikini leswaku yi va ni vugandzeri bya ndyangu. Loko swi koteka, ndyangu wun’wana ni wun’wana wu khutaziwe leswaku wu va ni vugandzeri bya wona bya ndyangu hi siku leri a ku khomiwa dyondzo ya buku ya vandlha, wu va ni mabulo ya Bibele handle ko tsutsuma naswona wu dyondza rungula leri fambisanaka ni swilaveko swa ndyangu.

4. Xana vugandzeri bya ndyangu byi fanele byi teka awara yin’we ntsena? Hlamusela.

⁴ Leswaku hi va kona eka Dyondzo ya Buku ya Vandlha, a hi tivekela nkarhi wo ambala, wo famba ni wa swin’wana. Eka vo tala va hina, ku va kona eka nhlangano lowu, lowu a wo teka awara ntsena, a swi hi tekela nkarhi wa hina wo tala wa nimadyambu. Leswi ku antswisiweke xiyimiso xa hina xa minhlangano, sweswi madyambu wolawo hi nga ma tirhisela ku gandzela Yehovha tanihi ndyangu. Hikwalaho, Vugandzeri bya hina bya Ndyangu bya nimadyambu a byi fanelanga byi teka awara yin’we ntsena. Kambe hi fanele hi anakanyisisa hi swilaveko swa ndyangu kutani hi veka nkarhi lowu nga ta hi pfuna leswaku hi hetisisa xikongomelo xa Vugandzeri bya Ndyangu.

5. Xana ndyangu wu fanele wu heta nkarhi lowu hinkwawo wu dyondza swin’we? Hlamusela.

⁵ Xana Ndyangu Wu Fanele Wu Heta Nkarhi Lowu Hinkwawo Wu Dyondza Swin’we? Loko mimpatswa ni mindyangu leyi nga ni vana yi bula hi tinhloko-mhaka ta le Matsalweni swin’we, ya khutazana. (Rhom. 1:12) Ndyangu wu va ni vun’we. Hikwalaho, leswi ndyangu wu bulaka ha swona swi fanele swi va swi sekeriwe eMatsalweni. Kambe, xirho xin’wana ni xin’wana xa ndyangu xi fanele xi tinyika nkarhi wo va ni dyondzo ya munhu hi yexe. Hi xikombiso, endzhaku ko dyondza swin’we, ndyangu wu nga ha va swin’we loko xirho ha xin’we xi ya emahlweni xi tidyondzela, kumbexana xi hetisa ku lunghiselela minhlangano kumbe xi tihlayela timagazini. Mindyangu yin’wana yi tiboha ku va yi nga yi pfuleli thelevhixini eka madyambu wolawo.

6. Xana vugandzeri bya ndyangu byi fanele byi fambisiwa njhani?

⁶ Xana Dyondzo Yi Fanele Yi Fambisiwa Njhani? A swi bohi leswaku nkarhi ni nkarhi ku va bulo ra swivutiso ni tinhlamulo. Leswaku Vugandzeri bya Ndyangu byi va lebyi rhandzekaka ni lebyi tsakisaka, mindyangu yo tala yi endle leswaku xiyimiso xa yona xi fana ni xa dyondzo ya vandlha ya le xikarhi ka vhiki. Yi hlela leswi yi nga ta swi endla swi va swiyenge swo hlayanyana naswona yi swi dyondza hi tindlela to hambana. Hi xikombiso, yi nga ha dyondza Bibele swin’we, yi lunghiselela xiyenge xo karhi xa minhlangano ni ku titoloveta swingheniso swa ntirho wa nsimu. Tluka 6 ri ni swiringanyeto swin’wana.

7. I moya wihi lowu vatswari va faneleke va wu hlakulela?

⁷ Xana I Moya Wihi Lowu Vatswari Va Faneleke Va Wu Hlakulela? Ndyangu wa wena wu nga vuyeriwa swinene loko swirho hinkwaswo swi ntshunxekile. Loko maxelo ma mi pfumelela, mi nga dyondzela ehandle. Vanani ni nkarhi wo wisa loko swi fanerile. Mindyangu yin’wana yi va ni swo timula torha endzhaku ka xiyimiso. Hambileswi vatswari va nga ta papalata ku tirhisa nkarhi wa Vugandzeri bya Ndyangu bya nimadyambu leswaku va va tshinya, kambe nkarhi wun’wana va nga ha wu tirhisela ku lulamisa xiphiqo lexi nga kona. Hambiswiritano, swi nga va swinene leswaku loko ku ri ni n’wana loyi va lavaka ku n’wi tshinya hi timhaka to karhi, sweswo va swi endlela exihundleni hi siku rin’wana evhikini leswaku va nga n’wi khomisi tingana exikarhi ka vamakwavo. Vugandzeri bya Ndyangu a byi fanelanga byi phirha kumbe byi endla swirho swa ndyangu swi nga ntshunxeki, kambe byi fanele byi tsakisa tanihi leswi hi gandzelaka Xikwembu lexi tsakeke.—1 Tim. 1:11.

8, 9. Xana tinhloko ta mindyangu ti nga lunghiselela njhani?

⁸ Xana Nhloko Ya Ndyangu Yi Nga Lunghiselela Njhani? Ndyangu wu ta vuyeriwa swinene loko nhloko ya ndyangu yi lunghiselela Vugandzeri bya Ndyangu ka ha ri emahlweni, yi hlela leswi ku nga ta dyondziwa ha swona ni ndlela leyi swi nga ta dyondziwa ha yona. (Swiv. 21:5) Wanuna u ta va a endla kahle loko a bula ni nghamu yakwe hi mhaka leyi. (Swiv. 15:22) Tinhloko ta mindyangu, ha yini minkarhi yin’wana mi nga vutisi vana va n’wina malunghana ni leswi ku nga buriwaka ha swona? Loko mi endla tano, mi ta kota ku tiva leswi va swi rhandzaka ni leswi va karhataka.

⁹ A swi bohi leswaku nhloko ya ndyangu yi heta nkarhi wo leha vhiki ni vhiki yi lunghiselela. Ndyangu wu nga tiphina hi ku va ni swilo leswi wu nga ta swi endla vhiki ni vhiki, naswona a swi bohi leswaku nhloko ya ndyangu yi endla xiyimiso lexintshwa vhiki ni vhiki. Yi nga ha vona swi fanerile ku va yi lunghiselela loko va heta ku dyondza, hi nkarhi lowu ya ha swi tsundzukaka kahle swilaveko swa moya swa ndyangu wa yona. Tinhloko tin’wana ta mindyangu ti tsala leswi ku nga ta dyondziwa ha swona kutani ti swi nameka laha ndyangu wu nga ta swi vona, ku fana ni le xigwitsirisini. Leswi swi endla leswaku ndyangu wu byi langutela hi mahlo-ngati vugandzeri bya ndyangu naswona wu lunghiselela loko swi laveka.

10. Xana lava tshamaka va ri voxe va nga wu tirhisa njhani nkarhi wa Vugandzeri bya Ndyangu bya nimadyambu?

¹⁰ Ku Vuriwa Yini Hiloko Ndzi Hlanganyela Ndzi Ri Ndzexe? Lava tshamaka va ri voxe va nga tirhisa nkarhi wa Vugandzeri bya Ndyangu leswaku va va ni dyondzo ya munhu hi yexe. Xiyimiso lexinene xa dyondzo ya munhu hi yexe xi fanele xi katsa ku hlaya Bibele, ku lunghiselela minhlangano ni ku hlaya Xihondzo xo Rindza ni Xalamuka! Vahuweleri van’wana va katsa ni leswi landzelaka eka dyondzo ya vona ya munhu hi yexe. Minkarhi yin’wana va rhamba muhuweleri un’wana kumbe ndyangu wo karhi leswaku wu va na vona eka mabulo lama akaka ya le Matsalweni.

11, 12. Hi yihi mikateko yin’wana yo va ni Vugandzeri bya Ndyangu nkarhi na nkarhi?

¹¹ Xana Hi Vuyeriwa Njhani Hi Ku Va Ni Vugandzeri Bya Ndyangu Nkarhi Na Nkarhi? Lava va tinyiketelaka evugandzerini bya ntiyiso hi mbilu hinkwayo va tshinela eka Yehovha. Ku engetela kwalaho, mindyangu leyi gandzelaka swin’we yi tiyisa vun’we bya ndyangu. Malunghana ni mikateko leyi wu yi kumeke, mpatswa wun’wana wu tsale wu ku: “Tanihi mpatswa lowu nga maphayona lowu nga riki na vana, hi wu langutela hi mahlo-ngati nkarhi wa Vugandzeri bya Ndyangu bya nimadyambu. Leswi swi tiyisa ndlela leyi hi rhandzanaka ha yona naswona hi titwa hi ri ekusuhi ni Tata wa hina wa le tilweni. Loko hi pfuka hi siku leri hi hleleke leswaku hi dyondza swin’we, ha vutisana hi ku: ‘Xana hi ta endla yini madyambu ya namuntlha? Hi ta va ni Vugandzeri bya Ndyangu!’”

¹² Lunghiselelo ra vugandzeri bya ndyangu ri tlhela ri pfuna mindyangu leyi khomekeke. Manana un’wana la nga yexe loyi a kurisaka vana vambirhi va majaha naswona a nga phayona u tsale a ku: “Enkarhini lowu hundzeke, a hi nga yi khomi nkarhi na nkarhi dyondzo ya ndyangu. Leswi a swi vangiwa hi leswi a ndzi tshama ndzi karhele. A ndzi nga swi tivi leswaku ndzi nga yi nghenisa njhani eka xiyimiso xa mina. Hikwalaho, ndzi tsalela ku mi nkhensa swinene hikwalaho ka Vugandzeri bya Ndyangu bya nimadyambu. Sweswi se hi ni vugandzeri bya ndyangu nkarhi na nkarhi naswona bya hi pfuna.”

13. I yini leswi nga ta pfuna ndyangu wa wena leswaku wu vuyeriwa eka lunghiselelo leri?

¹³ Ku fana ni Savata, Vugandzeri bya Ndyangu i nyiko leyi humaka eka Tata wa hina wa le tilweni leyi nga ta pfuna mindyangu. (Yak. 1:17) Ndlela leyi mindyangu ya le Israyele a yi yi tlangela ha yona Savata, hi yona leyi a yi va pfuna leswaku va vuyeriwa hi tlhelo ra moya. Hilaha ku fanaka, ndlela leyi hi wu tirhisaka ha yona nkarhi lowu hi nyikiweke wona wa vugandzeri bya ndyangu hi wona lowu nga ta hi pfuna leswaku hi vuyeriwa. (2 Kor. 9:6; Gal. 6:7, 8; Kol. 3:23, 24) Hi ku ri tirhisa kahle lunghiselelo leri, ndyangu wa wena wu nga ha phindha marito ya mupisalema lama nge: “Kambe loko ku ri mina, ku tshinela eka Xikwembu i swinene eka mina. Ndzi veke vutumbelo bya mina eka Yehovha, Hosi leyi Lawulaka.”—Ps. 73:28.

[Marito lama tshahiweke exihlokweni lama nga eka tluka 5]

Vugandzeri bya Ndyangu a byi fanelanga byi phirha kumbe byi endla swirho swa ndyangu swi nga ntshunxeki, kambe byi fanele byi tsakisa tanihi leswi hi gandzelaka Xikwembu lexi tsakeke

[Bokisi leri nga eka tluka 6]

XI HLAYISE

Swiringanyeto Swin’wana Swa Vugandzeri Bya Ndyangu Bya Nimadyambu

Bibele:

• Hlayani swin’we xiyenge xa ku hlaya ka Bibele ka vhiki ni vhiki. Rungula rin’wana ra Bibele ri tsariwe hi ndlela leyi swi nga ha lavaka leswaku ku va ni muhlamuseri, kutani van’wana va hlaya marito ya vanhu lavan’wana.

• Encenyetani xiyenge xo karhi xa ku hlaya ka Bibele.

• Avelani xirho xin’wana ni xin’wana xa ndyangu leswaku xi tihlayela tindzima to karhi ta Bibele ka ha ri emahlweni naswona xi tsala xivutiso xin’we kumbe swimbirhi leswi xi veke na swona loko xi hlaya rungula ra kona. Kutani endlani ndzavisiso wa swivutiso swa n’wina hinkwenu mi ri swin’we.

• Vhiki rin’wana ni rin’wana tiendleleni makhadi lama nga ni tindzimana ta Bibele naswona mi ringeta ku ti nhlokohata ni ku ti hlamusela. Hlengeletani makhadi ya n’wina kutani mi ma pfuxeta vhiki ni vhiki ku vona leswaku hi wahi Matsalwa lawa mi ma tsundzukaka.

• Yingiselani rungula leri rhekhodiweke ra ku hlaya ka Bibele, mi ri karhi mi fambisana na rona eTibibeleni ta n’wina.

Minhlangano:

• Lunghiselelani minhlangano swin’we.

• Titoloveteni tinsimu ta Mfumo leti nga ta yimbeleriwa eka vhiki leri landzelaka.

• Loko un’wana a ri ni nkulumo eka Xikolo xa Vutirheli bya le Tilweni kumbe a ri ni nkombiso eka Nhlangano wa Ntirho, bulani hi ndlela leyi a nga wu nyikelaka ha yona kumbe mi wu pfuxeta tanihi ndyangu.

Swilaveko Swa Ndyangu:

• Kambisisani rungula leri nga eka buku leyi nge Swivutiso Leswi Vantshwa Va Swi Vutisaka kumbe eka leyi nge Dyondza Eka Mudyondzisi Lonkulu.

• Pfuxetani ndlela yo langutana ni xiyimo lexi talaka ku va kona exikolweni.

• Vanani ni nkombiso laha vatswari ni vana va cincanaka ku bula hi mhaka yo karhi. Vana va endla ndzavisiso wa mhaka yo karhi ivi va vulavurisana ni vatswari.

Nsimu:

• Titoloveteni swingheniso leswi mi nga ta swi tirhisa hi mahelo-vhiki.

• Bulani hi tipakani leti ndyangu wu nga ti vekelaka tona leswaku wu ndlandlamuxa ntirho wa nsimu hi nkarhi wa Xitsundzuxo kumbe hi minkarhi yo wisa.

• Nyikani xirho xin’wana ni xin’wana xa ndyangu nkarhi wo endla ndzavisiso wa ndlela yo hlamula swivutiso swo hambana-hambana leswi swi nga ha vutisiwaka ensin’wini, kutani mi kombisa ndlela leyi mi nga swi hlamulaka ha yona.

Swiringanyeto Leswi Engetelekeke:

• Hlayani swin’we swihloko swa timagazini leta ha ku humaka.

• Avelani xirho xin’wana ni xin’wana xa ndyangu ka ha ri emahlweni leswaku xi hlaya xihloko lexi xi tsakisaka eka timagazini leta ha ku humaka, ivi xi hlamusela leswi xi swi dyondzeke.

• Minkarhi yin’wana rhambani muhuweleri kumbe mpatswa wu va na n’wina hi nkarhi wa Vugandzeri bya n’wina bya Ndyangu naswona mi nga ha wu kombela leswaku wu mi byela mintokoto kumbe ndlela leyi wu wu kumeke ha yona ntiyiso.

• Hlalelani yin’wana ya tivhidiyo ta hina mi tlhela mi bula ha tona.

• Bulani hi xihloko lexi nge “Vantshwa Va Vutisa” kumbe “Swivutiso Swo Pfuxeta Ha Swona eNdyangwini” leswi nga eka Xalamuka!

• Bulani hi xihloko lexi nge “Dyondzisa Vana Va Wena” kumbe “Ta Vantshwa Va Hina” leswi nga eka Xihondzo xo Rindza.

• Hlayani mi tlhela mi bula hi xiyenge xo karhi xa Buku Ya Lembe ya sweswi kumbe hi yin’wana ya minkandziyiso leyi humesiweke entsombanweni wa muganga lowu wa ha ku hundzaka.

• Loko mi vuya hi le ntsombanweni kumbe enhlengeletanweni, pfuxetani tinhla-nkulu.

• Langutisisani ntumbuluko wa Yehovha mi tlhela mi bula hi leswi wu mi dyondzisaka swona hi yena.

• Endlani nchumu lowu hinkwenu mi nga ta va ni xiphemu eka wona, tanihi ku tlanga drama, ku kuma tindhawu emepeni kumbe chati.