Lunghiselela Xingheniso Xa Wena N’wini Xa Ku Fambisa Timagazini
1 Hi tlangela timagazini ta Xihondzo xo Rindza na Xalamuka! hikwalaho ka swihloko swa tona leswi nga enkarhini ni leswi dyondzisaka, leti vulavulaka hi timhaka hinkwato ta mahungu ya misava ni “swihundla leswi enteke swa Xikwembu.” (1 Kor. 2:10) Hi October, hi ta va hi fambisa swikhokhelo swa timagazini hatimbirhi. Hinkwerhu ka hina ha swi tsundzuka swilo swo tala leswintshwa leswi akaka leswi hi swi hlayeke eka timagazini leti, leti Yehovha a ti tirhisaka leswaku a hambeta a paluxa ntiyiso. (Swiv. 4:18) Hi lava ku hisekela ku ti hangalasa hi mpimo lowukulu hilaha swi nga kotekaka hakona.
2 Kambisisani Nsimu Ya N’wina: Xana i vanhu va muxaka muni lava tshamaka ensin’wini ya ka n’wina? Loko va ri vanhu lava tshamaka va khomekile, swi nga ha lava leswaku u lunghiselela xingheniso xo koma ni lexi baka nhloko ya mhaka. Loko u tirha ensin’wini leyi vanhu va kona va nga khomekangiki, u nga ha kota ku vula swo tala. Loko vini va miti va tirha ninhlikanhi, u nga ha humelela swinene loko u va endzela nindzhenga kumbe hi mpima-vayeni. U nga ha vulavula ni van’wana ninhlikanhi hi ku nyikela vumbhoni exitarateni kumbe eswitolo. Vahuweleri van’wana va kuma vuyelo lebyinene hi ku vulavula ni vanhu hi xitshuketa endhawini yo paka mimovha ni le mintangeni ya doroba.
3 Tolovelana Ni Timagazini: Hlaya nkandziyiso wun’wana ni wun’wana hi ku hatlisa loko wa ha ku wu kuma. Hlawula swihloko leswi u vonaka leswaku swi ta tsakisa vanhu ensin’wini ya ka n’wina. I timhaka tihi leti va karhatekaka ha tona? Languta yinhla leyi baka nhloko ya mhaka leyi u nga yi tshahaka eka xihloko lexi u kunguhataka ku kombisa xona. Anakanya hi xivutiso lexi u nga xi vutisaka leswaku u pfuxa ku tsakela. Hlawula tsalwa leri u nga ri hlayelaka n’wini wa muti loko u kuma nkarhi wo endla tano. Anakanya hileswi u nga ta swi vula leswaku u pfula ndlela ya riendzo ro vuyela.
4 Lunghiselela Leswi U Nga Ta Swi Vula Ro Sungula: Hlawula marito hi vukheta lawa u kunguhataka ku ma vula loko u titivisa leswaku u ta sungula bulo. Van’wana va humelerile loko va sungula hi marito lawa: “Ndzi hlaye xihloko lexi nyanyulaka eka magazini lowu, ndzi tsakela leswaku ni van’wana va xi hlaya.” Van’wana va sungula hi xivutiso lexi kongomisaka eka yinhla-nkulu leyi va tsakelaka ku vulavula ha yona. Hi xikombiso:
5 Loko u vulavulela xihloko lexi vulavulaka hi ku andza ka vugevenga, u nga ha vutisa u ku: ◼“Xana ku laveka yini leswaku hi kota ku etlela nivusiku handle ko chava ku tekeriwa swilo kumbe ku vavisiwa?” Hlamusela leswaku u ni rungula leri vulavulaka hi ntlhantlho wa xiphiqo lexi. Ntlhantlho lowu ku nga ri khale wu ta herisa mpfilumpfilu wihi na wihi wa timhaka ta ntshamisano. Hlamusela swin’wana leswi nga eka magazini leswi kombisaka ntshembo wo tano. Loko u tlhelela, u nga ha yisa nyingiso wa n’wini wa muti eka ndzima 1 ya buku leyi nge Vutivi.
6 Loko u kombisa xihloko lexi vulavulaka hi vutomi bya ndyangu, u nga ha vula leswi: ◼“Vatswari vo tala va kuma swi ri ntlhontlho ku kurisa ndyangu masiku lawa. Ku tsariwe tibuku to tala leti vulavulaka hi mhaka leyi, kambe hambi va ri vatshila va kanetana. Xana u kona la nga nyikelaka nkongomiso wo tshembeka?” N’wi byele nhlamuselo leyi baka nhloko ya mhaka leyi nga eka magazini leyi kombisaka ndzayo ya vutlhari leyi kumekaka eBibeleni. Loko u endla riendzo ro vuyela, bula hi dyondzo ya Matsalwa leyi vulavulaka hi ku kurisa vana leyi hlamuseriweke ebukwini leyi nge Vutivi, matluka 145-8.
7 Loko u vulavulela xihloko lexi vulavulaka hi xiphiqo xa ntshamisano, u nga ha vula leswi: ◼“Vanhu vo tala va titwa va tshikilelekile hikwalaho ka minkarhi leyo nonon’hwa leyi hi hanyaka eka yona. Xana u ehleketa leswaku Xikwembu a xi langutele leswaku hi hanya hi ndlela leyi?” N’wi kombe xihloko lexi kombisaka ndlela yo langutana ni swiphiqo swa namuntlha kumbe lexi nyikaka xivangelo xo languta emahlweni enkarhini lowu nga riki na swivilelo. Eriendzweni ra wena leri landzelaka, bula hi xifaniso ni marito ya xona eka matluka 4-5 ya buku leyi nge Vutivi, kutani u sungula dyondzo ya le kaya ya Bibele xikan’we-kan’we.
8 Titwananise Ni Xiyimo Xa N’wini Wa Muti: U ta hlangana ni vanhu lava tsakelaka swilo leswi nga faniki ni lava nga ni mindhavuko yo hambana-hambana. Lunghiselela xingheniso xa xisekelo lexi nga ta fambelana ni n’wini wa muti un’wana ni un’wana. Ehleketa hi leswi u nga ta swi vula loko u kuma wanuna, wansati, munhu la dyuhaleke kumbe muntshwa. Ku hava milawu leyi bohaka malunghana ni leswi u nga ta swi vula. Tirhisa leswi u swi kotaka, leswi vuyerisaka. Hambiswiritano, vulavula hi ku hiseka, swi huma embilwini naswona u va muyingiseri lonene. Lava ‘fanelekaka’ va ta vona ku tiyimisela ka wena naswona va ta angula kahle.—Mint. 13:48.
9 Pfunanani: Hi ku byelana mavonelo ya hina, hi dyondza tindlela letintshwa to tiphofula. Ku titoloveta swingheniso hi ri swin’we swi hi nyika ntokoto ni ku titshemba. (Swiv. 27:17) Loko mi pfuxeta leswi mi nga ta swi vula, mi ta titwa mi ntshunxekile ku vulavula loko mi fika emutini. I swa nkoka leswaku vatswari va heta nkarhi wo karhi va pfuna vana va vona ku lunghiselela swingheniso swa vona, va yingisela loko va ri karhi va titoloveta swingheniso swa vona, ni ku nyikela swiringanyeto swo antswisa. Vanhu lavantshwa va nga pfuneka loko va tirha ni vahuweleri lava nga ni ntokoto swinene.
10 A swi bohi leswaku ku lunghiselela xingheniso xa wena ku va mhaka yo nonon’hwa. Leswi lavekaka ntsena i ku tsundzuka leswi u nga swi vulaka kutani u swi hlamusela hi ndlela leyi tsakisaka. Hi ku teka goza ni ku anakanyisisa ka ha ri emahlweni, u nga endla xingheniso lexinene lexi nga ta kuma n’wangulo lowunene.
11 Ku hangalasa timagazini hi yin’wana ya tindlela ta nkoka to hangalasa rungula ra Mfumo emisaveni hinkwayo. Loko wo fambisa timagazini ta Xihondzo xo Rindza na Xalamuka! eka vanhu lava nga ni timbilu letinene, timagazini ti ta tivulavulela. Nkarhi na nkarhi tsundzuka nkoka wa tona ni ndlela leyi rungula ra tona ri nga ponisaka vutomi ha yona. Mukhuva lowu wa “ku endla leswinene ni ku pambulela van’wana” hi wona lowu tsakisaka Yehovha swinene.—Hev. 13:16.