Khutaza Swichudeni Swa Bibele Ku Endla Nhluvuko
1 Misava yi anakanya hi nhluvuko ngopfu-ngopfu hi langutelo ra vutshila kumbe ra swilo leswi vonakaka. Kambe vanhu va Yehova a va hi ndlela yoleyo. Ku ri na sweswo, hi tikarhatela leswaku hi va lava hluvukaka hi tlhelo ra moya. Ha tsaka leswi hi kumeke xikhutazo lexi hi kongomiseke leswaku hi va vadyondzisiwa va migingiriko ni lava tswalaka mihandzu va Kriste.—Yoh. 15:8; 2 Pet. 1:5-8.
2 Eka Tievhangeli rito leri nge “mudyondzisiwa” ngopfu-ngopfu ri tirhisiwa eka lava va nga pfumeriki tidyondzo ta Kriste ntsena, kambe va tlhela va ti landzela swinene. (Mat. 28:19, 20) Xana swichudeni swa Bibele swa yi twisisa mhaka yoleyo? Xana hi nga swi khutaza njhani ku endla nhluvuko leswaku swi va vadyondzisiwa?
KONGOMISA KU TSAKELA ENHLENGELETANWENI
3 Nhluvuko wa xichudeni wu hlangane swinene ni ku twisisa ka xona nhlengeletano ya Yehova. Hikwalaho, xiyenge xa vutihlamuleri bya hina tanihi vadyondzisi i ku kongomisa ku tsakela ka xichudeni enhlengeletanweni ya Xikwembu. Hi malembe layo tala hi khutaziwe ku nyikela timinete ta ntlhanu ku ya eka khume eka nkarhi wa dyondzo yin’wana ni yin’wana ya Bibele hi hlamusela swo karhi malunghana ni nhlengeletano. Broxara leyi nge Timbhoni Ta Yehova—Ti Endla Ku Rhandza Ka Xikwembu Hi Vun’we eMisaveni Hinkwayo yi nyikela xivumbeko lexinene xo endla leswi. Xana xichudeni xa wena xa Bibele xi na kopi leyi? Loko swi nga ri tano, endla leswaku a yi kuma hi ku hatlisa. N’wi khutazi ku yi hlaya ivi u n’wi hlamusela leswaku mi ta xiya xiyenge xo koma ntsena xa yona eka dyondzo yin’wana ni yin’wana.
4 Rungula leri nga eka matluka 14 na 15 ya broxara leyi nge Ti Endla Ku Rhandza Ka Xikwembu ri kunguhateriwe ku aka ku twisisa wun’wana ni wun’wana wa minhlangano ya bandlha. Ha yini mi nga hlanganisi ndzimana yin’we kumbe timbirhi vhiki rin’wana ni rin’wana? Kombisa ndlela leyi nhlangano wun’wana ni wun’wana wu nyikaka vuleteri ni dyondzo leswaku wu tata xilaveko xo karhi ha yona. Pfuna xichudeni ku vona leswaku ku kula ka moya ku vangiwa hi ‘ku hlengeletana ka hina kun’we.’ (Vahev. 10:24, 25) N’wi khutaze swinene ku hi joyina eHolweni ya Mfumo. Kwalaho u ta byi tokota hi yexe vun’we ni rirhandzu leri hi tiphinaka ha rona tanihi vanhu lava hlengeletaneke va Yehova.—Ps. 133:1; Yoh. 13:35.
PFUXA KU KULA EMOYENI
5 Vanhu lavantshwa va fanele ku va swichudeni swa xiviri swa Rito ra Xikwembu, va endla nhluvuko hi tlhelo ra vutivi, ku twisisa ni ku tirhisa misinya ya rona ya milawu. Hikwalaho ka leswi, hi ta hambeta hi dyondza buku leyi nge Hanya Hi Masiku na United in Worship kumbe buku leyi nge Ku Rhula Ka Ntiyiso hambi loko xichudeni xi khuvuriwa xi nga si heta tibuku leti. Xichudeni xi nga amukela tikopi ta tibuku leti hambi loko xi ta va xi nga lunghekelanga ku sungula ku dyondza buku ya vumbirhi eka tin’hweti ti nga ri tingani. Leswi swi nga kurisa ku navela ka yena ka swa moya, swi n’wi susumetela ku endla ku hlaya loku engetelekeke loku nga ta hatlisisa nhluvuko wa yena. Nakambe, hi fanele hi kombisa ntikelo wa ku va ni swikhokhelo swa Xihondzo xo Rindza ni Awake! ni ku kuma tibuku tin’wana ta Sosayiti leswaku va fambisana ni ‘mphamelo wa swakudya hi nkarhi lowu faneleke.’ (Luka 12:42) Lava va endlaka tano va ta dzima timitsu, va akeka ni ku tiyisiwa eripfumelweni.—Vakol. 2:7.
6 Tanihi vanhu lava languteriwaka ku va Timbhoni-kulorhi ta Yehova, swichudeni swa Bibele swi lava mpfuno wa hina loko swi ta kula swi va leswi vupfeke. (Vahev. 5:14) Hi fanele ku nyikela xibumabumelo lexi faneleke leswaku hi khutaza nhluvuko. (Vafil. 3:16) Xana u avelana swilo leswi a swi dyondzaka ni ndyangu ni lava a tolovelaneke na vona? Loko a faneleka, xana u joyine Xikolo xa Vutirheli bya le Tilweni? Xana wa swi navela ku va muhuweleri wa mahungu lamanene?
7 Loko hina tanihi vadyondzisi hi endla xiphemu xa hina, hi nga langutela nkateko lowu fuweke wa Yehova. (2 Vakor. 9:6) A hi fanelanga hi rivala matimba ya xikhongelo hikwalaho ka swichudeni swa Bibele. Kombela Yehova ku va kongomisa ku amukela leswi va swi dyondzaka. (1 Vakor. 3:6, 7) Onge va nga teka goza leri tiyeke ro va lava hlanganyelaka swinene na bandlha ivi xisweswo va engetela ku twala ni ku dzuneka kun’wana eka vito ra Yehova.