“Xana Ndzi Nga Swi Tivisa Ku Yini, Handle Ka Loko Ndzi Kongomisiwa Hi Un’wana?”
1 Loko Filipi, muvuri wa evhangeli a vutise mutsheniwa wa Muetiyopiya loko a twisisa leswi a a swi hlaya eRitweni ra Xikwembu, wanuna loyi u hlamule a ku: “Kunene, xana ndzi nga swi tivisa ku yini, handle ka loko ndzi kongomisiwa hi un’wana?” Filipi u tsakele ku n’wi pfuna leswaku a twisisa mahungu lamanene malunghana na Yesu, kutani wanuna loyi a hatla a khuvuriwa. (Mint. 8:26-38) Filipi a a yingisa xileriso xa Kreste xa ku ‘endla vanhu va matiko hinkwavo va va vadyondzisiwa, va khuvuriwa ni ku dyondzisiwa.’—Mat. 28:19, 20.
2 Hi fanele ku yingisa xileriso lexi xa ku endla vanhu va va vadyondzisiwa, hilaha Filipi a endleke hakona. Kambe eka vanhu lava hi dyondzaka na vona Bibele namuntlha, a swi tolovelekanga ku vona nhluvuko wa xihatla hi tlhelo ra moya wo fana ni lowu endliweke hi mutsheniwa wa Muetiyopiya. Wanuna yoloye, loyi a hundzukeleke evukhongerini bya Xiyuda naswona a ri ni vutivi bya Matsalwa, a a ri ni mbilu leyinene, kutani lexi a xi laveka eka yena a ku ri ku pfumela leswaku Yesu a a ri yena Mesiya la tshembisiweke. I ntlhontlho eka vanhu lava hi dyondzaka na vona loko va nga yi tolovelanga Bibele, va hambukisiwe hi tidyondzo ta vukhongeri bya mavunwa kumbe va tshikileriwe hi swiphiqo swa munhu hi xiyexe. I yini lexi nga ta hi pfuna leswaku hi humelela eku kongomiseni ka swichudeni swa Bibele leswaku swi tinyiketela ni ku khuvuriwa?
3 Xiya Swilaveko Swa Moya Swa Xichudeni Xa Bibele: Xiengetelo xa Vutirheli Bya Hina Bya Mfumo bya August 1998, xi hlamusele nkarhi lowu hi nga wu hetaka hi dyondza ni munhu, hi tirhisa broxara leyi nge Leswi Xi Swi Languteleke ni buku leyi nge Vutivi. Xi nyike nkongomiso lowu: “Swi fanerile leswaku hi pima mpimo lowu dyondzo yi fambaka ha wona hi ku ya hi swiyimo ni vuswikoti bya ntumbuluko bya xichudeni. . . . A hi fanelanga hi tsona xichudeni vutivi lebyi kongomeke hikwalaho ko hlongorisa nkarhi. Xichudeni xin’wana ni xin’wana xi lava xisekelo lexi tiyeke xa ripfumelo ra xona lerintshwa eRitweni ra Xikwembu.” Hikokwalaho, a hi vutlhari ku ringeta ku fambisa dyondzo hi rivilo ebukwini ya Vutivi, u ringeta ku yi chaputa hi tsevu wa tin’hweti. Vanhu van’wana va nga lava nkarhi lowu tlulaka tsevu wa tin’hweti leswaku va endla nhluvuko ku kondza va khuvuriwa. Loko u ri karhi u fambisa dyondzo vhiki na vhiki, tirhisa nkarhi lowu lavekaka hi ku ya hi swiyimo, leswaku u pfuna xichudeni xexo xi twisisa ni ku amukela leswi xi swi dyondzaka eRitweni ra Xikwembu. Eka swiyimo swin’wana, swi nga ha teka mavhiki mambirhi kumbe manharhu ku heta dyondzo yin’we ebukwini ya Vutivi. Sweswo swi ta ku nyika nkarhi lowu ringaneke wa ku hlaya ni ku hlamusela matsalwa yo tala lama nga tshahiwangiki.—Rhom. 12:2.
4 Kambe, ku vuriwa yini loko endzhaku ko heta buku ya Vutivi, u xiya leswaku matwisiselo ya ntiyiso ya xichudeni xa wena ma lava ku antswisiwa kumbe a xi si susumeteleka hi ku helela leswaku xi yimela ntiyiso kutani xi nyiketela vutomi bya xona eka Xikwembu? (1 Kor. 14:20) Hi swihi swin’wana leswi u nga swi endlaka leswaku u xi kongomisa endleleni leyi yisaka evuton’wini?—Mat. 7:14.
5 Enerisa Swilaveko Swa Moya Swa Xichudeni Xa Bibele: Loko swi ri erivaleni leswaku munhu yoloye u endla nhluvuko, hambiloko a wu endla hi ku nonoka, ni loko a tlangela leswi a swi dyondzaka, yana emahlweni u dyondza Bibele na yena hi buku yin’wana endzhaku ko heta broxara leyi nge Leswi Xi Swi Languteleke ni buku leyi nge Vutivi. Leswi a swi bohi eka xiyimo xin’wana ni xin’wana kambe loko swi laveka, yisa dyondzo yoleyo emahlweni hi ku tirhisa yin’wana ya tibuku leti landzelaka, Ku Rhula Ka Ntiyiso, Vun’we Eku Gandzeleni kumbe leyi nge Rito Ra Xikwembu. Loko vandlha ri nga ri na tona tibuku leti, vahuweleri vo tala va na tikopi ta vona vini. Tibuku leti ku nga endliwa xikombelo xa tona hi Xitsonga eka Sosayiti. Eka swiyimo hinkwaswo, broxara leyi nge Leswi Xi Swi Languteleke ni buku leyi nge Vutivi, ku ta tirhisiwa tona ku sungula. Dyondzo yoleyo ya Bibele, maendzo ya ku vuyela ni nkarhi lowu hetiweke yi fambisiwa swi ta vikiwa hambiloko xichudeni xexo xi khuvuriwa ku nga si hela buku ya vumbirhi.
6 Xana leswi swi vula leswaku lava va ha ku khuvuriwaka kambe va dyondze buku yin’we ntsena va fanele ku tlhela va dyondzeriwa buku ya vumbirhi? A swi bohi. Kambe swi nga endleka leswaku va horile kumbe a va endli nhluvuko entiyisweni, kutani va nga lava mpfuno leswaku va tirhisa ntiyiso hilaha ku engetelekeke evuton’wini bya vona. Vulavula ni mulanguteri wa ntirho emahlweni ko va u dyondza nakambe ni muhuweleri la khuvuriweke. Kambe, loko u tiva van’wana lava dyondzeke buku ya Vutivi enkarhini lowu hundzeke kambe va nga tinyiketelanga ni ku khuvuriwa, u nga rhandza ku va vutisa loko va nga tsakela ku tlhela va yisa dyondzo ya vona ya Bibele emahlweni.
7 Ku nyikela nyingiso lowukulu eka munhu un’wana ni un’wana la tsakelaka, loyi hi dyondzaka na yena i xikombiso xa rirhandzu ra Vukreste. Xikongomelo xa hina i ku pfuna xichudeni xexo xi va ni vutivi lebyi engetelekeke hi ntiyiso wa Rito ra Xikwembu. Kutani xi nga yimela ntiyiso hilaha ku tiyeke xi ri ni vutivi kutani xi nyiketela vutomi bya xona eka Yehovha, xi kombisa ku tinyiketela koloko hi ku khuvuriwa.—Ps. 40:8; Efe. 3:17-19.
8 Wa tsundzuka leswaku ku endleke yini endzhaku ka loko mutsheniwa wa Muetiyopiya a khuvuriwile? ‘U tifambele a tsakile’ a ri mudyondzisiwa lontshwa wa Yesu Kreste. (Mint. 8:39, 40) Onge hina ni lava hi humelelaka ku va kongomisa endleleni ya ntiyiso, hi nga kuma ntsako lowukulu loko hi ri karhi hi tirhela Yehovha Xikwembu—sweswi ni hilaha ku nga heriki!