“A Hi Nge Tshiki Ku Vulavula”
1 Yesu Kreste u wu kongomisa hi vukheta ntirho wa ku chumayela. (Mat. 28:20; Mar. 13:10) Hambileswi se ku nga ni vahuweleri lava hisekaka va kwalomu ka tsevu wa timiliyoni, lava nyikelaka vumbhoni ematikweni ya 234, hi nga tshuki hi tibyela leswaku se hi wu gimetile ntirho wa hina wa ku nyikela vumbhoni. Ku fikela loko Xikwembu xi vula leswaku se swi ringene, “a hi nge tshiki ku vulavula” hi swilo leswi hi swi dyondzeke.—Mint. 4:20.
2 Titshege Hi Moya Wa Xikwembu: Sathana u hi tshikilela ngopfu leswaku a hi heta matimba. (Nhlav. 12:17) Kasi ni nyama ya hina leyi nga hetisekangiki yi hi vangela swiphiqo swo tala. Swilo swo tano swi nga hambukisa nyingiso wa hina entirhweni wa ku chumayela, lowu nga wa nkoka ku tlula hinkwayo. Nilokoswiritano, loko hi tshemba Yehovha, moya wakwe wu ta hi pfuna ku langutana ni xihinga xin’wana ni xin’wana.
3 Loko vandlha ra Vakreste vo sungula ri hlaseriwa hi tihanyi, vamakwerhu va khongele Xikwembu leswaku xi va pfuna va hambeta va vula rito ra xona hi vurhena lebyi heleleke. Yehovha u hlamule xikhongelo xa vona, a va chululela moya wakwe ni ku va nyika matimba ni ku tiyimisela loku a ku laveka leswaku va hambeta va chumayela. Hikwalaho ka sweswo, va hambete va nga rhuteli, va chumayela mahungu lamanene hi xivindzi.—Mint. 4:29, 31; 5:42.
4 U Nga Chavisiwi Hi Mavulavulelo Lama Hetaka Matimba: Vonelo leri tolovelekeke kumbe ku hangalasiwa ka rihlevo lero biha swi nga endla leswaku hi chava. Kambe, tsundzuka marito lama kombisaka ku va ni xivindzi, lawa Petro ni vaapostola lavan’wana va ma byeleke Sanedri, lama tsariweke eka Mintirho 5:29-32. Hilaha Gamaliyele, mudyondzisi wa Nawu a vuleke hakona, ntirho wa Xikwembu a wu nge herisiwi. A wu endliwi hi matimba ya hina. Ntirho lowu lowukulu, wu seketeriwa hi Xikwembu kutani hi xona xi nga ta endla leswaku wu humelela!—Zak. 4:6.
5 Siku ni siku a hi kombeleni Yehovha a hi nyika moya wakwe leswaku wu hi pfuna hi hisekela ku chumayela mahungu lamanene. Ku fana na Yeremiya, onge hi nga vula leswaku rungula ra Mfumo ri fana ni ndzilo lowu hisaka emarhambyini ya hina. (Yer. 20:9) A hi nge wu pfali nomu!