Ku Kambisisa Ntirho Wa Xihatla Wa Ku Endla Vadyondzisiwa

¹ A nga si suka laha misaveni, Yesu u lerise valandzeri vakwe leswaku va “endla vanhu va matiko hinkwawo va va vadyondzisiwa.” Leswi a swi lava leswaku va sungula tsima lerikulu ra ku chumayela ni ku dyondzisa ni ku ndlandlamuxa ntirho wa vona emisaveni hinkwayo leyi akiweke. (Mat. 28:19, 20; Mint. 1:8) Xana xileriso lexi va xi langute xi ri ndzhwalo xi ri nchumu wo nonon’hwa ku wu endla? Muapostola Yohane a nga xi langutanga tano. Endzhaku ka loko a hete malembe ya 65 a ri muendli wa vadyondzisiwa, u tsarile: “Ku rhandza ka Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.”—1 Yoh. 5:3.

² Rhekhodo ya Matsalwa ya ntirho wa Vakreste vo sungula yi kombisa leswaku va endle ntirho wa vona wa ku endla vadyondzisiwa va Yesu Kreste hi xihatla lexikulu. (2 Tim. 4:1, 2) Leswi va swi endlile, ku nga ri ku hetisa nawu ntsena, kambe hikwalaho ka rirhandzu ni ku navela ka vona ku dzunisa Xikwembu ni ku byela van’wana ntshembo wa ku ponisiwa. (Mint. 13:47-49) Hikwalaho ka leswi hinkwavo lava veke vadyondzisiwa na vona va tlheleke va va vaendli va vadyondzisiwa, vandlha ra Vukreste ri kule hi ku hatlisa eka lembe-xidzana ro sungula.—Mint. 5:14; 6:7; 16:5.

³ Ntirho Wa Ku Endla Vadyondzisiwa Wu Hatlisisiwa: Ntirho lowukulu ku tlurisa wa ku endliwa ka vadyondzisiwa wa karhi wa endliwa eka lembe-xidzana leri ra vu-20! Ku fikela sweswi, timiliyoni ta vanhu ti amukele mahungu lamanene ni ku endla hi ku pfumelelana na wona. (Luka 8:15) Tanihi leswi fambiselo leri ra swilo ri heleriwaka hi nkarhi hi ku hatlisa, “hlonga ro tshembeka ni ro tlhariha” ri hi nyike switirho leswi endlaka leswaku vanhu va timbilu letinene va dyondza ntiyiso hi ku hatlisa.—Mat. 24:45.

⁴ Hi 1995 hi kume buku leyi nge Vutivi Lebyi Yisaka eVuton’wini Lebyi Nga Heriki, naswona hi 1996 yi landzeriwe hi broxara leyi nge I Yini Leswi Xikwembu Xi Swi Languteleke Eka Hina? Malunghana ni buku leyi nge Vutivi, Xihondzo xo Rindza xa January 15, 1996, tluka 14, xi te: “Buku leyi ya matluka ya 192 yi nga ha dyondziwa hi xinkarhana, naswona lava ‘hlawuleriweke vutomi lebyi nga heriki’ va nga kuma vutivi lebyi ringaneleke hi ku yi dyondza leswaku va tinyiketela eka Yehovha ivi va khuvuriwa.”—Mint. 13:48.

⁵ Xiengetelo xa Vutirheli Bya Hina Bya Mfumo bya June 1996, lexi nge “Ndlela Yo Endla Vadyondzisiwa Hi Buku Leyi Nge Vutivi,” xi hi nyike nkongomiso lowu: “Hi ku ya hi swiyimo na hi vuswikoti bya ntumbuluko bya xichudeni, to tala ta tindzima u nga swi kota ku ti hlanganisa hi nkarhi wo ringana awara kumbe ku tlulanyana kwalaho, handle ko hatlisisa dyondzo. Swichudeni swi ta endla nhluvuko lowu vonakaka loko mudyondzisi ni xichudeni va hlayisa nkarhi lowu va endzelanaka ha wona leswaku va dyondza vhiki na vhiki.” Xihloko lexi xi ye emahlweni xi ku: “Ku fanele ku languteriwa leswaku loko munhu a heta ku dyondza buku leyi nge Vutivi, ku tiyimisela ka yena ni ku navela ka yena ka ku tirhela Xikwembu, swi ta va swi ri erivaleni.” Bokisi ra Swivutiso leri nga eka Vutirheli Bya Hina Bya Mfumo bya October 1996 ra hlamusela: “Ku languteriwe leswaku hi xinkarhana, mudyondzisi la nga ni vuswikoti, a nga swi kota ku pfuna xichudeni lexi tiyimiseleke leswaku xi kuma vutivi lebyi eneleke, leswaku xi ta endla xiboho xa vutlhari xo tirhela Yehovha.”

⁶ Buku Leyi Nge Vutivi Yi Kuma Vuyelo: Hi nkarhi wa ku khuvuriwa ka yena, wanhwana un’wana u hlamusele ndlela leyi a titweke ha yona malunghana ni ku dyondza buku leyi nge Vutivi. Se a a ri ni nkarhi wo leha, a ri karhi a dyondza buku leyi nge Hanya Hi Masiku. Loko ku humesiwe buku leyi nge Vutivi, makwerhu wa xisati loyi a a n’wi dyondzisa u cincele ebukwini leyintshwa. Ku nga ri khale xichudeni xi swi vonile leswaku leswi swi ta lava leswaku xi endla xiboho, naswona xi susumeteleke ku endla nhluvuko wa xihatla. Wanhwana loyi, loyi sweswi a nga makwerhu wa hina wa xisati, u ri: “Buku leyi nge Hanya Hi Masiku yi ndzi endle leswaku ndzi rhandza Yehovha, kambe buku leyi nge Vutivi yi ndzi pfune leswaku ndzi endla xiboho xo tirhela Yehovha.”

⁷ Xiya ndlela leyi wansati un’wana a dyondzeke ntiyiso hi ku hatlisa ha yona. Endzhaku ka loko a dyondze ra vumbirhi, u yile eminhlanganweni eHolweni ya Mfumo hi nkarhi wa riendzo ra mulanguteri wa xifundzha. Evhikini rolero, eka dyondzo yakwe ya vunharhu, u n’wi byele leswaku u tinyiketerile eka Yehovha naswona u lava ku va muhuweleri la nga khuvuriwangiki. U hlangane ni vakulu, lava kumeke a faneleka leswaku a va muhuweleri, naswona hi vhiki leri tlhandlameke u sungule ntirho wa nsimu. U sungule ku tikarhatela ku dyondza ka yena Bibele lerova a kombela livhi entirhweni leswaku a ta kota ku dyondza kambirhi kumbe kanharhu evhikini ni leswaku a ta heta nkarhi wo tala ensin’wini. Minkarhi yin’wana, a va swi kota ku dyondza tindzima timbirhi kumbe tinharhu hi nkarhi wun’we. U sungule ku tirhisa hinkwaswo leswi a a swi dyondza evuton’wini byakwe, u hete ku dyondza buku leyi nge Vutivi endzhaku ka mune wa mavhiki, naswona u endle nhluvuko lowu yisaka eku khuvuriweni!

⁸ Nuna wa makwerhu un’wana wa xisati u tivula “muhedeni wa xiviri.” Siku rin’wana, makwerhu wa xinuna u n’wi kombele leswaku va va ni dyondzo ya Bibele hi ku tirhisa buku leyi nge Vutivi, a n’wi byela leswaku u ntshunxekile ku tshika ku dyondza loko a swi lava endzhaku ka dyondzo yo sungula kumbe nkarhi wihi na wihi wun’wana. Wanuna loyi u vule leswaku u ta ringeta, hambileswi a a nga tlharihanga exikolweni loko a ha ri ntsongo naswona a nga si tshamaka a hlaya tibuku ta vukhongeri emalembeni ya 20 lama hundzeke. Xana u angurise ku yini eku dyondzeni ka yena buku leyi nge Vutivi? U te: “Swi ndzi tsakise ngopfu ku kuma leswaku buku leyi yo dyondza Bibele yi tsariwe hi ndlela leyi twisisekaka swinene. Rungula ra kona a a ri hlamuseriwe hi ndlela leyi twisisekaka lerova hi ku hatlisa, a ndzi langutela hi mahlo-ngati ku dyondza swin’wana eka dyondzo leyi landzelaka. Hi vutshila mudyondzisi wa mina u tirhise tindlela ta ku endla vadyondzisiwa leti simekiweke hi Sosayiti, naswona hi ku pfuniwa hi moya wa Yehovha, ndzi khuvuriwile endzhaku ka tin’hweti ta mune. Ndzi vula ndzi tiyisile leswaku loko hi hlakulela ku rhandza ku endla vadyondzisiwa, hi hambeta hi lavisisa lava nga ni timbilu letinene evutirhelini bya nsimu, hi tirhisa buku leyi nge Vutivi ni swipfuneto swin’wana swa ku dyondza Bibele leswi nyikeriwaka hi Sosayiti, naswona, xa nkoka, hi khongelela ku kongomisiwa hi Yehovha, hi nga va na rona lunghelo ro hlawuleka swinene ra ku pfuna vanhu leswaku va va vadyondzisiwa.” Mhaka leyi nga laha henhla i mintokoto leyi nga tolovelekangiki hakunene. Swichudeni swa hina swo tala a swi ngheni entiyisweni hi ku hatlisa hi ndlela leyi.

⁹ Swichudeni Swi Endla Nhluvuko Hi Rivilo Leri Nga Faniki: Hi fanele hi swi tiva leswaku vuswikoti bya vadyondzisi ni swichudeni swa Rito ra Xikwembu bya hambana swinene. Ku kula emoyeni ku nga ha hatlisa kumbe ku nonoka. Swichudeni swin’wana swi endla nhluvuko hi tin’hweti ti nga ri tingani ntsena kasi swin’wana swi heta nkarhi wo leha swi nga si endla nhluvuko. Ndlela ya ku kula ka munhu emoyeni yi khumbiwa hi dyondzo yakwe, ndlela leyi a tlangelaka ha yona swilo swa moya, ni ku enta ka ku tinyiketela ka yena eka Yehovha. A hi vanhu hinkwavo lava hi dyondzaka na vona lava nga ni “mapfundza lamakulu ya mianakanyo” lerova va nga dyondza Matsalwa siku na siku, hilaha Vaberiya va khale lava veke vapfumeri va endleke hakona.—Mint. 17:11, 12.

¹⁰ Hi yona mhaka leyi xiengetelo xa Vutirheli Bya Hina Bya Mfumo bya April 1998, lexi nge “Ku Laveka—Tidyondzo Ta Bibele Leti Engetelekeke,” xi hi nyikaka nkongomiso lowu wa xiviri: “Kavula, a hi hinkwaswo swichudeni swa Bibele leswi endlaka nhluvuko wo fana. Swin’wana a swi ti rhandzi ngopfu timhaka ta moya ku fana ni swin’wana kumbe ku hatlisa swi twisisa leswi swi dyondzisiwaka swona. Swin’wana swi taleriwe hi mintirho naswona swi nga ha tsandzeka ku va ni nkarhi lowu lavekaka wa ku dyondza ndzima hinkwayo vhiki rin’wana ni rin’wana. Xisweswo, etimhakeni tin’wana swi nga ha fanela leswaku mi hlangana minkarhi yo hlayanyana leswaku mi dyondza ndzima yin’we naswona mi nga ha heta tin’hweti leti engeteleke leswaku mi heta buku.”

¹¹ Vaendli Va Vadyondzisiwa Va Hambeta Va Ringanisela: Swi fanerile leswaku hi pima mpimo lowu dyondzo yi fambaka ha wona hi ku ya hi swiyimo ni vuswikoti bya ntumbuluko bya xichudeni. Tanihi leswi hi khutaziwaka ku sungula tidyondzo hi ku tirhisa broxara leyi nge Leswi Xi Swi Languteleke, swi nga hi tekela tin’hweti timbirhi ku ya eka tinharhu leswaku hi yi heta hi nga si sungula buku leyi nge Vutivi. Loko ho tirhisa swiringanyeto hinkwaswo leswi hlamuseriweke eka xiengetelo xa Vutirheli Bya Hina Bya Mfumo bya June 1996, swi nga ha lava leswaku hi heta tin’hweti tin’wana ta tsevu ku ya eka kaye leswaku hi heta buku leyi nge Vutivi. Van’wana lava ha ku sungulaka dyondzo hi buku leyi nge Vutivi va nga ha tlulela eka broxara leyi nge Leswi Xi Swi Languteleke leswaku va pfuna xichudeni xi dyondzo mintiyiso ya xisekelo ya Bibele hi ku hatlisa. Kutani dyondzo yi tlhele yi ya emahlweni hi buku leyi nge Vutivi. Loko ku sunguriwe dyondzo hi buku leyi nge Vutivi naswona yi famba kahle, swi nga va swinene leswaku mi dyondza broxara leyi nge Leswi Xi Swi Languteleke loko se mi yi hetile buku, hi ndlela yoleyo hi pfuxeta mintiyiso ya xisekelo ya Rito ra Xikwembu. Entiyisweni, a hi fanelanga hi tsona xichudeni vutivi lebyi kongomeke hikwalaho ko hlongorisa nkarhi. Xichudeni xin’wana ni xin’wana xi lava xisekelo lexi tiyeke xa ripfumelo ra xona lerintshwa eRitweni ra Xikwembu.

¹² Hikwalaho ka leswi hi swi tivaka leswaku nkarhi wu komile, i mhaka ya xihatla ku tlula rini na rini leswaku hi pfuna van’wana va dyondza ntiyiso. Ematshan’weni yo hambeta hi khongelela ku sungula tidyondzo ta Bibele letintshwa, a hi khongeleleni lava ana se hi dyondzaka na vona. Kutani hi ta kuma ntsako wo hambeta hi khuvula vadyondzisiwa van’wana lavantshwa “masiku hinkwawo ku fikela emakumu ka mafambiselo ya swilo.”—Mat. 28:20.