Bokisi Ra Swivutiso

◼ Xana dyondzo ya Bibele yi fanele yi fambisiwa nkarhi wo tanihi kwihi hi ku tirhisa buku leyi nge Vutivi?

Yehovha u katekisa nhlengeletano ya yena namuntlha. Hi vona vumbhoni bya leswi lembe na lembe loko magidi ya vanhu lavantshwa ma teka goza ro yimela ntiyiso. Buku leyi nge Vutivi yi vonaka yi ri xitirho lexi pfunaka swinene entirhweni lowu. Nkandziyiso wa Xihondzo xo Rindza xa January 15, 1996 wu kombise leswaku buku leyi yi endleriwe ku pfuna xichudeni xa Bibele leswaku xi endla nhluvuko hi ku hatlisa, kumbexana ku fikela laha xi khuvuriwaka hi tin’hweti ti nga ri tingani.

Hikwalaho ka xivangelo lexi, Xihondzo xo Rindza lexi fanaka, eka tluka 17, xi tsundzuxile: “Endzhaku ka loko munhu a hetile dyondzo ya yena ya Bibele ebukwini leyi nge Vutivi naswona se a khuvuriwile, a swi nge he bohi leswaku u fambisa dyondzo leyi hleriweke na yena hi buku ya vumbirhi.”

Ku vuriwa yini hi munhu la nga khuvuriwiki endzhaku ka loko a hetile buku leyi nge Vutivi? Vutirheli Bya Hina Bya Mfumo bya June 1996, tluka 6, ndzimana 23, byi hi tsundzuxe hi yinhla leyi nga eka Xihondzo xo Rindza mayelana ni ku nga dyondzi tibuku tin’wana ni xichudeni lexi fanaka endzhaku ka loko xi hetile buku leyi nge Vutivi. Xana leswi swi vula leswaku a hi swi tsakeli ku pfuna xichudeni xa Bibele leswaku xi fikelela pakani yo khuvuriwa? E-e. Hi lava leswaku vanhu va kuma vutivi bya ntiyiso lebyi nga bya xisekelo. Kambe, ku languteriwe leswaku hi xinkarhana, mudyondzisi la nga ni vuswikoti a kota ku pfuna xichudeni lexi tiyimiseleke leswaku xi kuma vutivi lebyi eneleke leswaku xi ta endla xiboho xa vutlhari xo tirhela Yehovha. Swi nga endleka leswaku hikwalaho ka swiyimo swa swona vini, swichudeni swin’wana swa Bibele swi nga ha navela ku dyondza ku tlula kan’we hi vhiki.

Kavula, swichudeni swin’wana swi ta endla nhluvuko hi ku nonoka ku tlula swin’wana. Kambe loko endzhaku ka ku dyondza buku leyi nge Vutivi, loku nga ha vaka ku teke nkarhi wo leha ku tlula lowu tolovelekeke, munhu loyi ku dyondziwaka na yena a nga si endla xiboho xa leswaku u lava ku hlanganyela ni vandlha, muhuweleri u fanele a burisana ni un’wana wa vakulu lava nga eka Komiti ya Ntirho ya Vandlha hi xiyimo lexi. Loko ku honisa kumbe loko swiyimo leswi nga tolovelekangiki swi humelela, ku nga ha nyikeriwa mpfuno wun’wana. Leswi swi fambisana ni nsinya wa nawu lowu hlamuseriweke eka tindzimana 11 na 12 eka tluka 17 ra Xihondzo xo Rindza xa January 15, 1996.

Ku anakanyisisa hi xilaveko xo kuma vutivi bya ntiyiso bya xisekelo swi fanele swi susumetela xichudeni leswaku xi va kona eminhlanganweni ya Vukreste. Leswi swi ta endla leswaku xichudeni xi kombisa vumbhoni bya ku navela ka xona ko tirhela Yehovha. Loko ku anakanyisisa koloko hi swilo swa moya ku nga si va erivaleni endzhaku ka ku dyondza buku leyi nge Vutivi leyi fambisiweke nkarhi wo leha, swi nga ha va swi fanerile ku yimisa dyondzo leyi.