Bokisi Ra Swivutiso

◼ Leswi se hi nga ni buku leyi nge Vutivi Lebyi Yisaka eVuton’wini Lebyi Nga Heriki, xana dyondzo ya le kaya ya Bibele yi fanele ku fambisiwa nkarhi wo tanihi kwihi?

Vutirheli Bya Hina Bya Mfumo bya September 1993 byi bumabumele leswaku dyondzo ya le kaya ya Bibele yi hambeta yi fambisiwa ni vanhu lavantshwa lava ha ku tsakelaka kukondza ku hetiwa tibuku timbirhi. Leswi se hi nga ni buku leyi nge Vutivi, swi vonaka swi fanerile ku endla ndzulamiso eka endlelo leri, hilaha wu andlariweke ha kona eka tluka 13 na 14 ra nkandziyiso wa Xihondzo xo Rindza xa January 15, 1996.

Buku leyi nge Vutivi yi endleriwe ku pfuna “lava hlawuleriweke vutomi lebyi nga heriki,” leswaku va dyondza leswi va faneleke ku swi tiva leswaku va tinyiketela eka Yehovha ivi va khuvuriwa. (Mint. 13:48) Hikwalaho, loko mi hete buku leyi leyintshwa, a swa ha bohi leswaku mi dyondza buku ya vumbirhi na xichudeni xolexo. Loko swichudeni swa n’wina swa Bibele swi sungula ku amukela ntiyiso, mi nga hambeta mi swi khutaza ku engetela vutivi bya swona hi ku va kona eminhlanganweni ya Timbhoni ta Yehovha ni hi ku hlaya Bibele ni tibuku tin’wana to hambana-hambana ta Vukreste.

Loko u swi tolovele kahle swivutiso leswi nga eka matluka 175 ku ya 218 ebukwini leyi nge Ku Hleleriwa Ku Hetisisa Vutirheli Bya Hina, swi nga ha pfuna ngopfu. Hambileswi u nga fanelangiki u kombetela eka swivutiso leswi kumbe u swi hlamusela xichudeni xa Bibele, swi nga va swinene ku kandziyisa tinhla leti nga ebukwini leyi nge Vutivi leti nga ta endla xichudeni xi kota ku phofula ku twisisa ka xona ntiyiso wa masungulo wa Bibele loko vakulu va vutisa swivutiso leswi eka lava yaka eku khuvuriweni.

A ku na xilaveko xo engetela rungula rin’wana ebukwini ya Vutivi, u nghenisa mhaka yin’wana kumbe swin’wana leswaku u seketela tidyondzo ta Bibele kumbe ku hlasela tidyondzo ta vunwa. Sweswo swi to endla ntsena leswaku dyondzo yi fambisiwa nkarhi wo leha ngopfu. Ematshan’wini ya sweswo, hi tshemba leswaku buku leyi yi nga hlanganisiwa hi ku hatlisa, kumbexana hi kwalomu ka tin’hweti ta tsevu. Leswi swi kandziyisa xilaveko xa ku va hi dyondza mhaka hi vuenti ka ha ri emahlweni leswaku hi ta yi veka yi va erivaleni naswona hi ku komisa. Hilaha ku fanaka, xichudeni na xona xi fanele xi khutaziwa ku lunghiselela ka ha ri na nkarhi, xi languta matsalwa lama kombisiweke, ni ku tikarhatela ku swi twisisa kahle leswi buku yi swi dyondzisaka eka ndzima yin’wana ni yin’wana.

Xihondzo xo Rindza xi kandziyise xilaveko xo va Timbhoni ta Yehovha ti fambisa nhlayo leyikulu ya tidyondzo ta Bibele leti endlaka nhluvuko hi nkarhi wo koma. (Vona Esaya 60:22.) Ku tirhisa buku leyi nge Vutivi swi nga pfuna lavantshwa leswaku va kuma vutivi lebyi yisaka evuton’wini lebyi nga heriki ni ku hanya hi ku pfumelelana na byona.—Yoh. 17:3.