Fambisela Vanhu Hinkwavo Buku Leyi Nge Ntsako eNdyangwini

¹ Mufana wa le California la nga ni malembe ya 11 hi vukhale, u phofule ku tlangela ka yena buku leyi nge Xihundla Xa Ntsako eNdyangwini. U tsarile: “Ndzi yi rhandza ngopfu, naswona ndzi khutaza mindyangu yin’wana leswaku yi hlaya buku leyi hikuva i ya nkoka. Yi . . . pfuna ndyangu wa ka hina leswaku wu kuma ku rhula ni ntsako ekaya.” Ntokoto wa muntshwa loyi wu fanele wu hi khutaza leswaku hi fambisela vanhu hinkwavo buku leyi nge Ntsako eNdyangwini. Hi leswi swiringanyeto swi nga ri swingani leswi u nga ringetaka ku swi tirhisa evutirhelini hi February.

² Loko u hlangana ni muntshwa, u nga ha ku:

◼ “Tintangha ta wena to tala ti anakanya hi ku nghenela vukati. Xana hi nga ri kuma kwihi rungula ro tshembeka emhakeni leyi? [Yimela nhlamulo.] Hakanyingi vantshwa va vula leswaku a va tiyiseki loko va lunghekele vukati. Ndzi navela ku burisana na wena hi leswi buku leyi yi swi vulaka malunghana ni mhaka leyi.” Pfula eka tluka 14 ebukwini leyi nge Ntsako eNdyangwini ivi u hlaya ndzimana 3. N’wi kombise xihlokwana xin’wana ni xin’wana xa ndzima leyi. Fambisa buku leyi nga ni xifunengeto xo tsindziyela hi R5,00 kumbe leyi nga ni xifunengeto xo olova hi R3,75, ivi u lunghiselela ku tlhelela.

3 Loko u vulavula ni mutswari, u nga ha ku:

◼ “Hi burisana ni vatswari hi swiletelo leswinene leswi tirhaka hakunene eku kuriseni ka vana. Swiletelo leswi swi hlanganisiwe ebukwini leyi, leyi nge Xihundla Xa Ntsako eNdyangwini.” Pfula eka tluka 55. Hlaya ndzimana 10 ivi u hlaya Deteronoma 6:6, 7 leyi nga eka ndzimana 11. Kutani n’wi kombise swiga leswi tsariweke hi xiitaliki leswi nga eka tindzimana 12 ku ya eka 16. Yana emahlweni u ku: “Buku leyi yi pfune vo tala leswaku va va vatswari lava humelelaka swinene.” Fambisa buku hi munyikelo lowu tolovelekeke.

4 Loko u vulavula ni munhu la dyuhaleke, u nga ha ku:

◼ “Endzhaku ka loko ndzi hlaye nhlamuselo leyi yo koma, ndzi kombela u ndzi byela vonelo ra wena.” Pfula buku leyi nge Ntsako eNdyangwini eka tluka 169, ivi u hlaya swiga swimbirhi swo sungula swa ndzimana 17. Endzhaku, kombela nhlamulo. Swi titshege hi nhlamulo leyi u yi kumeke, u nga ha hlaya swiyenge swin’wana swa buku leyi u nga si yi fambisa.

⁵ Loko u tlhelela laha u fambiseke buku leyi nge Ntsako eNdyangwini, anakanya hi ku ringeta ku sungula dyondzo ya Bibele. Dyondzo 8 eka broxara leyi nge Leswi Xi Swi Languteleke kumbe ndzima 15 ya buku leyi nge Vutivi yi nga va xiyenge lexi faneleke ku sungula ha xona. Hi nkarhi lowu fanaka, a hi ringeteni ku pfuna vanhu hinkwavo leswaku va aka vutomi bya ndyangu wa Vukreste lowu tsakeke.