Lava Ku Rhula Ka Xikwembu eVuton’Wini Bya Ndyangu
“Ṅwina, tinšaka ta matiko, nyikani ka Yehova, nyikani ka Yehova e ku kwetsima ni matimba!”—PISALEMA 96:7.
1. I vutomi bya muxaka muni lebyi Yehovha a byi nyikeke ndyangu wo sungula?
YEHOVHA u sungule vutomi bya ndyangu hi ndlela yo rhula ni ntsako loko a hlanganise wanuna wo sungula ni wansati wo sungula evukatini. Entiyisweni, Adamu a a tsake ngopfu lerova u kale a phofula ntsako lowu a ri na wona eka xiphato xo sungula lexi tsariweke: “Ŝeŝi, yoloyi, i rambu ra marambu ya mina, ni nyama ya nyama ya mina; yoloyi o ta tšhyiwa wansati hikuv̌a o tekiwile ka wanuna.”—Genesa 2:23.
2. I yini leswi Xikwembu a xi ri na swona emianakanyweni hi vukati ku tlula ku nyika vana va xona lava nga vanhu ntsako ntsena?
2 Loko Xikwembu xi simeke vukati ni lunghiselelo ra ndyangu, a xi nga anakanyi hi ku nyika vana va xona va nyama ntsako ntsena. A xi lava leswaku va endla ku rhandza ka xona. Xikwembu xi byele mpatswa wo sungula xi ku: “Tŝalanani, mi anḍa, mi tata misav̌a, mi yi fuma, mi fuma ni tinhlampfi ta lwandle, ni tinyanyana ta tilo, ni ŝiṅwana hikwaŝo le’ŝi hanyaka e misav̌eni.” (Genesa 1:28) Lexi a xi ri xiavelo lexi vuyerisaka hakunene. Vona ntsako lowu Adamu na Evha kun’we ni vana va vona va le nkarhini lowu taka a va ta va va ve na wona loko mpatswa lowu wo sungula lowu tekaneke a wu lo yingisa kutani wu endla ku rhandza ka Yehovha!
3. I yini leswi lavekaka emindyangwini leswaku yi hanya hi ku tinyiketela ka ku chava Xikwembu?
3 Kambe, hambi ku ri namuntlha mindyangu ya tsaka swinene loko yi endla ku rhandza ka Xikwembu hi vun’we. Mayana ku langutela lokukulu swonghasi loku mindyangu yoleyo leyi yingisaka yi nga na kona! Muapostola Pawulo u tsarile: “Vukhongeri byi pfuna hi matlhelo hinkwawo, naswona byi tshembisa vutomi bya nkarhi lowu, ni bya lowu taka.” (1 Timotiya 4:8) Mindyangu leyi hanyaka hi ku tinyiketela ka ntiyiso ka ku chava Xikwembu yi landzela misinya ya milawu ya Rito ra Yehovha kutani yi endla ku rhandza ka yena. Yi lava ku rhula loku nga ni vukwembu kutani yi kuma ntsako eka “vutomi bya nkarhi lowu.”
Vutomi Bya Ndyangu Bya Hlaseriwa
4, 5. Ha yini ku nga vuriwaka leswaku sweswi vutomi bya ndyangu bya hlaseriwa emisaveni hinkwayo?
4 Hi ntolovelo, a hi le ndyangwini wun’wana ni wun’wana laha ku nga ni ku rhula ni ntsako. Loko yi tshaha leswi vuriweke hi huvo ya vukambisisi bya ndzavisiso wa nhlayo ya vaaki va misava leyi vuriwaka Population Council, The New York Times yi ri: “Ematikweni lama fuweke ni lama nga evuswetini, xivumbeko xa vutomi bya ndyangu xi ya xi hundzuka swinene.” Mutsari wa vukambisisi lebyi u tshahiwe a ku: “Mianakanyo ya leswaku ndyangu i xivandla xa ntshamiseko ni vun’we laha tatana a tirhaka tanihi muwundli hi tlhelo ra swa timali ni leswaku manana u tirha tanihi mukhathaleri hi tlhelo ra mintlhaveko i mianakanyo ya hava. Ntiyiso hileswaku mukhuva wo tanihi ku va vamanana va nga tekiwi, ku tlakuka ka nhlayo ya ku dlaya vukati, [ni] mindyangu leyitsongo . . . hi lowu nga kona emisaveni hinkwayo.” Hikwalaho ka swiyimo swo tano, mindyangu ya timiliyoni yi hava ntshamiseko, ku rhula ni ntsako naswona yo tala ya yona ya hahluka. ESpain nhlayo ya ku dlaya vukati yi tlakuke ku fikela eka vukati byin’we eka bya nhungu eku sunguleni ka lembe-xikhume ro hetelela ra lembe-xidzana ra vu-20—ku nga ku engeteleka lokukulu eka vukati byin’we eka bya 100 emalembeni ya 25 yo sungula ntsena. Nghilandhi ri vikiwa ri ri rona leri nga ni nhlayo leyi tlakukeke ya ku dlayiwa vukati eYuropa—vukati bya mune eka bya khume a byi humeleli. Tiko rero ri tlhela ri va ni nhlayo leyikulu ya mindyangu leyi nga ni mutswari un’we.
5 Swi tikomba onge vanhu van’wana va nga ha rindzela ku dlaya ka vukati. Vanhu vo tala va khitikanela “ENdhumbheni Ya Ku Tsemiwa Ka Swiboho Swa Vukati” leyi nga ekusuhi na Tokyo, eJapani. Tempele leyi ya Mashinto yi amukela swikombelo swa ku dlayiwa ka vukati ni ku tsemiwa ka vuxaka byin’wana lebyi nga lavekiki. Mugandzeri un’wana ni un’wana u tsala xikombelo xa yena eka bodo yo vevuka leyi endliweke hi pulanga, a yi hayeka eswivandleni swa ndhumbha, kutani a khongelela ku kuma nhlamulo. Phepha-hungu ra le Tokyo ri vula leswaku loko ndhumbha leyi yi simekiwa kwalomu ka lembe-xidzana leri hundzeke, “vasati va swikhumukana swa le ndhawini yoleyo leswi nga ni mabindzu va tsale swikhongelo swo kombela leswaku vanuna va vona va tshika swigangu swa vona va tlhelela eka vona.” Hambiswiritano, namuntlha swikombelo swo tala i swo dlaya vukati, ku nga ri swo vuyelelana. Handle ko kanakana, vutomi bya ndyangu bya hlaseriwa emisaveni hinkwayo. Xana leswi swi fanele swi va hlamarisa Vakreste? E-e, hikuva Bibele yi hi nyika vutlhari byo twisisa swirhalanganya leswi nga kona emindyangwini.
Ha Yini Ku Ri Ni Swirhalanganya eMindyangwini?
6. Hi yihi yinhla leyi 1 Yohane 5:19 yi nga na yona malunghana ni swirhalanganya leswi nga kona emindyangwini namuntlha?
6 Xin’wana xa swivangelo swa swirhalanganya swa le mindyangwini hi lexi: “Misava hinkwayo yi le hansi ka matimba ya Lowo biha.” (1 Yohane 5:19) Xana hi nga langutela yini eka lowo biha, Sathana Diyavulosi? I muhembi lowo homboloka, wa mahanyelo yo biha. (Yohane 8:44) A swi hlamarisi leswi misava ya yena yi yaka yi nyanya ku biha hi vuxisi ni hi mahanyelo yo biha, lama hlakataka vutomi bya ndyangu swonghasi! Ehandle ka nhlengeletano ya Xikwembu, nkucetelo wa vusathana wu xungeta ku onha lunghiselelo ra Yehovha ra vukati ni ku herisa vutomi bya ndyangu lebyi nga ni ku rhula.
7. Xana mindyangu yi nga khumbeka njhani hi mikhuva leyi vanhu vo tala va yi kombisaka emasikwini lawa ya makumu?
7 Xivangelo xin’wana xa swiphiqo swa mindyangu lexi sweswi xi hlaselaka vanhu xi kombisiwe eka 2 Timotiya 3:1-5. Marito ya Pawulo ya vuprofeta lama tsariweke kwalaho ma komba leswaku hi hanya “emasikwini ya makumu.” Mindyangu a yi nge vi na kona ku rhula ni ntsako loko swirho swa yona swi ri leswi ‘tirhandzaka, swi ri varhandzi va mali, swi ri leswi titivaka, swi ri leswi tikurisaka, swi ri vasandzi, swi ri leswi nga yingisiki vatswari, leswi nga nkhensiki, swo pfumala ku tshembeka, leswi nga hava rirhandzu ra ntumbuluko, leswi nga laviki ku endla ntwanano wihi na wihi, swi ri valumbeti, swi pfumala ku tikhoma, swi ri vakarihi, swi ri hava rirhandzu ra leswo lulama, swi ri vaxengi, swi ri leswi omeke tinhloko, swi ri leswi tinyungubyisaka, swi ri varhandzi va mintsako ku tlula ku va varhandzi va Xikwembu, leswi vonakaka swi ri ni ku tinyiketela ka vukwembu kambe swi nga tshembekanga ematimbeni ya kona.’ Ndyangu a wu nge vi na wona ntsako lowu heleleke loko ku ri hava ni xirho na xin’we eka swirho swa wona lexi nga ni rirhandzu ra ntumbuluko kumbe lexi tshembekaka. Xana ku rhula ka ndyangu ku nga va kona njhani loko un’wana endyangwini a ri ni vukarhi ni ku ka a nga pfumeli ku endla ntwanano wihi ni wihi? Lexi biheke ku tlula ni mpimo, xana swi nga kotekisa ku yini leswaku ku va ni ntsako loko swirho swa ndyangu swi ri varhandzi va ntsako ku tlula ku va varhandzi va Xikwembu? Leswi hi swona leswi vanhu va misava leyi leyi lawuriwaka hi Sathana va nga xiswona. A swi hlamarisi leswi ntsako wa ndyangu wu nga kumekiki hi ku olova emasikwini lawa ya makumu!
8, 9. I vuyelo byihi lebyi mahanyelo ya vana ma nga va ka na byona malunghana ni ntsako wa ndyangu?
8 Nakambe xivangelo xin’wana lexi endlaka leswaku mindyangu yi pfumala ntsako i mahanyelo ya vana layo biha. Loko Pawulo a vhumbha swiyimo swa le masikwini ya makumu, u vhumbhe leswaku vana vo tala a va nga ta va yingisa vatswari. Loko u ri muntshwa, xana mahanyelo ya wena ma endla leswaku endyangwini wa ka n’wina ku va ni ku rhula ni ntsako?
9 Vana van’wana a hi swikombiso leswinene emahanyelweni ya vona. Hi xikombiso, xifanyetana xin’wana xi tshame xi tsalela tata wa xona papila leri leri kombisaka ku delela: “Loko ku ri leswaku a wu nge ndzi yisi eAlexandria a ndzi nga ku tsaleli papila, kumbe ku vulavula na wena, kumbe ku ku lela, naswona loko wo ya eAlexandria u nga ri na mina a ndzi nga ku qhavuli hambi ku ri ku tlhela ndzi ku xeweta. Leswi hi leswi nga ta humelela loko wo kala u nga ndzi yisi . . . Kambe ndzi ku kombela swinene leswaku u ndzi rhumelela [haripa]. Loko u nga swi endli sweswo, a ndzi nga dyi naswona a ndzi nga nwi nchumu. Ha twanana musi!” Xana sweswo swi twala swi fana ni leswi xiyimo xi nga xiswona namuntlha? Phela, papila rero leri humaka eka mufana loyi a tsaleleke tata wakwe ri tsariwe aEgipta wa khale ku tlula malembe ya 2000 lama hundzeke.
10. Xana vana va nga yi pfuna njhani mindyangu ya ka vona leswaku yi landzela ku rhula ka Xikwembu?
10 Langutelo ra muntshwa yaloye wa le Egipta a ri nga ri ro kondletela ku rhula ka ndyangu. Kavula, ku ni swilo swo tala swinene leswi humelelaka emindyangwini emasikwini lawa ya makumu. Kambe, n’wina vana mi nga pfuna ndyangu wa ka n’wina leswaku wu landzela ku rhula ka Xikwembu. Hi ndlela yihi? Hi ku yingisa ndzayo leyi ya Bibele: “Vana, yingisani vatswari va n’wina etimhakeni hinkwato, hikuva exikarhi ka va ka Kriste, hi swona leswi tsakisaka.”—Vakolosa 3:20.
11. Xana vatswari va nga va pfunisa ku yini vana va vona leswaku va va malandza ya Yehovha yo tshembeka?
11 Ku vuriwa yini hi n’wina vatswari? Pfunani vana va n’wina hi ndlela ya rirhandzu leswaku va va malandza ya Yehovha lama tshembekeke. Swivuriso 22:6 yi ri: “Dyonḍisa džaha e ndleleni leyi a fanelaka ku famba ha yona; ni loko a dyuhele a nga ka a nga hambuki.” Hi dyondzo leyinene ya Matsalwa ni xikombiso lexinene xa vatswari, vafana vo tala ni vanhwanyana vo tala a va hambuki endleleni leyinene loko se va kurile. Kambe swo tala swi titshege hi ntikelo ni ndlela leyi ndzetelo wa Bibele wu nyikeriwaka ha yona ni hi ndlela leyi mbilu ya muntshwa yaloye yi nga xiswona.
12. Hikwalaho ka yini ndyangu wa Vukreste wu fanele wu va ni ku rhula?
12 Loko swirho hinkwaswo swa ndyangu wa hina swi ringeta ku endla ku rhandza ka Yehovha, hi fanele hi va ni ku rhula ka Xikwembu. Ndyangu wa Vukreste wu fanele wu tala hi ‘vanghana va ku rhula.’ Luka 10:1-6 yi komba leswaku Yesu a a anakanya hi vanhu vo tano loko a rhuma vadyondzisiwa va yena va 70 leswaku va va vatirheli a va byela a ku: “Emutini wihi ni wihi lowu mi nga ta nghena eka wona, rhangani mi ku: ‘Ku rhula a ku ve ni ndyangu lowu!’ Kutani loko munhu wo rhula a ri kona kwalaho, ku rhula ka n’wina ku ta va ka yena.” Tanihi leswi malandza ya Yehovha ma fambaka hi yindlu ni yindlu hi ku rhula ma tamele “Mahungu Lamanene ya ku rhula,” ma lava vanghana va ku rhula. (Mintirho 10:34-36; Vaefesa 2:13-18) Hakunene, ndyangu wa Vukreste lowu vumbiwaka hi vanghana va ku rhula wu fanele wu va ni ku rhula.
13, 14. (a) Xana Nahumi a va navelela yini va Rhuti na Oripa? (b) Xana ndyangu wa Vukreste wu fanele wu va ndhawu ya vuwiselo ya muxaka muni?
13 Ekaya ku fanele ku va ndhawu ya ku rhula ni ya ku wisa. Mukhegula loyi a a ri noni la vuriwaka Nahumi a a tshemba leswaku Xikwembu a xi ta nyika vingi va yena va tinoni lava ha riki vantshwa, ku nga Rhuti na Oripa, ku wisa ni nchavelelo lowu kumiwaka hi ku va ni nuna lonene ni kaya lerinene. Nahumi u te: “Yehova a mi nyike uṅwana ni uṅwana e ku ṭaka e ndlwini ya nuna wa yena.” (Rhuti 1:9) Malunghana ni ku navela ka Nahumi, mudyondzi un’wana u tsale leswaku emakaya wolawo Rhuti na Oripa “a va ta kuma ku ntshunxeka eka ku karhateka ni ku vilela. A va ta kuma ku phyuphya ka mianakanyo ni moya. A ku ta va ndhawu leyi a va ta hambeta va tshama eka yona, ni leyi mintlhaveko ya vona leyi karhatekeke ni ku navela ka vona lokunene a swi ta eneriseka ni ku kuma ku rhula. Matsalele lama xiyekaka ya Xiheveru . . . ma kombisiwe kahle eka matsalele ya swivulwa leswi yelanaka na wona leswi nga eka [Esaya 32:17, 18].”
14 Hi kombela u xiya ku yelana loku nga kona eka Esaya 32:17, 18. Kwalaho ha hlaya: “Ntiro wa ku lulama ku ta v̌a ku rula, ni mihanḍu ya ku lulama, e ku wisa ni ku ṭaka lo’ku nga yiki helo. Kutani tiko ra mina ri ta aka v̌uakweni byo ṭaka, ne tindlwini le’ti ṭhembekaka, ne tinḍawini le’ti nga ni ku ṭaka e ku wiseni.” Ndyangu wa Vukreste wu fanele wu va ndhawu ya vululami, ya vuwiselo, ya ku rhula, ya nsirhelelo ni ku rhula ka Xikwembu. Kambe, ku vuriwa yini hi loko ku tlhekeka miringo, timholovo kumbe swiphiqo swin’wana? Kwalaho hi fanele hi xi tiva kahle xihundla xa ntsako endyangwini.
Misinya Ya Milawu Ya Mune Leyi Nga Ya Nkoka
15. U nga xi hlamusela njhani xihundla xa ntsako endyangwini?
15 Ndyangu wun’wana ni wun’wana lowu nga laha misaveni wu fanele wu vitaniwa hi vito ra Yehovha Xikwembu, Musunguri wa mindyangu. (Vaefesa 3:14, 15) Kutani lava lavaka ku va ni ntsako endyangwini va fanele va lava nkongomiso wa yena ni ku n’wi dzunisa, hilaha mupisalema a endleke hakona: “Ṅwina, tinšaka ta matiko, nyikani ka Yehova, nyikani ka Yehova e ku kwetsima ni matimba!” (Pisalema 96:7) Xihundla xa ntsako endyangwini xi kumeka eRitweni ra Xikwembu, ku nga Bibele ni hi ku tirhisa misinya ya yona ya milawu. Mindyangu leyi tirhisaka misinya leyi ya milawu yi ta va ni ntsako naswona yi ta va ni ku rhula ka Xikwembu. Kutani a hi languteni misinya leyi ya mune ya nkoka.
16. Xana ku tikhoma ku nga va ni xiphemu xihi evuton’wini bya ndyangu?
16 Wun’wana wa misinya leyi ya milawu wu titshege hi leswi: Ku tikhoma i swa nkoka leswaku ku va ni ku rhula ka Xikwembu endyangwini. Hosi Solomoni u te: “Munhu l’a hlulekaka ku fuma mbilu ya yena, [i] muti lo’wu ngheniweke hi v̌alala, wu nga ri na rirhangu.” (Swivuriso 25:28) Ku lawula moya wa hina—ku nga ku tikhoma—i swa nkoka loko hi lava ku va ni ndyangu lowu nga ni ku rhula ni ntsako. Hambileswi hi nga hetisekangiki, hi fanele hi tikhoma, leswi ku nga muhandzu wa moya wa Xikwembu lowo kwetsima. (Varhoma 7:21, 22; Vagalatiya 5:22, 23) Loko hi khongelela ku va ni mfanelo leyi, moya wu ta endla leswaku hi tikhoma, hi tirhisa ndzayo ya Bibele malunghana na kona, ni ku tihlanganisa ni van’wana lava yi kombisaka. Ku endla tano swi ta hi pfuna leswaku hi ‘balekela vuoswi.’ (1 Vakorinto 6:18) Nakambe ku tikhoma swi ta endla leswaku hi ala madzolonga, hi papalata kumbe ku hlula vundzendzele, ni ku langutana ni swiyimo swo nonon’hwa hi ndlela yo rhula swinene.
17, 18. (a) Vakorinto vo Sungula 11:3 yi tirha njhani evuton’wini bya ndyangu wa Vukreste? (b) Ku xiya vunhloko swi ku kondletela njhani ku rhula ka Xikwembu endyangwini?
17 Nsinya wun’wana wa nawu wu nga boxiwa hi ndlela leyi: Ku xiya vunhloko swi ta hi pfuna leswaku hi landzela ku rhula ka Xikwembu emindyangwini ya hina. Pawulo u tsarile: “Ndzi lava leswaku mi tiva leswi: Kriste i nhloko ya wanuna un’wana ni un’wana, wanuna i nhloko ya wansati, Xikwembu i nhloko ya Kriste.” (1 Vakorinto 11:3) Leswi swi vula leswaku wanuna hi yena la rhangelaka endyangwini, kutani nsati wakwe a n’wi seketela hi vutshembeki, ni leswaku vana va yingisa. (Vaefesa 5:22-25, 28-33; 6:1-4) Mahanyelo yo tano ma ta kondletela ku rhula ka Xikwembu evuton’wini bya ndyangu.
18 Wanuna wa Mukreste u fanele a swi tsundzuka leswaku vunhloko lebyi Matsalwa ma vulavulaka ha byona a hi bya ndzeriso. U fanele a tekelela Yesu, Nhloko ya yena. Hambileswi a a fanele a va “nhloko ya hinkwaswo,” Yesu “[a a] nga telanga ku tirheriwa, kambe ku tirhela van’wana.” (Vaefesa 1:22; Matewu 20:28) Hi ndlela leyi fanaka, wanuna wa Mukreste u kombisa vunhloko hi ndlela ya rirhandzu leyi endlaka leswaku a swi kota ku khathalela swilaveko swa ndyangu wakwe hi ndlela leyinene. Naswona wansati wa Mukreste u fanele a tirhisana swinene ni nuna wakwe. Tanihi ‘mupfuni’ ni ‘muhetisisi’ wa yena, u humesa timfanelo leti nuna wakwe a nga riki na tona xisweswo a n’wi nyika nseketelo lowu lavekaka. (Genesa 2:20; Swivuriso 31:10-31) Matirhiselo lamanene ya vunhloko ma pfuna vavanuna ni vavasati leswaku va xiximana, naswona swi endla leswaku vana va yingisa. Ina, ku xiya vunhloko swi kondletela ku rhula ka Xikwembu evuton’wini bya ndyangu.
19. Ha yini mbulavurisano lowunene wu ri wa nkoka malunghana ni ku rhula ni ntsako wa ndyangu?
19 Nsinya wa vunharhu wa nawu lowu nga wa nkoka wu nga boxiwa hi marito lawa: Mbulavurisano lowunene i wa nkoka leswaku ndyangu wu va ni ku rhula ni ntsako. Yakobo 1:19 ya hi byela: “Munhu un’wana ni un’wana a a hatlise ku twa, a hlwela ku vulavula, a hlwela ku kariha.” Swirho swa ndyangu swi fanele swi yingiselana ni ku bula swin’we hikuva mbulavurisano swi vula ku burisana ni ku yingiselana. Kambe, hambiloko leswi hi swi vulaka swi ri ntiyiso, hakanyingi swi nga vavisa swinene ku tlula ku pfuna loko swi vuriwa hi ndlela ya tihanyi, ya vutikukumuxi kumbe leyi nga hava ntwela-vusiwana. Mavulavulelo ya hina ma fanele ma va ya musa, ma va lama “nandzihaka.” (Vakolosa 4:6) Mindyangu leyi landzelaka misinya ya milawu ya Matsalwa kutani yi vulavurisana kahle yi landzela ku rhula ka Xikwembu.
20. Ha yini u nga vulaka leswaku rirhandzu i ra nkoka eka ku rhula ka ndyangu?
20 Nsinya wa vumune wa nawu hi lowu: Rirhandzu i ra nkoka leswaku ndyangu wu va ni ku rhula ni ntsako. Rirhandzu ra nuna ni nsati i ra nkoka evukatini, naswona ku fanele ku hlakuleriwa rirhandzu leri enteke eka swirho swa ndyangu. Kambe lexi nga xa nkoka swinene, i rirhandzu leri kombisiwaka hi rito ra Xigriki leri nge a·gaʹpe. Leri i rirhandzu leri hi ri hlakulelaka eka Yehovha, eka Yesu ni le ka muakelani wa hina. (Matewu 22:37-39) Xikwembu xi kombise rirhandzu leri eka vanhu hi ku nyika “N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Mayana ndlela leyi swi tsakisaka ha yona leswi hi swi kotaka ku kombisa muxaka wo tano wa rirhandzu eka swirho swa ndyangu wa hina! Rirhandzu leri leri tlakukeke i ‘xiboho lexi hetisekeke xa vun’we.’ (Vakolosa 3:14) Ri hlanganisa mpatswa lowu tekaneke endhawini yin’we ni ku wu susumetela ku endlelana leswinene ni ku endlela vana va wona leswinene. Loko ku va ni swiphiqo, rirhandzu ri wu pfuna ku tamela timhaka hi vun’we. Hi nga tiyiseka hi leswi hikuva “rirhandzu . . . a ri tilaveri leswi nga swa rona ntsena . . . Ri amukela hinkwaswo, ri pfumela hinkwaswo, ri langutela hinkwaswo, ri tiyisela eka hinkwaswo. Rirhandzu a ri heli.” (1 Vakorinto 13:4-8) Mindyangu leyi vanhu va kona va rhandzanaka hi rirhandzu leri tiyisiweke hi Yehovha ya tsaka hakunene!
Hambeta U Landzela Ku Rhula Ka Xikwembu
21. I yini leswi handle ko kanakana swi nga engetelaka ku rhula ni ntsako wa ndyangu wa wena?
21 Misinya ya milawu leyi boxiweke eku sunguleni ni yin’wana leyi kumekaka eBibeleni yi andlariwe etibukwini leti hikwalaho ka rirhandzu Yehovha a nyikeleke ha tona hi ku tirhisa “nandza la tshembekaka, wo tlhariha.” (Matewu 24:45) Hi xikombiso, rungula rero ri kumeka ebukwini leyi nga ni matluka ya 192 leyi nge Xihundla Xa Ntsako eNdyangwini leyi humesiweke eMintsombanweni ya Muganga ya Timbhoni ta Yehovha ya “Varhumiwa Va Ku Rhula Ka Xikwembu” leyi khomiweke emisaveni hinkwayo hi 1996/97. Dyondzo ya Matsalwa ya munhu hi xiyexe ni ya ndyangu yi nga va ni mimbuyelo yo tala leyinene hi ku pfuniwa hi buku yoleyo. (Esaya 48:17, 18) Ina, a swi kanakanisi leswaku ku tirhisa ndzayo ya Matsalwa swi engetela ku rhula ni ntsako endyangwini wa wena.
22. Xana hi fanele hi byi veka eka yini vutomi bya mindyangu ya hina?
22 Yehovha u ni swilo swo tala leswi a swi vekeleke mindyangu leyi endlaka ku rhandza ka yena, naswona u faneriwa hi ku dzunisiwa ni ku tirheriwa hi hina. (Nhlavutelo 21:1-4) Hikwalaho onge ndyangu wa wena wu nga veka vutomi bya wona evugandzerini bya Xikwembu xa ntiyiso. Naswona onge Tata wa hina wa le tilweni Yehovha, a nga ku katekisa hi ntsako loko u ri karhi u landzela ku rhula ka Xikwembu endyangwini wa wena!
A Wu Ta Hlamurisa Ku Yini?
◻ Ku laveka yini leswaku mindyangu yi hanya hi ku tinyiketela ka ku chava Xikwembu?
◻ Ha yini ku ri ni swirhalanganya swa mindyangu namuntlha?
◻ Xihundla xa ntsako endyangwini i yini?
◻ Xana hi yihi yin’wana ya misinya ya milawu leyi nga ta hi pfuna leswaku hi kondletela ku rhula ni ntsako endyangwini?
[Xifaniso lexi nga eka tluka 24]
Mbulavurisano lowunene wu pfuna ku landzela ku rhula ka Xikwembu endyangwini