Varhumiwa Va Ku Rhula Ka Xikwembu Va Hlengeletana
NKULU un’wana wa Mukreste wa le United States u ri: “Hi akiwile hi ntsombano wun’wana ni wun’wana wa muganga lowu hi tshameke hi ya eka wona. Hambiswiritano, wa nan’waka a wu hlamuseleki. A hi suka siku rin’wana ni rin’wana hi ri karhi hi tivutisa leswaku siku leri landzelaka ri ta va ri hi khomele yini leswikulu, naswona a hi hetiwanga matimba!”
Loko u ve kona eka wun’wana wa Mintsombano ya Muganga ya “Varhumiwa Va Ku Rhula Ka Xikwembu” a swi kanakanisi leswaku u pfumelelana na yena mupfhumba loyi wo hiseka. Siku rin’wana ni rin’wana ra ntsombano a ri kandziyisa xiphemu xin’wana lexi hambaneke xa ntirho lowu Timbhoni ta Yehovha ti wu endlaka tanihi varhumiwa va Xikwembu. A hi pfuxeteni nongonoko lowu wa masiku manharhu.
“[U] Sasekile Ŝonghasi . . . L’a V̌ulav̌ulaka Ŝo Rula”
Leyi a yi ri nhloko-mhaka ya siku ro sungula ra ntsombano. A yi sekeriwe eka Esaya 52:7. Eminkarhini leyi yo nonon’hwa, vo tala va tirhela Yehovha ehansi ka swiyimo leswi tlhontlhaka. Nkulumo leyi nge “Ku Yingisela Vahuweleri Lava Hisekaka Va Ku Rhula” yi katse mimbulavurisano ni van’wana va vanhu lava vo tshembeka. Ku yingisela marito ya vona a swi khutaza hakunene, naswona vatsombani va tiyisekisiwile leswaku Yehovha a nga va tiyisa na vona, hambi ku ri ku va nyika “matimba . . . lama tlulaka hinkwaswo” leswaku ma va pfuna ku tiyisela.—2 Vakorinto 4:7.
Swilaveko swa Yehovha a hi ndzhwalo. (1 Yohane 5:3) Leswi swi vekiwe erivaleni hi nkulumo yo hetelela ya nongonoko wa nimixo, leyi chaputeke hi ku humesiwa ka broxara ya matluka ya 32 leyi nge, I Yini Leswi Xikwembu Xi Swi Languteleke Eka Hina? Xipfuneti lexi lexintshwa xo dyondzisa lexi nga ni swifaniso swo saseka, a swi kanakanisi leswaku xi ta hoxa xandla swinene eku pfuneni ka vo tala leswaku va dyondza mayelana ni swikongomelo swa Xikwembu. Tinhlamuselo mayelana ni matirhiselo ya buku leyi leyintshwa ti kumeka eka xihloko xo hetelela lexi dyondziwaka xa magazini lowu ni le ka matluka 16 na 17.
Nkulumo leyi nge “Ku Tiyisela eNtirhweni Lowunene” yi kandziyise leswaku Yehovha u tiva miringo ya hina hi ku helela. Ku tiyisela swi vula ku yima hi tiyile naswona hi nga lahlekeriwi hi ntshembo. Yehovha u hi nyike Rito ra yena, moya wa yena ni nhlengeletano ya yena leswaku a hi pfuna. Ku chumayela swi lava ku tiyisela, nakambe ku chumayela ka hi pfuna leswaku hi tiyisela, hikuva ku endla leswaku ripfumelo ra hina ri tshama ri hanyile. Leswi hi nga ekusuhi swinene ni ku fika emakumu ka mphikizano, a hi fanelanga hi pfumelela swiphiqo swa hina swi tsanisa ku hiseka ka hina, hikuva ku ta ponisiwa ntsena lava tiyiselaka ku fika emakumu.—Matewu 24:13.
Nkulumo-nkulu leyi nge “Ntirho Wa Hina Tanihi Varhumiwa Va Ku Rhula Ka Xikwembu,” yi yise nyingiso eku humesiweni ka Vayuda evuhlongeni le Babilona ni ku kondleteriwa ka vugandzeri lebyi tengeke eYerusalema hi 537 B.C.E. Xivulavuri xi hlamusele leswaku, xiendlakalo lexi a ko va ntsena xikombiso xa leswi Mfumo wa Xikwembu wu nga ta swi endla ku nga ri khale emisaveni hinkwayo. (Pisalema 72:7; Esaya 9:7) Xiavelo xa hina sweswi i ku chumayela mahungu lamanene mayelana ni Mfumo lowu, ni ku hanya hi ku pfumelelana ni rungula rero. Ku rhandza Xikwembu ni muakelani swi fanele swi hi susumetela ku ya emahlweni ni ntirho lowu handle ko karhala.—Mintirho 5:42.
Lexi tsakiseke ngopfu eka nongonoko wa Ravuntlhanu, a ku ri nxaxamelo lowu nge “Tivonele Eka Mintlhamu Leyi Tumbeleke Ya Vuhungasi.” Vuyimbeleri bya namuntlha, tibayiskopo, tivhidiyo, minkombiso ya thelevhixini, mintlango ya vhidiyo, tibuku, timagazini ni tibuku ta mintlango yo hlekisa hakanyingi swi kombisa tidyondzo ta vudimona. Hikwalaho hi fanele hi “[venga] leswo biha,” ivi hi “namarhela leswinene.” (Varhoma 12:9) Ina, hi fanele hi nyenya vuhungasi lebyi thyakeke ni ku byi papalata, loko hi hala tlhelo hi ri karhi hi namarhela swilo leswi tengeke, leswi nga ni vunene ni leswi dzunekaka. (Vafilipiya 4:8) Tibuku ni switirho swo endla hi swona ndzavisiso leswi humesiwaka hi nhlengeletano ya Yehovha swi phyuphyisa mianakanyo ya hina hi tidyondzo leti akaka ni ku hi letela leswaku hi hambanisa leswinene eka leswo biha. (Vaheveru 5:14) Hi fanele hi namarhela malunghiselelo lawa tanihi laha a hi ta endla hakona loko hi ri endzeni ka xikwekwetsu lexi fambaka elwandle leri kariheke.
Ku landzele nkulumo leyi nge “Lwisana Na Diyavulosi—U Nga Pfumeleli Vubihi.” Loko va ri kusuhi ni ku nghena eTikweni leri Tshembisiweke, magidi ya Vaisrayele va phasiwile hi ku tikhoma loko biha. Finiyasi a nga byi pfumelelanga vubihi evugandzerini bya ntiyiso. U teke goza leri tiyeke ro lwisana ni vaendli va leswo biha, naswona ku tinyiketela ka yena loku heleleke ku tsakise Yehovha. (Tinhlayo 25:1-13) Pakani ya Sathana i ku endla leswaku un’wana ni un’wana wa hina a nga faneleki ku nghena emisaveni leyintshwa ya Xikwembu. Hikwalaho, ku fana na Finiyasi, hi fanele hi lwisana ni matshalatshala ya Diyavulosi yo lava ku hi thyakisa. Ku nga khathariseki leswaku hi nghenele vukati kumbe hi titshamele hexe, hi fanele ku “[chava] vuoswi.”—1 Vakorinto 6:18.
“Ku Namarhela Vutshembeki Bya Rito Ra Xikwembu Hilaha Ku Tiyeke” a yi ri nkulumo yo hetelela ya siku ro sungula ra ntsombano. Vahundzuluxeri vo tala va cinca kumbe va susa swiphemu swo karhi swa Matsalwa. Hi xikombiso, leswaku va tsakisa vayimeri va timfanelo ta vavasati, vahundzuluxeri va The New Testament and Psalms: An Inclusive Version va kombetela eka Xikwembu, hayi tanihi Tatana kambe tanihi Tatana-Manana. Ku hambana ni sweswo, New World Translation yi namarhela matsalwa ya ririmi ro sungula hi ku tshembeka swinene lerova yi hi pfune ku twisisa timhaka to hlayanyana ta Matsalwa. Hi xikombiso, xivulavuri xi te: “A ku ri vuhundzuluxeri lebyi pakanisaka bya New World Translation lebyi vekeke xisekelo xa leswaku hi hlela mavandlha hi vuntshwa hi ku hlawula tihuvo ta vakulu, hi ku pfumelelana ni fambiselo leri fanaka swinene ni leri simekiweke evandlheni ra Vukreste ra lembe-xidzana ro sungula.” Hi kombisa vutshembeki bya hina lebyi tiyeke eka Rito ra Xikwembu hi ku ri hlaya siku na siku ni ku tirhisa ndzayo ya rona. Xivulavuri xi tlhele xi ku: “Hi kombisa leswaku hi vayimeri lava tshembekeke hilaha ku tiyeke va Rito ra Xikwembu hi ku ri chumayela hi ku hiseka eka van’wana ni ku ri tirhisa hi vukheta loko hi ri karhi hi dyondzisa van’wana, hi nga ringeti ku ri endla ri fanela mavonelo ya hina hi ku ri soholota kumbe ku tatisa eka leswi ri swi vulaka.”
‘Ku Rhula Ka Xikwembu Ku Tlula Miehleketo Hinkwayo’
Nhloko-mhaka leyi, leyi sekeriweke eka Vafilipiya 4:7, a ku ri yona leyi andlaleke masungulo ya siku ra vumbirhi ra ntsombano. Rungula ro tala leri nyikeriweke a ri hlamusela langutelo lerinene ra vutirheli bya munhu hi xiyexe, ndyangu, ku tinyiketela, ni swilo swin’wana swa vutomi bya siku na siku.
Endzhaku ka ndzimana ya siku, ku nyikeriwe nkulumo ya nxaxamelo leyi nge “Varhumiwa Lava Tisaka Mahungu Lamanene Ya Ku Rhula.” Rungula ra hina i ra ku rhula naswona ri fanele ku nyikeriwa hi mukhuva wo rhula. (Vaefesa 6:15) Xikongomelo xa hina i ku fikelela timbilu ta vanhu, hayi ku kanetana na vona. Vuleteri ni tibuku leti hi ti kumaka enhlengeletanweni ya Yehovha ta hi pfuna ku va hi endla sweswo hi ku kongoma. A hi fanelanga hi pfumelela ku honisa kumbe ku pfumala ku tsakela ka vanhu ku hi heta matimba. Ematshan’weni ya sweswo, hi fanele hi hambeta hi “endla hi matimba,” hi va ni xiyimiso lexinene xa dyondzo ya munhu hi xiyexe, hi va kona eminhlanganweni ni ku hlanganyela entirhweni wo chumayela nkarhi na nkarhi. (2 Timotiya 2:15) Naswona a hi fanelanga hi honisa ku endlela van’wana leswinene, ngopfu-ngopfu lava nga vapfumeri-kulorhi. (Vagalatiya 6:10) Kavula, ku tirha hi matimba a swi vuli swona leswaku hi fanele hi tidlaya. Leswi un’wana ni un’wana wa hina a kotaka ku swi endla hi ku ya hi vuswikoti ni swiyimo swa yena, Yehovha wa swi amukela.
Vanhu va Xikwembu va nyikela hi nkarhi, ntamu ni rifuwo ra vona leswaku va rhangisa swilaveko swa Mfumo. Nkulumo leyi nge “Ku Nyika Hi Ku Tsaka eNhlengeletanweni Ya Yehovha” yi swi veke erivaleni leswaku, tanihi leswi vo tala lava fanaka ni tinyimpfu va angulaka kahle eka rungula ra Mfumo, ku ni xilaveko xa nhundzu leyi engetelekeke, tindhawu ta minhlangano ni miako ya marhavi. Minyikelo ya hina yi pfuna nhlengeletano leswaku yi kota ku kuma swilo hinkwaswo leswi lavekaka leswaku ku endliwa ntirho wo chumayela emisaveni hinkwayo. Nakambe minyikelo leyi yo hanana yi yisa ku dzuneka eka Yehovha naswona munyiki hi yena a kumaka ntsako. Hikwalaho, leswi hi nga Vakreste, a hi fanelanga hi honisa xiphemu lexi xa nkoka xa vugandzeri bya hina.—2 Vakorinto 8:1-7.
Nongonoko wa nimixo wu gimetiwe hi nkulumo ya nkhuvulo—leyi minkarhi hinkwayo ku nga nkulumo yo hlawuleka etinhlengeletanweni letikulu ta Timbhoni ta Yehovha. Swi tsakisa swonghasi ku vona vanhu lava ha ku tinyiketelaka va landzelela mikondzo ya Yesu hi ku titisa enkhuvulweni wa mati! (Matewu 3:13-17) Hinkwavo lava tekaka goza leri va dyondzisiwile hi ku tirhisa xihlovo xa vutlhari lebyikulu—ku nga Bibele. Tlhandla-kambirhi, va kume xikongomelo xa xiviri evuton’wini, naswona va vuyeriwa hi ku rhula loku kumiwaka hi ku tiva leswaku va le ku endleni ka leswo lulama.—Eklesiasta 12:13.
Ndzayo leyi kongomeke yi nyikeriwe enkulumeni leyi nge “Ku Twisisa A Ku Ve Xisirhelelo Xa N’wina.” Ku twisisa i ka nkoka swinene malunghana ni ku tirhisana emabindzwini. A hi fanelanga hi endla mintirho ya mabindzu ya munhu hi xiyexe eHolweni ya Mfumo, naswona a hi fanelanga hi dyelela Vakreste-kulorhi hikwalaho ka ku lava ku pindzula. (Ringanisa Yohane 2:15, 16.) Nakambe ku twisisa ka laveka loko hi endla vuvekisi bya mabindzu kumbe loko hi lomba kumbe ku lombisa mali. Xivulavuri xi te: “Ku onhaka ka timhaka ta bindzu exikarhi ka Vakreste ku endle leswaku va heleriwa hi matimba, van’wana hambi ku ri ku lahlekeriwa hi vumoya bya vona hileswi va veke ni magugu va nghenela makungu yo kuma mali hi ndlela leyi nga ni khombo.” Hambileswi swi nga hoxangiki ku va Vakreste va endla bindzu swin’we, entiyisweni ku va ni vukheta i ndlela ya vutlharhi. Naswona loko ntwanano wa bindzu wu endliwa hi vanhu vambirhi, xiboho lexi minkarhi hinkwayo xi fanele xi tsariwa ehansi.
Mimpimanyeto ya Xikwembu eka vavanuna ni vavasati yi hlamuseriwe eka nkulumo leyi nge “U Vumbe Wanuna Ni Wansati.” Swiphemu swa vununa ni vusati swi soholotiwile ematin’wini hinkwawo. Xivulavuri xi te: “Vo tala va endla xihoxo hi ku anakanya leswaku timfanelo ta vununa ti fambisana ni vulawuri bya tihanyi, ku tirhisa voko ra nsimbi kumbe ku tiendla makhonya. Hi ku ya hi tinxaka tin’wana a swi tolovelekanga, naswona swi khomisa tingana leswaku wanuna a rila emahlweni ka vanhu hambi ku ri exihundleni. Kambe Yohane 11:35 yi kombisa leswaku loko a ri exikarhi ka ntshungu lowu a wu ri ehandle ka sirha ra Lazaro, ‘Yesu u ririle.’” Ku vuriwa yini hi vavasati? Hakanyingi ku va wansati swi tekiwa swi fambisana ni vumbhuri. Kambe xivulavuri xi te: “Loko wansati a sasekile kambe a kala miehleketo naswona a rhandza timholovo, a sapatela kumbe a tikurisa, xana a nga va wansati la sasekeke hakunene, a va munhu la nga ni timfanelo ta vusati?” (Ringanisa Swivuriso 11:22; 31:26.) Hi ku vulavula, hi mahanyelo ni loko va tilunghisa, vavanuna ni vavasati va Vukreste va lwela ku landzela mimpimanyeto ya Bibele. Xivulavuri xi te: “Wanuna la kombisaka mihandzu ya moya swa olova ku n’wi xixima, ni wansati la endlaka tano swa olova ku n’wi rhandza.”—Vagalatiya 5:22, 23.
Endzhaku ku landzele nxaxamelo lowu nge “Xikwembu Xa Ku Rhula Xa Ku Khathalela.” Vakreste vo tala va karhatiwa hi swiphiqo swa timali. Hambiswiritano, Yehovha wa tshembisa: “Ndzi nga ka ndzi nga ku tshiki, kumbe ku ku cukumeta, ni siku ni rin’we.” (Vaheveru 13:5) Ku nga khathariseki swiphiqo swa ikhonomi, vo tala va kombise ku tshemba ka vona xitshembiso lexi hi ku nghenela ntirho wa vuphayona bya nkarhinyana kumbe bya nkarhi hinkwawo. Van’wana lava tsandzekaka ku phayona sweswi, va rhangisa swilaveko swa Mfumo ku sungula hi ku tirhisa nkarhi wun’wana ni wun’wana lowu va wu kumaka eku nyikeleni ka vumbhoni. (Matewu 6:33) Matshalatshala yo tano hinkwawo ma faneriwa hi ku bumabumeriwa! Nhlengeletano ya Yehovha yi humese tibuku to tala leswaku ti hi pfuna evutirhelini bya hina ni ku hi pfuna leswaku hi langutana ni swiphiqo swa hina. Loko hi kombisa ku tlangela malunghiselelo ya Yehovha ya moya, u ta hi katekisa hi ku rhula eminkarhini leyi nga ni mpfilumpfilu hi tlhelo ra ikhonomi.—Pisalema 29:11.
Loko nkulumo yo hetelela ya siku rero, leyi nge “Lava Ku Rhula Ka Xikwembu eVuton’wini Bya Ndyangu” yi ri ekusuhi ni ku hela, vatsombani a va tsakile ku kuma buku leyintshwa leyi nge, Xihundla Xa Ntsako eNdyangwini. Xivulavuri xi khutazile xi ku: “Hisekela ku dyondza buku leyi hi wexe ni hi ndyangu. Tikarhatele swinene ku tirhisa ndzayo ya yona leyi sekeriweke eBibeleni, kutani hakunene u ta engetela ku rhula ni ntsako wa ndyangu wa wena.”
“Hlayisa V̌uṅwe . . . Hi Šiboho Ša Ku Rula”
Leyi a yi ri nhloko-mhaka leyi fanelekaka ya siku ro hetelela ra ntsombano, yi sekeriwe eka Vaefesa 4:3, (BX). Timbhoni ta Yehovha leti humaka ematikweni hinkwawo ya misava, ti dyondzisiwe hi Xikwembu. Hikwalaho, va rhandza ku rhula. Va landzela xikombiso xa Yesu ni ku ringeta “ku hlayisa v̌uṅwe bya Moya hi šiboho ša ku rula.”
Ku rhula loku nga kona enhlengeletanweni ya Xikwembu ku kandziyisiwe enxaxamelweni lowu nge “Ku Hlawula Varhumiwa Lava Nga Vona.” Vaprofeta va mavunwa a va ri kona eIsrayele wa khale. Hambiswiritano, varhumiwa va ntiyiso va Xikwembu—vo tanihi muprofeta Esaya, Ezekiyele na Yeremiya—hi ku pakanisa va vhumbe hi ta ku wa ka Yerusalema, nkarhi wa ku ya evuhlongeni ni ku ntshunxiwa ka vanhu va Xikwembu eku heteleleni. Ni namuntlha ku na xiyimo lexi fanaka. Varhumiwa va mavunwa va andza swinene etipolitikini ni le vukhongerini bya mavunwa. Hambiswiritano, Yehovha u pfuxe Timbhoni ta yena leswaku ti huwelela xikongomelo xa yena mayelana ni mafambiselo lawa ya swilo. Ngopfu-ngopfu, ku sukela hi 1919, malandza ya Yehovha ma tirhisiwe ku twarisa rungula ra Xikwembu. Vona ndlela leyi va hambaneke ha yona ni varhumiwa va mavunwa va Vujagana! Onge hi ku hiseka hi nga endla xiphemu xa hina entirhweni lowu ku fika loko Yehovha a vula leswaku swi ringene.
Nkulumo leyi nge “Yingisela Rito Ra Xikwembu U Tlhela U Ri Landzela” yi kandziyise leswaku Matsalwa i xihlovo lexikulu xa nkongomiso, nchavelelo ni ntshembo. (Esaya 30:20, 21; Varhoma 15:4) Emisaveni ya namuntlha ku tilawula ka andza. Hikwalaho, ku tlula rini na rini, hi fanele hi yingisela ndzayo leyi humaka eRitweni ra Xikwembu ni nhlengeletano ya xona. Yehovha wa ku tiva ku tsana ka hina, naswona eRitweni ra yena u yi veke erivaleni ndlela leyi nga ta vuyerisa hina. Ku tiva ka hina leswaku Yehovha wa hi seketela swi endla leswaku hi tiyiseka hi ku ya emahlweni hi endla xin’wana ni xin’wana lexi a hi kombelaka xona.
Nkulumo leyi yi endle leswaku vayingiseri va langutela drama leyi landzeleke leyi vatlangi va kona a va ambale swiambalo swa kona. A yi ku “Ha Yini Hi Fanele Ku Xixima Malunghiselelo Ya Le Tilweni?” Hi ku tirhisa mhaka ya Gidiyoni leyi nga eBibeleni tanihi xisekelo, nkulumo leyi yi kandziyise dyondzo ya nkoka—hi fanele hi landzela swiletelo swa Xikwembu, naswona hi nga swi sivi hi mianakanyo ya hina kumbe ku ringeta ku tlula ndzayo ya Xikwembu.
Nkulumo ya le rivaleni a yi ri ni nhloko-mhaka leyi nge “Ku Rhula Ka Ntiyiso Emakumu!—Xana Ku Huma Eka Xihlovo Xihi?” Ku rhula loku Xikwembu xi ku tshembisaka ku tlula nchumu wihi ni wihi lowu anakanyiwaka hi misava leyi. Xivulavuri xi te: “Ku rhula ka ntiyiso swi vula ku rhula siku rin’wana ni rin’wana. Ku rhula ka Xikwembu swi vula misava leyi nga hava vuvabyi, switlhavi, mbitsi ni rifu.” Bibele yi hi byela leswaku Yehovha “o [herisa] tinyimpi ku yisa e makuṅweni ya misav̌a.” (Pisalema 46:9) Xana leswi u ta swi endla hi ndlela yihi? Hi ku susa muhlohloteri wa nyimpi, ku nga Sathana Diyavulosi. (Nhlavutelo 20:1-3) Leswi swi ta pfulela lavo lulama ndlela yo ‘fuma misava ni ku kuma ntsako lowukulu eku rhuleni lokukulu ka vona.’—Pisalema 37:11.
Endzhaku ka nkatsakanyo wa xihloko lexi dyondziwaka vhiki rero xa Xihondzo xo Rindza nkulumo yo hetelela ya ntsombano yi nyikeriwile. Leswi a yi ri ni nhloko-mhaka leyi nge “Ku Ya eMahlweni Hi Ri Varhumiwa Va Ku Rhula Ka Xikwembu,” nkulumo leyi leyi khutazaka yi kandziyise leswaku ntirho wa hina wo chumayela wu hlawulekile naswona i wa xihatla. Sweswi a hi wona nkarhi wo wisa, wo loloha kumbe wo tlhelela emianakanyweni leyi hoxeke. Hi hlomisiwile hi leswi hi swi lavaka—rungula ra Xikwembu, moya wa xona lowo kwetsima ni malunghiselelo yo tala lama humaka eka nhlengeletano ya xona leyi nga ni rirhandzu leyi lawuriwaka hi xona. Hikwalaho leswi hi nga malandza ya Yehovha, onge hi nga ya emahlweni hi ri varhumiwa va ku rhula ka Xikwembu!
[Bokisi/Swifaniso leswi nga eka tluka 9]
Lunghiselelo Ra Rirhandzu Eka Mindyangu
Lava a va ri kona hi siku ra vumbirhi ra Ntsombano wa Muganga wa “Varhumiwa Va Ku Rhula Ka Xikwembu” a va tsakile ku kuma buku leyintshwa leyi nge, Xihundla Xa Ntsako eNdyangwini. Buku leyi yi na rungula ra Matsalwa leri nga ta pfuna mindyangu hinkwayo leyi rhandzaka Xikwembu.
Nkulu un’wana wa le Connecticut, U.S.A., wa hlamusela: “Hi June 15, hi kume buku ya hina leyi nge, Ntsako eNdyangwini. Hi June 16, a ndzi yi hlaye ndzi fika exikarhi. Hi ti-17, hi ve ni dyondzo ya ndyangu yo sungula hi buku leyi, naswona hi kume xikhutazo lexikulu! Hi siku rero, ndzi hete ku hlaya buku leyi. A swi kanakanisi leswaku hinkwavo lava tirhisaka buku leyi ya risima va ta yi rhandza. Ku kongoma ka buku leyi ni rungula ra yona leri nga enkarhini i vumbhoni lebyi engetelekeke bya leswaku ‘nandza la tshembekaka, wo tlhariha,’ u phamela ‘swakudya hi nkarhi wa kona’ naswona wa swi xiya swinene swilaveko swa hina eminkarhini leyi ya miringo.”—Matewu 24:45-47.
[Xifaniso lexi nga eka tluka 7]
Lavantsongo ni lavakulu hilaha ku fanaka va lava ku tiva leswi Xikwembu xi swi languteleke