Ntsombano Wa Muganga Wa “Ku Rhula Ka Xikwembu”—Hi Swona Leswi A Hi Swi Lava!

“TIMBILU a ti fikeleriwile ni malangutelo a ya khumbekile.” “Yehova u hangalase nkhuvo wa swakudya swo tala swo hlamarisa.” “Tinkulumo a ti kongoma mhaka ni ku va ta xiviri.” “Hi swona leswi a hi swi lava SWESWI!” “Leswi hi leswi a hi swi lava!”

Wolawo i xikombiso xa marito yo tala yo tlangela lama twiweke eka Ntsombano wa Muganga wa “Ku Rhula Ka Xikwembu” wa 1986 wa Timbhoni ta Yehova. Marito hinkwawo yo tano ya kombe leswaku lava va veke kona va hlayise xitsundzuxo lexinene lexi nyikeriweke hi mutshami wa xitulu na hi nkulumo yo pfula: “Yingisani, Mi Twisisa.”

Tanihi leswi xihloko xa ku rhula xi tlakusiweke eRitweni ra Xikwembu, rito leri humelelaka makhamba yo tlula 300 eBibeleni, a ri fanela swinene lerova ri faneriwa hi ku endliwa xihloko xa mintsombano ya hina ya muganga ya 1986. Kahle-kahle, 18 wa mapapila lama huhuteriweke ku sukela eka Varhoma ku ya eka Nhlavutelo ma sungula hi marito yo tanihi ku “Ingi tintswalo ni ku rhula swi nga mi talela swi andza!” A swi xiyiwe leswaku eka Matsalwa ya Xiheveru rito leri hundzuluxeleke “ku rhula” i sha·lohmʹ, leswi swi nga vuleki ku pfumaleka ka nyimpi ni ku xaniseka ntsena kambe swi vula ni rihanyo, ku kateka ni vuhlayiseki.—1 Petro 1:2.

Ku rhula ku kandziyisiwile hi ku phindha-phindha eka nongonoko hinkwawo. Tanihi laha munyikeri wa nkulumo-nkulu a kandziyiseke ha kona, Yehova i “Xikwembu xa ku rhula” ni “Xikwembu lexi nyikaka ku rhula.” N’wana wa xona, “Hosi ya ku Rula,” u tshembise valandzeri vakwe ku rhula. (Vafilipiya 4:9; Varhoma 16:20; Esaya 9:6; Yohane 14:27; 16:33) Munyikeri wa nkulumo-nkulu u kombe leswaku ku rhula loku hina Timbhoni hi ku tsakelaka hi loku hlawulekeke hikuva a ku titshegi hi swiyimo swa le handle. Ku titshege hi ku xixima ka hina ka vuhosi, loku ku nga xivangelo xa leswaku misava yi pfumala ku rhula—a yi na xichavo eka Mufumi lonkulu, Yehova Xikwembu. Esaya u swi veke kahle: “Mawako! loko ngi u yingisa milawu ya mina! Ku rula ka wena ku ta v̌a tani hi nambu.”—Esaya 48:18.

Exikarhi ka switsundzuxo leswi pfunaka leswi nyikiweke leswaku hi tsakela ku rhula ka Xikwembu hi xitalo a ku ri leswaku hi tikarhatela ku famba ni yinhla yin’we leyi nga erivaleni leyi ku nga tirheriwaka eka yona eka nhlangano wun’wana ni wun’wana. Nkulumo leyi yi kombe leswaku ku va vaendli va ku rhula a swi enelanga eka hina ku va ni ku rhula; hi fanele ku tirhela ku rhula, hi rhandza ku tisa ku rhula.

Twarisa Evangeli Ya Ku Rhula Ti Va Tintangu Ta Le Milengeni

Mahungu ya hina ya vitaniwa kahle hi ku “Evangeli ya ku rhula.” (Vaefesa 6:15) Hi kume xitsundzuxo lexinene ngopfu xa hi laha hi nga yisaka Evangeli leyi ya ku rhula eka van’wana ha kona. Nxaxamelo wa swiphemu swinharhu swa vutirheli bya hina a wu pfuna swinene emhakeni leyi. Xivulavuri xo sungula xi kombe hi laha ntirho wa yindlu na yindlu wu veke mfungho wa Timbhoni ta Yehova ha kona. Tanihi leswi ntirho lowu wu nga oloviki, hi komba rirhandzu ra hina eka Xikwembu ni vanhu hi ku wu nghenela. Ku va lava hakunene hi humelelaka, hi fanele ku va ni vukheta ni vutshila, hi hlayisa tirhekhodo letinene ni ku vuyela hi minkarhi yo hambana leswaku hi ta kota ku fikelela hinkwavo.

Xivulavuri xa vumbirhi xi hi hlamusele leswaku ku endla vadyondzisiwa hi fanele ku hambeta hi endla maendzo yo vuyela eka vanhu lava tsakelaka, hi endla tano hi langutelo lerinene. Hi fanele ku va ni ku tsakela ka munhu hi xiyexe eka lava hi tlhelelaka eka vona, loko hi swi xiyile eka riendzo ro sungula leswi tsakisaka n’wini wa yindlu. Tiyiseka leswaku n’wini wa yindlu u dyondza nchumu wun’wana lowuntshwa eka riendzo rin’wana ni rin’wana ro vuyela.

Xivulavuri xa vunharhu xi kombe leswaku swichudeni swa hina swa Bibele swi ta pfuniwa ku va Timbhoni loko hi fikelela timbilu ta swona hi swivutiso swa malangutelo. Hi lava ku kombisa ku va tsakela ka xiviri hi ku va kongomisa enhlengeletanweni ya Xikwembu, hi va pfuna ku ya eminhlanganweni, minkarhi yin’wana hi va vhakela hambi ku ri ku va rhambela emakaya ya hina. Hi malembe ya 35 lama hundzeke, tidyondzo ta Bibele ti andze ka khume.

Endzhaku ka nxaxamelo lowu, hi kandziyiseriwe xilaveko xo kombisa ku chivirikela ku vula mahungu lamanene ya ku rhula hinkwako laha swi kotekaka kona ni le hansi ka swiyimo hinkwaswo. Vukulu a hi xihinga. Vana lavantsongo ni lava nga eka malembe ya vona ya va-90 va hambeta va chumayela. Van’wana i maphayona kumbe vachumayeri va nkarhi hinkwawo, hambi leswi va nga mabofu, hi ku helela. Van’wana va phayona hambi leswi va nga vamafa-ndleve, ni van’wana hambi ku ri lava tirhisaka switulu swa mavhilwa. Mpatswa wun’wana wa maphayona wu fambe ni vana lavantsongo va tsevu entirhweni wa nsimu.

Lexi fanelaka swinene a ku ri xitsundzuxo lexi a xi ku “Endlani Hi Matimba Hi Ku Hlanganyela eVutirhelini Bya Nkarhi Hinkwawo.” Ntirho wa nkarhi hinkwawo i ndlela leyi anerisaka swinene, leyi hakelaka ngopfu ya vutomi. Hi ku va ya sungurile, maphayona ya khutaziwe ku tikarhatela ku tshama entirhweni wa nkarhi hinkwawo.

Tanihi le ka mintsombano leyi hundzeke, hi twile hi ta vatwarisi va nkarhi wo leha va mahungu lamanene, van’wana va tirhe ku sukela eka malembe ya 30 ku ya eka 70. Va vulavule hi ntsako wa vona eku twariseni ka mahungu lamanene. Hakunene a swi khutaza ku twa hi laha va hluleke swirhalanganya ha kona va ya emahlweni evutirhelini. Hi xikombiso, makwerhu un’wana a nga tlulanga n’hweti na yin’we hi malembe ya 43 ya ntirho.

Ndzayo Ya Swirho Swa Ndyangu

Ndzayo leyinene ya swirho swa ndyangu a yi laveka swinene hikwalaho ka nxungeto lowu mafambiselo layo biha ya swilo ya wu tisaka eka lava nga endyangwini wa Vukriste. Vantshwa va vutisiwile, “Ma Kula eMoyeni Xana?” Namuntlha vo tala va tirha nkarhi hinkwawo tanihi maphayona ni le makaya ya Bethele. Kambe xana vo tala va nga endla tano? Ku kula emoyeni swi vula ku rhangisa ku rhandza ka Xikwembu evuton’wini bya hina. Nakambe swi vula ku va ni mikhuva leyinene yo dyondza ni ku hlanganyela nkarhi na nkarhi emintirhweni ya bandlha ni le ntirhweni wa nsimu, kun’we ni ku va ni vuxaka lebyinene ni lava kuleke. Naswona swi vula ku ka hi nga wu tsakeli nchumu wun’wana ni wun’wana lowu Rito ra Xikwembu ri wu sivelaka.

Nxaxamelo wun’wana wa swiphemu swinharhu wu sungule hi xivutiso lexi sechaka, “Xana Kaya Ra Wena I Ndhawu Ya Ku Wisa Ni Ku Rhula?” Xo sungula eka leswi i ku hlawula munghana la nga Mbhoni ya Yehova loyi a rhangisaka timhaka ta Mfumo ni loyi a kombisaka mihandzu ya moya wa Xikwembu. Leswaku kaya ri va ndhawu ya ku wisa ni ku rhula, wanuna u fanele ku rhangela eka swilo swa moya, naswona u fanele ku rhandza nsati wakwe tanihi miri wa yena. Wansati u fanele ku va la seketelaka ni ku va ni xichavo lexi enteke eka nuna wakwe. Nakambe i swa nkoka ku khongela swin’we ni ku ka mi nga nyiki Diyavulosi nkarhi. Vana va nga engetela eku endleni ka kaya endhawu ya ku rhula ni ku wisa hi ku titsongahata ni ku tirhisana. Swiboho swa ndyangu swa tiyisiwa loko mindyangu yi dyondza Bibele na tibuku ta Bibele swin’we.—Psalma 34:11.

Lexi a xi laveka swinene a ku ri nkulumo leyi landzeleke, “Xana Ku Hambana I Ndlela Ya Ku Rhula Ka Vukati?” Nhlamulo a yi ri yihi? Kumbexana eka vanhu va misava kambe hayi eka Timbhoni. Eka vona, ku hambana a hi ndlela yo olova yo huma eka swiphiqo swa vukati. Mongo hinkwawo wa ndzayo ya Xikwembu eka vukati hi leswaku mimpatswa yi tshama hi vun’we. Ku hambana hakanyingi ku na mbuyelo lowu vavaka eka vana lava katsekaka, naswona ku na muhandzu wun’wana wo biha. Ku swi veka kahle, ku hambana i ku amukela leswaku munghana un’we wa vukati kumbe hinkwavo ka vona a va kombisi mihandzu ya moya.—Vagalatiya 5:22, 23.

Ndzayo leyinene yi nyikiwile Vakriste lava nga nghenangiki evukatini eka nkulumo leyi nge “Xana Munhu Loyi A Nga Nghenangiki eVukatini U Fanele Ku Titwa A Nga Helelanga?” A swi tano! Tanihi leswi vutirheli byi nga pakani ya vutomi bya hina, hi nga helela hambi hi nga nghenangi evukatini kumbe hi nghenile. Kahle-kahle, tanihi laha Pawulo a kombaka ha kona, Vakriste lava nga nghenangiki evukatini va ni malunghelo yo karhi. Hi ku hlakulela ku aneriseka, va nga tsakela nyiko yo titshamela voxe ivi va yi tirhisa.—1 Vakorinto 7:32-34.

Ndzayo Leyi Lavekaka Ya Mahanyelo Lama Tengeke

Moya wa mahanyelo lama nyanyaka ku biha wa misava leyi wu vangele ku tshinyiwa erivaleni ka nhlayo leyikulu ya Timbhoni kumbe hambi ku ri ku suseriwa mahanyelo layo biha. Mawaku ndzayo leyi a yi fanela swonghasi leyi nyikeriweke etimhakeni ta mahanyelo! Ku tsakela ku rhula ka Xikwembu, hi fanele ku languta mahanyelo ya hina minkarhi hinkwayo. Leswi swi vekiwe erivaleni, hi xikombiso, eka nkulumo leyi nge “Papalata Mintlhamu Ya Ku Tirivatisa Ka Ntirhisano.” Minkhuvo yi nga va leyi tsakisaka, kambe loko hi nga tilanguteli, hi ku olova yi nga kavanyetana ni mintirho ya le tilweni ivi yi yisa eka mahanyelo lama nga basangiki. Mbilu ya munhu leyi nga hetisekangiki yi na mano naswona yi tilunghiselele ku tirhisa nkarhi wihi na wihi ku tlanga hi mahanyelo yo biha. Ngopfu-ngopfu minkhuvo leyikulu yi vanga makhombo lamakulu, swi tano na hi vuyimbeleri lebyi onhaka.—1 Vakorinto 15:33.

Ku hlayisa ku rhula ka hina ka Xikwembu, hi fanele ku “Papalata ‘Moya’ Wa Misava Lowu Dlayaka.” Ku fana ni moya lowu hi wu hefemulaka, moya lowu wa misava wa vutianakanyi ni ku nga yingisi wu hi rhendzerile. Nkulumo yi vulavule hi swikombiso swa kaye swa moya wa misava lowu wu dlayaka, lowu exikarhi ka wona ku nga na ku tlanga hi swilo leswo biha, ku bomba ku tlula mpimo ni ku tisasekisa, ku tirhisa loko biha ka swakudya ni swonwa, ku godzomberiwa hi mintlangu ni ku tidzunisa ka rixaka. Ku hambeta u hefemula moya lowu swi ta dlaya vumoya bya wena.

Mhaka leyi yi hlamuseriwe ku ya emahlweni hi nkulumo leyi nge “Xana U Tshama U Basile eTimhakeni Hinkwato?” Futa ri hi endla hi titwa hi ri na nandzu wa vugwinehi. Ku va ni ripfalo lerinene, hi fanele ku tshama hi basile emirini, emianakanyweni, emahanyelweni ni le moyeni. Emhakeni yoleyo hi fanele ku “venga leswo biha,” ‘hi nyenya leswo homboloka.’ Leswi swi katsa ku venga vunwa bya vagwinehi.—Psalma 97:10; Varhoma 12:9.

Nkulumo leyinene leyi a yi ku “Ndzayo Ya Yehova Yi Veka Mihandzu Ya Ku Rhula” a yi tirha laha. Yehova i Munyiki Lonkulu wa Ndzayo, naswona wa hi laya hikuva wa hi rhandza. Ku hava ni un’we eka hina loyi a nga laveki ndzayo. Hambi a ri N’wana wa Xikwembu a a yi lava! (Vaheveru 5:8) Ina, kahle-kahle ndzayo yi vula ku letela, hayi ku xupula nkarhi na nkarhi, naswona leswaku hi vuyeriwa eka tindlela to tala leti Xikwembu xi hi lawulaka ha tona, hi fanele ku tshembeka—ivi hi titsongahata!

Nkulumo leyi nge “Hambetani Mi Akana” yi nyikele xitsundzuxo lexinene malunghana ni ku vulavula ka hina. Hi nga vavisa swonghasi hi ku vulavula loku nga anakanyiwangiki, ko solasola kumbe ku n’unun’uta! Hakunene, ririmi ra nonon’hwa ku ri lawula. Hi laha ku fanelaka, hi tsundzuxiwile leswaku hi nga ‘tshuki hi hlevana.’ (Yakobo 4:11) Rirhandzu ra vamakwerhu ri ta hi endla leswaku hi va ni vukheta. Naswona hi nga si vulavula nchumu, ri ta hi vangela ku tivutisa: “Hakunene i ntiyiso?” “Xana ndzi fanele ku vulavula ha swona?” “Xana swi ta aka?”

Ku Ya Eka Vuprofeta

Nkulumo yin’wana ni yin’wana yi ye eka vuprofeta lebyi huhuteriweke ku kuma switsundzuxo ni swikhutazo. Xisweswo, enkulumeni leyi nge “Ku Avanyisa Ka Xikwembu—Misava A Yi Ku Tolovelanga,” xivulavuri xi kandziyise leswaku a hi na mahungu lamanene ntsena yo ma chumayela hi ta paradeyisi kambe, ku fana na Yeremiya, ku twarisa hi ku avanyisa loku taka ka Xikwembu. (Yeremia, tindzima 6 na 7) Tanihi leswi Yeremiya hi xivindzi a paluxeke tidyondzo ta mavunwa ni swiendlo leswi onhakeke swa varhangeri va vukhongeri va siku rakwe, kutani hi khutaziwe ku endla tano.

Nkulumo leyi nge “Nkarhi Wa Ku Ringiwa Ni Wo Hlawula” yi kombe ku tirha ka manguva lawa ka Malakia 3:1-3. Hakunene, vanhu va Yehova va basisiwile eka tidyondzo to hemba ni swiendlo swa Babilona. Masungulo ya endlelo ra le tilweni ni ku twisisiwa ka leswaku vutirheli bya yindlu na yindlu i bya nkoka wo sungula a swi ri exikarhi ka tinhla letinene leti xivulavuri xi ti humeseke.

Nakambe hi twile nkulumo leyinene leyi eka yona xivulavuri xi vulavuleke hi tindzima 11 na 12 ta Daniyele. A yi ri na xihloko lexi nge “Swihundla Leswo Kwetsima Leswi Nga Fihliwangiki Swi Rindzela Ntshembo Lowu Tiyisekeke Wa Ku Rhula.” Ku lwa ka hosi ya le n’walungwini ni ya le dzongeni swi vangela misava ku va empfilumpfilwini. Eka vuprofeta bya Daniyele, hi nga swi vona leswaku tihosi leti ti nga ka ti nga heti ku lwisana ka tona. I Mikayele ntsena a nga ta tisa ku rhula loku nga heriki.

Nkulumo yin’wana leyi yeke eka vuprofeta lebyi huhuteriweke a ku ri leyi nge “Nsirhelelo Wa Misava Hinkwayo Ehansi Ka ‘Hosana Ya Ku Rhula.’” A yi vulavula hi Esaya 9:6, 7 ni mongo wa tindzimana teto, lowu kombaka hi laha vuprofeta byolebyo hi laha ku fanelaka byi tirheke ha kona eka Yesu Kriste. Xivulavuri xi vule eku heteleleni ka xona leswaku Mikayele “u ta hetelela ntirho wakwe hi ku hlula eArmagedoni loku nga ta pfuma ku nga miyeli hi laha ku nga heriki . . . kutani ke, yanani eku twaleni lokukulu ka misava ku tlula eku sunguleni, n’wina hinkwenu Timbhoni ta Yehova, hi laha ku heleleke mi tshemba Xikwembu xa n’wina ni Hosi leyi fumaka ya xona, ‘Hosana Ya Ku Rhula’! Kombisani ku nga chavi hi laha ku heleleke ka ku hlambanyelana ka sweswi ka misava . . . hinkwenu vonani swikombiso ni swifaniso eku dzuniseni ka Yehova!” Leyi hakunene a ku ri yin’wana ya tinkulumo leti nyanyulaka ta ntsombano.

Tlangela Lava Rhangelaka

Nxaxamelo wa swiphemu swimbirhi lowu nga ni xihloko lexi nge “Valanguteri Lava Tirhelaka Mintsako Ya Ku Rhula” hakunene wu hi pfunile ku tlangela lava rhangelaka. Xivulavuri xo sungula xi vulavule hi ntirho wa valanguteri lava famba-fambaka ivi xi komba leswaku hakunene, va faneriwa hi ku xiximiwa kambirhi hikwalaho ka mintirho ya vona yo tala. Leswi swi katsa ku nyikela tinkulumo, ku pfuna eku tlhantlheni ka swiphiqo, ku letela vamakwerhu eku vekeni ka vumbhoni na ku vhakela vavabyi emirini kumbe emoyeni. Hakunene, valanguteri hinkwavo lava famba-fambaka va lava ntirhisano wa hina lowu teleke ni malwandla yo fana ni ya Lidiya.—Mintirho 16:15.

Xivulavuri xa vumbirhi xi hlamusele mintirho ya vakulu ni ntirho wa vona eku kuriseni ka ku rhula ebandlheni. Leswi va nga swi endla hi ku lunghiselela ni ku fambisa minhlangano, va endla maendzo ya vurisi, va khoma timhaka to avanyisa, va rhangela entirhweni wa nsimu ni ku veka xikombiso lexinene emahanyelweni ni le vuton’wini bya ndyangu. Hakunene, hinkwerhu ka hina hi fanele hi lava ku komba ku tlangela vakulu lava hlawuriweke hi ku yingisela ni ku titsongahata, hi laha hi layiwaka ha kona eka Vaheveru 13:17.

“Ku Navela Ni Ku Kuma Xiyimo Lexinene” a ku ri nkulumo leyi hlamuseleke xilaveko xa vakulu lava fanekelaka hikwalaho ka ku andza lokukulu ka Timbhoni. Yi kombe vamakwerhu hinkwavo lava tinyiketeleke lava nga riki vakulu hi laha va nga fikelelaka malunghelo lamakulu ha kona. Ngopfu-ngopfu nkulumo yi khutaze lava a va faneleka kambe va nga voni xilaveko xo tirhela ku tivutisa, Ha yini ndzi tlhelela endzhaku?

Timhaka Tin’wana Ta Moya

Lexi tlangeriweke swinene a ku ri nkulumo leyi nge “Xana Wa Aneriseka Hi Malunghiselelo Ya Yehova?” Hi twile swikombiso swa Bibele swa lava va tlangeleke malunghiselelo ya moya lawa Xikwembu xi ma nyikeleke ni lava va nga ma tlangelangiki. Mpimo lowu hi tikarhatelaka xilaveko xa hina xa moya ha wona, hi ta aneriseka hi wona hi malunghiselelo ya Yehova naswona hi ta swi kombisa. Hi ndlela yihi? Hi ku xava nkarhi wa dyondzo ya Bibele ya munhu hi xiyexe na hi ku tidyondzisa loko hi ri eminhlanganweni leswaku hi kuma swo tala eka yona.

Lexi ku nga vuriwaka leswaku xi pfuxe mphikamakaneta yin’wana eka vumoya bya hina xi vuriwe eka nkulumo leyi nge “Swikhongelo Swa Wena I Swa Ntikelo Hi Ndlela Yihi?” Ku vuriwe leswaku hi tivutisa: Xana ndzi tshike swikhongelo swa mina swi va swo phindhaphindhiwa, swi vula xilo xin’we kumbe i swa xihatla, onge hi loko ndzi ri bizi eku endleni ka vululami eku vulavuleni ka mina ni Xikwembu? Hi xikhongelo, hi ta eka Munhu lonkulu emisaveni. Leswaku swikhongelo swa hina swi va swa ntikelo, Xikwembu xi fanele ku va xa xiviri hakunene eka hina. Swi fanele swi huma embilwini ni ku ba nhloko ya mhaka, naswona hi fanele ku ehleketa.

Xihlovo xin’wana xa ntsako a ku ri nkulumo ya nkhuvulo leyi nge, “Ku Kuma Ku Rhula Ni Xikwembu Hi Ku Tinyiketa Ni Nkhuvulo.” Xivulavuri xi kombe leswaku nkhuvulo wa hina i xiendlakalo lexikulu ni lexi tsakisaka swinene. Hikwalaho ka wona, hi kuma ku rhula ni Xikwembu ivi hi va vatirheli lava hlawuriweke va Timbhoni ta Yehova. Naswona ku tinyiketa ka hina a hi ku tiboha ntsena, hikuva hi nga endla ni ku hlayisa ku tiboha ko tala hi nkarhi wun’we. Ku ri na sweswo, ku tinyiketa swi vula ku ‘tinyikela hi ku helela eka Munhu lowo Kwetsima,’ Yehova Xikwembu.

Tidrama timbirhi ta Bibele a ti ri exikarhi ka swiendlakalo swa ntsombano lowu rhandzekaka. Ku Hlayisa Vutomi Enkarhini Wa Ndlala yi vulavule hi mhaka leyi khumbaka ya Yosefa ni vamakwavo, leyi ririseke vo tala. Mbilu leyo leha ya Yosefa, moya wo rivalela i xikombiso lexinene eka hina hinkwerhu ku xi tekelela. Nakambe mhaka yi na nkoka wa vuprofeta. Drama ya vumbirhi leyi a yi ku, Lava Ku Lulama Ka Xikwembu Leswaku U Pona, yi nyikele xitsundzuxo lexi nga ni matimba lexi xiyekaka mayelana ni swirhalanganya swa vantshwa va hina. Yi kandziyise xilaveko xo hlayisa mahanyelo ya hina, hi rhangisa timhaka ta Mfumo, nakona hi nga hatliseli ku avanyisa makungu ya van’wana.

Lexi xi pfumelelanaka ni xihloko xa ntsombano a ku ri nkulumo ya rivala leyi nge, “Ku Rhula Eku Heteleleni—Loko Xikwembu Xi Vulavula.” Xo sungula, hi twile ku paluxiwa ka vunwa bya malunghiselelo hinkwawo ya nyutliya ni ku pfumala ntshembo ka xiyimo xa misava hi malangutelo wahi ni wahi ya vanhu. I Mfumo wa Xikwembu ntsena wu nyikaka ntshembo lowu tiyeke. Xana swi vula yini ku yingisela loko Xikwembu xi vulavula? A swi vuli ntsena leswaku hi yingisela hi vukheta ni ku twisisa leswi Xikwembu xi swi vulaka kambe ni leswaku hi endla xanchumu hi leswi xi swi vulaka. Kutani a hi nge kanganyisiwi hi ku xisa loku nge “Ku Rhula Ni Nsirhelelo!”

Nkulumo yo hetelela leyi a yi ku, “Ku Lulamisiwa Hi Xikwembu Xa Ku Rhula Leswaku Hi Endla Ku Rhandza Ka Xona,” yi rhumele vatsombani hinkwavo ekaya va titwa kahle embilwini hi nkhuvo hinkwawo wa swa moya lowu va wu tsakeleke hi masiku ya mune. Ku tlula hambi ku ri rini emahlweni, hakunene ntsombano wu hi lulamiserile ku endla ku rhandza ka Xikwembu. Kutani “a hi yeni emahlweni hi tiyimisele ku endla yini? Ku ya emahlweni entirhweni lowukulu wa ku chumayela Mfumo, hakunene hi ri lava tlangelaka ku rhula ka hina ka Xikwembu na hinkwaswo leswi ku vulaka swona eka hina!”

EUnited States, a ku ri na mintsombano ya 135 leyi endleriweke emalokhixini yo hambana-hambana ya 65 hi tindzimi ta 11. Nhlohlorhi ya lava veke kona a ku ri 1 276 578, na 12 603 lava khuvuriweke. Mintsombano minharhu eYankee Stadium eMutini wa New York a yi ri na nhlohlorhi ya 95 091, ni 1 110 lava khuvuriweke.

[Bokisi leri nga eka tluka 30]

Tibuku Ta Ntsombano Wa “Ku Rhula Ka Xikwembu”

Buku yo sungula a yi ri mpfuxeto wa xibukwana xa “Vonani, Ndzi Endla Swilo Hinkwaswo Swi Va Leswintshwa,” eku heteleleni ka nkulumo emhakeni yoleyo. Sweswi i broxara ya mihlovo ya mune, leyi tsariweke hi maletere lama kurisiweke naswona yi khome vuxokoxoko lebyi engetelekeke. Yi fanele yi va ya nkoka ku sungula tidyondzo ta Bibele ta le makaya.

Timbhoni Ta Yehova—Ti Endla Ku Rhandza Ka Xikwembu Hi Vun’we eMisaveni Hinkwayo, “broxara ya mihlovo ya mune ya vukulu bya magazini, a ku ri buku ya vumbirhi ku humesiwa. I xitirho lexinene xo tivisa van’wana hi mintirho ya hina yo hambana-hambana nakambe yi nyikela marungula ya matimu hi Timbhoni ta Yehova.

Buku ya vunharhu a ku ri xipfuneto xo dyondza Bibele xa matluka ya 192 xo sungula ku tirha eTidyondzweni ta hina ta Buku ya Bandlha. Yi na xihloko lexi nge Nsirhelelo Wa Misava Hinkwayo eHansi Ka “Hosana Ya Ku Rhula.”

Kingdom Melodies No. 7 a ku ri nchumu wa vumune ku humesiwa, nchumu lowu tsakiseke vatsombani hinkwavo.

[Swifaniso leswi nga eka tluka 31]

1. Yosefa loyi a xavisiweke hi vamakwavo eka drama entsombanweni wa Timbhoni ta le Korea eUnited States

2. Muungameri wa Sosayiti ya Watch Tower F. W. Franz u nyikela vayingiseri nkulumo entsombanweni

3. Xiphemu xa vayingiseri lava rhiyeke ndleve eYankee Stadium, eMutini wa New York

4. Magidi ya khuvuriwile ku kombisa ku tinyiketela ka wona eka Yehova Xikwembu