Mintsombano Leyi Nyanyulaka Yi Seketela Dyondzo Ya Xikwembu
NAMUNTLHA, misava yi ni marungula lama yaka ma andza. Eka thelevhixini ni xiya-ni-moya, etibukwini kumbe hi ku tirhisa tikhomphyuta, ku ni vutivi lebyi nga pimekiki bya mhaka yin’wana ni yin’wana leyi u nga yi ehleketaka. Kambe, vanhu va vabya ni ku fa. Vugevenga, ndlala ni vusweti swi kona emisaveni hinkwayo, naswona ku pfilunganyeka ka mintlhaveko ku hlasela vanhu vo tala ku tlula eku sunguleni. Vutivi hinkwabyo byi tsandzeke ku lulamisa timhaka. Ha yini? Hikuva vanhu va fularhele vutlharhi bya Xikwembu.
Kutani, vona ndlela leyi swi fanelanaka ha yona leswi ku hlawuriweke leswaku “Dyondzo ya Xikwembu” yi va nhloko-mhaka ya mintsombano ya sweswinyana ya Timbhoni ta Yehovha! Nongonoko wu tsundzuxe lava a va ri kona leswaku i dyondzo leyi kumekaka eRitweni ra Xikwembu ntsena, ku nga Bibele leri nga ni nkoka wa xiviri.
Ntsombano wo rhanga wu sungule hi Ravumune, June 3, le Uniondale, New York, U.S.A. Ku suka kwalaho nongonoko wu nyikeriwe emadorobeni yo hambana-hambana ku suka etikweni rin’wana ku ya eka rin’wana, wu hetelela hi le tikweni-nkulu ra Afrika na Amerika Dzonga.
Ndzhenga Wa Siku Ro Sungula
Siku rin’wana ni rin’wana a ri ri ni nhloko-mhaka leyi a yi kandziyisa yinhla ya dyondzo ya Xikwembu. Hi xikombiso, nongonoko wa siku ro sungula a wu sekeriwe eka nhloko-mhaka-nkulu leyi nge “Ku Tiva Dyondzo Leyi Humaka Eka Xikwembu.” (Yohane 7:17) Mhaka leyi yi hlamuseriwe kahle hi ku famba ka siku.
Endzhaku ka risimu ni xikhongelo, mutshama-xitulu wa ntsombano u pfule nongonoko hi nkulumo leyi nge “Dyondzo Ya Xikwembu Ya Hi Hlanganisa.” U kombise leswaku vanhu va Yehovha va hlanganisiwa hi ku dyondza tindlela ta Yena ni ku famba emintileni ya Yena. (Mikiya 4:1-5) Dyondzo ya Xikwembu yi tiyisa vun’we bya vona. Vatsombani va khutaziwe ku tsakela vun’we bya vona bya vumakwavo.—Pisalema 133:1-3.
Endzhaku ka nkarhinyana nhlikanhi wolowo, minhlangano ya vandlha ya nkarhi na nkarhi yi hlamuseriwe hi nxaxamelo lowu nge “Minhlangano Leyi Hi Dyondzisaka Tindlela Ta Yehovha.” Xivulavuri xo sungula xi tsundzuxe vatsombani leswaku loko hi hlangana kun’we, hi xixima Yehovha xisweswo hi amukela mikateko Yakwe. Xivulavuri lexi tlhandlameke xi kandziyise xilaveko xo hlanganyela eminhlanganweni. Hi ku endla tano, hi dzunisa Yehovha erivaleni, hi kombisa ripfumelo ra hina, ni ku tiyisa ripfumelo ra van’wana. Xivulavuri xa vunharhu enxaxamelweni xi kombise xilaveko xo tirhisa leswi hi swi dyondzaka eminhlanganweni. Hi fanele ku va “vaendli va rito, [ku nga ri] vatwi ntsena.”—Yakobo 1:22.
Endzhaku ku landzele bulo lerinene ra ku yimbelelela Yehovha swidzuniso. Risimu leri humaka embilwini i xiphemu xa ntikelo xa vugandzeri bya hina. Nkulumo leyi yi landzeriwe hi nkulumo-nkulu leyi nge “Dyondzo Ya Xikwembu Leyi Hlulaka.” Mawaku nhloko-mhaka leyinene swonghasi! Xivulavuri xi te: “Yehovha i Xihlovo xa dyondzo leyinene ku tlula yihi na yihi leyi munhu a nga yi kumaka.” Kutani, endzhaku ka bulo ro koma ra singita ra byongo bya munhu, xi te: “Hi fanele ngopfu-ngopfu hi tirhisa matimba ya hina yo ehleketa leswaku hi kuma dyondzo ya Xikwembu. Hi yona ntsena yi nyikaka vutlharhi bya ntiyiso.” Mawaku ntiyiso lowonghasi!
Mixo Wa Vumbirhi
“Hambetani Mi Sasekisa Dyondzo Ya Xikwembu, Muponisi Wa Hina” a ku ri nhloko-mhaka ya siku ra vumbirhi ra ntsombano. (Tito 2:10) Nsinya lowu wa nawu wu vekiwe erivaleni eka nkulumo leyi nge, “Dyondzo Ya Xikwembu Yi Hlasela Tidyondzo Ta Mademona.” Ina, mademona ma ni tidyondzo ta wona. (1 Timotiya 4:1) Hi laha xivulavuri xi hlamuseleke ha kona, dyondzo ya Xikwembu yi hlula “vutlharhi” bya Sathana hi ku paluxa tidyondzo ta mavunwa ni tindlela ta mano ta Diyavulosi. Hikwalaho ka leswi Vakreste van’wana va timbilu leto lulama va 4 500 000 a va ha ri mahlonga ya munyama wa Sathana.—Yohane 8:32.
Kambe, hi fanele ku hambeta hi alela Sathana. Leswi swi kandziyisiwe hi nkulumo leyi nge “Xana Wa Wu Ala Moya Wa Misava?” Moya wa misava leyi wa dlaya. Wu khutaza mahanyelo lama thyakeke, langutelo ro xandzukela vuhosi, ni makwanga yo navela swilo leswi vonakaka. Mukreste u fanele ku hambeta a tikambela. Xana wa ha ri na mimpimanyeto leyi tlakukeke loko swi ta eka leswi a swi hlalelaka, leswi a swi yingiselaka kumbe leswi a swi hlayaka? Nchumu lowu khutazaka, xivulavuri xi te: “Vamakwerhu va xinuna ni va xisati, ni vana, ha mi bumabumela hikwalaho ka matshalatshala lawa mi ma endlaka emhakeni leyi.”—1 Yohane 2:15-17.
Ku ni nchumu wun’wana lowu endlaka leswaku swi nonon’hwa ku ala moya wa misava. Hi wihi nchumu wa kona? Hinkwerhu ka hina a hi hetisekanga. Ina, Yesu u fele swidyoho swa hina, kambe ha ha fanele ku lwisana ni mboyamelo wa vudyoho. Leswi swi kambisisiwe eka nkulumo leyi nge “Ku Lwisana Ni Nyama Leyi Nga Wela eXidyohweni.” Exikarhi ka swilo swin’wana xivulavuri xi vule leswaku hi nga hlula nyimpi ya hina ni vudyoho loko hi ambala vumunhu lebyintshwa ni ku papalata xin’wana ni xin’wana lexi nga vangelaka mimboyamelo ya hina ya vudyoho.
“Hanya Hi Ku Landza Dyondzo Leyi Hanyisaka” a ku ri xihloko xa nkulumo leyi landzeleke. Van’wana va tikarhatela ngopfu rihanyo ra miri. Hambi swi ri tano, entiyisweni rihanyo ra moya i ra nkoka swinene. Xivulavuri xi kandziyise nkoka wa vutihlamuleri bya hina emhakeni leyi, naswona xi ve ni rito ra ku khutaza ngopfu-ngopfu vavasati va Vakreste. Xi te: “Hi va tlangela swinene vamakwerhu va xisati lavakulu ni lavatsongo lava va ringaniselaka eku hisekeni ka vona ni le ku khathaleleni ka vutihlamuleri bya vona.” Ina, hinkwerhu ka hina hi nkhensa Yehovha hikwalaho ka dyondzo leyi hanyisaka leyi yi hi hambanisaka ni misava.
Nkulumo leyi a yi ku “Dyondzo Ya Xikwembu Yi Paluxa Xikongomelo Xa Vutomi” yi gimete nongonoko wa ni mixo. Xivulavuri xi te: “Vanhu vo tala va hetelela va tivutisa leswaku, ‘Xana hi xihi xikongomelo xa vutomi?’” Hi tinhla ta matimba xi kombise leswaku i Bibele ntsena leyi nga ni nhlamulo ya xivutiso xexo. Kutani xivulavuri xi kombise leswaku switshembiso leswi hlamarisaka swa Xikwembu swi hi nyika xikongomelo evuton’wini hi laha ku tsakisaka. Kumbexana, vo tala va vayingiseri a va ehleketa leswaku, ‘Leswi hi swona leswi vanhu va le nsin’wini ya ka hina va lavaka ku swi twa hakunene.’ Huvo Leyi Fumaka yi pfumelelana na swona. Emakun’wini ya nkulumo leyi ku humesiwe broxara leyi nge Xana Xikongomelo Xa Vutomi I Yini? Mawaku ndlela leyi un’wana ni un’wana a a tsake ha yona! Nkarhi wa ku wisa wa ni nhlikanhi wu nyikele nkarhi wa ku langutisisa nkandziyiso lowu lowuntshwa.
Ndzhenga Wa Vumbirhi
Nkulumo yo sungula ya ni ndzhenga a yi ri ni nhloko-mhaka leyi khutazaka leyi nge “Rhulani Mivilelo Ya N’wina Hinkwayo Eka Yehovha.” Swilo swo tala swi vangela ku vilela; kambe Rito ra Xikwembu ri vula leswaku hi fanele ku rhula ku vilela ka hina hinkwako eka yena. (1 Petro 5:6, 7) I ntiyiso, swiphiqo swin’wana swi ya emahlweni, naswona emhakeni leyi xivulavuri xi khutaze xi ku: ‘Lehisa mbilu. Rindzela Yehovha. Vana ni ripfumelo leri tiyeke ra leswaku ku landzela Bibele i swinene minkarhi hinkwayo. Loko hi hlayisa timbilu ta hina ti langute eka Yehovha, hi ta tsakela “ku rhula ka Xikwembu” loku tlulaka ku twisisa hinkwako.’—Vafilipiya 4:6, 7.
Tinkulumo ta mune leti landzeleke ti kombise leswaku dyondzo ya Xikwembu yi tirha ni le vuton’wini bya ndyangu. Yo sungula, “Ku Endla Leswaku Vukati Byi Va Ni Vun’we Lebyi Khomelelaka,” yi tsundzuxe vatsombani leswaku emahlweni ka Yehovha vukati a hi matlangwana, hi laha vanhu vo tala va byi langutaka ha kona emisaveni. Hambi swi ri tano, ku endla leswaku vukati byi humelela hi fanele ku landzela nkongomiso wa Yehovha. U hi endlile. Hikwalaho, Rito rakwe leri huhuteriweke ri ni xitsundzuxo lexinene ngopfu xa vukati ku tlula swin’wana leswi nga kona.
Nkulumo leyi nge “Tikarhatele Ku Ponisiwa Ka Ndyangu Wa Wena” yi hlamusele mintlhontlho yo hlayisa ndyangu eminkarhini leyi yo nonon’hwa. (2 Timotiya 3:1) Vatswari va dyondzisa vana va vona rihanyo ra miri, mahanyelo, ndlela yo tirha, ni ku hanana swin’we ni ku khathalela vanhu van’wana. Xa nkoka ngopfu, va fanele ku dyondzisa vana va vona ku va malandza lama tinyiketeleke ya Yehovha.—Swivuriso 22:6.
Enkulumeni leyi tlhandlameke leyi nge, “Vatswari, Vana Va N’wina Va Lava Nyingiso Wo Hlawuleka,” xivulavuri xi tsundzuxe vatsombani xilaveko xo bumabumela vana, loko hi hala tlhelo va nga honisi ku tsana ka vona. Ngopfu-ngopfu vatswari va fanele ku va ni vuxiya-xiya eka mimboyamelo yo pfumala vutshembeki, ku rhandza swilo leswi vonakaka, kumbe vutianakanyi.
Ngopfu-ngopfu vatsombani lavatsongo va yi yingisele hi vukheta nkulumo leyi nge “Vantshwa—Xana Mi Yingisa Tidyondzo Ta Mani?” Swilo swa nonon’hwa eka Vakreste lavatsongo namuntlha. Ku fambisana ni misava swa olova, kambe leswi swi yisa eku feni. Hambi leswi ku namarhelana ni dyondzo ya Xikwembu swi lavaka xivindzi eka muntshwa, swi tisa mikateko leyikulu sweswi ni vutomi lebyi nga heriki enkarhini lowu taka.—1 Timotiya 4:8.
Siku ra vumbirhi ri hele hi drama leyi tsakisaka leyi nge Vantshwa Lava Tsundzukaka Muvumbi Wa Vona Sweswi. Exinghenisweni, mufambisi u vule leswaku vantshwa lava nga enhlengeletanweni ya Xikwembu i “vuthu ro tshembeka ra le tilweni leri ngheneleke ntirho wo tinyiketa eka Yehovha Xikwembu ni Hosi yakwe leyi totiweke ya le tilweni, Kreste Yesu.” U engeterile: “Entiyisweni vantshwa va hina va endla ntirho lowunene!” Hi ku kongoma drama yi kombise leswaku loko mutswari a letela n’wana kahle, n’wana u ta tiyimela loko a kurile naswona u ta tirhela Yehovha hi yexe.
Mixo Wa Siku Ra Vunharhu
Nhloko-mhaka ya siku ra vunharhu a yi ku “Hambetani Mi Dyondzisa Vanhu Va Matiko Hinkwawo.” (Matewu 28:19, 20) Handle ko kanakana vatsombani a va langutele xitsundzuxo lexi nga enkarhini xa ntirho wo chumayela, naswona a va khomisiwanga tingana. Nxaxamelo lowu a wu ku “Ku Tirha Ntirho Wa Hina Wo Chumayela Ni Ku Dyondzisa Hi Ntsako” wu tiyise ku tiyimisela ka vona ko hambeta va hlanganyela entirhweni wo nyikela vumbhoni. Nkulumo yo pfula yi vulavule hi maendzo yo sungula; ya vumbirhi, maendzo yo vuyela; kasi ya vunharhu tidyondzo ta Bibele. Vurhumiwa emisaveni hinkwayo va rhamberiwa ku tlhelela emakaya naswona va ya entsombanweni ni mindyangu ya ka vona ni vanghana. Etindhawini tin’wana varhumiwa va hlanganyerile exiphen’wini lexi xa nongonoko. A swi tsakisa ku twa hi ta ku humelela ka vona eswiavelweni swa vona. Nkulumo leyi landzeleke leyi nge, “Ku fikelela Vanhu Hinkwavo Hi Mahungu Lamanene” yi kombise vuyelo bya vumbhoni bya xitshuketa.
Nongonoko wa ni mixo wu gimetiwe hi nkulumo ya nkhuvulo, leyi nkarhi na nkarhi yi nga yinhla-nkulu eka tinhlengeletano letikulu ta Timbhoni ta Yehovha. Emintsombanweni hi ku landzelelana ka yona, mintlawa leyikulu ya vanhu lavantshwa lava tinyiketelaka yi yime emahlweni ka mintshungu leyi hlengeletaneke naswona hi xivindzi va hlamule va ku ina eka swivutiso swimbirhi leswi kongomisiweke eka vona. Kutani va ye eka nkhuvulo wa le rivaleni. Vona vumbhoni bya matimba swonghasi bya nkucetelo lowukulu wa dyondzo ya Xikwembu!
Ndzhenga Wa Siku Ra Vunharhu
Nongonoko wa ni ndzhenga wu sungule hi bulo leri enteke ra Matsalwa. Timbhoni ta Yehovha ti tolovelane ni marito ya Matewu ndzima 24 na Luka ndzima 21. Xana van’wana a va ehleketa leswaku ku hava swilo leswintshwa leswi nga vuriwaka malunghana ni tindzima leti ta Bibele? Vona ndlela leyi a va hoxise ha yona! Tinkulumo leti nge ‘Xikombiso Xa Vukona Bya Wena Xi Ta Va Xihi?’ ni leyi nge ‘Hi Byele, Xana Swilo Leswi Swi Ta Humelela Rini?’ ti kokele vatsombani ebulweni leri tsakisaka ra swiyenge swa tindzima teto timbirhi naswona ri nyikele nhlamuselo ya tindzimana tin’wana leti nga enkarhini. Ku ve ni mabulo lama nyanyulaka endzhaku ka tinkulumo loko vatsombani va kombana tinotsi ku vona loko tinhla va ti twisisile. Handle ko kanakana, swivutiso swo tala swi ta hlamuriwa loko rungula leri ri humesiwa eka Xihondzo xo Rindza.
Nhloko-mhaka ya dyondzo ya Bibele yi yisiwe emahlweni hi nkulumo leyi nge “Tinhlamulo Leti Dyondzisaka Ta Swivutiso Swa Wena Hi Bibele.” Kutani nongonoko wu nghene eka mhaka yin’wana. Lembe ra 1993 ri funghe lembe ra vu-50 ra Xikolo xa Bibele xa Gilead xa Watchtower. Nkulumo leyi nge “Makume-ntlhanu Wa Malembe Ya Vuleteri Ni Ntirho Wa Vurhumiwa Le Gilead” yi kombe vatsombani leswi swi hetisisiweke hi nkarhi wolowo. Loko ku ve ni varhumiwa hi nkarhi wa nkulumo leyi nge “Leswi Swi Hetisisiwaka Hi Ku Vula Evhangeli eNsin’wini Ya Misava Hinkwayo,” va rhambiwe ku avelana yin’wana ya mintokoto ya vona ni vayingiseri. Ku yingisela timhaka ta varhumiwa a swi nyanyula swinene!
Nkulumo leyi landzeleke leyi nge, “Xivangelo Xa Leswaku Timbhoni Ta Yehovha Ti Tshama Ti Hitekile,” a yi ri dyondzo yin’wana ya matimu. Yi kombise leswaku Vakreste a va tshama va hitekile ku sukela hi lembe xidzana ro sungula C.E. ku fikela sweswi. Leswi swi vangele ku hlamala kun’wana. Eku sunguleni ka nkulumo leyi tlhandlameke, leyi nge: “Vahuweleri Va Mfumo Va Gingiriteka eMisaveni Hinkwayo,” xivulavuri xi tlakuse vholumo leyikulu (loko se yi kumeka hi ririmi ra kwalaho) xi ku: “I ntsako namuntlha ku tivisa ku humesiwa ka buku leyi leyintshwa leyi nge Timbhoni Ta Yehovha I Vahuweleri Va Mfumo Wa Xikwembu.” Buku leyi yi tamele vuxokoxoko bya matimu ya manguva lawa ya Timbhoni ta Yehovha. Yi hlamusela mhaka leyi nyanyulaka ya ku tiyisela, ku tiyimisela, ni ku humelela, yi nyikela vumbhoni bya moya wa Yehovha lowu tirhaka eka malandza ya yena.
Mixo Wa Vumune
Kutani se a ku ri siku ro hetelela ra ntsombano. Nhloko-mhaka-nkulu ya siku, “Ku Vuyeriwa Hi Dyondzo Ya Xikwembu,” yi endle leswaku ku languteriwa leswikulu eku chaputeni ka nongonoko. (Esaya 48:17) Ni mixo nyingiso wa vatsombani wu kokeriwe eka nxaxamelo wa tinkulumo tinharhu ta matimba. Nxaxamelo lowu a wu ku “Xitsundzuxo Xa Yeremiya Lexi Huhuteriweke—Eka Nkarhi Lowu Hundzeke Ni Namuntlha,” a wu ri ni bulo ra ndzimana hi ndzimana ra Yeremiya tindzima 23, 24, na 25. Mawaku rungula ra matimba leri tindzima leti ti nga na rona! Israyele la nga tshembekiki wa siku ra Yeremiya u fanele a chavile hikwalaho ka switsundzuxo swakwe leswi tshembekaka, leswi huhuteriweke hi Xikwembu. Misava hinkwayo yi chave swinene loko switsundzuxo leswi swi hetiseka. Xana swilo swa hambana namuntlha? Nikatsongo. Timbhoni ta Yehovha ti chumayela marungula ya ku avanyisa ya Xikwembu hi xivindzi. Eku heteleleni, mafambiselo lawa ya swilo hinkwawo ma ta langutana ni swiendlo swa ku avanyisa swa Yehovha. Leswi swi ta vula ku lovisiwa ka makumu ka misava ya Sathana.
Mixo wa Sonto wu gimetiwe hi drama ya vumbirhi leyi nge, Mi Nga Kanganyisiwi, Naswona Mi Nga Vungunyi Xikwembu. Hi ku kongoma, yi kombe ndlela leyi dyondzo ya Xikwembu yi nga hi sirhelelaka ha yona eku kuceteriweni hi tivhidiyo ni vuyimbeleri lebyi thyakeke kun’we ni mboyamelo wo byala ku avana exikarhi ka Vakreste-kulorhi. Loko drama yi hela, mutshama-xitulu u tshahe marito lama tlhontlhaka mianakanyo ya mutlangi un’wana a ku: “A hi sirhelelekanga eka minkucetelo ya misava. Loko hi nga lwi, misava hi mano ya yona yi nga onha mianakanyo ya hina. Naswona leswaku hi tshama hi tshembekile kumbe e-e swi titshege hi leswi hi swi byalaka.” Vona ndlela leyi leswi swi nga ntiyiso ha yona!
Ndzhenga Wo Hetelela
Ntsombano a wu tshinelela makumu ya wona hi xihatla loko xivulavuri xi ya exitejini xi ya nyikela nkulumo ya le rivaleni, leyi nge “Dyondzo Leyi Pfunaka eMinkarhini Ya Hina Leyo Nonon’hwa.” Hi ndlela leyi twisisekaka ni leyi kongomeke, xi kombise swiphiqo leswikulu leswi hi khumbaka hinkwerhu namuntlha ivi xi kombisa tindlela tin’wana leti dyondzo ya Xikwembu yi nga hi pfunaka ha tona ku tsakela vutomi byo antswa. Xi vule leswaku loko hi landzela dyondzo ya Matsalwa sweswi, hi ta kota ku yi landzela hi laha ku nga heriki emisaveni leyintshwa ya Yehovha.
Endzhaku ka nkatsakanyo wa dyondzo ya vhiki na vhiki ya Xihondzo xo Rindza, a ku ri nkarhi wa nkulumo yo hetelela. Hi xihatla xivulavuri xi hlamusele tinhla-nkulu ta nongonoko wa masiku ya mune ivi xi tsundzuxa vatsombani hi tibuku letintshwa. Xi tlhele xi tivisa leswaku khasete ya vumbirhi ya vhidiyo leyi nge The Bible—A Book of Fact and Prophesy yi ta humesiwa ku nga ri khale. Kahle-kahle, khasete ya vhidiyo leyi nge The Bible—Mankind’s Oldest Modern Book, sweswi ya kumeka hi Xinghezi. Ku vikiwe swiviko leswi khumbaka mbilu swi huma etindhawini leti nga ni minkitsikitsi, to tanihi Bosnia na Herzegovina. Emakumu, xivulavuri xi hlaye marito ya Eklesiasta 12:13: “A hi yingiseni makumu ya timhaka hikwato: Tšhav̌a Šikwembu, u hlayisa milawu ya šona, hikuv̌a hi yona fanelo hikwayo ya munhu.”
Mawaku xitsundzuxo lexinene swonghasi! A hi languteleni siku leri vanhu hinkwavo va nga ta dzunisa Mudyondzisi wa hina Lonkulu, Yehovha ni ku yingisa dyondzo yakwe leyi tlakukeke.
[Swifaniso leswi nga eka tluka 24, 25]
Mintsombano ya “Dyondzo ya Xikwembu” le Moscow ni le Kiev yi tise ntsako lowukulu
[Swifaniso leswi nga eka tluka 26, 27]
1. Hi ku khuvuriwa, vo tala va kombise ku tinyiketela ka vona eka Xikwembu
2. Mutsombani wa malembe ya 100 hi vukhale a a nyanyukile loko a amukela buku leyintshwa
3, 4. Tidrama leti tlhontlhaka mianakanyo ti tlangeriwe swinene
5. Varhumiwa lava ku vulavuriweke na vona emintsombanweni va kombise mpfuno wa dyondzo ya Xikwembu