Vadyondzisi Va Rito RA Xikwembu Va Khutaziwa Ku Hetisisa Ntirho Wa Vona
VADYONDZISI va madzana ya magidi va hlengeletanile leswaku va ta dyondzisiwa etin’hwetini leta ha ku hundzaka. Ku sukela hi May n’wexemu, va hlengeletane eka madzana ya Mintsombano ya Miganga ya Timbhoni ta Yehovha ya “Vadyondzisi Va Rito ra Xikwembu” emisaveni hinkwayo. Vayingiseri va khutaziwe leswaku va tidyondzisa, va va vadyondzisi vo antswa va tlhela va hetisisa ntirho wa vona.
Xana u yile eka wun’wana wa mintsombano yoleyo? Loko swi ri tano, u fanele u tsakele swakudya swa moya leswi a swi phameriwa vayingiseri emintsombanweni yoleyo ya ku gandzela Yehovha, Xikwembu xa xiviri. A hi pfuxeteni nongonoko lowu dyondzisaka wa ntsombano wolowo?
Siku Ro Sungula—Matsalwa Lama Huhuteriweke Ma Pfuna Ku Dyondzisa
Mutshama-xitulu wa ntsombano u va amukele hi mandla mambirhi lava teke entsombanweni, hi nkulumo leyi nge “Amukelani Vuleteri, N’wina Vadyondzisi Va Rito Ra Xikwembu.” Yesu Kreste u ve Mudyondzisi Lonkulu hileswi a dyondzeke eka Yehovha, ‘Muleteri Lonkulu.’ (Esaya 30:20; Matewu 19:16) Na hina loko hi lava ku endla nhluvuko tanihi vadyondzisi va Rito ra Xikwembu hi fanele hi dyondzisiwa hi Yehovha.
Endzhaku ku landzele nkulumo leyi nge “Ku Dyondzisa Hi Ta Mfumo Swi Tswala Mihandzu Leyinene.” Ku endliwe mimbulavurisano ni vadyondzisi va Rito ra Xikwembu lava nga ni ntokoto leswaku ku kandziyisiwa ntsako swin’we ni mikateko ya ku endla vanhu vadyondzisiwa.
Ku landzele nkulumo leyi khutazaka leyi nge “Ku Khutaziwa Hi ‘Swilo Leswikulu Ngopfu Swa Xikwembu.’” Eka lembe-xidzana ro sungula, “swilo leswikulu ngopfu” leswi katsaka Mfumo wa Xikwembu swi susumetele vanhu ku teka goza. (Mintirho 2:11) Na hina hi nga susumetela vanhu leswaku va teka goza hi ku twarisa “swilo leswikulu ngopfu” swo tanihi tidyondzo ta le Matsalweni leti vulavulaka hi nkutsulo, ku pfuxiwa ka vafi ni ntwanano lowuntshwa.
Nkulumo leyi landzelaka yi khutaze hinkwavo ku “Tsakela Vululami Bya Yehovha.” (Pisalema 35:27) Hi pfuniwa ku endla swilo swo lulama hi ku dyondza ku rhandza swilo swo lulama ni ku venga leswo biha, hi ku dyondza Bibele, hi ku lwisana swinene ni minkucetelo leyi nga ni khombo hi tlhelo ra moya na hi ku hlakulela moya wa ku titsongahata. Magoza wolawo ma ta hi sirhelela eka vanghana vo biha, eka vonelo ra misava hi swilo leswi vonakaka ni le ka vuhungasi lebyi thyakeke ni lebyi nga ni madzolonga.
Nkulumo-nkulu leyi a yi ku, “Ku Hlomisiwa Hi Ku Helela Tanihi Vadyondzisi Va Rito Ra Xikwembu,” yi hi tsundzuxile leswaku Yehovha u hi endla vatirheli vakwe lava fanelekaka hi ku tirhisa Rito rakwe, moya wakwe lowo kwetsima ni nhlengeletano yakwe ya laha misaveni. Xivulavuri xi hi tsundzuxile malunghana ni ku tirhisa Rito ra Xikwembu: “Pakani ya hina i ku endla leswaku rungula ra Bibele ri hanya naswona hi ri dzikisa etimbilwini ta vayingiseri va hina.”
Nkulumo yo sungula yo siyerisana entsombanweni a yi ri ni nhloko-mhaka leyi nge, “A Hi Tidyondziseni Loko Hi Ri Karhi Hi Dyondzisa Van’wana.” Xiyenge xo sungula xi kandziyise leswaku hi fanele hi hanya hi ku landza mimpimanyeto ya mahanyelo ya Vukreste leyi tlakukeke leyi hi yi dyondzisaka van’wana. Xiyenge lexi landzelaka xi hi tsundzuxe ku ‘tamela rito ra ntiyiso khwatsi.’ (2 Timotiya 2:15) Leswaku hi tidyondzisa i swa nkoka leswaku hi va ni dyondzo ya munhu hi xiyexe ya Bibele ya nkarhi na nkarhi, ku nga khathariseki leswaku se hi ni nkarhi wo tanihi kwihi hi tirhela Xikwembu. Xiyenge xo hetelela xa nkulumo leyi yo siyerisana xi kombise leswaku Diyavulosi u tshama a ri karhi a lava ndlela yo endla leswaku hi va ni moya wa ku tikukumuxa, ku tilawula, vutianakanyi, mona, mavondzo, ku kariha, xikhomela ni ku xopa-xopa swihoxo. Hambiswiritano, loko hi kaneta Diyavulosi hi matimba, u ta hi balekela. Hi fanele hi namarhela Xikwembu swinene leswaku hi kanetana na yena.—Yakobo 4:7, 8.
Nkulumo leyi fikeke hi nkarhi leyi nge “Papalata Ntungu Wa Misava Wa Swilo Swo Navetisa Rimbewu” yi hi kombe ndlela yo lwisana ni ntungu wolowo wo biha, lowu nga ni khombo eka vumoya bya hina. Muprofeta Habakuku u vule leswi landzelaka malunghana na Yehovha: “Mahlo ya wena ma tengile swinene, ku va ma vona leswo biha; naswona a wu swi koti ku languta leswi karhataka.” (Habakuku 1:13) Hi fanele hi ‘nyenya leswo homboloka.’ (Varhoma 12:9) Vatswari va tsundzuxiwe ku lawula ndlela leyi vana va yi tirhisaka ha yona Internet, ni leswi va swi langutaka eka thelevhixini. Xivulavuri xi vule leswaku lava va tikumaka va kokiwe hi swilo swo navetisa rimbewu va fanele va kombela ku pfuniwa hi munghana la vupfeke emoyeni. Nakambe swi nga pfuna ku anakanyisisa u tlhela u ma tiva hi mbilu matsalwa yo tanihi Pisalema 97:10; Matewu 5:28; 1 Vakorinto 9:27; Vaefesa 5:3, 12; Vakolosa 3:5; na 1 Vatesalonika 4:4, 5.
Nkulumo leyi landzeleke leyi nge, “Ku Rhula Ka Xikwembu A Ku Mi Sirhelele,” yi hi chavelerile hi xitiyisekiso xa leswaku loko hi tshikileriwe hi ku vilela, hi nga hoxa ndzhwalo wa hina eka Yehovha. (Pisalema 55:22) Loko hi phofula leswi nga etimbilwini ta hina hi xikhongelo, Yehovha u ta hi nyika “ku rhula ka Xikwembu,” ku nga ku rhula loku hi ku kumaka hi ku va ni vuxaka lebyinene na yena.—Vafilipiya 4:6, 7.
Siku ro sungula ri gimete hi ndlela yo tsakisa swinene loko ku nyikeriwa nkulumo leyi nge “Yehovha U Vangamisa Vanhu Vakwe Hi Ku Vonakala,” leyi yi hlamuseleke ku hetiseka ka Esaya ndzima 60. Exikarhi ka munyama lowu nga kona emisaveni, “vanhu vambe”—ku nga ntshungu lowukulu lowu andzaka wa vanhu lava fanaka ni tinyimpfu—va tsakela ku vonakala ka Yehovha, swin’we ni Vakreste lava totiweke. Loko xivulavuri xi vulavula hi tindzimana 19 na 20, xi te: “Yehovha a nge ‘peli’ ku fana ni dyambu kumbe a ‘nyamalala’ ku fana ni n’weti. U ta hambeta a sasekisa vanhu va yena hi ku va voningela. Mawaku xitiyisekiso lexi tsakisaka lexi hi nyikiwaka xona tanihi leswi hi hanyaka emasikwini ya makumu ya misava leyi yi nga ni munyama!” Loko xivulavuri xi gimeta nkulumo xi tivise ku humesiwa ka buku leyi nge Vuprofeta Bya Esaya—I Rivoningo Eka Vanhu Hinkwavo, Vholumo Ya Vumbirhi. Xana se u yi hlaye u yi heta buku leyi?
Siku Ra Vumbirhi—Vana La Fanelekaka Kahle Ku Dyondzisa Van’wana
Endzhaku ko kambisisa ndzimana ya siku ra vumbirhi ra ntsombano, hi yingiserisise nkulumo ya vumbirhi yo siyerisana entsombanweni leyi nge, “Vatirheli Lava Pfunaka Van’wana Leswaku Va Va Vapfumeri.” Swivulavuri swa nkulumo leyi yo siyerisana ya swiyenge swinharhu swi kandziyise magoza manharhu lama katsekaka eku pfuneni ka vanhu leswaku va va vapfumeri—ku twarisa rungula ra Mfumo, ku hlakulela ku tsakela loku kumiweke ni ku dyondzisa vanhu lava tsakelaka ku yingisa leswi Kreste a leriseke swona. Hi ku pfuniwa hi mimbulavurisano ni minkombiso, hi swi kotile ku yi vona kahle ndlela leyi hi nga dyondzisaka van’wana ha yona leswaku va va vadyondzisiwa.
Nkulumo leyi landzelaka a yi ri ni nhloko-mhaka leyi nge “Eku Tiyiseleni Ka N’wina Engetelani Ku Tinyiketela Loku Nga Ni Vukwembu.” Xivulavuri xi kombise leswaku lexi nga xa nkoka eka hinkwaswo i ku ‘tiyisela ka hina ku fika emakumu.’ (Matewu 24:13) Hi fanele hi tirhisa malunghiselelo hinkwawo lawa Xikwembu xi hi nyikeke wona—xikhongelo, dyondzo ya munhu hi xiyexe, minhlangano ni vutirheli—leswaku hi ta hlakulela moya wa ku tinyiketela loku nga ni vukwembu. Hi fanele hi sivela ku navela ka misava ni mintirho ya kona leswaku swi nga hi kavanyeti kumbe swi onha ku tinyiketela ka hina ka vukwembu.
Xana vanhu lava tirhaka hi matimba ni lava tikeriwaka va nga phyuphyisiwa hi ndlela yihi? Nkulumo leyi nge “Ku Kuma Mianakanyo Leyi Phyuphyeke eHansi Ka Joko Ra Kreste” yi hlamule xivutiso xolexo. Yesu hi tintswalo u khutaze valandzeri va yena leswaku va va ehansi ka joko ra yena va tlhela va dyondza eka yena. (Matewu 11:28-30) Hi nga va ehansi ka joko ra Yesu hi ku xi landzelela swinene xikombiso xa yena xa ku hanya vutomi byo olova ni lebyi ringaniseriweke. Tinhla-nkulu ta nkulumo leyi ti kandziyisiwe hi ku vulavurisana ni lava va oloviseke vutomi bya vona.
Mhaka yin’wana yo hlawuleka ya tinhlengeletano letikulu ta Timbhoni ta Yehovha i ku khuvuriwa ka malandza lama ha ku tinyiketelaka eka Xikwembu. Makwerhu loyi a a nyikela nkulumo leyi nge “Nkhuvulo Wu Yisa Eka Malunghelo Lamakulu Ya Ku Dyondzisa” u hoyozele lava yaka eku khuvuriweni kutani a va rhamba leswaku na vona va hlanganyela eka malunghelo lamakulu ya ntirho. Vadyondzisi va Rito ra Xikwembu lava ha ku khuvuriwaka lava fikelelaka timfanelo ta Matsalwa va nga kuma vutihlamuleri byo hambana-hambana evandlheni.
Nkulumo yo sungula ya ndzhenga wolowo a yi ku “Tekelela Mudyondzisi Lonkulu.” Yesu u hete nkarhi wo leha etilweni a xiyisisa Tata wa yena ni ku n’wi tekelela, xisweswo a va Mudyondzisi Lonkulu. Loko a ha ri emisaveni u tirhise maendlelo lamanene ya ku dyondzisa, yo tanihi swivutiso leswi khumbaka mianakanyo ni swifaniso swo olova kambe leswi twisisekaka. Yesu u sekele dyondzo ya yena eRitweni ra Xikwembu naswona u vulavule hi ku hiseka, hi rirhandzu ni hi ku tiyiseka. Xana a hi susumetelekanga ku tekelela Mudyondzisi Lonkulu?
Nkulumo yin’wana leyi tsakisaka leyi nge, “Xana Wa Swi Rhandza Ku Pfuna Van’wana?” yi hi khutaze ku tekelela xikombiso xa Yesu xa ku pfuna vanhu van’wana. (Yohane 13:12-15) Xivulavuri xi va khutaze hi ku kongoma vavanuna lava fanelekaka leswaku va fana na Timotiya hi ku tshama va lunghekele ku pfuna van’wana. (Vafilipiya 2:20, 21) Vatswari va khutaziwe ku tekelela Elkana na Hana eku pfuneni ka vana va vona leswaku va tivekela pakani ya ku nghenela vutirheli bya nkarhi hinkwawo. Naswona vantshwa va tsundzuxiwe ku tekelela xikombiso xa Yesu Kreste ni xa Timotiya lontsongo hi ku tinyikela swi huma embilwini. (1 Petro 2:21) Hi tlhele hi khumbiwa hi marito ya lava va pfuneke van’wana.
Nhloko-mhaka ya nkulumo ya vunharhu yo siyerisana a yi ku, “Vuyeriwa Hi Xitalo Eka Dyondzo Ya Swa Le Tilweni.” Xivulavuri xo sungula xi kandziyise nkoka wa ku dzikisa mianakanyo ya hina emhakeni yo karhi. Leswaku hi endla sweswo, hi nga sungula hi dyondzo ya munhu hi xiyexe yo koma kutani hi ringeta ku yi lehisa. Xi tlhele xi khutaza vayingiseri leswaku va pfula matsalwa va tlhela va tsala tinhla hi nkarhi wa minhlangano. Xivulavuri xa vumbirhi xi hi tsundzuxe hi xilaveko xa ku namarhela “ntila wa marito lama nga ni rihanyo.” (2 Timotiya 1:13, 14) Leswaku hi tisirhelela eka rungula leri thyakeke leri nga eka swihaxa-mahungu, tifilosofi ta vanhu, vuxopaxopi bya matsalwa ni tidyondzo ta vagwinehi, hi fanele hi tixavela nkarhi wa dyondzo ya munhu hi xiyexe ni wa ku ya eminhlanganweni. (Vaefesa 5:15, 16) Xivulavuri xo hetelela eka nkulumo yo siyerisana xi kandziyise xilaveko xa ku endla swilo leswi hi swi dyondzaka leswaku hi ta vuyeriwa swinene eka dyondzo ya le tilweni.—Vafilipiya 4:9.
A hi tsake swinene loko hi twa nkulumo leyi nge “Malunghiselelo Lamantshwa Ya Ku Antswisa Timhaka Ta Hina Ta Moya”! Hi tsakile loko hi twa leswaku ku nga ri khale ku ta humesiwa buku leyintshwa leyi nge, Vuyeriwa Eka Vuleteri Bya Xikolo Xa Vutirheli Bya Le Tilweni. Loko xivulavuri xi hlamusela leswi nga endzeni ka yona hi rhiye ndleve swinene. Malunghana ni xiyenge xa buku leyi lexi nga ni tinhla to hlayanyana to tirhela eka tona, xivulavuri xi te: “Buku leyi yintshwa a yi tirhisi endlelo ra misava eku andlaleni ka tinhla leti ta 53 ta ku hlaya, ku vulavula ni ku dyondzisa lokunene. Endlelo ra yona ri sekeriwe eka misinya ya milawu ya Matsalwa.” Buku leyi yi ta kombisa ndlela leyi vaprofeta, Yesu ni vadyondzisiwa vakwe va wu kombiseke ha yona mukhuva lowunene wa ku dyondzisa. Ina, buku leyi ni nongonoko lowuntshwa wa Xikolo xa Vutirheli bya le Tilweni swi ta hi pfuna swinene leswaku hi va vadyondzisi lavanene va Rito ra Xikwembu.
Siku Ra Vunharhu—Mi Va Vadyondzisi Hikwalaho Ka Nkarhi
Endzhaku ko kambisisa ndzimana ya siku ro hetelela ra ntsombano, vayingiseri hinkwavo va rhiye ndleve swinene eka nkulumo yo hetelela yo siyerisana entsombanweni leyi nge, “Vuprofeta Bya Malakiya Byi Hi Pfuna Ku Lunghekela Siku Ra Yehovha.” Malakiya u profete endzhaku ka dzana ra malembe Vayuda va vuyile eBabilona. A va tlhele va khukhuriwa hi vugwinehi ni vuhomboloki, va nyamisa vito ra Yehovha hi ku honisa milawu yakwe yo lulama ni hi ku nyikela hi swiharhi leswi nga voniki, leswi lamaleke ni leswi vabyaka leswaku ku endliwa magandzelo hi swona. Ku tlula kwalaho, a va thala vavasati va vuntshwa bya vona, kumbexana leswaku va teka vavasati lava nga vahedeni.
Ndzima yo sungula ya vuprofeta bya Malakiya yi hi tiyisekisa leswaku Yehovha wa va rhandza vanhu vakwe. Yi kandziyisa xilaveko xa ku chava Xikwembu swinene swin’we ni ku tlangela swilo swo kwetsima. Yehovha u langutele leswaku hi n’wi nyika leswinene ngopfu, hi n’wi gandzela hi rirhandzu leri pfumalaka vutianakanyi. Ntirho wa hina wo kwetsima a wu fanelanga wu va wo hetisisa nawu ntsena, naswona hi fanele hi tihlamulela eka Xikwembu.
Loko xi kombisa ndlela leyi ndzima ya vumbirhi ya Malakiya yi tirhaka ha yona enkarhini wa hina, xivulavuri xa vumbirhi eka nkulumo yo siyerisana xi te: “Xana hina hi hexe ha tivonela leswaku ‘ku nga tshuki ku kumiwa leswi nga lulamangiki emilon’wini ya hina’?” (Malakiya 2:6) Lava va rhangelaka eku dyondziseni va fanele va tiyiseka leswaku leswi va swi vulaka swi sekeriwe hilaha ku heleleke eRitweni ra Xikwembu. Hi fanele hi venga vukanganyisi byo tanihi ku dlaya vukati swi nga fanelanga.—Malakiya 2:14-16.
Xivulavuri xo hetelela eka nkulumo leyi yo siyerisana xi hi pfune ku lunghekela siku ra Yehovha hi nhloko-mhaka leyi nge “I Mani A Nga Ta Pona Siku Ra Yehovha?” Xivulavuri xi te: “Malandza ya Yehovha ma chaveleriwa hakunene hi ku tiva leswaku Malakiya ndzima 3, ndzimana 17, yi hetiseka swinene eka wona! Yi ri: ‘Kunene va ta va va mina,’ Yehovha wa mavuthu u vurile, ‘esikwini leri ndzi humesaka ha rona ndzhaka yo hlawuleka. Ndzi ta va komba ntsetselelo, ku fana ni loko munhu a komba ntsetselelo eka n’wana wakwe loyi a n’wi tirhelaka.’”
Mhaka yin’wana ya ntsombano leyi tsakisaka a ku ri drama ya xikhale leyi a yi ri ni nhloko-mhaka leyi nge “Xixima Vulawuri Bya Yehovha,” leyi a yi vulavula hi vana va Kora. Hambileswi tata wa vona a xandzukeleke Muxe na Aroni, vona va tshame va tshembekile eka Yehovha ni le ka vayimeri va yena. Hambileswi Kora ni valandzeri va yena va lovisiweke, vana va Kora va ponile. Nkulumo leyi landzelaka leyi nge, “Titsongahatele Vulawuri Bya Xikwembu Hi Ku Tshembeka,” yi kombise ndlela leyi drama yi tirhaka ha yona eka un’wana ni un’wana wa hina. Xivulavuri xi tsundzuxe hi tinhla ta tsevu laha Kora ni valandzeri va yena va tsandzekeke kona: a va nga seketeli vulawuri bya Yehovha hi ku tshembeka; va pfumele ku fumiwa hi moya wa ku tikukumuxa, ku navela swikhundlha ni mavondzo; va xopa-xope ku nga hetiseki ka vanhu lava vekiweke hi Yehovha; va ve ni moya wa ku vilela; a va enerisiwanga hi malunghelo ya vona; naswona va rhandze mindyangu ya vona swinene ematshan’weni yo tshembeka eka Yehovha.
Nhloko-mhaka ya nkulumo ya le rivaleni a yi ku “I Vamani Lava Dyondzisaka Vanhu Va Matiko Hinkwawo Ntiyiso?” A ku nga vulavuriwi hi ntiyiso lowu tolovelekeke, kambe a ku vulavuriwa hi ntiyiso wa malunghana ni xikongomelo xa Yehovha lexi Yesu Kreste a nyikeleke vumbhoni eka xona. Xivulavuri xi hlamusele ntiyiso lowu fambisanaka ni tidyondzo, ntiyiso lowu khumbaka ndlela yo gandzela hi yona ni ntiyiso lowu fambisanaka ni ndlela leyi munhu a tikhomaka ha yona. Hi ku hlamuseriwa ndlela leyi xiyimo xa Vakreste va lembe-xidzana ro sungula xi yelanaka ha yona ni xa Timbhoni ta Yehovha namuntlha, ku khorwiseka ka hina ka leswaku ‘Xikwembu xi le xikarhi ka hina hakunene’ ku tiyisiwile swinene.—1 Vakorinto 14:25.
Endzhaku ka nkatsakanyo wa xihloko xa dyondzo ya Xihondzo xo Rindza ya vhiki rero, nkulumo leyi landzeleke leyi nge “Ku Hetisisa Ntirho Wa Hina Wo Chumayela Hi Xihatla” yi khumbe vadyondzisi hinkwavo lava a va ri kona va rito ra Xikwembu. Nkatsakanyo wo koma wa nongonoko wu kandziyise nkoka wa ku tirhisa Matsalwa loko hi dyondzisa, tindlela leti hi nga vaka vadyondzisi lava fanelekaka ha tona, ni xilaveko xa ku tiyiseka hi ntiyiso lowu hi wu dyondzisaka van’wana. Xivulavuri xi hi tsundzuxe leswaku hi endla ‘ku ya emahlweni ka hina ku vonaka’ naswona hi ‘nyikela nyingiso lowu hambetaka eka hina ni le ku dyondziseni ka hina.’—1 Timotiya 4:15, 16.
Mawaku nkhuvo wa swakudya swa moya lowu hi tiphineke ha wona eNtsombanweni wa Muganga wa “Vadyondzisi Va Rito Ra Xikwembu!” Onge hi nga tekelela Muleteri wa hina Lonkulu, Yehovha swin’we ni Mudyondzisi wa hina Lonkulu, Yesu Kreste eku dyondziseni ka van’wana rito ra Xikwembu.
[Bokisi/Swifaniso leswi nga eka tluka 28]
Minkandziyiso Leyintshwa Leyi Nga Ta Enerisa Swilaveko Swo Hlawuleka
Vanhu lava a va ri eNtsombanweni wa Muganga wa “Vadyondzisi Va Rito Ra Xikwembu” va amukele minkandziyiso yimbirhi leyi nga ta va pfuna swinene loko va dyondzisa vanhu va le matikweni yo karhi ya misava, ntiyiso wa Matsalwa. Xiphephana lexi nge Xana U Ni Moya Lowu Nga Fiki? xi ta pfuna swinene eku sunguleni ka mabulo ni vanhu lava tshamaka ematikweni lawa tindzimi ta kona ti nga kombisiki ku hambana exikarhi ka “moya-xiviri [soul]” ni “moya [spirit].” Xiphephana lexi lexintshwa xi swi kombisa kahle leswaku matimba ya moya ma hambanile ni xivumbiwa xa moya nileswaku loko vanhu va fa a va hundzuki swivumbiwa swa moya.
Broxara leyi nge A Satisfying Life—How to Attain It yi humesiwe emakumu ka siku ra vumbirhi ra ntsombano. Broxara leyi yi lunghiseleriwe leswaku ku sunguriwa tidyondzo ta Bibele ni vanhu lava va nga anakanyiki leswaku Muvumbi i munhu nileswaku ku ni buku leyi huhuteriweke hi Xikwembu. Xana se wa yi tirhisa minkandziyiso leyi yimbirhi ensin’wini ya ka n’wina?
[Swifaniso leswi nga eka tluka 26]
Le Milan, eItaly, ni le mintsombanweni yin’wana emisaveni hinkwayo, ku khuvuriwe madzana ya vanhu
[Xifaniso lexi nga eka tluka 29]
Vayingiseri va khumbiwe swinene hi drama leyi nge “Xixima Vulawuri Bya Yehovha”