Xana Wa Swi Tirhisa Leswi U Swi Dyondzeke eNtsombanweni Wa Muganga Wa “Vadyondzisi Va Rito Ra Xikwembu”?
1 Un’wana ni un’wana la veke kona entsombanweni wa muganga wa 2001/2002, u swi vonile leswaku vanhu va Yehovha va tiyimiserile ku hetisisa xileriso xa vona xa ku va vadyondzisi va Rito ra Xikwembu. (Mat. 28:19, 20) Leswi se u tlheleleke ekaya, hi tihi tinhla leti dyondzisaka, leti hi ku kongoma u tiyimiseleke ku ti tirhisa evuton’wini bya wena ni le nsin’wini?
2 Matsalwa Lama Huhuteriweke Ma Pfuna Ku Dyondzisa: Nhloko-mhaka ya siku ro sungula yi kandziyise 2 Timotiya 3:16. Nkulumo-nkulu yi kombise leswaku loko hi ta ‘Hlomisiwa Hi Ku Helela Tanihi Vadyondzisi Va Rito Ra Xikwembu,’ hi fanele ku ri xixima swinene, hi ri teka ri ri ra nkoka ku tlula mavonelo wahi ni wahi ya vanhu kumbe ndhavuko naswona hi ri tirhisa minkarhi hinkwayo. Nakambe hi fanele ku khongelela moya lowo kwetsima siku ni siku leswaku wu hi pfuna evutirhelini bya hina, hi tlhela hi lwela ku hlakulela mbhandzu wa wona wo sungula—ku nga rirhandzu. Naswona hi fanele ku pfumelela nhlengeletano ya Yehovha ya la misaveni, yi hi letela ku va vatirheli hi minhlangano hinkwayo ya vandlha.
3 Nxaxamelo wa Ravuntlhanu lowu nge, “A Hi Tidyondziseni Loko Hi Ri Karhi Hi Dyondzisa Van’wana,” wu hlamusele leswaku hi fanele ku va xikombiso lexinene (1) hi ku namarhela milawu ya Xikwembu emahanyelweni ya hina hinkwawo ya Vukreste, (2) hi ku gingiritekela ku dyondza (3) ni hi ku herisa mimboyamelo leyi Diyavulosi a nga hi phasaka ha yona etimbilwini ni le mianakanyweni ya hina. Endzhaku ka sweswo hi dyondze tindlela leti tirhaka ta ku sirhelela mindyangu ya hina eka ntungu wa misava wa swilo swo navetisa rimbewu. Vatswari va khutaziwe ku veka xikombiso lexinene hi ku va va nga swi languti nikatsongo swifaniso swa rimbewu ni ku hoxa tihlo eka vana va vona loko va ri karhi va tirhisa Internet niloko va hlalela thelevhixini. Hi tihi tinhla ta nongonoko wa Ravuntlhanu leti u sunguleke ku ti tirhisa?
4 Nkulumo yo gimeta ya siku yi tiyise ku tiyimisela ka hina ku rhandza rivoningo ra Yehovha, ku namarhela vatotiwa lava tshembekeke va Xikwembu ni ku kondletela ku rhula ka vanhu va Yehovha. Xana se u sungurile ku hlaya buku leyintshwa leyi nge Vuprofeta Bya Esaya—I Rivoningo Eka Vanhu Hinkwavo II?
5 Ku Faneleka Kahle Ku Dyondzisa Van’wana: Nhloko-mhaka ya siku ra vumbirhi a yi sekeriwe eka 2 Timotiya 2:2. Loko u ri karhi u yingisele nxaxamelo hi Mugqivela nimixo, xana u swi xiyile swiringanyeto swa ndlela leyi (1) u nga lavisisaka vanhu lava fanelekaka, (2) u nga hlakulelaka ku tsakela ka vona (3) ni ku va dyondzisa hinkwaswo leswi Kreste a swi leriseke? Xana wa swi tirhisa leswi u swi dyondzeke—ku kombisa vini va miti hambi ko va yinhla yin’we leyi humaka eMatsalweni leswaku u veka xisekelo xa riendzo leri landzelaka?
6 Nongonoko wa nindzhenga wu kandziyise nkoka wa ku tekelela Mudyondzisi Lonkulu, ku nga Yesu. Hi tihi tindlela leti u tiyimiseleke ku n’wi tekelela ha tona? Eka leswi u swi dyondzeke enxaxamelweni wa vumbirhi wa siku, xana u vona leswaku hi yihi ndlela leyi u nga ‘Vuyeriwaka Hi Xitalo Ha Yona Eka Dyondzo Ya Swa Le Tilweni?’ Hi swihi swiringanyeto leswi u swi tirhiseke leswaku u antswisa vuswikoti bya wena bya ku yingisela hi vukheta loko u ri karhi u dyondza hi wexe niloko u ri eminhlanganweni ya vandlha?
7 Handle ko kanakana, buku leyi nga ta humesiwa ku nga ri khale leyi nge, Vuyeriwa Eka Vuleteri Bya Xikolo Xa Vutirheli Bya Le Tilweni, yi ta hi pfuna leswaku hi antswisa vuswikoti bya hina bya ku va swivulavuri ni vadyondzisi va Rito ra Xikwembu. Ku ta yisiwa nyingiso lowukulu eka timfanelo to dyondzisa leti hlawulekiseke malandza yo tshembeka ya Xikwembu ya le minkarhini ya Bibele. Dyondzo ha yin’we ebukwini leyi leyintshwa yi ni mabokisi lama tameleke rungula leri swi kombisaka hi ku kongoma leswi hi faneleke ku swi endla, leswaku ha yini swi ri swa nkoka ni ndlela leyi hi nga swi endlaka ha yona. Ku katsiwe ni switoloveto leswi tirhaka. Vamakwerhu va xisati va ta va ni mahlelelo ya tinkulumo ya 29, lawa va nga ta hlawula eka wona loko va nyikela tinkulumo ta vona. Hi ku famba ka nkarhi, ku cinca loku boxiweke ku ta tivisiwa eka xiyimiso xa xikolo. Xana u ni xiyimiso lexinene xo dyondza ni ku lunghiselela, leswaku u ta vuyeriwa hi xitalo eka Xikolo xa Vutirheli bya le Tilweni vhiki ni vhiki?
8 Mi Va Vadyondzisi Hikwalaho Ka Nkarhi: Vaheveru 5:12 yi endle leswaku vayingiseri va langutela leswi siku ra Sonto ri va khomeleke swona. Nxaxamelo wa nimixo lowu nge “Vuprofeta Bya Malakiya Byi Hi Pfuna Ku Lunghekela Siku Ra Yehovha,” wu hi khutaze ku endlela Xikwembu hinkwaswo leswi hi nga swi kotaka ni ku venga mixaka hinkwayo ya vukanganyisi leswaku hi ta pona esikwini lerikulu ni leri chavisekaka ra Yehovha. Drama leyi nga ni nhloko-mhaka leyi nge, “Xixima Vulawuri Bya Yehovha,” yi yi kandziyise swinene ndlela leyi ku tikurisa, ku navela ku va ni ndhuma, mavondzo ni ku khomelela eka leswi hoxeke swi yiseke Kora wa khale ni vanghana vakwe leswaku va xandzukela Yehovha hi ku kongoma. Nkulumo leyi landzelaka drama yi kombetele eka xilaveko xa namuntlha xa ku titsongahatela vulawuri bya Xikwembu endyangwini ni le vandlheni. Nkulumo ya le rivaleni leyi nge “I Va Mani Lava Dyondzisaka Vanhu Va Matiko Hinkwawo Ntiyiso?,” yi nyike vumbhoni bya leswaku Timbhoni ta Yehovha hi tona ti endlaka tano, nileswaku ti hambanile ni Vujagana, lebyi tivulaka leswaku byi dyondzisa ntiyiso wa Bibele.
9 Swi le rivaleni leswaku Yehovha u hi letela hinkwerhu leswaku hi va vadyondzisi vo antswa va Rito rakwe. A hi tirhiseni leswi hi swi dyondzeke, ‘hi nyikela nyingiso lowu hambetaka eka hina ni le ka leswi hi swi dyondzisaka leswaku hi ta tiponisa swin’we ni lava va hi yingisaka.’—1 Tim. 4:16.