Wa Amukeriwa eNtsombanweni Wa Muganga Wa “Vadyondzisi Va Rito Ra Xikwembu”!
VANHU VA TIMILIYONI VA TA VA KONA entsombanweni lowu etindhawini ta madzana emisaveni hinkwayo. EAfrika Dzonga ntsena, ku hleriwe mintsombano ya 50. Ntsombano wo sungula wu ta khomiwa hi November 23-25 naswona wo hetelela wu ta khomiwa hi January 4-6, 2002. Swi nga ha endleka wun’wana wa mintsombano leyi ya masiku manharhu—ku sukela hi Ravuntlhanu ku ya eka Sonto—wu ta va wu ri endhawini leyi nga riki ekule ni laha u tshamaka kona.
Etindhawini to tala, nongonoko wu ta sungula hi risimu hi 9:30 nimixo. Nkulumo yo hoyozela hi Ravuntlhanu yi ta landzeriwa hi tinkulumo leti nga ni tinhloko-mhaka ta Bibele leti nge “Ku Dyondzisa Hi Ta Mfumo Swi Tswala Mihandzu Leyinene,” “Ku Khutaziwa Hi ‘Swilo Leswikulu Ngopfu Swa Xikwembu,’” ni leyi nge “Tsakela Vululami Bya Yehovha.” Xiyimiso xa nimixo xi ta gimeta hi nkulumo-nkulu leyi nge, “Ku Hlomisiwa Hi Ku Helela Tanihi Vadyondzisi Va Rito Ra Xikwembu.”
Nkulumo yo sungula ya nindzhenga leyi nge “Ku Basisiwa Leswaku Hi Va Vanhu Lava Endlaka Mintirho Leyinene,” yi ta landzeriwa hi tinkulumo tinharhu ta nxaxamelo leti nga ni nhloko-mhaka leyi nge “A Hi Tidyondziseni Loko Hi Ri Karhi Hi Dyondzisa Van’wana.” Leyi yi ta kandziyisa nkoka wa ku hanya hi leswi munhu a swi dyondzisaka emhakeni ya mahanyelo, dyondzo ya munhu hi xiyexe ya Bibele ni xilaveko xo bakanya matshalatshala ya Diyavulosi ya ku hi hambukisa. Ku ta landzela nkulumo leyi nge “Nyenya Khombo Ra Swilo Swo Navetisa Rimbewu.” Kutani nongonoko wa siku wu ta gimeta hi nkulumo leyi nga ta bula hi Esaya ndzima 60, leyi nga ni nhloko-mhaka leyi nge “Yehovha U Vangamisa Vanhu Vakwe Hi Ku Vonakala.”
Tinkulumo ta Mugqivela leti nge “Ku Kuma Mianakanyo Leyi Phyuphyeke Ehansi Ka Joko Ra Kreste,” “Tekelela Mudyondzisi Lonkulu,” ni leyi nge “Xana Wa Swi Rhandza Ku Pfuna Van’wana?” ti ta bula hi xilaveko xa ku landzela xikombiso xa Kreste. Hi Mugqivela ku ta nyikeriwa tinkulumo ta nxaxamelo leti nga ta teka tiawara timbirhi, leti nga ni nhloko-mhaka leyi nge “Vatirheli Lava Pfunaka Van’wana Leswaku Va Va Vapfumeri” ni leyi nge “Vuyeriwa Hi Xitalo Eka Dyondzo Ya Swa Le Tilweni.” Tinkulumo ta nxaxamelo ta nimixo ti ta nyikela swiringanyeto malunghana ni ku endla vadyondzisiwa, naswona tinkulumo ta nindzhenga ti ta kandziyisa tindlela leti ha tona hi nga vuyeriwaka hi xitalo edyondzweni ya Bibele ni hi ku ya eminhlanganweni ya Vukreste. Nongonoko wa nimixo wu ta gimeta hi nkulumo ya nkhuvulo, endzhaku ka yona ku ta va ni nkarhi wa leswaku vanhu lava fanelekaka va khuvuriwa. Vo tala va ta va va langutele ku yingisela nkulumo yo gimeta ya Mugqivela nimadyambu leyi nge, “Malunghiselelo Lamantshwa Lama Nga Ta Hi Pfuna Leswaku Hi Endla Nhluvuko Hi Tlhelo Ra Moya.”
Nongonoko wa hi Sonto wu ta katsa tinkulumo ta nxaxamelo tinharhu leti bulaka hi buku ya Malakiya ni leti nga ta kombisa kahle ndlela leyi yi tirhaka ha yona exiyin’weni xa hina namuntlha. Nxaxamelo lowu wu ta landzeriwa hi drama ya nkarhi wa khale leyi vulavulaka hi ku xandzuka ka Kora, Dathani na Abirama, loko va xandzukela vulawuri lebyi Muxe a nyikiweke byona hi Xikwembu. Endzhaku ka sweswo, ku ta landzela nkulumo leyi nga ta kandziyisa rungula leri tameriweke hi drama leyi. Nongonoko wa nindzhenga wu ta va ni nkulumo ya le rivaleni leyi nga ni nhloko-mhaka leyi nge “I Vamani Lava Dyondzisaka Matiko Hinkwawo Ntiyiso?”
Kunene, u ta fuwa hi tlhelo ra moya hi ku va kona masiku manharhu hinkwawo. Leswaku u kuma tindhawu leti wu nga ta khomeriwa eka tona ekusuhi ni laha u tshamaka kona, vutisa eHolweni ya Mfumo ya Timbhoni ta Yehovha ekusuhi ni laha u tshamaka kona kumbe u tsalela vakandziyisi va magazini lowu.