Wa Rhambiwa eNtsombanweni Wa Muganga Wa “Vachumayeri Va Mfumo Lava Hisekaka”

EAFRIKA DZONGA ntsena, ku hleriwe leswaku ku va ni mintsombano ya 42. Ntsombano wo sungula wu ta khomiwa hi November 22-24, naswona wo hetelela wu ta va eku heleni ka December. Wun’wana wa mintsombano leyi swi nga endleka wu khomiwa endhawini leyi nga ekusuhi na wena naswona hi ntolovelo wu khomiwa ku sukela hi Ravuntlhanu ku ya fika hi Sonto.

Etindhawini to tala, nongonoko wu ta sungula hi vuyimbeleri hi awara ya kaye nimixo. Hi siku ro sungula, nkulumo yo hoyozela yi ta landzeriwa hi yin’wana leyi eka yona ku nga ta va ku buriwa ni vachumayeri va Mfumo. Kutani, endzhaku ka nkulumo leyi nge “Kuma Ntsako Lowu Heleleke Eka Yehovha” ni leyi nge “Kombisani Moya Wa Ku Nkhensa,” nongonoko wa nimixo wu ta gimeta hi nkulumo-nkulu leyi nge, “Vachumayeri Va Mfumo Va Tirha Hi Ku Hiseka.”

Nongonoko wa Ravuntlhanu nindzhenga wu ta katsa ni tinkulumo tinharhu ta nxaxamelo leti nga ni xihloko lexi nge “Vuprofeta Bya Mikiya Bya Hi Tiyisa Leswaku Hi Famba Hi Vito Ra Yehovha,” swin’we ni nkulumo leyi nge “Tshama U Tengile eMahanyelweni Hi Ku Hlayisa Mbilu Ya Wena” ni leyi nge “Papalata Vuxisi.” Eka nkulumo yo gimeta leyi nge “Gandzela Xikwembu Xi Ri Xin’we Xa Ntiyiso,” hi ta pfuniwa swinene malunghana ni vutirheli bya Vukreste.

Nongonoko wa Mugqivela nimixo wu ta katsa nxanxamelo wa tinkulumo tinharhu leti nga ta tlhuvutsa nhloko-mhaka leyi nge “Vachumayeri Va Mfumo Lava Vangamisaka Vutirheli Bya Vona.” Wu ta tlhandlamiwa hi tinkulumo leti khutazaka yin’wana yi ta va ni xihloko lexi nge “Xivangelo Xa Ku ‘Khongela Minkarhi Hinkwayo’” ni lexi nge “Ku Vulavula Hi Timhaka Ta Moya Swa Aka.” Nongonoko wa nimixo wu ta gimeta hi nkulumo ya ku tinyiketela ni nkhuvulo, endzhaku ka yona, lava va fanelekaka va ta khuvuriwa.

Nongonoko wa Mugqivela nindzhenga wu ta va ni tinkulumo tinharhu to hetelela ta nxaxamelo, leti nga ta tlhuvutsa nhloko-mhaka leyi nge, “Ku Tiya Ka Ripfumelo Ra Hina Ku Ringiwa Hi Miringo Yo Hambana-hambana.” Tinkulumo leti ti ta pfuna Vakreste leswaku va ngheneleli etimhakeni ta misava. Nongonoko wa Mugqivela wu ta gimeta hi nkulumo leyi hi nga taka hi nga yi rivali, nkulumo yo tsakisa leyi nge “Tshinela Eka Yehovha.”

Nongonoko wa Sonto nimixo wu ta yisa nyingiso wo hlawuleka eka vantshwa, wu ta sungula hi nkulumo leyi nge “Xana Wa N’wi Tshemba Yehovha?” ni leyi nge “Vantshwa—Kunguhatani Vumundzuku Bya N’wina Hi Ku Fambisana Ni Nhlengeletano Ya Yehovha.” Eka nkulumo leyi ya vumbirhi, ku ta buriwa ni vantshwa hi timinete ta 20. Endzhaku ka sweswo ku ta landzela drama leyi vulavulaka hi Yeremiya, loyi loko a hlawuriwa ku va muprofeta a vuleke a ku, “ndza ha ri mufana.” (Yeremiya 1:6) Kutani ku ta landzela nkulumo leyi nga ta kandziyisa drama leyi. Nongonoko wa nindzhenga wu ta va ni nkulumo ya le rivaleni leyi nge, “Xiyimo Xa Misava Leyi Xa Hundzuka.”

Kunene u ta akeka emoyeni hi ku va kona masiku manharhu. Leswaku u tiva lomu ntsombano wu nga ta khomeriwa kona ekusuhi ni laha u tshamaka kona, famba u ya vutisa eHolweni ya Mfumo ya Timbhoni ta Yehovha leyi nga ekusuhi ni laha u tshamaka kona kumbe u tsalela vakandziyisi va magazini lowu.