A Wu Nge Swi Lavi Ku Wu Kayela!

U KAYELA yini? Ntsombano wa Muganga wa “Vaendli Va Rito Ra Xikwembu” wa Timbhoni ta Yehovha! Ntlhandlamano lowu wa mintsombano, leyi sunguleke hi May eUnited States, wu ta khomeriwa eka madzana ya madoroba emisaveni hinkwayo ku ringana tin’hweti to hlayanyana. Etindhawini to tala, nongonoko wu ta sungula hi Ravuntlhanu nimixo hi 9:30 hi vuyimbeleri byo pfula nongonoko.

Endzhaku ko pfula hi xikhutazo xo yingisa leswi Rito ra Xikwembu ri swi vulaka, nongonoko wa nimixo wu ta ya emahlweni hi nkulumo leyi nge “Tsakisisa Hikwalaho Ka Vunene Hinkwabyo Bya Yehovha” ni leyi nge “Hambeta U Yima U Tiyile Onge Hiloko U Vona Loyi A Nga Vonakiki.” Kutani nongonoko wa nimixo wu ta gimeta hi nkulumo-nkulu leyi nge, “Dzunisani Yehovha—Muendli Wa Swilo Swo Hlamarisa.”

Nkulumo yo sungula ya nindzhenga leyi nge, “Mi Nga Karhali Eku Endleni Ka Leswinene,” yi ta landzeriwa hi nxaxamelo wa tinkulumo tinharhu leti vulavulaka hi ndlela yo hlawula munhu loyi u nga ta tekana na yena, ku aka mindyangu leyi tiyeke ni ku dyondzisa vana ku rhandza Yehovha. Nkulumo yo hetelela ya siku yi ri, “Ku Fambisana Ni Nhlengeletano Ya Yehovha,” yi ta pfuxeta ku twisisa swikongomelo swa Xikwembu loku yaka emahlweni eminkarhini ya manguva lawa.

Nongonoko wa Mugqivela nimixo wu ta va ni nxaxamelo wa tinkulumo tinharhu leti nge “Vachumayeri Va Rito Ra Xikwembu.” Tinkulumo leti ti ta nyikela swiringanyeto swa ndlela yo endla ntirho wa hina wa ku endla vadyondzisiwa. Kutani ku ta landzela nkulumo leyi phyuphyisaka leyi nge “Ku Papalata Ku Khomisa Xikwembu Tingana.” Endzhaku ka yona, ku ta landzela nkulumo ya nkhuvulo, ku ta va ku ri nkarhi wa ku khuvuriwa ka lava va fanelekaka.

Nindzhenga, nxaxamelo wa vunharhu lowu nga ni tinkulumo tinharhu wu ta kandziyisa xihloko lexi nge “Tikarhatele Ku Hlakulela Vumoya,” eka tona ku ta nyikeriwa swiringanyeto leswi tirhaka swa ku hlakulela vumoya. Xiyimiso xi ta gimeta hi nkulumo leyi phyuphyisaka leyi nge “Ku Landzelela Ku Vonakala Loku Yaka eMahlweni Ka Rito Ra Xikwembu.” Yi ta bula hi Esaya ndzima 25 na 26, nileswaku hi nga yi twisisa njhani buku leyi yo tsakisa ya Bibele.

Hi Sonto nimixo ku ta va ni nxaxamelo wo hetelela wa tinkulumo tinharhu leti nga ni xihloko lexi nge “Vuprofeta Bya Sofaniya Lebyi Nga Ni Xikongomelo Eka Lava Endlaka Ku Rhandza Ka Xikwembu.” Ti ta kombisa leswaku vuprofeta byebyo byi tirhe njhani eminkarhini ya khale eka tiko ra Yuda ni ndlela leyi byi tirhaka ha yona esikwini ra hina, ngopfu-ngopfu eka vukhongeri bya misava. Endzhaku ka yona u ta tsakela drama ya le minkarhini ya khale leyi nga ni nhloko-mhaka leyi nge “Swikombiso Leswi Xalamukisaka eNkarhini Wa Hina,” leyi vulavulaka hi vavanuna va Vaisrayele lava tikhomeke hi ndlela yo biha emahlweninyana ko va Vaisrayele va nghena eTikweni ra Xitshembiso. Nkulumo yo hlawuleka ya nongonoko wo hetelela hi Sonto nindzhenga ku ta va nkulumo ya le rivaleni leyi nge, “Xivangelo Lexi Endlaka Leswaku Hi Yisa Nyingiso Eka Mintirho Ya Xikwembu Leyi Hlamarisaka.”

Endla malunghiselelo sweswi ya ku va kona masiku lawa manharhu hinkwawo. Leswaku u tiva lomu wu nga ta khomeriwa kona ekusuhi ni laha u tshamaka kona, vutisa eHolweni ya Mfumo ya Timbhoni ta Yehovha ya ndhawu ya ka n’wina kumbe u tsalela vakandziyisi va magazini lowu.