Tanani Eka Ntsombano Wa Muganga Wa “Ku Pfumela eRitweni Ra Xikwembu”!
VANHU va timiliyoni to tala va ta va va ri kona eka madzana ya tindhawu emisaveni hinkwayo. EAfrika Dzonga mintsombano yi hleleriwe n’hweti ya December. Kumbexana wun’wana wa mintsombano leyi ya masiku manharhu—Ravuntlhanu ku fika hi Sonto—wu ta va edoroba-nkulu leri nga riki ekule ni le kaya ka wena.
U ta vuyeriwa eka ndzetelo lowunene wa Bibele. Etindhawini to tala nongonoko wu ta sungula hi vuyimbeleri mixo wun’wana ni wun’wana hi 9:30. Ravuntlhanu ni mixo ri ta va ri ri ni mimbulavurisano ya timinete ta 25 ni vanhu lava vutomi bya vona byi khumbiweke swinene hi ripfumelo ra vona eRitweni ra Xikwembu. Xiyenge xexo xo sungula xi ta gimeta hi nkulumo-nkulu leyi nge, “Ku Famba Hi Ripfumelo, Ku Nga Ri Hi Ku Vona.”
Nkulumo yo sungula hi Ravuntlhanu nindzhenga yi ta vulavula hi xiphemu xa nkoka lexi vantshwa va nga na xona evandlheni ra Vukreste. Nkulumo ya nxaxamelo leyi nga ta landzela yi ta vulavula hi mimpimanyeto ya Bibele tanihi leswi yi fambisanaka ni swiendlo swa Vukreste eku vulavuleni, mahanyelo ni ndlela leyi munhu a tilunghisaka ha yona. Nkulumo leyi nga ta landzela leyi nge “Tivonele eMhakeni Yo Pfumala Ripfumelo” ni leyi nge “Rito Ra Xikwembu Ra Hanya” ti ta kombetela eka ndzayo leyinene leyi nga eka Vaheveru ndzima 3 na 4. Nongonoko wa Ravuntlhanu wu ta gimeta hi nkulumo leyi nge “Buku Ya Vanhu Hinkwavo.”
Nkulumo yo sungula hi Mugqivela ni mixo hi leyi nge “Ripfumelo Handle Ka Mintirho Ri File.” Nkulumo yin’wana ya nkoka mixo wolowo, hi leyi nge “Ku Dzima Timitsu Ni Ku Tiya eNtiyisweni,” yi ta hlamusela ndlela leyi ku kula hi tlhelo ra moya ku nga endliwaka ha yona. Nongonoko wu ta gimeta hi xiendlakalo lexi tolovelekeke xa ntsombano, “Ku Pfumela eRitweni Ra Xikwembu Swi Yisa Eku Khuvuriweni,” laha endzhaku ku nga ta va ni lunghiselelo ra vadyondzisiwa lavantshwa lava nga ta khuvuriwa.
Nkulumo yo sungula hi Mugqivela nindzhenga leyi nge, “Lwela Ripfumelo Hi Matimba Hinkwawo,” yi ta vulavula hi ndzayo ya buku ya Bibele ya Yuda. Nkulumo ya nxaxamelo leyi leheke ku ringana awara leyi nge “A Hi Yeni Ndlwini Ya Yehovha” yi ta vulavula hi vuyelo bya minhlangano ya Vukreste. Nongonoko wa siku rolero wu ta gimeta hi nkulumo leyi nge “Ku Tiya Ka Ripfumelo Ra Wena—Ka Ringiwa Sweswi.”
Nongonoko wa hi Sonto ni mixo wu ta va ni nkulumo ya nxaxamelo wa swiphemu swinharhu leyi nga ta vulavula hi buku ya Bibele ya Yuwele, ku katsa ni ndlela leyi yi tirhaka ha yona esikwini ra hina. Kutani ku landzela drama ya Bibele leyi nge “Hlayisa Tihlo Ra Wena Ri Ri Rinene.” Yinhla-nkulu ya ntsombano i nkulumo ya le rivaleni ya nindzhenga leyi nge, “Ripfumelo Ni Vumundzuku Bya Wena.”
Hakunene u ta fuwisiwa hi tlhelo ra moya hi ku va kona. U ta amukeriwa hi mandla mambirhi eka nongonoko wun’wana ni wun’wana. Endla malunghiselelo sweswi leswaku u va kona. Endhawini leyi nga ekusuhi ni le kaya ra wena, vutisa eHolweni ya Mfumo ya Timbhoni ta Yehovha kumbe u tsalela vakandziyisi va magazini lowu.