Ntsombano Wa “Ku Hanya Hi Ndlela Ya Xikwembu” Wa 1998-1999 Wu Tshinele!

LAHA Afrika Dzonga, ku hleriwe mintsombano etindhawini ta 21 to hambana-hambana hi December na January. Kumbexana wun’wana wa mintsombano leyi ya masiku manharhu wu ta khomeriwa edorobeni ra le kusuhi ni le kaya ka wena. Etindhawini to tala, nongonoko wu ta sungula—ku sukela hi Ravuntlhanu ku ya fika hi Sonto—hi vuyimbeleri siku rin’wana ni rin’wana hi 9:30 ni mixo.

Nongonoko wa Ravuntlhanu ni mixo wu ta kandziyisa swiviko swa nhluvuko wa ku chumayela Mfumo etindhawini to hambana-hambana ta misava. Naswona nhloko-mhaka ya ntsombano yi ta kandziyisiwa hi nkulumo-nkulu leyi nge, “Nkutsulo Wa Kreste—Ndlela Ya Xikwembu Yo Ponisa.”

Nindzhenga nxaxamelo lowu nge, “Vatswari—Dyondzisani Vana Va N’wina Ndlela Ya Xikwembu,” wu ta nyikela swiringanyeto swa ndlela yo khutaza vana ku rhandza ni ku tirhela Yehovha. Nongonoko wa nindzhenga wu ta gimeta hi nkulumo leyi nge, “Xana Ku Ni Vutomi eNdzhaku Ka Rifu?”

Nongonoko wa Mugqivela nimixo wu ta kandziyisa ntirho wo endla vadyondzisiwa wa Timbhoni ta Yehovha hi tinkulumo tinharhu leti landzelelanaka leti nge, “Ku Pfuna Vanhu Va Ta Endleleni Ya Vutomi,” “Ntlhontlho Wa Ku Fikelela Vanhu” na “Ku Dyondzisa Vadyondzisiwa Hinkwaswo Leswi Kreste A Swi Leriseke.” Emakumu ka nongonoko wa nimixo, ku ta va ni lunghiselelo ra ku khuvuriwa ka vadyondzisiwa lavantshwa.

Nkulumo yo sungula hi Mugqivela nindzhenga leyi nge, “Ku Tirha Hi Ri Ni Xikongomelo Xa Vutomi Lebyi Nga Heriki,” yi ta hi khutaza ku anakanyisisa hi vuenti eka swivangelo swa hina swo tirhela Xikwembu. Tinkulumo leti nge, “Ku Tlangela ‘Tinyiko Leti Nga Vavanuna’ Lava Dyondzisaka Ndlela Ya Xikwembu” na “Vumunhu—Hluvulani Lebya Khale Mi Ambala Lebyintshwa” ti nyikela nkambisiso lowu voningelaka wa ndzimana hi ndzimana wa Vaefesa ndzima 4. Ku ta landzela xitsundzuxo lexinene xa Matsalwa lexi nga ta nyikeriwa hi nkulumo leyi nge “Tihlayise U Nga Ri Na Xivati Xa Misava” na hi nxaxamelo wa tinkulumo tinharhu lowu nge “Vantshwa—Landzelani Ndlela Ya Xikwembu.” Nongonoko wa nindzhenga wu ta gimeta hi nkulumo leyi nge “Muvumbi—Vumunhu Bya Yena Ni Tindlela Ta Yena.”

Nongonoko wa nimixo hi Sonto wu ta nyikela nxaxamelo wa tinkulumo tinharhu leti nga ta hlamusela tindzima to hetelela ta buku ya Bibele ya Ezekiyele swin’we ni ndlela leyi vuprofeta bya tona byi tirhaka ha yona. Lexi nga ta gimeta nongonoko wa nimixo ku ta va drama leyi nga ni swiambalo swa kona leyi sekeriweke eka vutshembeki bya vantshwa vanharhu va Vaheveru. Yinhla-nkulu ya ntsombano ni ndzhenga i nkulumo ya le rivaleni leyi nge, “Ndlela Leyi Nga Yona Ntsena Leyi Yaka eVuton’wini Lebyi Nga Heriki.”

Hakunene u ta fuwisiwa hi tlhelo ra moya hi ku va kona hi masiku lamanharhu. Wa amukeriwa ku va kona eka nongonoko wun’wana ni wun’wana, kavula laha wu nga ta khomiwa handle ko ku hakerisa. Leswaku u kuma ndhawu leyi nga kusuhi ni laha u tshamaka kona, vulavurisana ni vanhu va le Holweni ya Mfumo ya Timbhoni ta Yehovha ya le ndhawini ya ka n’wina, kumbe u tsalela vakandziyisi va magazini lowu.