Xana U Ta Va Kona?

◼ Xana u ta va kona eNtsombanweni wa Muganga wa Timbhoni ta Yehovha wa “Ku Yingisa Xikwembu”? Ku ta va ni mintsombano yo tala ya masiku manharhu leyi nga ta sungula eUnited States hi vhiki ro hetelela ra May, kutani yi khomiwa tin’hweti to hlayanyana leti nga ta landzela etindhawini to tala ta misava. Kumbexana wun’wana wu ta khomiwa endhawini ya le kusuhi ni laha u tshamaka kona.

Etindhawini to tala xiyimiso xi ta sungula hi 9:30 nimixo hi vuyimbeleri. Nhloko-mhaka ya Ravuntlhanu yi ta va yi ku “Yingisani Rito Ra Mina Kutani Ndzi Ta Va Xikwembu Xa N’wina.” (Yeremiya 7:23) Endzhaku ka tinkulumo ta nimixo leti nga ta va ni swihloko leswi nge “Hi Endliwe ‘Hi Ndlela Yo Hlamarisa’” ni leyi nge “Xivangelo Xa Leswaku Ntshembo Wa Ku Pfuxiwa Ka Vafi Wu Va Wa Xiviri Eka Wena,” xiyimiso xi ta gimeta hi nkulumo-nkulu leyi nge, “Landzela Xikombiso Lexi Hi Vekeriweke Xona Hi Loyi A Yingiseke Xikwembu.”

Xiyimiso xa Ravuntlhanu nindzhenga xi ta va ni tinkulumo leti nge “Hambeta U ‘Anakanya Swa Moya’ Kutani U Hanya,” “Tivonele Eka Muxaka Wun’wana Ni Wun’wana Wa Ku Navela” ni leyi nge “U Nga Landzeli ‘Timhaka Ta Mavunwa Leti Kunguhatiweke Hi Mano.’” Kutani nxaxamelo wa tinkulumo timbirhi wu ta kandziyisa tinhla-nkulu leti humaka etibukwini ta Bibele ta Hagayi na Zakariya. Nongonoko wa siku rero wu ta gimeta hi nkulumo leyi nge “Ku Xaniseka Hinkwako Ku Ta Hela Ku Nga Ri Khale!”

Nhloko-mhaka ya nongonoko wa Mugqivela yi ta va yi ku ‘Ku Yingisa Swi Suka eMbilwini’ ‘Eka Swilo Hinkwaswo,’ naswona yi ta va yi sekeriwe eka Varhoma 6:17 na 2 Vakorinto 2:9. Xiyimiso xa nimixo xi ta gimeta hi nxaxamelo wa tinkulumo tinharhu lowu nga ni xihloko lexi nge “Ya Tsaka Mindyangu Leyi Yingisaka Misinya Ya Milawu Ya Xikwembu.” Yi ta va yi ri ni minkombiso ni mimbulavurisano naswona yi ta hlamusela ndlela leyi swirho swa ndyangu—tatana, manana ni vana—va nga hoxaka xandla ha yona leswaku ndyangu wu tsaka. Nongonoko wa nimixo wu ta gimeta hi nkulumo leyi nge “Ina Wa N’wina A A Ve Ina” endzhaku ka sweswo ku ta khuvuriwa lava fanelekaka.

Tinkulumo ta Mugqivela nindzhenga ti ta katsa leyi nge “U Nga Pfumeleli Mahlo Ya Wena Ma Languta Swilo Leswi Nga Pfuniki Nchumu” ni leyi nge “Vuyela Eka Murisi Wa Moya-xiviri Wa Wena.” Endzhaku ku ta landzela nxaxamelo wa tinkulumo timbirhi leti nge “Yingisani Lava Rhangelaka.” Nkulumo yo gimeta ya nindzhenga yi ta va yi ri ni xihloko lexi nge “Xana Bibele Yi Dyondzisa Yini Hakunene?” a yi nge rivaleki eka ntsombano lowu.

Nongonoko wa Sonto nimixo wu ta tlhuvutsa nhloko-mhaka leyi nge “Yingisa Marito Lawa Hinkwawo . . . Leswaku Swi Ta Ku Fambela Kahle,” yi ta va yi sekeriwe eka Deteronoma 12:28. Nxaxamelo wa tinkulumo tinharhu lowu nga ni xihloko lexi nge “Pfuna Vanhu Leswaku Va Yingisa Leswi Bibele Yi Swi Dyondzisaka,” wu ta pfuna emhakeni yo sungula ni ku fambisa tidyondzo ta Bibele leti humelelaka.

Xiyimiso xa nimixo xi ta gimeta hi drama leyi nga ni xihloko lexi nge “Tikarhatele Ku Fikelela Tipakani Leti Kombisaka Ku Xixima Xikwembu.” Yi ta landzeriwa hi nkulumo leyi nge “Vantshwa—Xana Tipakani Ta N’wina Ti Ta Mi Pfuna Leswaku Swi Mi Fambela Kahle eVuton’wini?” Nkulumo leyi yi sekeriwe eka drama ya Bibele, leyi vulavulaka hi muntshwa Timotiya, loyi a vekeke xikombiso lexinene entirhweni wo tinyiketela, lexi vantshwa va manguva lawa va khutaziwaka ku xi tekelela. Xiyimiso xo hetelela xa ntsombano xa Sonto nindzhenga xi ta va ni nkulumo ya le rivaleni leyi nge, “Xana Hi Fanele Hi Yingisa Mani?”

Kunguhata ka ha ri sweswi leswaku u va kona. Leswaku u kuma ndhawu leyi nga ekusuhi ni laha u tshamaka kona, yana eHolweni ya Mfumo ya Timbhoni ta Yehovha ya le ndhawini ya ka n’wina kumbe u tsalela vakandziyisi va magazini lowu.